الثلاثاء، 30 أكتوبر 2007

وكمان خبر الدستور ليه بقيه؟؟!! مبروك الدستور غلب المصري في الهجص

تحديث
التعليق ده جالي عالبوست الي فات
بيقول صاحبه
هههههههه
مش عارف اقول ايه؟
بس لما قريت الخبر ده
فعلا فطست علي نفسي من الضحك
يا راجل ده لما الخبر بتاعنا نزل غسلتوا بكرامه اهلنا الارض

فين بقي التدوينات اللوزعيه عن منعم

الواضح ان الفرق مش كبير بينهم وبينكم
احمد رجب
صاحب الخبر الاول اللي اتشتم واتهم بالعماله للامن
واللي واحد من اصدقائكم اسمه مجدي عمل فيه حركة قليلة الادب


ولاحمد رجب احب اقول
والله ما عارف اقول لك ايه
بس واضح ان حتي في الكتابة عن الاخوان ينطبق المثل القائل الي ملوش ظهر بيضرب علي بطنه
يارب تكون فهمتني

------------------------------------------------------------------------
صدق او لا تصدق
هتشه الدستور بتاعه امبارح عن مدوني الاخوان واول اول امبارح ليها بقيه النهرده
وبكده تبقي هتشه علي 3 اجزاء
النهرده بقه كان الجزء الاكثر مسخره
لان امبارح كان الخبر بيتكلم عن دعوه لمدوني الاخوان للجماعه بتقليد الوطني ومقلش الخبر في ايه ومجبش سيرة
وقلنا خلاص الديسك بيهزر عادي متعودين عليها من المصري والدستور وساعات البديل
محصلش حاجه
لكن الجزء التالت بتاع النهرده كان فيه الصاعقة والي المفروض هو جزء من خبر امبارح وقع في الديسك
بيقول الخبر ان صاحب مدونة يالالالي طالب بانتخابات قاعدية ذي بتاعه الوطني.
نقطة ومن اول السطر
سمعني كده تاني
صاحب مدونة ايه يا عم الجورنان ؟
وقال ايه ؟
ده والله اعلم قصده انا
تقريبا فعلا
اه انا بشبه عالاسم ده
بقه صاحب مدونة يالالالي قال انتخابات قاعديه ذي الوطني ؟
طب بزمتك وردت ده فين ؟
والله ما عارف الاخوه الصحفين بقه بيسمعوا منين بالضبط
وعالعموم عشان يمكن هو اتلخبط ولخبط ورق موتمر الحزب الوطني بورق لقاء المدونين احب اوضح له النقطة تاني
النقطة اثارها احد المدونين عن مشاركة الشباب من الاخوان في السياسة
وهنا ادخلت في النقاش وقلت ان الشباب المفروض يبقوا اكثر مشاركة سياسية وطلب د\ مرسي عرض مقترحات عملية
واقترحت انا ان الشباب لازم يبقي ليهم راي اكثر في بعض الشخصيات التي تمثلهم ذي امناء الاتحادات الطلابية سواء الحرة او العادية التي ترشح باسم الجماعه
يعني تتعمل انتخابات جوه الجماعه وبين شبابها حولين مرشحيهم
والموضوع يكبر ونعمل انتخابات لمرشحبي مجلس الشعب
ومجبتش ابدا سيرة وطني ولا اوطان ولا اي وطن علي لساني
ومش عارف والله الاخ الصحفي اللوزعي جابها منين
طيب وما المستفاد من الخبر ؟
يمكن المستفاد قلته في البوست الي فات بس هزود عليه هنا شويه حاجات
اولها : ان بقه واضح جدا ان فيه في مصر مصطح هيظهر اسمه صحفي اخوان متخصص شوون الاخوان يعني , ومرهوش شغلانه غيرهم وده مش وحش
بس الوحش انه لما ميلاقيش حاجه يكتبها يكتب عن اي حاجه والسلام
تاني حاجه بقه واضح ان مفيش فرق يذكر بين المصري والدستور
الاتنين ضريبه اخبار
بس يمكن الفرق الوحيد ان المصري اكثر مهنية في الحبكة الصحفية والاسلوب الصحفي واللغة والشكل والمراجعه والكلام الفني ده
ويارب بقه نسمع صوت اخواننا الي قعدوا ينتقدوا المصري لما نشر تمرد مدوني الاخوان هيقولوا ايه المره ده وان مكنتش مستني كتير منهم لان الدستور بالعربي كده مفيش عالحجر غيره - ويارب كل واحد يفسر الجملة ده بالي يحبه -
ثالثا وده الاهم بقه والي بجد قربت اتشل بسببه
ان لسه مفيش حد عارف يكتب اسم مدونتي صح
يا جماعه والله اسمها يالالاللي مش يالالالي
اتنين لام قبل الياء الاخيرة
ويارب بقه تتعلموا
في النهاية احب انشر هنا حاجه
هو ميل وصلني من صديق عزيز
بيقول فيه مذكرني بقول الامام الشهيد حين البنا
أيها الشباب ميدانكم الاول انفسكم ، فإذا انتصرت عليها كنت على غيرها أقدر ، وإذا أخفقتم فى جهادها فأنتم عما سواها أعجز . فجربوا الكفاح معها اولا ، واذكروا أن الدنيا جميعا تترقب جيلا من الشباب الممتاز بالطهر الكامل والخلق القوى الفاضل ، فكونوا أنتم هذا الجيل ولا تيأس

الاثنين، 29 أكتوبر 2007

ايوه حضرت لقاء د\ مرسي

ابتدي منين ؟
الموضوع بجد كبير ومتشعب وهيدخلنا في مناطق مكنتش احب ادخل فيها
بس مش مهم ندخل واجرنا علي الله
الاول بدأت القصة بايميل من صديق بيقول الدكتور مرسي عايز يقعد مع مدوني الاخوان
يا نهار بالالوان ... الي كنت خايف منه ... الجماعه عايزه تربي مدوني الاخوان
طب والحل ؟
اجريت اتصالاتي علي اعلي مستوي - اعرفه يعني - وعرفت ان اللقاء ما هو الا دردشة د\ مرسي سمع عن العالم المدونين دول وعايز يقعد يدردش معاهم
اوك بيس يا مان - المان ده يعني الي هو الدكتور مرسي - نقعد احنا مبنخافش ونقعد مع فضيلة المرشد ومبنتهزش لاننا مبنعملش حاجه غلط او عيب- علي فكره ابن الدكتور مرسي مدون ومحضرش اللقاء -
المهم يوم اللقاء كنت رايح واذ بيا اطالع الجرنان اللوزعي الدستور
قال ايه واحد صحفي - المفروض انه مدعوا للقاء - كاتب ان اللقاء ده لحصار تمرد مدوني الاخوان
طااااااايب يا عم الصحفي خلينا وراك ونروح ونتاكد ونشوف وان كنت عارف كويس ان لا ده اسلوب الجماعه ولا اسلوب د\ مرسي بالذات لانه راجل سياسي بجد ولان اللقاء عرفت انه ليس مدعو له مدوني الاخوان بس بل كل الناس والدليل ان كان فيه صحفية من نفس الجرنان اللوزعي حاضرة اللقاء وهي طبعا مش اخوان بس لان اللقاء مكنش فيه اسرار كان مفتوح
اللقاء كان عادي جدا
بل عادي طحن
وتفاصيله العادية ممكن تطالعوها هنا عند شذا بلسانها الملتوف والي كانت حاضرة اللقاء
نيجي للمهم
اللقاء ده كشف امور منيلة بنيلة
بس للاسف الامور ده علي مستوي المدونين وليس الجماعه
اولا
احد المدونين والي ممكن نصنفه انه احد حملة لواء النقد الذاتي دعي للقاء ومش بالميل لا بالتليفون من حد كان المفترض انه منسق اللقاء - علي فكرة د\ مرسي مكنش هو الي منسق اللقاء ده كان حد من انصار مبدأ نوفق راسين في الحلال - وطلب منه الحضور الاخ الكريم قاله بالنص انا مش جاي طايب لحاد هنا وعادي لكن المصيبة انه قاله لو تحبوا تعلموا اللقاء ده كنتم المفروض تتصلوا بيا وانا الي احضر ليه واشوف مين الي يدعي ومين لا !!!!
لحاد هنا ونقطين وتلات علامات تعجب وفصلتين وشرطه كمان
السوال هو فيه ايه بالضبط ؟؟؟ وايه الصفة الي تضفي علي صاحبها هذا الحق ؟
اسيب ليكم الاجابة لاني مبحبش ازعل حد
بالطبع خبر الدستور الاول والتاني - الي طلع النهرده اثار الكثير من الشباب وضايقهم واولهم انا لانه خبط في كذا حاجه
اولا الخبرين اتكلموا بلغة زميل من المصري اليوم كان اتكلم زمان عن تمرد لمدوني الاخوان بالرغم من ان ده كلام ( هجايص ) والمفروض ان الاخ الصحفي ده احد من تصدوا لهذا الكلام وقت صدوره
وبلاش نتكلم في ثاينا وثالثا لان فيه كتير هيزعلوا
عالعموم انا سمعت تعليقات كتير جدا علي خبر الدستور كان احلاهم بالتاكيد تعليق سمعته من صديق عزيز جدا واخ اكبر لما قرا الخبر قالي
خبر الدستور : فيها لاخفيها
والحدق يفهم

الجمعة، 26 أكتوبر 2007

شاهد معنا بالصوت والصورة ما حدث في جامعه عين شمس

أعلم ان هناك الكثير من استطاع تصوير ما حدث بجامه عين شمس
ولكن هذه الافلم التي اعرضها هي ما وصلتني عن طريق احد الاصدقاء في الجامعه حول ما حصل
وهي الرد الامثل علي من اتهم طلاب الاخوان بانهم من تعدي علي الطلاب
شاهد معنا








الخميس، 25 أكتوبر 2007

ابن ذكي بدر مستنين منه ايه ... اتفرج يا سلام عليه وهو بيقوم بمهام عمله

سمعتوا الخبر
ابن ذكي بدر رئيس الجامعه الفاضل برتبة لواء ذي ابوه
كان امبارح بيقود بنفسه مليشيات البلطجية
ياسلام ... هما دول روساء الجامعات ولا بلاش
الست الغلبانه جتي استغربت وسالتني اذاي رئيس جامعه يعمل كده
وللست الغلبانه ولكل الغلابة في بلدانا اهدي اليهم هذا الفيلم الذي سبق ونشرته
ده اتصور للواء ابن ذكي بدر السنة الي فاتت ايام ما كان يادوب نائب رئيس جامعه
واتفرج ياسلام
وانتظروا الفيديو القادم


الثلاثاء، 23 أكتوبر 2007

والحلم اتحقق في الاوضة الزرقا


لو راودك حلم - في الزمن ده -
فده شئ رائع
ولو الحلم فوجئت بعد فترة طويلة ان حد تاني صاحبك بيحلم بنفس الحلم - علي اساس ان البلد ده فيها لسه 2 بيعرفوا يحلموا -
فده شئ فوق رائع
اما بقه ان الحلم ده يتحقق - علي اساس انه في الزمن ده والبلد ده وبالظروف ده ممكن احلام تتحقق -
فده الجمال ذاته
بس صدقوني ده الي حصل
انا حلمت وهو حلم وفوجئنا ان الحلم واحد
وحققنا الحلم
وعملنا الاوضة الزرقا
صدقوني الاحلام بتحقق في الاوضة الزرقا

الثلاثاء، 16 أكتوبر 2007

أشمعني انا مش هتكلم علي برنامج الحزب ؟

في الأيام الاخير سالني كثيرا اصدقائي من المتشيعون واليساريوون واليمينيون والليبراليوون والي ملهمش في البطيخ وحتي المتاخونون سوال واحد فقط الا وهو
هو ايه رايك يا واد يا استاذ احمد في برنامج حزب الاخوان ؟
وكان جوابي دائما " كحتين " دليلا علي اني هقول كلام سيسجل للتاريخ ثم كلمة " واللهيييييييييييييييييييييي هو جميل بس ليا عليه ملاحظات طفيفة " ثم اباغت محدثي " الا هو مطش الاهلي عمل ايه امبارح لاني مشوفتوش " وغالبا ما يكسفني الاهلي وميطلعش لعب امبارح
طوال الفترة الماضية تحاشيت ان اصرح ولو لاصدقائي عن رايي في برنامج الحزب لاسباب عدة اهمها انني لن اقرا النسخة كاملة الا من ايام فقط وكان بالنسبة لي من المستحيل ان ابني راي علي موضوع هام مثل ذلك من مجرد كلام سمعته ومقالات قرائتها .
ولكن وبعد طول انتظار وبعد ان زاد لكلام ووصل الي حد المهاترات والكلام لمجرد الكلام قررت ان افصح عما بداخلي ورزقي علي الله .
بداية أحب ان اووكد اواوضح واصرح ولابين واكشف النقاب عن سر خطير وهو انني لم اكن واضعي هذا البرنامج ولا من المفكرين فيه ولم ادخل في اي لجنة انبثقت عن اي لجنة اعدت اي شئ ذو علاقة بهذا البرنامج - ولو حتي غلاف البرنامج - ولم اكن حتي انا عامل البوفيه الذي اعد الشاي والقهوة للسادة الافاضل الذين اعدوا هذا البرنامج ولم يكن لي صفة من قريب او بعيد او حتي بالشبهة باعداد البرنامج - وبالمناسبة انا عمري ما دخلت مكتب الارشاد ولا يراودني هذا الحلم في القريب العاجل ولا البعيد الاجل - الا انني ادعي انني علي علاقة يسيره ببعض من خطوا هذا البرنامج وتحدثت معهم وحاورتهم وناورتهم ووقعتهم ساعات في الكلام من اجل الوصول الي القول الفصل في هذا البرنامج ، كما انني ساتحدث عن هذا البرنامج من منطلق اني الشاب الاخونجي الصغير السن والمقام الذي يجلس كل اسبوع في احد المنازل بالمنطقة التي يسكن بها مع 5 شباب في سنة واخر اكبر منهم قليلا ونسمي هذه الجلسة باسرتنا الاسبوعية .
اختصارا للوقت احب ان اقسم حديثي الي نقاط وهي

1
النقد اياه
اعترف ان ما دفعني للكلام في هذا الموضوع هو كثرة الحديث عنه والذي اري انه زاد عن حده ، لن اتشدق كغيري ممن يغنون صباح مساء بما اسموه النقد الذاتي - بالمناسبة المصري اليوم مرة اعتبرتني احد رواده - الا انني ساتحدث من منطلق ما تعلمته في الاخوان - ولا بلاش الاخوان - دعونا نتحدث في هذه النقطة من قبيل العيب الذي تعلمناه في مجتمعنا .
خرج علينا اناس كثير كل يحمل قلمه واحيانا كي بورده واحيانا اشياء اخري ينتقضون البرنامج وهو امر صحي وعندما ياتي النقض من داخل الاخوان فهو صحي ايضا ولكن ان ياتي النقد مجرحا فهو العيب نفسه .
لن اتحدث عن الاحاد الذين تحدثوا في الامر ولكني ساتحدث عن شخصين
الاول استاذي ومعلمي وكما اطلق عليه دائما الكشكول كناية علي سعة علمه واقصد هنا الدكتور عصام العريان فالدكتور عصام له مكانة في قلبي لم يصل اليها احد كثير من قيادات الاخوان وكم المني ان يصرح في اول يوم له خارج السجن انه "فوجئت مثل غيري بتعديل نقاط جوهرية في برنامج الحزب عمما أعددناه قبل السجن " وافضل ان لا اعلق علي هذا التصريح لاني لم اصل للمكاة التي اعلق فيها لي تصريح للدكتور العريان .
الموقف الثاني كان للدكتور عبد المنعم ابو الفتوح في صورة مقال له منع من النشر علي الموقع الرسمي للجماعه اخوان اون لاين ونشر في الصحف وبعد مطالعتي للمقال رايت انه كان مقالا رائعا نقد البرنامج في موضوعية وبشكل رزين واري ان الاخوان خسروا كثيرا بعدم نشره .

2
بطحة الاخوان
لنترك النقد قليلا ونتحدث عن صلب البرنامج
قلتها قبل ذلك كثيرا وتحديدا قلتها اول مرة منذ عام بالضبط في الملتقي الخاص بالمنظمة المصرية لحقوق الانسان والذي كان يعقد حول التعديلات الدستورية ففي احد الكلمات لي قلت مشكلة الاخوان ان علي راسهم بطحة ، بطحة الاخوان في الحقيقة عدة بطحات كالمراة والفن والاقباط والحدود ...... الخ .
فبمجرد ان تتحدث عن اي عمل سياسي للاخوان تجد من يخرج لك ليقول " الا ايه موقف لاخوان من المسرح والفن وعادل امام وبوسي وهل يوافق الاخوان ان يتولي ابو لهب رئاسة مصر ؟ "
وحتي ان لم يظهر هذا الشخص الفلتة تجد من يخرج من الاخوان انفسهم ليقول يجب ان نتحدث عن موقفنا عن كذا وكذا وكذا - المقصود بها البطحات طبعا - ولسان حاله يقول يجب ان نختلف حول هذه النقط مع الاخرين ونبهدل الدنيا .
هو سوال تاعبني حبتين اشمعني الاخوان نطلب منهم موقفهم من كل هذا والاخرين لا ؟
ازعم انني قرات كل برامج احزاب مصر المعروف منها وابو طربوش لم اجد برنامج يتحدث عن المسرح والفن بطريقة برنامج الاخوان ولا عن الولاية الكبري ولا الصغري ولا عن اي شئ مثل هذا . فكل البرامج تنص علي المواطنة والسلام ، اشمعني الاخوان مطلوب منهم تفصيل كل شئ ؟
اري صديق لي عارف نفسه يقول انني احرض الاخوان يضمرون نواياهم وارد عليه بالقول بالطبع لا ولكني اقصد ان نترك التفاصيل الصغيرة للغاية لوقتها لنتفق مع الجميع علي الاسس والتي اري انها واحده فقط الديموقراطية والتي تشمل المواطنة والدستور والقانون والبرلمان وكل شئ ولنترك الحكم في هذه المسائل للديموقراطية التي هي راي الشعب .
اعلم ان كلامي يحمل بعض الغموض لدي البعض ولكنني سافصله واوضحه بمثال قادم في النقطة التالية
3
متيجوا تعلمها من تركيا
دعوه اطلقتها بعد بعض اللقائات التي حضرتها حول تجربة العدالة والتنمية بتركيا ورايت ماذا فعلوا ليصلوا للسلطة بالرغم من انهم حزب اسلامي .
كلمة السر لفوز العدالة والتنمية انه تخلي عن بطحتة البس الاسلام ثوب العصر الائق به لم يخرج علينا احد جهابزة الحزب يقول تولي المسيحي حرام شرعا لان العقل يقول ان دولة 99% من شعبها مسلم مستحيل يراسه مسيحي ولم يخرج علينا المعي اخر يقول فالنقم الحدود صباح يوم تولينا السلطة ولا الي اخر هذا الكلام الي عارفينه كويس
العدالة والتنمية ترك الامر لشعبه الذي اشربه مبادئه فاخذ الشعب يقرر بما يريده الحزب
4
عن رايي في البرنامج بقه
انا طبعا رافض المادتين اياهم وشايف انهم لايصلحوا لبرنامج حزب اخواني للقرن العشرين ولكن لي اقتراح لم لا يدس الاخوان السم بالعسل
مثلا اهم النقاط التي ارفضها هيئة كبار علماء المسلمين والسبب قانوني قبل ان يكون مزاجي فالهئية سالفة الذكر ذكر البرنامج ان لها رقابة قبلية - اي قبل وضع المواد والقوانين واقراراها - مع العلم ان المحكمة الدستورية لما رقابة بعديه - اي بعد الوضع - ولا يجوز قانونا الجمع بين الرقابة القبيلة والبعدية - الدرس الجامد ده اداه ليا استاذ قانون دستوري - فلم لا يقترح الاخوان مثلا انشاء لجنة شريعه داخل المحكمة الدستورية تكقفل تنفيذ المادة 2 من الدستور ويادار ما دخلك شر ؟
علي هذا المنوال يمكن للاخوان حل كل مشاكلهم الصدامية مع البرنامج والمجتمع وصدقوني استاذ قانون دستوري يحل لكم الموضوع ده في قعده واحده .
5
اذكركم بقول البنا
لاحظت في الفترة الاخيرة اننا نسينا مقوله مهمه للبنا وهي ايها الاخوان نحن لسنا حزبا سياسيا ولا جمعية خيرية .
احترت فيما مضي في تفسير ذلك القول الا انني منذ ايام سرحت فيه فوجدت له تفسير اقنعني ويمكن تطبيقه علي زماننا الحالي وهو
ان عمل الحزب او الجمعية الاهلية او الموسسة الدعوية ... الخ هو جزء من عمل الاخوان لا مانع من ان ننشا حزب ولكن لا ننسي ما وجدنا من اجلة لا ننسي رسالتنا التي هي من اغلي
لا ننسي اننا كاخوان
الله غايتنا
الرسول قدوتنا
القران دسورنا
الجهاد سبيلنا
الموت في سبيل الله اسمي امانينا



الاثنين، 15 أكتوبر 2007

عذرا عبد الرحمن لتاخري .... وكلمتين عالماشي لناس عارفين نفسهم


انقطعت عن الشبكة العنكبوتية لفترة قصيرة بلغ عدة ايام بسبب عطب اصاب جهاز الكمبيوتر الخاص بي وبسبب بعض المشاكل التي اعتدت ان تصاحب الاعياد لدي ، وخلال فترة انقطاعي فوجئت برسالة علي هاتفي المحمول من احد الاصدقاء مساء اول ايام العيد تخبرني ان مدونا يدعي عبد الرحمن فارس صاحب مدنة لساني هو قلمي قد اعتقل، لم اكن سمعت بعد الرحمن قبل ذلك ولم اكن اعرفه ولا عرف مدونته ولا اعلم انتمائه السياسي ولا اي شئ عنه الا انني وعلي الفور بدات التحرك من منطلق انه انسان مقيد الحرية ويجب الدفاع عنه ، اتصلت بالزملاء في موقع ابناء مصر وبدانا في متابعة الاحداث والنشر لاعلم بعد ذلك انه جري عرضه علي النيابة واقررت النيابة اخلاء سبيله وتم تحويله الي مقر امن الدولة .
كل هذا الكلام اغلبنا يعرفه ولكن ما اريد التحدث عنه هو بعض النقاط
1
عندما اعتقل عبد الكريم نبيل سليمان ( الملحد علي حد وصفخه ) وعبد المنعم محمود ( الاخواني علي حد وصفه ) تضامنت انا ومجموعه كبيرة جدا من المدونين معهم وعندما كنت اسال كيف تتضامن مع ملحد واخواني وهما علي النقيض كنت اجيب بتلقائيه من اجل الحرية وعندما وقفت اتحدث امام احد الموتمرات داخل نقابة الصحفيين يوم اعتقال عبد المنعم محمود قلت انني لست احد اصدقاء منعم ولم اقابله سوي مرتين صدفة ولكنني اتضامن معه لانه بني ادم ومن حقه الحرية ولم يقترف ذنب يسجن من اجله وان احد اهم اسباب تضامني معه انيي قد اكون مكانه غدا فانا عندما ادفع عن حريته ادافع عن حريتي قبل حريته .
2
بالنسبة لمزاد الدفاع عن الحريات الذي افتتح منذ اعتقال عبد الرحمن والذي شوهدت ظواهره عبر رسائل التويتر والتدوينات التي اقل ما يقال عنها انها مستفزة احب ان اوكد علي شئ لا يوجد كيان قائم بذاته اسمه مدوني الاخوان واتحدي ان يقول اي انسان مثل هذه المقوله كما لا يوجد كيان لمدوني اليسار او العلمانين او غيرهم من التيارات فالتدوين كما اقول دائما فعل فردي بحت وتضامن المدونين مع بعضهم البعض هو نوع من انواع التضامن من اجل المبدا وليس من اجل التيارات فالدافع الذي يدفعني للتضامن مع عبد الرحمن غير الذي يدفعني للتضمن مع الشاطر علي سبيل المثال ولهذه الاسباب لا اجد محلا للاعراب لبعض الجمل التي استخدمت من قبيل " نحن اولي بعبد الرحمن منهم " او اين مدوني الاخوان " او هل يجب ان يكون عبد الرحمن في وزن عبد المنعم محمود اذكر اخواننا المدونين ان عبد المنعم نفسه لم يكن الشخص المشهور كما هو الان قبل اعتقاله .
3
كان عندي بعض الاسئلة كده عالماشي
هو لغاياة امتي هيبقي التضامن في عرف المدونين عبارة عن بانرات ؟ وما مدي الاستفادة من البانرات ؟
هل التضامن بالكلام ؟
اين رد فعلنا علي ارض الواقع ؟ وهل دورنا ينتهي عند الواقع الافتراضي ؟
احب افكر ناس كتير ان حملة التضامن مع منعم لم تاخذ المنحي الجدي ولم توثر الا عندما انتقلت للشارع سواء علي سلم النقابة او في جلسات عرضه علي النيابة او غيرها من الافعال التضامنية التي استخدمها المدونين علي ارض الواقع .

الخميس، 11 أكتوبر 2007

كل سنة وانتم طيبيييييييييييييييييييييين

العيد بعد بكره
والمفروض اكتب لكل الناس الي بتدخل هنا حاجة بالمناسبة ده
بس للاسف انا مش قادر اكتب اي شئ
ومش عارف ليه
بس وانا بقلب في دفاتري القديمة وجدت تدوينة
وبالاصح اول تدوينة كتبتها في حياتي
وكنت كتبتها اول يوم العيد الاضحي الي فات
حاسس انها معبرة جدا عن الي عايز اقوله النهرده
ياريت تقروها هنا
بس قبل ما تقروها اقروا الكلمتين دول والي قلتهم في نفس التدوينة
امبارح واحد اعرفه قالي ده مبدأ عندي لازم افرح رغم اي شئ وعلي فكره انا شايف ان ده سر حياة الشعب ده وغيره من الشعوب المحظوظه بحكم الروساء الملهمين امثال مبارك لها انهم عندهم مبدأ ولو كان المبدأ ده مبدأ واحد بس انهم يفرحوا رغم اي شئ. وكل سنة وانتم طيبيييييييييييييييييييييييييين
روحوا بقه شوفوا التدوينة
بس محدش يدعي عليا لو سمحتم

صرخات ... وثائقي عن التعذيب

تحية لابناء مصر
بل اكبر تحية لهم
بعد مجهود كبير ابناء مصر تنتج اول افلامها الوثائقيه عن التعذيب
بعنوان
صرخات






شاهد معنا
وشارك معنا
علي ابناء مصر

السبت، 6 أكتوبر 2007

عاجل القبض علي أحد الاشخاص من داخل استديوهات القناة الاولي علي الهواء

في حادث غريب ويعد الاول من نوعه تم قبل قليل وعلي الهواء مبارشرة علي القناة الاولي
اقتحم شخصيين يرتدون ملابس مدنية ليسالوا ضيف - لم اتمكن من تحديد هويته - والذي كان يتحدث عن انتصارات اكتوبر عن التصريح الذي حصل عليه للكلام بالتلفزيون واثناء محاولة الرجل اخراج حافظة نقوده من جيبه الخلفي قطع الارسال لتبدا اناشيد وطنية ثم نشرة الاخبار
ياتري مين الراجل وكان بيقول ايه ومين الي خدوه ؟

حمد لله عالسلامة يا كشكول


وحشتني وطولت الغيبة
بجد محتاجين لك اليومين دول
حمد لله عالسلامة يا كشكول

شارك مع اصدقائك

Share |