الجمعة، 27 أبريل 2007

شباب من اجل ................

لو كنت مشترك في جروب شباب من اجل التغيير عالنت كانت هتوصلك الرسالة ده

وصلني خبر من الزميل بهاء صابر بأن الصحفي عصام فضل موجود الان بقسم قصر النيل ولم يخبرني بأية تفاصيل
من لديه معلومات برجاء اخبارنا بها


وبعدها بساعه توصلك الرسالة ده

اسامه انت حد جميل زى كتير من الناس اللى بيهتمو بشؤن الغير
أشكرك انت وكل من اهتم بموضوع عصام فضل لأن هذا هو المنتظر والمتوقع من ولاد البلد الجدعان
واعتذر
عن عدم صحة الخبر
لأننى اكتشفت ان الناس اصبحت مريضه والفراغ يقتلها فأخذت تزايد على انفسها
بالمختصر المفيد
الأخ عصام فضل كان بيهرج
فالموضوع هو وصلتنى مكالمه من صديقه تخبرنى بأن عصام فى قسم قصر النيل ويريد من يذهب اليه وبالتالى بدأت اخبر الجميع وأهتمت الناس وتركوا اعمالهم وذهبوا يبحثو عن الأخ المختطف فى حين كان تليفون الأخ مغلق فهذا ما اثبت لى انه فى محنه وواجب علينا مساندته ولكن للأسف اكتشفت اليوم ان البيه ما كنش فى واعيه حين قام بالأتصال بالزملاء وانه قرر يخرج الجميع من الفراغ والأكتئاب فخسيء وانكر صلته بالموضوع ومن هنا
اكتشفت ان الموضوع ما هو الآ فانتازيا
من الأخ الفانتازى
أعتذارى للجميع على هذه الكومديا الرديئه والرخيصه
وتحياتى لك يا أسامه انت وكل من اهتموا
بهاء صابر



ولا تعليق

وراء الشمس

معا ننشر فيلم وراء الشمس للمبدعة هويدا طه
ننشره
لنعلن صرختنا للعالم باسره
لنتضامن مع هويدا طه
لنقولها عالية مدوية اننا لن نسكت علي ما يحدث لنا

أنشر بانر الفيلم

ويمكن مشاهده الحلقات علي الرابط
http://ensaa.blogspot.com/2007/04/blog-post_5577.html

شكر خاص لمدونة انسي علي المجهود المبذول

الأربعاء، 25 أبريل 2007

أخيرا الصور جت

أخيرا الصور جت لعرض منعم علي النيابة


الصورة نقلا عن ميت لاحد النشطاء مع مراسلين اجانب





أحد امهات المعتقلين ووالده


وفيديو لنفس العائلة المنكوبة



اليوم بعد......

اليوم بعد أن تم تجديد حبس عبد المنعم وطلاب معهد التعاون 15 يوم اخرين
اليوم بعد طَردنا من قبل الامن وهُجمنا وروعنا امام محكمة شبرا
اليوم بعد قيل لعامة الناس حتي يبتعدوا عن المحكمة ان الوزير قادم وان من يحكم بالداخل ارهابيين
اليوم بعد ان نجوت من الاعتقال بفضل الله ثم بمساندة بعض المراسلين الاجانب
اليوم بعد ان تم اعتقال اثنين من زملائي لمدة نصف ساعه لانهم حاولوا روية اخوانهم المرحلين
اليوم بعد ان منعنا حتي ومن لو مجرد النظر الي وجه عبد المنعم
اليوم بعد ان حشدت قوات امن شبرا كلها عن بكرة ابيها وضباط امن الدولة بمحافظة القيوبية كلها لمجرد ارهاب 20 مدون
اليوم بعد ان نزل احباب منعم الي الشارع يطالبون بحريته وبحرية كل صاحب راي
اليوم بعد ان جريت بسرعة لم اجري بها من قبل في حياتي لمجرد روية سيارة الترحيلات وهي تفر مسرعه عبر الشارع وارد هتاف الاحرار من المعتقلين بهتاف مثله لمجرد ان يشعروا اننا بجوارهم
اليوم بعد أعتقل مصور المصري اليوم من امام نيابة شبرا ، وتحرش بطاقم العاشرة مساءا وقناة الحوار لانهم كانوا يمارسون عملهم
اليوم بعد ان قال لي احد المراسلين الاجانب بعد ان راي كيف نتعامل مع الامن انكم لديكم خبرة لا مثيل لها فرددت عليه من يتعامل مع الامن المصري يكتسب الخبرة بسهوله ويصبح قائدا حربيا
اليوم بعد ان شعرت بمدي ضعف لغتي بعد ان تحدثت لاكثر من اربع ساعات متواصلة بالانجليزية المتواضعه التي اتحدث بها مع 5 مراسلين اجانب لاشرح لهم قضية اخي عبد المنعم
اليوم بعد ان اثلج صدري تواجد الاخوات المدونات ووقوفهم لاول مرة دون خوف امام جحافل الامن رغم صغر عددنا
اليوم بعد ان اغتيلت كالعاده حرية الراي واغتصبت علي قارعه الطريق ولكن هذه المرة علي قارعه الطريق في شبرا
اليوم بعد ان اجتمعت حركة شباب مصري ضد الاعتقال " مش هتاخد " علي قارعه الطريق لتقرر كيف ستتحرك في المستقبل
اليوم بعد ان صورت بكاميرات الاندال اعضاء مش هتاخد عشرات الصور ومبعتوش ليا ولا صورة احطها مع البوست وعشان كده قررت اشتري كاميرا باي طريقة
اليوم بعد ان فرحت حينا وبكيت حينا وسعدت حينا وحزنت حينا
اليوم بعد أن هزم الاهلي 4/0 ورجع 65 الف مصري منكسي الرؤؤس من استاد القاهره ، وبات 70 مليون مصري حزاني اما لهزيمة الاهلي او لهزيمة اخري لحقت بهم
اليوم وبعد كل هذا
يجب ان انااااااااااااااااااااااااااااااااااااام
لاني في قمة الارهاق



-----------------------------------------
هوامش
أحدهم سالني اليوم
لو كان الامام البنا حيا الان ماذا كان سيفعل معكم ؟
قلت كان سيخلع الطربوش والبدلة ويرتدي الجينز والكاجول ويقف بجوارنا حاملا مجسم القلم الرصاص معنا او لعله يتعلم التصوير ويستعير من احدنا كاميرا ديجيتال ويتسلق احدي العمارات السكنية ويصور من فوق سطحها كما نفعل نحن المدونون
والسبب بمنتهي البساطة ان الامام البنا صاحب فكر متجدد ويستوعب الاخر - الي هو احنا - وبس



الأحد، 22 أبريل 2007

مه احنا مش ارايل

بجد بقت حاجه تقرف
حاجه تبعث علي الغثيان ... حاجه تخلي الصنم يتحرك
الشاطر اتاخد ومعاه خيرة رجالة البلد وقلنا حصل خير نصبر ونحتسب ... كل يوم اعتقالات وضرب وسحل وانتهكات وقلنا وماله شوية وتتحل .... منعم اتاخد وقلنا كبوة وتعدي .... دار الخدمات النقابية تقفل لها فرع وراء التاني وقلنا وماله لسه الفرع الرئيسي .
لكن بجد الي بيحصل ده بقه فوق احتمال البشر
ولاننا مش ارايل ولااننا لسه رجاله ولاننا لسه فينا نخوه مش هنسكت
مش هنسكت علي خطف منعم ولا اعتقال شفاء الوطن ... مش هنسكت علي الذل ... مش هنسكت علي اي حاجه بعد كده ... ولو السجن مصيرنا يبقي مش مهم لان السجن هو مكان الشرفاء دلوقت .
من الاخر الي لسه عنده نقطة دم لازم يتحرك ينتفض يروح بكره دار الخدمات النقابية يقف علي بابها يقول لا لكلاب الداخلية لي عايزين يقفلوها ...أو يروح بعد بكره نيابة شبرا يقف جنب منعم ويقول لوزارة المقشات لا والف لا .... أو يروح بعد بكره المحكمة يقف مع اسر المحالين للمحاكم العسكرية ..... الي لسه عنده نقطة دم يقول لا ولو مرة للي احنا فيه .
أما انا عن نفسي فهقول لا والف لا

أأمر واتمنظر ... أنقعص وأتأنعر


عارف ان العنوان صعب بس صدقوني انا مليش اي ايد فيه , العنوان ده نقلا عن الفنان الجميل محمد هنيدي في مسرحية عفرتو ووفقا لكلام هنيدي فان العفاريت اليومين دول بيقولوا الجملة ده لما يطلعوا للبني ادمين قبل ما ينفذوا طلابتهم .
مش هخبي عليكم الفترة الي فاتت كان بيلح عليا سوال مهم جدا ، بل بالعكس هو من اهم الاسئلة الي لازم بجاوب عليها البني ادم والسوال هو :
لو طلع لك عفريت هتطلب ايه ؟؟؟
متتصوروش السوال ده صعب قد ايه ولو مش مصدقين سيبوا البوست دلوقت واقعدوا فكروا في حل السوال ده وهتعرفوا قد ايه انه صعب .
أنا به قضيت وقت طوبل افكر في الحل وناوي اقول لكم انا وصلت لايه .
أول اجابة طبعا هتيجي في دماغي ان نفسي طبعا في عربية بي ام دبليو سبور أحدث موديل ونفسي في لاب توب وكاميرا اخت بتاعه عمر عبد الله مصور المصري اليوم وموبيل أن 54184864 وخط موبيل من بتوع الجيل الثالث .
وعلي علي الصعيد الثدوينيي هيبقي نفسي ان مدونتي تعمل 41545428842861 زائر وان احمد زكي والحاج جرجس يرجعوا للتدوين وان الاستاذه سارة تعبر مدونتها وتمن علينا ببوست وان الاخت زنزانه تفكها علينا شوبة في البوستات .
أكيد نفسي في حاجات كتير قوي بس اكيد العفريت مش هيحقق كل ده وهو بالكتير هيحقق 3 طلبات , فانا من هذا المنطلق لازم اختار اهم 3 امنيات بس يا تري ايه هما ؟
السوال صعب قوي بس انا عصرت دماغي ووجدت أهم 3 حاجات فعلا .
أكيد اول حاجه اني ابقي غني قد خمشخاخر مليار دولار ودول متيقلي مش صعبين علي عفريت وبالفلوس أكيد هعرف احقق حاجات كتير , بس يا خوفي من الي ممكن يحصل لان اخرتي ممكن تبقي ذي اخرة خيرت الشاطر والمحالين للمحاكم العسكرية اياهم , وهيقولوا عليا بغسل اموال وبمول الارهاب ، يعني الفلوس ممكن توديني في داهية .
طيب نسيبنا من الطلب ده
مدام معيش فلوس تبقي سلطة وده بقه مشكلة يا تري اخد السلطة فين في الحكومة ؟وده طبعا مشكلة لاني لو مبقتش هليب ونصاب هتشال تاني يوم .
وطبعا مفيش سلطة في المعارضة
يبقي بلاها السلطة
الطلب الثالث اني اتجوز واحده بحبها وبتحبني ونعيش حياه سعيده وده متيقلي طلب سهل قوي , بس بعد التفكير لقيت الامنية ده برضه اخرتها مش تمام لان بعض قانون الارهاب اياه ايه فايده اني اتجوز واحده بحبها او حتي بكرهها مدام فيه مخبر هيبقي نايم معانا ؟ ايه فايده اني اتجوز واعمل بيت مدام ممكن اي حد في اي وقت يدخل عليا بيتي ؟
يبقي برده الامنية ده مش هي الاهم
يعني الثلاث طلبات طلعوا فشنك
بصراحة انا قعدت افكر وافكر وافكر اطلب ايه من العفريت
وصدقوني ملقتش الا طلب واحد لو اتحقق ممكن ابقي غني وانا مرتاح وممكن اطلع للسلطة وممكن اتجوز ، الطلب ده لو اتحقق هيخرج كل الناس الي بحبهم من السجون وهشوف منعم تاني .
الطلب والي اكيد الكل عرف ايه هو ان البيه العفريت يخلصنا من مبارك وابنه ونظام الهبيشه بتوعه , وأكيد بعد الطلب ده ملبش اي طلبات تاني وحلال عليه الطلبين التانيين .
والسوال هو العفريت هيرد عليا يقولي ايه لما اقول له علي طلبي ده ؟أكيد هيقولي انه مش هيعرف يعمل حاجه مع الشياطيين من بني جلدته امثال مبارك وابنه .
يبقي حتي العفاريت مش هيحلوها أمال مين الي ممكن يحلها ؟
هو ده السوال

الخميس، 19 أبريل 2007

منظمات المجتمع المدني المصرية والدولية تتضامن مع المدون المصري المسجون عبد المنعم محمود


أصدرت العديد من المنظمات المصرية والعربية العالمية بيانات تضامن للمدون المصري المعتقل عبد المنعم محمود محرر مدونة انا اخوان والصحفي بموقع اخوان ويب ومراسل قناه الحوار البريطانية في مصر
المنظمات والبيانات الصادرة :
بيان الشبكة العربية لدراسات حقوق الانسان
الرابط
http://www.hrinfo.net/press/2007/pr0414.shtml
بيان مراسلون بلا حدود
الرابط
http://www.rsf.org/article.php3?id_article=21764
بيان لمركز النديم
الرابط
http://harakamasria.org/node/9380

والي عنده بيانات تاني ياريت يحطها عشان نجمع كل البيانات

الاثنين، 16 أبريل 2007

كلمه المدونيين في موتمر الاسلام والدلوة المدنية يوم وقفة الكيبوردات

كلمة المدونيين امام موتمر لجنة الحريات بنقابة الصحفيين
يوم السبت الماضي تحت عنوان الاسلام والمجتمع المدني
وكانت الكلمة حول قضية عبد المنعم وملاحقة المدونيين

ورانا ورانا

دائما احسد امن الدولة علي صبره وعلو همته في الظلم والبطش بخلق الله .
الايام الثلاثة الماضية كنت مشغول للغاية في القاهره بسبب قضيه صديقي واخي المدون عبد المنعم محمود والمطارده الامنية التي تعرض لها وهو ما ادي لتاخر سفري لجامعتي في اسيوط لمدة يوم واحد فبدلا من سفري مساء السبت سافرت مساء الاحد الماضي ولم اكن ان الاقدار كانت تحمل لي الكثير من الخير .
فبعد ان نصحني البعض بالسفر لاسيوط لان الدوشة الي عملتها المرة ده عشان منعم ممكن تلفت ليا نظر حد من اخوانا البعدا ولان ورايا امتحنات ولاني ورايا بلاوي هنا في اسيوط كان لازم اسافر وبسبب موضوع عبد المنعم والوقفة يوم السبت اضطريت ااجل سفري من السبت للاحد عشان اوصل اسيوط صباح الاتنين ولافاجا ان امن الدولة شرف كضيف عزيز عندنا في السكن في اسيوط عصر يوم الاحد - اول مرة اشوف امن دولة بيجي العصر - أمن الدولة الي كان جاي في 4 عربيات بوكس وعساكر شايليين بنادق الالي قصيرة وقمصان واقية من الرصاص كانوا جايين عشان يقبضوا علي واحد ساكن في الدور الخماس بتهمة انه تكفيير وهجرة وبيقولوا انه كفر شيخ الاسلام ابن تيميه .
محمد الي كانوا جايين يقبضوا عليه والي شفته مرتين قبل كده وهو واد امور وميبنش عليه انه بيصلي حتي اتاخد وسط عرض رعب من الي متعود عليها امن الدولة , فبداية بوجود 2 عساكر علي كل بسطة سلم والي هي مبتكفنيش اصلا واقف لوحدي ووجود كتبة محاصرة الحارة السد الي فيها السكن ووجود شوية غيرهم عالسطح واقتحام مجموعه عساكر ثالته لكل شقة في وقت واحد موجوده في السكن ولغاية سحب بطايق كل الي ساكنين معاه في الشقة .
الحمد لله انهم مكنوش جايين ليا بس كان اول تعليق قلته لما سمعت القصة هما ولاد الكلب دول ورايا ورايا ؟؟
الظاهر كده
بس لمعلوماتكم
ولاد الكلب دول مش ورايا انا بس ولا ورا منعم بس ولا محمد لكن دول ورا الشعب المصري كله وربنا يشيل عنا الغمة .

الأحد، 15 أبريل 2007

وقفة مع وقفة الامس



أمبارح كانت الوقفة الي دعي ليها بعض شباب الاخوان المدونيين والي اثير قبلها وبعدها كلام كتير سواء من الاخوان او غيرهم ذي الكلام الي اثير هنا وهنا وهنا وهنا هنا .
بشكر كل الي اهتم بالوقفة سواء بالتشجيع او بالنقد ، بالمشاركة أو بالد عوة لمقاطعتها ، بشكر كل واحد الوقفة ده مرت حتي علي باله المواقف ده والوقفة ده هتفتح معانا مواضيع مهمة جدا مسكوت عنها من زمان . ونيجي للمهم
الوقفة
بداية تقيمي للوقفة انها نجحت علي المستوي الاعلامي ( وكفاية أن صوتنا وصل امبارح اكتر من 4 دول ) وحققت فوق المطلوب منها وكان الحشد الاعلامي فوق الخيالي بالنسبة للعد الذي لم يتجاوز 40 فرد أمام اكتر من 70 اعلامي .
الوقفة لم تنجح والي عايز تقول فشلت ممكن برده علي مستوي الحشد والاسباب كتيرة جدا للموضوع ده
ممكن يكون استعجال ذي ما قال محمود وممكن يكون لان محدش اتبناها سواء اخوان أو كفاية وممكن يكون اي سبب .
الاهم
هل حققت الوقفة هدفها ؟؟؟
أه ونص وتلات اربع
لان ببساطة قضية منعم سمعت في كل حتة بسبب الوقفة علي المستوي الاعلامي وياريت مننساش ان المظاهرات في الاول والاخر هدفها الاول مش حشد جماهير بل توصيل صوت والي تم امبارح ان الصوت وصل لاماكن لا تحققهها مظاهره جرارة من ام 1000 وانت طالع.
أمر هام برضه كنت عايز اتكلم فيه الا وهو كواليس الوقفة
1- الوقفة ده كانت فكرتي وفكرة ميت وعلي فكرة كنا هننزلها لوحدنا بس وميت ليه تجربة لانه مرة تظاهر وحده قدام روز يوسف .
2- قلنا ندعو ليها وكانت المشكلة ندعوا باسم مين ؟ مفيش وقت ناخد اذن كفاية عشان تبقي باسمها ولا شباب من اجل التغيير ولا الاخوان طبعا - وعلي فكرة احنا مندمجين في كل دول - فبقي الحل اننا ندعولها احنا بصفتنا التدوينة والاخوانية والي هي الصفات التي لا يسقطها عننا كونا خدنا اذن ولا لا وهي نفس الفصيل الي انتمي ليه عبد المنعم - مدون اخوان - ومش حاجه تاني .
3- البعض اعترض عالمعاد وده كان وارد في خططنا ومنهم حتي اصدقاء منعم المقربين ولحل الموضوع ده اجتمعنا وكنا 4 من المدونيين منا 3 اخوان وواحد كان اخ وفلسع وحطينا موبيل في نص التربيزه وشغلنا الهند فري واتصلنا بناس كتير مهم نعرف رايها في الموضوع ده ذي اصحاب منعم , محامين , نشطاء , قيادات في الاخوان , صحفيين , وكالات انباء ......الخ وكان كل هدفنا نعرف هل ده في صالح منعم ولا لا , وهل التاجليل افيد ولا التنفيذ , وبعد ما خلصنا كارت الشحن كانت القناعه ان لازم بكره لاسباب
- الضغط علي الامن وخصوصا ان منعم لم يصدر امر بالقبض عليه يعني فيه امل يسيبوه لو لقوا الموضوع عامل شوشرة وهيصة
- نشر قضية منعم لان كتير مكنش متابعها بحجه انه لسه متاخدش
- ايضاح ان وضع منعم وهو هربان لا يقل عن وضع المعتقل ان لم يكن اسواء
وكفاية لحد كده اسباب
4- أحنا ناس بتحب منعم ومش لازم نستني لما كفاية تمن علينا بعمل لمناصرة منعم ولا السادة كبار المناضلين يدعوا لعمل ذي ده ولا الاخوان يكلفوا القواعد انهم يتحركوا وكانت حركتنا شخصية والي استجاب لنا كانوا ناس مقتنعيين بكلامنا
5- اخ واحد بس من كل اخوان امبارح كان مستاذن مسوله والغريبة بقه ان مسوليين قالوا اه وتانيين قالوا لا وبشده ومحدش عارف السبب
6- اخوان اون لاين دعت للوقفة مش عارف ليه وده كان فوق تصورنا ومش مصدقينه لحد دلوقت لدرجة اني كل شوية افتح الصفحة ابص عالاعلان واقفل تاني ومش محبذ موضوع انهم اعلنوا تحت ضغط لان متمش ضغط اصلا .
7- حد لعب من ورانا عشان يفشل المظاهره وهو مين معرفش حتي الان والحد ده اتصل مثلا بناس قبل المظاهره بساعه بعت رسايل يقول فيها منعم مش عايز حد يروح المظاهره
واليكم المفاجاة
رفيق منعم طول يومين الهرب والي كان اخر واحد يشوفه قبل ما يدخل المطار ويتقبض عليه قال ان منعم كان سعيد جدا بالوقفة وبتوقيتها بالرغم انه تردد في الاول وانه كان بيدور علي اخبارها لحاد الساعه 10 لما دخل المطار وحتي لحاد 1 لما اتقبض عليه من جوه الطيارة .
نيجي للمهم
التجربة اثبتت ليا وبشكل كبير ان تجربة الاخوان التدوينية لم تنضج بعد وان احد جناحيها عالاقل- وهو الاخوات - لسه عليهم بدري اما الاخواه فلسه مش مقدرين يعني ايه تدوين واتمني من الاخواه دول يراجعوا مسوليهم وافكارهم وكتبهم عشان يرجعوا يفهموا ان عمل ذي ده لا يتعارض ابدا مع الي اتعلموه ومع اهداف الجماعه .
وهحكي هنا موقف بسيط واحد قالي غلط لانك مش مستاذن قلت له وهل انت بتستاذن قبل ما تدون ؟؟ قال لا , قلت له ده التدوين اكبر من العمل ده بالف مرة يبقي اذاي متستاذنش ؟
اتمني اننا نعالج الانفصال في الشخصية ده
اخيرا
انا اخ وهفضل طول عمري اخ مصلحة جماعتي فوق مصلحتي
هعيش
الله غايتي
والرسول قدوتي
والقران دستوري
والجهاد سبيلي
والموت في سبيل الله اسمي امنياتي
ولاني شايف ان الي بعمله ده في مصلحة جماعتي ولاني مش لوحدي عمل كده ولكم في منعم مثال فانا شايف ومقتنع ومومن ان التجربة التدوينة الاخوانية من الحاجات الي هتكون سبب في بث روح جديده شابة للجماعه وانها هتحافظ عليها وتنيمها كتير جدا
والحرية لمنعم

اعتقال منعم من مطار القاهرة

تحديث
الشبكة العربية والمجتمع المدني يتضامن مع عبد المنعم محمود
طالع بيان الشبكة العربية والتي طالبت منظمات حقوق الانسان والمجمتع المدني من التوقيع عليه

---------------------------------------------------------------
قامت مباحث أمن الدولة بمطار القاهرة باعتقال المدون المصري والإعلامي عبد المنعم محمود مراسل قناة الحوار أثناء مغادرته البلاد في مهمة عمل خاصة بقناة الحوار خارج مصر وذلك بعد يومين من ملاحقة مباحث أمن الدولة له ومداهمة منزله أكثر من مرة لإعتقاله دون صدور أي قرار حتي الأن من النيابة بالقبض عليه
أختار عبد المنعم العمل للقناة في تغطيات خارجية حتي تتضح الامور وتتوقف عمليات الملاحقة الأمنية المستمرة له والتي حالت دون قدرته علي الوفاء بأعمال القناة . .
وفي الساعة العاشرة توجع إلي مطار القاهرة لبدأ رحلته التي كانت تشمل أكثر من سبع دول عربية في إعداد تقرير مصور حول " ملف الحريات في الوطن العربي " وهناك تمت كل الإجراءات بسلام حتي قام بركوب الطائره حيث أنه غير مدرج علي قوائم الممنوعين من السفر ولم يصدر بحقه حتي الآن أي قرار من النيابة بالقبض عليه إلا أن الدولة البوليسية التي تتحكم في كل شيئ فرضت سيطرتها علي الأمر وتم إنزال عبد المنعم من علي الطائرة بمعرفة رجال الأمن وتو إقتياده إلي مكتب مباحث أمن الدوله بالمطار
عبد المنعم محمود يعتقل للمرة الرابعة لمجرد أنه يحلم بأن يحيا عزيزاً في وطن كريم ..
عبد المنعم محمود يداهم بيته لمجرد أنه نادي بحرية وطته ..
عبد المنعم محمود يبعد عن أهله وأسرته ويحرم من وداع والده الذي قد لا يراه مرة أخري وصحته تنحدر من السيئ إلي الاسود كل لحظة ..
عبد المنعم محمود نموذج الشاب المصري الذي قتل النظام الفاسد كل أماله وطموحاته في الحياة

السبت، 14 أبريل 2007

أطفال من اجل الحرية يشاركون المدونين والنشطاء اعتصام اليوم


أعلنت رابطة اطفال من اجل الحرية تضامنهم مع عبد المنعم محمود محرر مدونة انا اخوان المطارد حاليا من قبل الامن واعلن اعضاء الرابطة عن اشتراكهم اليوم في الاعتصام الذي سيقام الساعه الخامسة مساءا علي سلم نقابة الصحفيين .

قبل ما تتاخد - عشان حريتنا وحرية منعم-

هل تصورت ان تعتقل يوما بسبب إستخدام الإنترنت ؟؟
لقد حقق مبارك وإبنه ونظامه وتعدياته الدستوريه كل الأحلام

100_7254-web.jpgالأن ولفتره غير محدوده ......

هتتاخد يعني هتتاخد لو هوبت ناحيه الإنترنت

ولو عملت بلوجرهيبقي مصيرك زي مصير عبد المنعم .

عرفت إنه .....

يتم الأن مطارده المدون والصحفي عبد المنعم محمود محرر مدونة ” أنا إخوان “ والتهديد بإعتقال أهله ؟؟ ، وذلك بتهمه إنه بيقول رأي .

نقف غدا علي سلم نقابة الصحفيين في الخامسة مساءا من أجل

  1. وقف مطارده عبد المنعم محمود
  2. إعلام النظام وأعوانه أن المدونين خط أحمر
  3. فضح النظام وتخريباته الدستوريه

سيشاركنا عدد من الناشطيين السياسي والمدونين ، بالإضافه إلي بمشاركة مجموعه أطفال من أجل الحرية

اليوم السبت 14/4/2007
علي سلم نقابة الصحفيين
الساعه الخامسة مساءا

نرجوا من كل مدون سيشارك أن يأتي ومعه الكيبورد بتاعه من فضلكم

ومن يستطيع فليشاركنا بالأعلام السوداء وعلم مصر

تحت شعار

الحرية لمنعم

الجمعة، 13 أبريل 2007

منعم في صور

عبد المنعم قصة طويلة من العمل لخدمة دعوة ورسالة وهدف وغاية
حاولت اختصرها بشتي الطرق ملقتش انسب من الطريقه ده



الصور نقلا عن مدونة منعم
ووللي يحب عرض الصور عنده بنفس الطريقة تضامنا مع عبد المنعم ياخد الكود من هنا

يثبته عنده في المدونة
الحرية لمنعم

غدا اعتصام اما نقابة الصحفيين للافرا ج عن عبد المنعم محمود


ردا علي التصعيد الذي ارتكب ضد المدون عبد المنعم محمود محرر مدونة انا اخوان يعلن مدوني الاخوان المسلمين عن تنظيم اعتصام غدا السبت في تمام الساعه الخامسه عصرا امام نقابة الصحفيين تضامنا مع الزميل عبد المنعم محمود ان لم يعرف مصير عبد المنعم قبل موعد الاعتصام .
ومدوني الاخوان يدعون كافة القوي السياسية والنشطاء للمشاركة معهم في الاعتصام .
تحت عنوان
الحرية لمنعم

بانر للتضامن مع عبد المنعم محمود اهداء من الحاج جرجس


الحاج جرجس محرر مدوة كفاية حرام ارسل البانر ده تضامن مع عبد المنعم محمود المطارد من الفجر من امن الدولة
وبشكر جرجس علي اللفتة الجميلة ده ونحاول ننشر البانر

مداهمة منزل رويترز الاخوان عبد المنعم محمود


منذ قليل - فجر الجمعه - داهمت قوات الامن منزل عبد المنعم محمود صاحب مدونة انا اخوان ومراسل قناة المحور البريطانية والصحفي بموقع اخوان ويب .
مفيش اخبار حولين اعتقال منعم لان الامن لسه في بيته بيفتشه .
ولكل كلاب الداخلية بقولهم لو حد مس شعرة من منعم هتبقي وقعتهم سوداء لانهم هيقعوا في ايد من لا يرحم الا وهم المدونين .


حول نصباية عسل النحل السدر الجبلي

وصلني ميل من اخ عزيز لم يسعدني التعرف عليه شخصيا ولكني بعد ما تاكدت من شخصيته ومن صدق كلامه من شخصيات تعرفه شخصيا ومحل ثقة وجدت انه من واجبي نشر كلامه هنا ليعرفه كل الناس .
يقول صاحب الرسالة

إلي من يهمه الأمر نكشف لكم قضية غش وتزوير وتهريب واضرار بحياة المواطنين وبمصرنا

هام جدا جدا بخصوص عسل السدر الجبلي المغشوش لشركة جادو ماركت

بخصوص موضوع العسل السدر الجبلي الموجود في محافظة الدقهلية بمدينة المنصورة وفي بقية المحافظات كلها أحب أن أوضح لك أولا أني كنت موظف في شركة جادو ماركت لعسل السدر الجبلي الموجودة في مدينة المنصورة بمحافظة الدقهلية كنت موظف بقسم المبيعات ومن خلال وظيفتي بهذه الشركة تعرفت علي اشياء كثيرة طبعا البعض او الاغلبية ممن في الشركة يعرفون كل شئ عن موضوع العسل والكل يعيش حاله من القلق في هذه الأيام بسبب انه تم الفبض علي العاملين بمخازن الشركة والكل يعلم ايضا ان الشركة تتهرب من التأمينات والضرائب والصحة والزراعه ايضا وذلك كله بسبب ان عسل السدر الجبلي الموجود بالشركة او بمخازن الشركة ليس عسل سدر جبلي سعودي كما يقول المسئولين عن الشركة ( محمد جادو ونجله محمد وشريكهما د. وليد عبدالعزيز ) ولكنه عبارة عن عسل اسود عادي مضاف اليه محلول سكر وعسل أبيض واضافة مكسبات الطعم واللون هذا كما جاء في التقرير المكتوب بالمدونة علي هذا الرابط

http://lo4ve.maktoobblog.com/?post=193270

وايضا كما جاء في بعض الصحف المصرية منها علي سبيل المثال الجمهورية والاخبار والوفد واخيرا جريدة المساء .وأكد مدير عام بحوث النحل بالدقهلية ودمياط ان العسل السدر لا يوجد داخل مصر كما يوجد قرار بمنع استيراد عسل النحل وجميع منتجاته وهذا القرار صادر من وزير الزراعة لأنها تحمل الأمراض ولخشية انتشارها كما أكد أن العسل المضبوط عبارة عن مواد سكرية ومكسبات طعم وبذرة غير صالحة للاستهلاك الآدمي.. ولقد قام بعض الاخوة في مصر بتحذير قناة الناس والمسؤلين عن قناة الناس بهذا الموضوع ولكن كل ما حدث من قناة الناس انها قامت بقطع الاعلانات لمدة اسبوع تقريبا وبعدها قامت بعودة الاعلانات مرة اخري ولا اعرف ما سبب انقطاع الاعلانات فجأة وعودتها مرة اخري ولكننا سمعنا ان الشيخ محمد حسان والشيخ محمد حسين يعقوب عندما علموا بموضوع العسل هددوا قناة الناس بانهم سوف يتركون قناة الناس اذا لم يتم منع هذا الاعلان من القناة وبالفعل تم المنع لمدة اسبوع فقط ولا نعرف الي الان ما هو سبب رجوع الاعلان مرة اخري للقناة ؟

واحب ان اوضح لكم امر مهم جدا وهو ان مقر الشركة الرئيسي موجود تحت اسم جادو سوفت في المنصورة ش عبد السلام عارف مبني حاضنه اعمال المنصورة الدور الثالث وبالفعل كان هذا هو مقر الشركتين معا جادو سوفت وجادو ماركت ولكن بعد القبض علي العاملين بالمخازن تم تغيير مكان مبيعات شركة جادو ماركت الي عنوان اخر انا لن اذكر العنوان بالتفصيل ولكن احب ان اوضح لكي ان العنوان الجديد ايضا بمدينة المنصورة بمنطقة توريل بجوار سور حديقة الحيوان ومكان الذي يوجد به الشركة عبارة عن منزل تم تأجيره لكي يكون مقر لقسم المبيعات بشركة جادو ماركت وايضا لقسم ادخال واخراج البيانات وقسم الدعم الفني بشركة جادو سوفت ومعروف بهذه المنطقة ان الشركة عبارة عن شركة كمبيوتر ولا يوجد احد من اهالي المنطقة يعرف أي شئ عن الشركة ولكن اريد ان اعلمكم بشئ ان المسئول عن مقر الشركة او بمعني اصح هذه الاقسام الموجودة في المنزل بمنطقة توريل هو شخص يدعي ( محمد إبراهيم علي سعد ) وللعلم هذا الشخص قد تم التأمين عليه في الشركة ولكن تحت اسم شركة جادو سوفت لان شركة جادو سوفت هي المعلومه للجميع والمرخصة اما شركة جادو ماركت فلا يوجد لها أي دليل يدل علي انها موجودة غير اوراق بالشركة فقط وهذا المنزل الموجود في توريل فقط واذا اردتم التاكد من ان الشخص الذي يدعي محمد سعد هو المسئول عن الفرع الخاص بقسم المبيعات عليكم الاتصال بالارقام الموجودة في الاعلان والسؤال عن الشخص المدير المسئول عن الشركة بحجة وجود مشكلة بالعسل سوف يتم تحويلكم الي قسم الدعم الفني اولا اطلبوا منه تحويلكم الي مدير الشركة وهو الشخص المذكور اسمه بالاعلي .

كما احب ان اوضح لكي امر مهم جدا ان الشركة بالفعل الان بدأت في افتتاح فرع جديد لها في القاهرة ولكن هو عبارة عن فرع توزيع فقط ولا احد يعرف بمكان هذا الفرع غير المسئولين عن الشركة فقط وانا من خلال معلوماتي عرفت انه موجود في مدينة نصر بالحي العاشر .

اما بالنسبة لمكان المخازن بفرع المنصورة فهي غير موجودة ايضا فقد تم نقلها للقاهرة لانها ابعد عن اعين الشرطة والتموين .

كما احب ان اوضح ان مبيعات الشركة اليومية تتراوح ما بين 400 او 500 علبة عسل ومعروف لدي الجميع ان ثمن العلبة ( 1/2 كيلو ) 199 جنيه أي ان المبيعات تصل الي ما بين 80000 الي 100000 جنية يوميا أي بمعدل 3 ملايين جنيه مصري شهريا من اموال مرضي الشعب المصري الباحثين عن الشفاء ومع العلم ان هذا العسل ليس عسل السدر الجبلي ولكنه اما انه عسل ابيض او اسود مضاف اليه مكسبات اللون والرائحة واما انه عسل مصري خالص لكنة ليس عسل سدر جبلي سعودي ولا يتعدي سعره 30 جنيها مصريا فقط لا غير نظرا لندرة عسل السدر الجبلي ان وجد في مصر فلا يمكن تصور أن تقوم الشركة يوميا بإخراج ما يقارب ال 200 أو 300 كيلو عسل سدر جبلي .

استغلوا حلم وحاجة المرضي بالسكر والكبد والسرطانات بالشفاء وبرهنوا بالقرآن ان العسل هو الحل والعلاج من كل الأمراض.. وقاموا بعرض نوع من أنواع عسل النحل الجبلي السدر علي شاشات الفضائيات.. اقتنع المواطنون واستمروا في شراء العسل وزاد الاقبال عليه من خلال العرض التليفزيوني المستمر ليلاً ونهارا .

ولمعرفة مكان المخازن عليكم بتعقب او بسؤال شركات الشحن التي تتعامل معها الشركة وهما شركتي شحن ميدل ايست وشركة ارامكس وهذه ارقام التليفونات الخاصة بهم

المسؤل عن شركة ارامكس

أ / عمرو الكاشف : 0102555013

أ/ ايمن منصور : 0102555012 أ/ شادى : 0107989200

عنوان ميدل ايست فى القاهره هيليوبلس مصر الجديده روكسى ميدان صلاح الدين خلف فندق بيروت ارقام تليفونات الفرع الرئيسى : 2917291 4159340

هذا ونترك الموضوع تحت تصرفكم لتتعاملوا معه كما تعاملتم مع العديد من قضايا الفساد والتزوير والغش في البلد واذا كانت هناك أي اسئلة او استفسارات فنحن في الخدمة ان شاء الله

وهذا ولدي بعض الكشوفات للمواطنيين الذين قاموا بشراء العسل ويمكنكم الاتصال بهم والاستفسار منهم أيضا


والي هنا انتهت الرسالة

وحسبنا الله ونعم الوكيل في امثال هولاء ممن يتاجرون بالدين


الخميس، 12 أبريل 2007

بعد تغلب مصر علي موريتانيا في الكرة ... مصر تتغلب علي موريتانيا في التخلف الاقتصادي .... مبروك لمصر


طبعا مصر بالابيض وموريتنيا بالاحمر مش محتاجه فكاكة يعني

في اخر حلقات الهزائم التي ينزلها شعب مصر ونظامه بالشعب الموريتاني ونظامه ... وبعد الهزيمة - الجامده جدا - في مبارة كرة القدم التي جرت في استاد القاهره والتي انتهت 3:0 لصالح الفراعنة أراد النظام المصري أن يثبت أن المصريين يستطيعون هزيمة الموريتانيين في ميادين كثيرة وليس في الكرة فقط .
فقد حصدت مصر وبجدارة المركز الاول علي مستوي الدول العربية ( بما فيها موريتنيا ) في مجال التخلف الاقتصادي .
التقرير الذي يصدره المنتدي الاقتصادي العالمي بالدوحة وضع مصر في المركز الاول في الدول الاقل تطورا اقتصاديا تليها المغرب ثم سوريا ثم موريتنيا .
ومع العلم أن موريتنيا معندهاش قناة سويس ولا قطن طويل التيلة ولا حتي قطن تنجيد ومعندهاش أطول انهار العالم ومعندهاش توشكي ولا 6 أكتوبر ولا العاشر من رمضان ولا المناطثق الصناعية الي عند مصر والي بقت اكتر من المصانع نفسها ، واكيد موريتنيا معندهاش مصانع سيارات وسيراميك وسجاد والمصانع الكتير الي رئيسنا الجامد جدا طول النهار رايح جاي يفتح فيها لحاد لما خس النص يا عيني .
طب السوال ... موريتنيا عندها ايه ؟؟؟
موريتنيا ومحدش يستغرب الصناعة القومية فيها هي تربية الابل - الي هي الجمال الي طول النهار واقفة عند الهرم عندنا- والتجارة في لبن الابل ... بس .
وبمناسبة الابل صرح ولد داده - الراجل المحترم جدااااااا الي عمل الانقلاب في موريتنيا وبعد كده ساب الحكم للشعب - أنه لما يسيب الحكم هيتفرغ لتربية ابله وشرب لبنها - عقبال واحد صحبنا .
وبهذه المناسبة والنصر المبين علي الاخوة الموريتانيين أحب اوجه السوال للسادة اصحاب هذا الانجاز الخزعبلي بداية من السيد رئيس الجمهورية والسادة روساء وزراء مصر السابقين والحليين ووزراء اقتصادها وتجارتها .... الخ والسوال هو
الا هو الاصلاح الاقتصادي أخباره ايه ؟؟؟ وصحته عامله ايه دلوقت ؟؟؟
وبالمناسبة برده موريتنيا معندهاش اصلاح اقتصادي ولا قطة خمسية ولا قطة بلدي ولا حتي قطة سيامي - علي راي الفنان سعيد صالح - .
وبالمناسبة ده برده احب اووكد ان مصر طول عمرها رائدة وانها تغلبت هلي موريتنيا وكل الدول في حاجات كتير قوي ، وان موريتنيا نفسها خرجت من دائرة المنافسة في ميادين كتير كانت هي محتكراها زمان .
وفي مقدمة هذه الميادين الي احتلتها مصر يجي القمع السياسي وانتهاك حقوق الانسان وتزوير الانتخبات والواسطة والمحسوبية ... الخ .
وفي اخر الكلام احب ازف لكل مصري ومصرية خصوصا السادة المسولين الكبار قوي خبر خيبتنا القوية
واحب اقول من كل قلبي
غطيني وصوتي عليا يا اما


التاج وصل


وصلني موخرا تاج جميل جدا من الصديق العزيز جدا والاخ الجميل والحبيب الي قلبي وزميل الغربة محمود سعيد ( أبن أخ ) وقبل ما احكي حولين التاج احب اشكر محود لانه اتاح ليا الفرصة ده .
التاج كان بيقول
تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارسته

بصراحة السوال فكرت فيه كتير ووصلت ان فيه حاجات كتير وهوايات كتير محبش حد يقاطعني فيها او بمعني اصح اي حد بيعمل حاجه بيحبها فهو اكيد ميحبش حد يقاطعه .
طبعا اول الهوايات ده هي القراءة ومهما كان الكتاب لاني ببقي في دنيا انا والكتاب محبش حد ابدا يدخل فيها او يخرجني منها ، ده في الحالة العامة أما لو الكتاب بقه كتاب محتاج تركيز اصلا ذي كتب الفيزياء الي بعشقها فغالبا الي بيفكر يشوشر عليا بتبقي وقعته سودا .
تاني الهوايات هي الكتابة ولاني بحب اكتب سواء شعر او قصة قصيرة او مسرحية او خواطر وا بوست أو حتي بشخبط ومحبش ابدا حد يقاطعني وانا بكتب وغالبا ما بكتب في اماكن زحمة لظروف ترحالي بس ببقي منعزل عن العالم الي حوليا ذي ما دايما بكتب في القطر أو عالكورنيش .
ثالث هواية بالتاكيد هي التصوير ومدة التقاط الصورة لا تذيد عن 5 ثواني بس بحب ابقي مركز فيها وقبلها وانا بختار المكان الي هصور منه والكادر وكده .
رابع هواية هي التامل وده هواية غريبة شوية بس بحبها وممكن عشان محدش يزعجني وانا بمارسها اعمل الموبيل سيلنت .
طفاية كده هوايات ونخلي الباقي لبعدين .
أما عن التاج فاحب امرره لحبيبي احمد ذكي صاحب دفتر الوطن والمدونة الجامدة جدا رانده صاحبة مدونة زنزانة والمدونة الجامده برضه مها مصطفي صاحبة مدونة أحسن تستاهل واكيد طبعا سارة صاحبة مدونة مقاومة وكفاية كده .
وكل تاج وانتم طيبين

الثلاثاء، 3 أبريل 2007

بلدي يامصر " الغروب من موتمر القاهرة الخامس "






الصور من تصويري
وشكر خاص لمحمود سعيد ( أبن اخ ) عشان سرقت منه الكاميرا وصورت بيها

الاثنين، 2 أبريل 2007

رشوة لايف .. بالصورة بس من غير صوت


أبتسم ...فأنت ترتشي

حين يفسد الراعي يجب ان تفسد الرعية . يعني لما الحاكم يرضي علي نفسه الحرام رعيته بتعمل ذيه بمدأ "ده الكبير بيعمل كده جت عليا " ، واما الكبير يوصل لدرجة البجاحه وانه يجاهر بالي بيعمله ده برضه رعيته هتقلده وبلا تردد . الصورة ده لعسكري واقف كل يوم قدام خلق الله كلها وساعات معاه امناء شرطة كمان ، ياخد رشوة من عربيات الاجرة الي رايحة حلوان من ميدان التحرير وبتقف بره الموقف ، العسكري ده والي معتقدش ان مفيش حد مبيشفوش وهو كده - ومش فاهم اذاي محدش فكر يصوره قبل كده - بيعمل ده بمنتهي البجاحه لدرجه انه لما شافني بصورة جه يتخانق معايا ... تصوروا كان ناقص يسحبني عالقسم بس انا مسكتلوش ولولا اني كنت رايح مظاهرة مجلس الشعب كنت كبرت الموضوع . علي العموم انا مش هاين عليا ادعي عالعسكري ده لاني مش عارف ظروفه بس الدعاء الي بقوله كل ما اشوف منظر ذي ده " حسبي الله ونعم الوكيل فيك يا مبارك انت وابنك وكلابك الي مسميهم وزراء ورجال دولة من اول وزير الدخلية لحاد وزير العيش "

الأحد، 1 أبريل 2007

التوريث فيديو فيلم يقدم " المفتري "

أرسل الي احد الزملاء هذا الفيلم والذي يدور حول قضية التوريث
الفيلم من انتاج المفتري
واعداد m.g.k.
وانا بصراحة لا اعرف المفتري ولا التاني ده
بس الفيلم بجد يجنن
أتمني مشاهده سعيده
وشكرا للي عمل الفيلم والي بعته


شارك مع اصدقائك

Share |