السبت، 31 مارس 2007

مؤتمر القاهرة يرقص علي انغام الجميزة

* في مؤتمر القاهره .... لا جديد والرغي هو سمة الموتمر * أبناء اصلاحيين الاخوان نجوم الموتمر باجماع الاراء ... والجميزة فاكهة الموتمر * أبو عمر المصري مفاجاة اول يوم في اول ظهور اعلامي له من اربع سنوات

موتمر القاهرة لمناهضة الامبارلية والعولمة هو الحدث الذي ينتظره النشطاء من العام للعام في مصر وخارجها
وهذا العام جاء الموتمر بحفل افتتاح حاول المنظمون ان يخرجوه بصورة جيدة ولكن العدد الكبير وضيق القاعة وكثرة كلام المتحدثين كانت السبب وراء ظهور حفل الافتتاح دون المستوي ، والذي انتقضة البعض كثيرا .
تجاوزنا حفل الافتتاح وبدانا اليوم الاول للمؤتمر والذي كان يحمل الكثير والكثير فمن ورش عمل حول المقاومة وافلام سيمائية وورش عمل وتجمعات للسيدات والفلاحيين والعمال والطلبة وورش عمل عن التعذيب كانت تدور احداث اليوم ، الاحداث التي امتدت من الساعه الواحده ظهرا وحتي الحادية عشرة مساءا .
في منتدي التعذيب كانت مفاجاة اليوم هو ظهور ابو عمر المصري الامام المصري المولد الايطالي الجنسية الذي عذب في مصر وايطاليا ورحلته ايطاليا الي مصر لكي يعذب واضهد من اجهزة المخابرا ت المصرية والايطالية والامريكية ،ه أبو عمر والذي اخترق امرا بالاقامة الجبرية وامر اخر بعدم التحدث لوسائل الاعلام وأمام التجماعات ظهر اليوم في منتدي التعذيب لكي يروي لنا تفاصيل ماساته وكيف عاشها ،أبو عمر الذي تحدي ثلاثة اجهزة مخابرات وثلاثة حكومات ووزراة داخلية وامن دولة وغيرها من الاجهزة لكي يتحدث عن قضيته استحق وبجدارة مفاجاة موتمر القاهرة الخامس ، فتحية لابو عمر .


أبو عمر يتحدث لوسائل الاعلام
أبو عمر ويظهر علي اذنه أحد اثار التعذيب



أحد ضحايا التعذيب وابتنها

علي صعيد أخر اجمع المشاركين في الموتمر ان أبناء الاصلاحيين من الاخوان المحالين للمحكمة العسكرية والذين ظهروا طوال الموتمر باللباس الابيض المطبوع عليه صور ابائهم هم وبلا منازع نجوم المؤتمر .
فالاطفال الذين تجدهم تارة يقفون ينشدون أناشيد تعبر عن قضيتهم وتارة اخري تجدهم يوزعون الملصقات والمنشورات التي تتضمن قضاياهم واحيانا اخري تجدهم مع احد المشاركين يشرحون له ما يعانوه كانوا وبلا منازع محط انظار الجميع حتي وسائل الاعلام .
هذا ومن المقرر غدا ان يعلن الاطفال عن تشكيل رابطتهم من اجل الحرية في موتمر صحفي يعقد ضمن اعمال الموتمر .


من ناحية اخري كانت أحلي فقرات اليوم هو عرض فريق الجميزه والذي كان متاخر اذ بدا الساعه 9:30 لكنه جمع كل المشاركين والذين صفقوا ورقصوا علي انغام الفريق ( الاخوان مرقصوش صقفوا بس ) وحقا فلا يجمع الاخوة اليساريين سوي الغناء والموسيقي
اسيبكم مع عروض فيديو لاغنيتين من أحلي ما غنوا
واتفرجوا عالمؤتمر وهو بيرقص
الاولي تحت عنوان خاين يا زماني



والثانية تحت عنوان
أنا قلبي صحرا


الخميس، 29 مارس 2007

أخر انجازات عصر التعذييب

بعد عماد الكبير
وشاب قسم الهرم
بعد أقوي العروض التي قام ببطولتها وأخراجها
العادلي وكلابة
شاهد معنا
أخر عروض الداخلية

ضابط شرطة يحبس مواطنا لمدة عامين على سطح مركز الشرطة

من مدونة مقاومة
نقلا عن المصري اليوم

الأربعاء، 28 مارس 2007

هنغني ضد التعديلات

المقاومة انواع
والاعتراض ليه مليون طريقة ، ومن رايي ان الشعب يتقاس نسبة تحضره بالطرق الي بيعترض بيها
المهم ان اليوم اثبت طلبة جامعة حلوان ( كعادتهم ) انهم من الطلبة المتحضرين ومتحضرين قوي كمان
طلاب حلوان اصحاب يوم الكوسة والملحمة المشهورة بتاعته الي اترفد علي حسها 29 طالب لممد وصلت لثلاثة سنوات النهرده اتحفوني بعمل اقل ما يقال عنه انه متحضر وراقي ورائع .
اليوم أقام طلاب الاخوان المسلمين بجامعة حلوان مهرجان الفن الاسلامي وكان تحت عنوان ضد التشويهات الدستوريه .
علي انغام الدفوف وصقفة الشباب غني الشباب ضد أنتهاك حريتهم ... ضد مصادرة ارادتهم ... ضد بيع الوطن من غير تمن لمبارك وعيلته ..ز ضد رئيس جمعتهم الي فصلهم وشردهم وفي عهده كانت اعلي مصاريف جامعه في مصر هي مصاريف جامعة حلوان .
غير الغناء كان فيه التمثيل والاسكتشات الي كانت تجنن وكان فيه المسابقات والحبشتكنات (وخناقات مع الامن كمان ) الي خلت اي حد مجاش اليوم ده بجد فاته كتييييييييير .
هسيبكم مع الصور هتعرف تتكلم احسن مني


كتير هيسالني هما بنوا المسرح ده من غير الامن ما ياخد باله ؟؟؟
وللاخواة السالين هرد اخر البوست

3 ساعات في الشمس بس كانوا 3 ساعات يستاهلوا بصراحة



الشراكة والتعاون ضد الشمس


ده بقة الفرقة ... وانتم عارفيي ن الفرقة صعبة اذاي

ان شاء الله هنشر لكم فيديو من الحفلة لاول ما الاخ ابو قميص بمبة ده يديني السي دي
وعلي فكره هو مش مصور الامن مصور الامن جايب صورته بعد شوية





الحميل في الحفلة انها كانت لمة الكل
من اول الي كاتب علي كشكوله بحبك وحشتيني

لحاد بتوع المصاحف







حين تعانقت الايادي ... في حب مصر


ده 6630 كاميرا 1.3 ميجا بيكسل

هو الطبيعي بتاعه كده مكشر ... بس الحفلة كانت حلوه والله


دلوقت بقه صور الامن وللاسف مش انا الي مصورها لاني مكنتش فاضي اصور ساعتها

ده مصور الامن الي كان معاه كاميرا سوني هاند كام من ام الفين وشوية

وده وهو بيعاياين الصيده بتاعته

وطبعا قامت خناقة



بس سيبك ساعة الحظ مبتتعوضش

كتير سالوني بصفتي خبير في الشوون الامنية والتنظيمية يا استاذ أحمد هو المسرح والساوندات ومولدين الكهرباء والهلمة ده دخلت الجامعه اذاي ؟ وكان من الي سالوني زميلة صحفية في أحد الجرائد .
وللسادة المتسالين احب ارد عليهم واقول
الموضوع بمنتهي البساطة ان الحاجه بتدخل بنظام طرق الحكم في افرقيا
وطرق الحكم في افريقيا بتنص ان الي يصحي بدري يحكم البلد
وهو ده الي بيتم
طلاب الاخوان بيصلوا الفجر ويتكلوا علي الله يلموا بعض بره الجامعه ويدخلوا بالحاجه
طبعا الساعه 6 لا بيبقي الامن المركزي جه
ولا البهوات الضباط وحرس الجامعه جه
ولا اي حاجه
يادوب عسكري غلبان يمسك الاسلكي ميلقيش حد يقوله حاجه
كفاية كده عليكم نصايح امنية .
وبرافو ياشباب حلوان

فاصل اعلاني مع اقوي عروض الدستور

لاول مرة بمصر
ومتقوليش عروض موبينيل ولا غيره
من الدستور وبس
ولمبارك وابنه واحفادهم وبس
صلاحية مدي الحيااااااااااااااااااااااااااااااااااااااااااااااااااااااااااة

الدستور ........أقوي شبكة استهبال واستعباط للشعب في التاريخ
الدستور .........هيوريك الي عمرك ما تتمني تشوفه
الدستور .......هيوريك جمال مبارك وهيثم مبارك ومش بعيد سوسن مبارك
الدستور ............هيطلع عليك القديم والجديد
الدستور .............. ثورة في عالم النصب والغش والاحتيال
الدستور ............من دم الشعب وعلي قفا الشعب
الدستور ............لا تقولي طوارئ ولا غيره
الدستور ........... ثورة في عالم الحريات علي حساب الحريات
الدستور .............
مش بتاع ابراهيم عيسي علي فكرة

في ذكراك نسيناك ... الله يحرقك يا مبارك


يوم 23/3 يوم بستناه من السنة للسنة وبالنسبة ليا بيمثل ذكري سنوية كبيرة جدا ، انها ذكري شيخ المجاهدين وعريس الشهداء الشيخ احمد ياسين .
السنة ده الامر اختلف ، فبالرغم من اني كنت مجهز للموضوع من قبلها بشهر تقريبا وبتابع الفاعليات الي هتحصل في هذا اليوم التاريخي والدنيا هتبقي عامله اذاي في اليوم ده ، مرة واحده اتلغي كل الكلام ده ولدرجة اني نسيت اليوم ومفتكرتش الا يوم 24/3 بالليل.
السبب وراء الي حصل ده اكيد معروف وهو انشغال مصر كلها بالمهزلة الدستورية اياها .
بس عشان مينفعش يعدي الحدث كده احب اوجه كلمتين
الاولي للشيخ أحمد ياسين أقوله تعالي وشوف حال فلسطين من بعدك ... فلسطين بتشكي فراقك ... فلسطين بقت مش مشكلتها احتلال بقت مشكلتها السلطة والنفوذ ... في ذكراك بقولك وحشتني ووحشت كل الفلسطنيين .
الرسالة التانية للفرعون مبارك وابنه بقوله فيها الله يحرقك مبقاش الواحد حتي عارف يتهني بذكري حزينه في عصرك الاسود ده .
وتسمح لي اسالك سوال رفيع ؟؟؟ هو امتيي جنابك ناوي تحل عننا انت وعيلتك الملكية ؟؟؟ لو مش ناوي ياريت تقول عشان اعمل حسابي .

الاثنين، 26 مارس 2007

قيادات علي قفا الشباب

أعتذار واجب
واضح جدا ان كتير ضايقهم البوست ده
وشافوا انه اهانة شخصية بالرغم من ان ده مش غرضه بالمرة
ولكل دول بقولهم ولاي واحد زعل مني أنا اسف لو كان كلامي ضايقكم أو كان فيه نوع من عدم الصحة
ويمكن الي خلاني لااورد اسماء أني مش عايز الكلام يتاخد علي ملمح شخصي
كل واحد من الي انا حكيت عنهم هو مش واحد أو شخص بعينه
لا ده تصرف عمله البعض وكنت احب نقف عليه
بس مدام الموضوع وصل ان البعض افتكره تجريح
يبقي ملوش لزمة الكلام .... لان الاعتصامات ممكن تتعوض والدساتير كمان ممكن تتعوض لكن الصحبة الحولة عمرها ما تتعوض
توضيح مهم جدا
نقلا عن مدونة أسد
أسد قال علي مدونته بعد ما حكي عن تجربته في الاعتقال عن موضوع تنظيم الاعتصام كلام مهم جدا شايف اننا نقراه
بيقول أسد "
لي تعليق أخير بخصوص ما قيل هنا و هنا وهنا وهنا :

- تأسيساً على كوننا من البشر ؛ من المفهوم أن يخاف أحد أو يمرض أو يتكاسل أو حتى يجبن ويتراجع تحت ضغوط معينة , لا أرحب بعقد المحاكمات ولا ألوم أحداً من القيادات أو غيرهم على عدم الحضور, فكما قال عم أحمد الجدع جدع والجبان جبان , وهذا الميدان يا حميدان كما قال أهل نجد . لسنا عيالا ولا حاجة بنا إلى السادة القيادات كنا قد كلامنا ونزلنا ومش مهم مين جه ومين مجاش .

- الأصل في مثل هذه الفعاليات أنها فرض كفاية ؛ إذا قام به البعض سقط عن الباقين - إذا قامت الكفاية بهذا البعض - وبالتالي يُترك الأمر لضمائر الناس وتقديراتهم الذاتية , لم نكن نعيب على أحد الانسحاب لاي سبب يخصه ؛ لأن دافعا ذاتيا يوجد لدى الجميع وسيبقى في النهاية عدد تقوم به الكفاية إذا تخلف أصحاب الأعذار وحدهم , لكن نسبة المتخلفين تزداد في الآونة الأخيرة ؛ لدوافع الشعور باليأس وعدم الجدوى أكثر من أي شيء آخر .

- ليس صحيحاً أنني دعوت لهذا الاعتصام بشكل منفرد , كتبت الدعوة واتصلت ببعض النشطاء لحثهم على نشرها لكنني لم أكن وحدي بل كنت مع مجموعة كبيرة من الزملاء, ولا أريد الآن أن أذكر من شاركوني التفكير والإعداد ؛ فهي تهمة لا أنكرها ومسئولية لا أتهرب من حملها .

-صحيح أن الدعوة لم تكن في البدء باسم كفاية , ولكن ليس صحيحاً أنها لا تتحمل أية مسئولية عنها فلجنتها التنسيقية امتنعت عن تنظيم أية فعالية مواكبة للاستفتاء في القاهرة مكتفية بالدعوة إلى المشاركة في الاعتصام , ومنسقها العام د.عبد الوهاب المسيري صرّح للصحف بأن كفاية ستنظم اعتصاماً بميدان التحرير , وكذا صرح منسقها المساعد جورج اسحاق . "
ولا كلام بعد كلام اسد
تحديث
بعض الردود الي وردت ليا اكدت اني لازم اكتب التحديث ده للتدوينه وهلخصه في نقط
1- حصل لبس عند كتير من الي قرا البوست وافتكر اني قلت ان كفاية هي من دعت للاعتصام وانا كلامي كان واضح ان كفاية اعلنت عن الاعتصام ويمكن الغلط اني ماوردتش في التدوينه كلمة محدده عن الموضوع .
2- بالنسبة لقيادات كفاية انا عاتبت عليهم لسبب بسيط انهم افشلوا الاعتصام بحركة غير ذكية بالمرة وهي حركة مظاهرة سلم النقابة ،والاسئلة الي بتجيلي لما افتكر الموقف ده
- مدام هما عارفيين وداعيين لاعتصام منظمه المدونين والنشطاء في التحرير ليه بيشتتوا قواهم في النقابة ؟
- العدد الي كان في النقابة 100 تقريبا او 150 ، لو كان جيه الاعتصام كان هيبقي شكله ايه ؟
- ليه كفاية اصلا تدعي لعمل مش هتشارك فيه ؟ وحتي لو مش هتشارك ليه تجهضه بحركه ذي ده ؟
- لو اسقطنا كل كلامي الي قلته ده علي مظاهره مجلس الشعب الي برده اجهضت والي كان داعي ليها كفاية هنلاقي موقف قيادات كفاية هو هو موقف الداعيين للاعتصام ده .
3- موقع كفاية نشر بالنص ان المظاهرة منظمها مدونين ونشطاء عالانترنت ومن الكلمه ده نفهم أن كل من نشر الدعوه هو من المنظميين لانه بالتاكيد ناشط عالانترنت ومدون وكون ان الدعوه منقوله من أسد فده امر طبيعي ذي البوسترات الي واحد بيعملها والكل بيتداولها .
4- اسئلتي الي حد لو جاوبني عليها واقتنعت ممكن اشيل البوست ده واكتب اعتزار كمان لاي حد وهي :
- مين المسول عن الناس الي اعتقوا دول ؟
- هل من العقل ان ندعوا ( ومش ننظم )لاعتصام او مظاهرة او عمل عام ونحن متوقعون افشاله واجهاضه ووقوع معتقلين فيه ؟
- ياتري هنتعلم من الي حصل ده ولا لسه برده ؟
5- الملاحظ اني ماوردتش ولا اسم بالبوست وده لسبب بسيط أني مش بنتقض اشخاص انا بنتقض افعال والاشخاص هم اشخاص احترمهم واتعلم منهم .
6- انا مليش اي علاقة بموضوع المقال الي اتنشر علي اسلام اون لاين ولا اعرف الصحفي الي كتبه اصلا ، وان كنت بنتقض الصحفي لانه وببساطة لم يظهر راي اخر ولم يورد اي راي لاي مدونة اخري ، كما انه استغل تدوينتي باسلوب اراه متحيز وغير دقيق .
------------------------------------------------------------------------------------
مشهد 1 نهار خارجي ميدان التحرير اما كنتاكي
- بقولك ايه يا جيمي مفيش حل تاني لازم نتقدم وندخل الميدان حتي لو كان عددنا صغير
= أوك ياعم أحمد
- طيب انا هقول للناس الي ورا ده وندخل مرة واحده
والتفت ورايا وفي لحظة لقيت جيمي جوه الميدان وحولية أكتر من 100 عسكري وبلطجي وخدوه هو واسد . بس هو ده الي حصل .
مشهد 2 : شارع طلعت حرب ليل خارجي ، مظاهره صغيرة من 100 أو 150 فرد أكتر من نصفها صحفيين تتجه باتجاه الميدان وفجأة تنقض عليها جحافل الامن المركزي وتشتتهها وتحشر المتظاهرين في سيارات الترحيلات أحاول أن ابقي بجوار ضحي وابو يوسف رفقائي ولكن لا أمل وافقد الاتصال بهم .
كفاية المشهدين دول ولا احكي تاني ؟؟؟
المشاهد ده طبعا منقوله من مشروع الاعتصام الي كان مقرر اليوم بميدان التحرير واتلغي كالعاده أو بالاصح اجهض .
انا بعد الي حصل مشيت ذي المجنون بشوارع وسط البلد ولما لمحت اللواء / أسماعيل الشاعر مساعد وزير الداخلية كنت ناوي أروح الطشه بالقلم عالاقل هروح مع زمايلي بدل ما انا بلف في الشوارع لوحدي بس وقفت للحظة وفكرت ... وهي الشرطة غلطانة في ايه ؟؟؟
هما ناس من وجهة نظرهم بيدافعوا عن نفسهم .. عن بقائهم ... عن وجودهم ... وعن أكل عيشهم .. لانهم وببساطة مرتبط وجودهم بوجود الرئيس في السلطة ، يبقي مينفعش نلومهم .
أمال نلوم مين ؟؟ ونسال مين عن كل الشباب الي اعتقل ده ؟؟؟
فكرت في السوال ده لفترة ولقيت الاجابة الي مكنتش عايز اصدقها في الاول بس لازم اصدقها
الاجابة وببساطة لازم نسال البهوات الي دعوا للاعتصام ده من غير ما يجهزوا خطط للاعتصام ولا طريقه لحماية المعتصميين ولا حتي جهزوا زجاجة مية للعالم الي هتعتصم ده .
لمفروض نسال قيادات كفاية الي مجاش ولا واحد منهم والي منسقها السابق هربان من امبارح خارج القاهره وعمل انه مخطوف وهو يا عيني كان قافل الموبيل عشان بيريح وهيجي القاهره كمان يومين وسايب الدنيا هنا تضرب تقلب علي حسب كلام موقع كفاية .
المفروض نسال القيادات الي ريحوا دماغهم وراحوا نقابة الصحفيين ركنوا عربيتهم جنبها واشتروا كارت بـ 5 ج لزوم الركنة ووقف له علي سلم النقابة ساعه عقبال ما رصيد الكارت خلص وقام مروح .
المفروض نسال أصحاب المدونات الرنانة ومديري المجموعات البريدية وقيادات شباب من أجل التغيير الي هرونا دعوات لحضور الاعتصام مع انهم مجوش اصلا وكل واحد فيهم كان مستخبي في جحر ذي الفار المبلول ، خايف لاحسن يظهر قال ايه بيدون .
المفروض نسال القيادي الكبير في شباب من أجل التغيير وابن المناضل ذو التاريخ الطويل الي مجاش الاعتصام اصلا وأكتفي بالقاعده في بيتهم قدام الكمبيوتر يكتب الاخبار ولما كل الناس اتاخدوا ملقاش حد يملية الاخبار فساب بس تنبيه علي مدونته ان الاخبار هتجدد بالرغم انه منزلش ولا خبر ولا راح الاعتصام.
المفروض نسال المدون العالمي الي مثل شباب مصر في دول كتير والي لسه يا عيني ملحقش يخلص كتابة عن رحلته الاخيرة والي كان قاعد في مكان ما قريب من الاحداث هو ولفيف من الصحفيين والمدونين يشربوا شاي ويدونوا وسايبين عامة المناضلين تحت بيتسحلوا مهنش عليهم حتي يبصوا من الشباك عليهم .
المفروض نسال المدون الي بيته فوق ميدان طلعت حرب والي منزلش اصلا من بيته ولا صحي من النوم الا الساعه 8 بالرغم من ان الاعتصام كان الساعه 6 والناس كانت يتضرب وتتسحل تحت بلكونته ، والساعه 9بداء يتصل بذوي المعتقلين عشان يقولهم قلبي معاكم ومتقلقوش صاحبكم اتاخد .
المفروض نسال فطاحلة المدونين الي كل واحد فيهم شغل خدمة توتر والي بتسمح ليه انه يدون برسايل قصيرة من تليفونه المحمول والغربيةان كل الي عمل كده مشفنهوش اصلا في المظاهره يبقي الاخ كان بيدون منين ؟؟؟ أكيد من الحمام او المطبخ .

المفروض نسال كل واحد دعي لاعتصام هو مش مخطط ليه ولا عارف هيتم اذاي .
دلوقت بس عرفت ليه بعض الفصائل المحترمة في المعارضة منزلوش الشارع لانهم ببساطة عالم بتحترم أتباعها ومويديها ونشطائها ومترداش انهم يتاخدوا بالاسلوب المهين ده ولما بينزلوا للشارع بينزلزوا صح وصح قوي .
الرسالة الي بوجهها هنا بوجها لكل واحد نصب نفسه قائد علي مجموعه الشباب الي اتاخدوا النهرده بقولهم فيها قول الرسول " كلكم راعي وكلكم مسول عن رعيته " وياتري هتعرفوا تناموا النهرده ؟؟؟؟؟؟
أكيد لا ... لو عنكم دم اصلا

الأحد، 25 مارس 2007

مظاهرة لايف

الكل خلاص بيستعد عشان ينزل ؟
أوك
اليكم الوضع الان من ميدان التحرير
مراسلنا هناك في الميدان - رانده صاحبة مدونة زنزانه - أكدت ان الميدان شبة السكنة العسكرية وشبهتته بيوم نكسة 67 مع ان علي حسب معلوماتي مكنش فيه جيش في الميدان سنة 76 ، المهم أن الامن المركزي وكلاب العادلي محاصرين الميدان ، يبقي نشد حيلنا ومنتاخرش ولو فسوه عن معادنا لان اليوم شكله هيبقي جااااااااااااااامد .
واشوفكم علي خير يا شباب

قبل أن نعتصم غدا

غدا هو الاعتصام الذي دعت له حركة كفاية الجميع لاعلان رفضهم التعديلات الدستورية ،والاعتصام من المقرر له ان يكون الساعه السادسة مساء الاحد بالحديقة الدائرية بوسط ميدان التحرير .
البعض وصف الاعتصام ده بانه اخر اعتصام أو مظاهره هتجري قي مصر قبل أن تتحول لعزب رئاسية ، وعشان كل ده انا قررت اقدم بعض النصايح عشان اعتصام بكره .
1- مبدأيا وقبل اي اعتصام لازم تشوف حالة الجو وخصوصا لو فيه بيات ذي بكره كده وانصحك طبعا شوف حالة الجو من موقع اجنبي محترم وملكش دعوه بالمصري لاحسن انت الجاني علي نفسك .
حالة الجو بكرة -علي حسب قناة بي بي سي للاحوال الجوية -هيبقي الجو مترب قليلا ودرجة الحرارة العظمي 22 والصغري 13 وهو نفس الجو بتاع يوم الاتنين كمان بالضبط يعني الجو بالليل هيبقي برد شويه عشان كده بننصح باللبس التقيل وياريت يكون اللبس من النوع الي مبيعملش زحمة عشان متتلخمش في الاعتصام وممكن تركز علي الحاجات الي بتدي احساس بالدفء وصغيرة الحجم ذي الطواقي الصوف والكفيات .
2- مننساش ان بكره هنبات في الميدان يعني نعمل حسابنا علي زجاجات المياة عالاقل ولو الاكل يبقي قليل جدا وعلي القد لانه لا يفضل ترك مكان الاعتصام عشان الشرب أو الاكل لان ده ممكن يعرضنا لمضايقات كلاب الداخلية .
3- شحن الموبيل برصيد كويس عشان تعرف تطمن اهلك وتتصل باصحابك ومننساش نشحن الموبيلات كويس عشان مفيش هناك فيش وانا عارف العالم النبيهه الي بتيجي معاها الشاحن والبطارية فاضية .
4- بلاش المسليات الكبيرة ذي الكتب والحاجات الي ملهاش مكان في اعتصام ذي ده وكبيرك اوي أم بي ثري أو وكمان وكفاية علي كده .
5- أحرص دايما تخفف من شيلك وحاجاتك لان حركات كلاب العادلي مش مضمونه .
6- للمرة المليون بلاش يا شباب وانتم رايحيين المظاهر الثورية ، والناس الي بتبقي حاطه شعار كفاية في كل حتة وبتبقي شبه سلطنية العدس -علي راي االمتر أحمد حلمي -لان ده ملفت للنظر ومستفز للشرطة وهي مش ناقصه .
7- دخول الميدان ياريت يعتمد علي نظرية التلامه والطرش ، يعني أمشي في وسط الشارع حاطط سماعات الام بي ثري في ودنك وماشي علي مهلك ، وداخل ناحية الجنينه عدل مش سامع اي حد بينادي لك أو حتي بيشتمك لغاية لما توصل .
8- بلاش نقف علي اطراف الميدان نستني بعض ونتكلم في الموبيلات لاننا غالبا بنتلم في الوقت ده .
9- للمرة الميون نظريتي بتقول ان اول 5 د من عمر اي مظاهره بيحددوا شكل المظاهره ياريت نخلي بالنا كويس .
10- بلاش بالله عليكم موضه نقابة الصحفيين ومش كل مرة نلاقي شوية عساكر واقفين نروح النقابة ... لا والي يفرس انه ساعات الناس بتروح هناك بناء علي طلب الامن منهم كده ، نلتزم بالمكان بالتحديد لاحسن بشرفي اقفلكم النقابة ده للابد .
كفاية لحد كده نصايح وربنا ييسر لنا بكره .

الجمعة، 23 مارس 2007

لماذا المقاطعة ليست هي الحل ؟

خرجت علينا المعارضة مجمعة علي راي واحد لاول مرة منذ فترة طويلة هذا الراي يتمثل في وجوب مقاطعة الاستفتاء علي التعديلات الدستورية يوم الاثنين القادم ، وتحدثت المعارضة سواء أخوان او يسار أو ليبراليين عن ان الاستفتاء سيزور وان المعارضة هي الحل الوحيد .
وانا شخصيا لا أجد اي محل لهذه الاسباب في وضعنا الحالي ، فوفق لغة الرياضيات التي ادرسها بالجامعه بسبب تخصصي في مجال الفيزياء فان التعديل بعد مقاطعه المعارضة للاستفتاء عليه سيمر بالتاكيد لانه لن ينزل للشارع الا الموافقين فقط وحتي ان بلغ عددهم بضعة افراد ، وهو ما يعني هزيمة المعارضة في معركة التعديلات الدستورية وهي التي تعتبر معركة مصيرية بالنسبة لهم ، ومن الموكد أن المعارضة تفهم هذا الامر جيدا .
أذن السوال لم طالبت المعارضة بالمقاطعة ؟؟
والاجابة تتلخص في ان المقاطعه ما هي الا لعبة سياسية لا تملك المعارضة في يديها الا الرضوخ لها لانها تعلم انه في جميع الاحوال ستمرر التعديلات لانها لم تستطيع لم صفوفها بسبب تعجيل موعد الانتخبات وتعلم ايضا ان الشعب المصري عامة لا يشارك في الحياة السياسية ولا يهتم بالنزول للتصويت ، وعند مزج هذان العاملان معا نجد ان المعارضة قررت اعلانها المقاطعه وفي يوم الاستفتاء و بالتاكيد كعادة الشعب المصري لن ينزل للتصويت فتقول النعارضة ان الشعب استجاب لدعوتها بالمقاطعه .
اللعبة من الناحية السياسية ذكية الي حد ما لكن من الناحية العملية وفرض الامر الواقع غير مجدية ، وانا اري ان المقاطعه وحدها لن تجدي ويجب ان يصاحبها عصيان مدني وحركة واسعه في الشارع لان تمرير التعديلات معناه الموت لاي صوت معارض في مصر في ظل قانون الارهاب والغاء الاشراف القضائي عالانتخبات .
وبالرغم مع تعارضي مع مبدا المقاطعه لكنني ادعوا كل الناس للمقاطعه لان الاكثرية اجمعت عليه ونزول البعض للتصويت ا سيعمل علي تفتيت قوة المعارضة الضعيفة اصلا ،وحسبنا الله ونعم الوكيل في من ظلمنا .

سبق تدويني: بالصور المؤتمر الصحفي لنواب المعارضة



في ثاني تعاون بين يالالاللي ومقاومة

ننفرد بنشر صور الموتمر الصحفي الخاص بنواب المعارضة حول التعديلات الدستورية

ابتدي منين ؟؟ الموضوع كبير .

خلاص ابتدي من الاول

النهرده 19/3 والمكان مجلس الشعب

بالليل بالتحديد الساعه 9 كنت انا هناك عديت عالنواب المعتصميين في الجنينه واخدت حديث من النائب علي فتح الباب من كتلة الاخوان حولين الوضع وقالي انهم داخليين دلوقت يصوتوا عالتعديل فصعقت وقلت له اذاي ده لسه بكره قالي لا قدموه .

بعدها بساعه تم التصويت فعلا ووفق علي التعديات الدستورية ونواب الوطني الي كان لمهم أحمد عز قبل التصويت بساعه بالموبيل خرجوا عن شعورهم من الفرح - فاكريين انهم كده رضي عنهم الشيطان الكبير مبارك - قعدوا يهتفوا بالروح بالدم نفديك يا مبارك وواحد خدته الجلالله وهو النائب الصعيدي الي عر كل الصعايده النائب سابقا والفنان حاليا فارس الجعفري نائب سوهاج وقام رقص فوق البنش بتاع المجلس - مش عارف هو اسمه بنش ولا دكه - ولينتهي بهذا المنظر الللين أخر مشاهد ليلة من اسود ليالي المحروسه .

النهرده بقه 20/3 والمكان ميدان التحرير بس المره ده الصبح .

واقف مستني ساره محررة مدونة مقاومة عشان نروح نغطي مظاهره دعت ليها كفاية قدام المجلس وقت عقد النواب موتمرهم الصحفي ضد التعديلات وحصلت ليا مغامرة صغيرة هتبقي موضوع تدوينه تانية وده قبل ما تيجي ساره واتاكدت برده ان الحاج جرجس اتخطف من الامن واستعديت لمظاهره محدش عارف ممكن توصل لايه وهيكون شكلها ايه .

جت سارة بالسلامه متاخره وبسبب تاخيرها مبقتش انا خامس جيمي وجرجس وصحبتهم الي اتاخدوا يومها وربنا ستر ، في الطريق قابلنا ابو يوسف الصحفي بعشرينات وتوجهنا لمجلس الشعب لقينا الدنيا متكردنه من القصر العيني وشارع مجلس الشعب مقفول لفينا من خلف مركز دعم واتخاذ القرار ودخلنا شارع الفكلي الي كان لبش جدا وشفنا 4 من قيادات كفاية واقفين هناك تايهيين مش عارفيين يعملوا ايه وبيتصلوا بالنائب حمدين صباحي بس هو مقدرش يسيب الموتمر ويطلع لهم .

قعدنا نلف حولين المكان وقررنا نطلع عمارة نصور من فوق لان مكنش ينفع نصور من تحت قدام كلاب الداخلية بس في الطريق لقينا وزارة الصحة فاتجيين لها باب صغير من ناحية شارع الفلكي وقافليين الباب الرئيسي ودخلنا الوزراة مش عارفيين احنا داخليين ليه بس قلنا نجرب مش هنخسر حاجه ، واتمشيتا في الوزراة لحاد الباب الرئيسي الي بيفتح علي شارع مجلس الشعب والي في وشه الموتمر الصحفي واستينا لما عربية كانت خارجه وواحده داخله واستخبينا وراهم وخرجنا من الوزارة علي شارع مجلس الشعب ومرة واحده بقينا جوه الموتمر الصحفي ولهنا يسكت الكلام وتتكلم الصور .

بدا الموتمر بتجمع الصحفيين

والنواب رصوا نفسهم وعالبركة بدانا

قال كل واحد فيهم كلمه اتكلم عن رايه في التعديلات الالمعيه

والكل اتكلم عن الي حصل وراء هذا الباب الفترة الي فاتت

مش عارف ليه طول عمري ان العلم ده محطوط هنا غلط ذي ما هو محطوط فوق قصر العروبة برده غلط

سبحان الله

الامن برده كان هو نجم الحدث الاول تقولش الي شغال ده مظاهره مش موتمر صحفي

طبعا انا هنا مصور الكاميرا بتاعه الزميل لانها تحفة مش النواب

بديهي ان النيل للاخبار مش جاية تغطي الموتمر ... تقريبا كانوا ناسيين حاجه جوه وجايين ياخدوها

مصور من النوع العالي مكانا وكاميرتا

أبو يوسف محرر عشرينات في وقفة قتالية يستعد لاقتناص صورة

سارة محررة مقاومة وشريكتي في السبق التدويني

وكعادتها ... منهمكه في العمل

ملاحظه : كان منظرنا غريب جوه الموتمر بسبب سننا ولبسنا الي كان لبس مظاهره مش لبس صحفيين خالص

نائب الوفد عايش الكلمة بتاعته

العلم طول الوقت كان لافت ذهني مش عارف ليه ؟؟؟

ده بقه اسمه النائب علاء عوجه من الوطني ومواله موال

البيه النائب كان حاضر الموتمر ومعاه نائب تاني برده وطني وكانت مهمتهم عمل شو اعلامي وتبويظ الموتمر

البيه النائب صرح لوكالة الانباء الفرنسية وحظه الاسود ان سارة كانت راميه ودنها " أن هولاء المعارضيين ليسوا مشكلتي وهم ليسوا موضوعيين وكل مشكلتهم قانون الارهاب ولا اعرف لماذا ؟ فهو مطبق علي الارهابي فقط ، فالارهاب ليس له وطن " ومشربش الشاي اشرب ازوزا انا

أ

اكيد مكنتش بتساله نفسك تسمع ايه النهرده معانا

وده بقه الصحفي المزقوق

البيه المحترم افتعل خناقه مع النواب وكان عايزهم يفضلوا كلهم ال 100 نائب واقفيين قدامه لحاد ما سعادته يتكرم عليهم بسوال ويختار الي يجاوب عليه ويرد

بصراحه كان اليوم سببوبة للاعلام

البلتاجي ... نائب يقطر وطنية

نواب بتتمشي عالرصيف

بهوات الامن في صورة جماعية مع كتف ابو يوسف

الصحفي الارزقي مع النائب الوطني

فيه واحد أمن هنا ؟؟؟

عرفت تطلعه ؟؟؟

الامور ابو بلوفر اسود في ابيض وشعر مسبسب

الشاعر بيمسي علي بور سعيد

الباشا مصور امن الدولة مندس وسط الصحفيين وصور كل همسه في الموتمر بس علي مين معرفش يجيبني بس جاب العيال الي معايا

ده نائب الوطني التاني الي حضر الموتمر في صورة جماعية مع الصحفي اياه

وده هو وهو قرفان من نفسه

عيبد المنعم محرر مدونة انا اخوان ودخل الموتمر بصفته الصحفية كمراسل لاحد القنوات الفضائية

تابع الامن

وعلي فكره

كانوا اكتر من الصحفيين وكانوا واقفين وسط الصحفيين

الباشا اللوز كبير الليلة عملت المستحيل عشان اعرف اسمه بس كان درب من الخيال

واضح ان الباشا هو اللهو الخفي بعينه

وده صورته وهو بيشرب السجارة المارلبولو الاحمر وماسك الموبيل الان 73ونسيت أجيب الجزمة الايطالي البني

نائب يحاور صحفي بعد الموتمر

وده عيل كان بيصبح علينا بعد الموتمر من شباك مدرسته بس دمه كان ذي العسل

تفتكروا الواد ده ممكن يسامحنا لما يكبر ويشوف الي جري لبلده في عهدنا وسكتنا عليه ؟؟؟؟

أنا عن نفسي مفتكرش

ملاحظة :- سارة وابو يوسف كانوا نجوم التقرير الي نشرته الجزيرة علي الفضائية بتاعتها حول الموتمر وانا يا دب ظهرت بظهري وتقريبا سارة وأبو يوسف ظهروا اكتر من لينا الغضبان المذيعه

لمشاهده الفيديو

ادخل علي الرابط

http://www.aljazeera.net/Channel/KServices/SupportPages/ShowMedia/showMedia.aspx?fileURL=/mritems/streams/2007/3/20/1_681991_1_12.wmv




10 تعليقات
في 22,آذار,2007 - 12:59 صباحاً, مجهول كتبها ...
احمد ، انت يابني تمسك الكاميرا و تسرح و بعدين المرة دي بالذات مكنش فيه تحالف بيني و بينك انت صورت صور رائعة بجد الله يكرمك

سارة نور الدين




في 22,آذار,2007 - 01:09 صباحاً, أحمد عبد الفتاح كتبها ...
لا كان تحالف غصبن عنك لاننا كنا مبيتين النية علي التغطية قبلها بيوم

ونسيت في البوست اوجه الشكر لصديقة سارة الي شفتها مرة واحده طياري مني

مني بنت قبطية بس ب 100 راجل وهي صاحبة الكاميرا الي عملنا بيها الشغل ده وشغل نظاهرة الخميس ويوم الجمعه من نياابة الجلاء وعلي فكره كاميرتها لسه جديده ومستعملتهاش تقريبا وتمنها غالي ورغم كل ده وافقت تسلف الكاميرا لاتنين مهافيف ذينا عشان مغامرة غير مضمونه العواقب

شكرا يا مني وسلميلي عليها يا ساره




في 22,آذار,2007 - 01:15 صباحاً, مجهول كتبها ...
يوصل يا اخوية ربنا يسهل ، و بعدين منى نادر يا اخوانة مش مسلفاني الكاميرا و بس دة انا بقولها خدي الكاميرا تقولي لأ خلها معاكي و والله لو شافتك وانت كاتب قبطية يا احمد هتتروق ، منى من النوادر اللي شفتهم في حياتي انسانة مصرية بجد معندهاش حكاية الفوارق دي خالص ، و اسكت صحيح مش عرفت الكاميرا دي بكام:

بيني و بينك و متقولش لحد الكاميرا دي بـ 2700 جنيه مصري فقط لاغير

سارة نور الدين




في 22,آذار,2007 - 01:30 صباحاً, أحمد عبد الفتاح كتبها ...
هو ان شاء الله هنقلب الصفحة ده رغي بينا ونميمة علي مني ؟




في 22,آذار,2007 - 01:43 صباحاً, ميت كتبها ... (غير موثّق)
والله يا أحمد ، العلم بتاع مصر وهوه بيرفرف ، نفس الشعور بتاعي النهارده ، وانا شايفه من العرابيه ، تقريبا نفسك وصفك

أنا أول ما شفته عينيه ما إتشلتشي من عليه لحد ما بعد عن عيني ، بس طول ماهوه كان علي عيني مارضاش يقع وفضل يرفرف

وأول ما لاحظته ، كان الكادر حلو جدا ، وقلبي كان مليان خوف وحنان ، وكانت عايز أقوم وأحيه

ولما بعد عيني قلبي كان هيقع




في 22,آذار,2007 - 01:48 صباحاً, أحمد عبد الفتاح كتبها ...
ميت

هي كده

نحبها ونلعن ابوها بعشق ذي الداء





في 22,آذار,2007 - 07:04 صباحاً, إسلام حنفى كتبها ...
البقاء لله فى مصر والمصرين العزاء 26/3/2007





في 22,آذار,2007 - 09:23 صباحاً, zenzana كتبها ... (غير موثّق)
يا مفتري لحقت شقط السجارة المرلبورو؟ وكمان الموبيل والجزمة البني الايطالي؟

يا واد انت ف شعبة ايه بالظبط؟


مخابرات؟

يخرب بيتك

انا دلوقتى متأكدة ان الاخوان هيوصلوا للحكم

وهيكون عندهم اقوي جهاز مخابرات.

ههههههههههههههه

علي الله مطلعوش مخابراتكم ساعتها علينا

تحياتي تغطية هايلة اجدع من مليون جريدة وقناة




في 22,آذار,2007 - 09:50 صباحاً, مجهول كتبها ...
انا ابو يوسف


والله يا احمد ويا سارة

كل الي احنا عملاناه لازم نعمل


زية واكتر


لكن يوم


الاحد والاثنين

يلا

ورونا الشغل




في 22,آذار,2007 - 09:59 صباحاً, أحمد عبد الفتاح كتبها ...
العزيزة زنزانه

معقول لسه معرفتيش انا قسم ايه في الاخوان ؟

عيب عليكي

--------------------------------------------------------------------------------

وانت يا ابو يوسف هتشتغل لوحدك الاحد والاتنين لاني هبقي في اسيوط وسارة مش نازله اصلا

حظ سعيد ولو اتاخدت علي رنات

ولو لقيت التحش اياه ابو ان 73 بتاع امن الدولة ابقي سلم عليه وبوسه من هنا ومن هنا

ولو لقيت احمد بيه التحش التاني ابقي قله احمد الي صورك من فوق كوبري الجلاء بيدحرج التماسي وهو في اسيوط وممكن تكلم اشرف بيه أبو المكارم هناك لو عايزه ضروري

واقترح انك تعمل يفط عليها صور البهايم ده عشان يبطلوا يتنططوا علي الي خلفونا

شارك مع اصدقائك

Share |