الأحد، 22 أبريل، 2007

مه احنا مش ارايل

بجد بقت حاجه تقرف
حاجه تبعث علي الغثيان ... حاجه تخلي الصنم يتحرك
الشاطر اتاخد ومعاه خيرة رجالة البلد وقلنا حصل خير نصبر ونحتسب ... كل يوم اعتقالات وضرب وسحل وانتهكات وقلنا وماله شوية وتتحل .... منعم اتاخد وقلنا كبوة وتعدي .... دار الخدمات النقابية تقفل لها فرع وراء التاني وقلنا وماله لسه الفرع الرئيسي .
لكن بجد الي بيحصل ده بقه فوق احتمال البشر
ولاننا مش ارايل ولااننا لسه رجاله ولاننا لسه فينا نخوه مش هنسكت
مش هنسكت علي خطف منعم ولا اعتقال شفاء الوطن ... مش هنسكت علي الذل ... مش هنسكت علي اي حاجه بعد كده ... ولو السجن مصيرنا يبقي مش مهم لان السجن هو مكان الشرفاء دلوقت .
من الاخر الي لسه عنده نقطة دم لازم يتحرك ينتفض يروح بكره دار الخدمات النقابية يقف علي بابها يقول لا لكلاب الداخلية لي عايزين يقفلوها ...أو يروح بعد بكره نيابة شبرا يقف جنب منعم ويقول لوزارة المقشات لا والف لا .... أو يروح بعد بكره المحكمة يقف مع اسر المحالين للمحاكم العسكرية ..... الي لسه عنده نقطة دم يقول لا ولو مرة للي احنا فيه .
أما انا عن نفسي فهقول لا والف لا

هناك 3 تعليقات:

قلم حر يقول...

السلام عليكم..انا معاك أنا لازم ناخد موقف ادام كلاب دولتنا المحروسة , بصرف النظر عن انتمائنا السياسي عشان ندافع عن حريتنا وحرية كل إنسان عايش في البلد ديه , بس تفتكر وقفتنا أمام دار الخدمات هتجيب نتيجة أو حضورنا لمحاكمة عبد المنعم من نيابة شبرا هتخليهم يسمعونا, كلاب الحراسة اللي في بلدنا محتاجين حاجة أكبر عشان نواجههم ,احنا لازم نعمل حاجة منظمة, وتأثر بجد ..محتاجين من كل حد عايز يكون حر يفكر ممكن نمعل ايه

a7lam 3adya يقول...

الواضح انو انت بتكتب وانت غضبان
كلنا غضبانين
بس للاسف الدولة لبستنا كلنا توب الذل

ودائت علينا وفاتت
قدام النيابة هنقف
ومع الاهالى هنروح

بس تفتكر هيتهزوا؟؟

يا ريت

بجد يا ريت

خالد وليس بخالد يقول...

سبحان الله
ممدوح اسماعيل يقتل اكثر من 1500 وليس خطرا على امن الدولة
أما عبد المنعم -المسالم- ..وان كنت اختلف معه في امور- فلا زال الناس يختلفون

هذا المسالم اعتبروه خطرا على امن الدولة
سؤال: حد يجاوبني عليه
يعني إيه أمن الدولة؟؟؟
حسبنا الله ونعم الوكيل
والله يا اخي انا لا هروح ولا هقف على بابا نيابة ...ولا على باب محكمة
انا هقف على باب الملك القهار
ادعوه انه يفك عننا كلنا الاسر
يا اخي
انت زعلان ان عبد المنعم في السجن
هو انت فاكر نفسك انت فين
فاكر نفسك في الجنة؟؟؟
منتا وانا عايشين برضه في السجن...بس كبير شوية عن بتاع منعم
مش كده؟؟
يللا الله المستعان

شارك مع اصدقائك

Share |