والله شعبنا الجميل احلي ما فيه النصاحه الزيادة والفهلوة . وذي ما كان واحد صحبي دايما بيقولي " العيل الناصح يفرح اهله " .
وهو ده بالضبط الي بنعيشه اليومين دول في بلدنا المحروس مصر .
اليوم وذي كل يوم قمت من النوم وسايب البي بي سي شغاله جنبي وخير اللهم اجعله خير وانا بين الصحيان والنوم سمعت طراطيش خبر مهم في مصر وقال ايه مجلس الشعب مقلوب والموضوع سامع فيه وزراء وسفراء ونواب وبلاوي سوداء .
طبعا قمت من النوم وركزت مفيش اقل من 20 د والخبر اتعاد تاني وده معناه ان الامر هام جدا ، ايه هو بقه الخبر الجامد ده ؟؟
قال ايه التلفزيون الصهيوني اذاع فيلم بيقول ان فرقة من الجيش الاسرائيلي بقياده وزير البنية التحتية ( الي هي تقريبا المية والصرف الصحي ) بنيمين بن الي عازر قتلت 250 جندي مصري في حرب 67. بس شوفتوا الخبر جامد اذاي ، وياعيني محمود المسلمي مذيع البي بي سي كان هيعيط من التاثر وكان في قمة الاثارة بسبب الخبر المعجزة الي بيذيعه وكانه بيذيع خبر وصول الصعيدة لسطح القمر أو وصول منتخب مصر للدور 158955 من كاس العالم .
الغريبة مكنش في تصرف مذيع البي بي سي لانه مش مصري فمعزور الغريبة كان في سلوك المصريين انفسهم فتقريبا كل الي علقوا عالخبر وكل الي كتبوا عنه في الصحف أتكلموا عن الخبر وكانهم اول مرة يعرفوه وياعيني كانت صدمتهم لا توصف والدموع كانت نازله من كلامهم مطر علي ضحايانا الابرياء ، ايه الفلاحه ده يا جدعان .
بقه بذمتكم فيه مصري علي وجه الكرة الارضية مش عارف ان اسارانا اتقتلوا في سيناء علي ايد اخس خلق الله وبالالاف ؟؟؟ بقه فيه مصري ملوش قريب ولا جار ولا صديق حارب في 67 أو 73 وحكاله عن ماسي الاسري المصرين والي لسه منهم لحاد دلوقت معتقلين جوه اسرائيل نفسها ؟؟ بلاش مفيش مصري اتفرج علي مسرحية سكة السلامة للنابغة محمد صبحي والي عملها مخصوص عشان يقول يا ناس يا هو فيه اسري لينا اتقتلوا في سيناء علي ايد الصهاينة ؟؟؟
ولا الظاهر ان المثقفين والمحللين السياسيين ونواب الشعب والنخبة في مصر صدقوا موضوع السلام وكامب ديفد والعلاقات المصرية الاسرائيلية والهبل ده كله . وياعيني الفيلم الكخه ده هز موضوع الاخواة والصداقه ده مع الكيان الصهيوني .
وطبعا الوطنية زنقت الكل والي بقه بينادي بمحكمة دولية والي طالب اللغاء اتفاقية السلام والي طالب بطرد السفير والي طالب بالثائر وكل واحد قال الي قدره عليه ربنا .
طب مدام الوطنية جامده كده عند الكل مشفناش ليه تحرك للعالم ده كلها في موضوع قتل جنود الامن المركزي كل كام شهر علي الحدود المصرية الفلسطينية علي ايد الصهاينة برده ؟؟ ولا الاسري كانوا مصرين وجنود الامن المركزي هنود ؟؟
عالاقل موضوع جنود الامن المركزي قريب ومتاكيدن منه بنسبة 700% وفيه شهود والموضوع مثبت حتي بشهاده الجانب الصهيوني الي دايما بيعتذر وربنا يخلية رئيسنا الوطني قوي بيقبل الاعتذار وبياخد رئيس وزرائهم المعتذر بالاحضان في شرم الشيخ - يارب تولع بيهم هما الاتنين - .
للناس الي نسيوا دم الثلاثة جنود المصرين الي استشهدوا في نوغمبر 2004 بقذيفة دبابة واستشهاد جنديين مصريين في شهر 6 عام 2006 والي جه بعده بايام اللقاء الاخوي بين اولمرت ومبارك في شرم الشيخ .
ياريت قبل ما نتشملل ونقعد نعيط علي اسرانا الي ماتوا من زمن بعيد قوي نفكر في الي موجودين دلوقت عالاقل هما اولي وده ميمنعش طبعا اننا ناخد حقهم من ولاد ال .... الصهاينة .
وقبل ما انسي احب افكركم بالصورة الجميلة ده قبل ما التار ولا العار يمكن نفهم حق اسرانا لازم نرجعه من مين الاول
انه كان أولى من الكلام حوالين أسرانا و قتلانا و شهداءنا ، نتكلم عن أرضنا اللي لسة تحت الاحتلال و الصهاينة داخلين خارجين زي ما تكون أرض اللي جابوهم و شوية يطلعوا يقولولنا لا احنا اللي بنينا السد العالي و الأهرامات و أي هبل .
و في النهاية مات الملك عاش الملك .... سؤال بيطرح نفسه :
هو لسة السياسة الخارجية تحت القيادة الحكيمة لسيادة الريس لسة فعالة و شغالة والناس بتحترمه عشان هو اللي مانع عننا الحرب يا عيني أصله مش عارفة ازاي يمكن عشان هو صاحب الضربة الجوية ، و كأن لا فيه شهداء و لا فيه محاربين تانيين غيره و لا أي حاجة؟
سارة نور الدين
كتبت
قتلت 250 جندي اسرائيلي
والصحيح
مصرى
الاستاذ احمد عبد الفتاح
حميل اسلوبك الشيق وكلماتك المعبرة بالعامية المصرية
في مدونتي كاريكاتير جديد (الفيتو الامريكي) في انتظار زيارتكة
انا سمعت عن موضوع الشريط من اصحابى بس ما حاولتش أركز
بس لما قرأت استغربت جدا
هل وصل بينا الفضى لعرض مشاكل من 40 سنة طب نخلينا فى الى احنا فيه
والا هما كدبوا على نفسهم كدبة السلام وصدقوها
عموما انصحهم وافكرهم بمثل
(صاحب بالين كذاب ) خليكوا ببال واحد وفكروا فى مشاكل الواقع المرير الى زهقنا منه وفاض بينا الكيل
اخرها احتجاج قصاد نقابة الصحفيين ويمسك عبد القدوس ميكرفون و بكري ميكرفون ويهتفوا ضد العدو الغاشم
ولا نقابة المحامين حتولعها نار و تعمل مؤنمر شجب و تحط مكبرات الصوت بره
و عاشور والاخوان يزايدوا علي بعض في الوطنية-اصل الانتخابات قربت-
وبعد كل ده ايه اللي حيجري..........صفر......وصفر حلو كده وكبير من بتاع المونديال
هل حيسمح للناس انها تعمل مظاهرات تنديد
طبعا لا طب هل يسمح لهم بالاعتصام اما السفارة الاسرائلية أهم بقعدوا في الشمس شوية............أكيد لا طبعا
حتي المحكمة الدولية-واللي متابع حيفهم- لو رحنلها حتعترف بالمذبحة- مثل مذبحة سيبرنيتشا لمسلمي كوسوف- وبعد كده تبرأ الجناةثم فيه سؤال هف علي دماغي تفتكروا ليه اسرائيل ازاعت الشؤيط في الوقت ده؟؟؟
رأيي أنه نوع من الرد علي ما قيل امه جاسوس -نوع من اخراج اللسان لمصر يعني-
طب تفتكروا لما استدعوا السفير الاسرائيلي في مصر قالوا له ايه؟
انتم بتستهبلوا انتم و تلفزينكم..مش تتزاع الحاجات ده بعد الزيارة......شعبي يقول علي ايه!!!!!!!!!!!!!!!!!
نعمل ايه....زنفضل ننفخ في القربة المقطوعة لغاية منقدر نغيرها.......لك الله يا مصر
اللهم ارحم كرامتنا واجعل مثواها الجنة اللي مش حيورد الكلاب عليها
ملحوظة يا عم احمد متزعلش عشان حتة الاخوان بس هي ده الحقيقة كما أراها