الجمعة، 23 مارس، 2007

ياما في السجن عظماء



يمكن فيه ناس منك بيحبوا الاخوان وناس مش بيطقوهم ، ناس بتحب المعارضة وناس تبع الحزب الوطني الحاكم - قضاء ربنا - يمكن نختلف بس الي بيجمعنا في الاخر حب البلد الجميل ده مصر .

الي هكتبه دلوقت ده ملوش علاقة انا بحب مين وبكره مين الي هكتبه ده عشان انا بحب مصر وبس .

في الفترة الاخيرة اعتقلت الداخلية عدد من قيادات الاخوان المسلمين بتهم قديمة ذي الانضمام لجماعه محظورة وعقد اجتماعات سرية . ....الخ - قال يعني لسه مكتشفين الاكتشاف الالمعي ده دلوقت - وشوية تهم جديده ذي غسيل الاموال - وانا مستعد احلف ان الضابط الي قبض عالناس ده ميعرفش يعني ايه غسيل اموال اصلا - وكالعادة دايما جت الاعتقلات في قيادات الجماعه في فئة دكاترة الجامعات - مش عارف ليه علي طول دكاتره كده - وذاد عليهم فئة رجال الاعمال المرة ده .

المهم انا دورت وراء الشخصيات المعتقلة وبجد انا صعقت من الي عرفته .

انا هتكلم عن شخصيتين بس من المعتقلين الاول هو الدكتور خالد عبد القادر عوده استاذ الجيولوجيا بكلية العلوم جامعه اسيوط والغريبة اني مكنتش اعرف عنه حاجه بالرغم من اني طالب في كلية العلوم بس فيزياء وكنت فاكره دكتور عادي من بتوع المذكرة والامتحنات والمحاضرات المملة والكلام ده بس لما دورت اكتشفت غير كده .

أذن فمن هو خالد عبد القادر عوده ؟ سيبكم من انه ابن الشهيد عبد القادر عوده اول شهيد في صوف الجماعه والقيادي التاريخي فيها وخلينا فيه هو شخصيا .

الدكتور خالد هو نائب رئيس فريق بحثي دولي يعمل تحت اشراف " اللجنة الدولية للاستراتجرافيا " - وطبعا محدش يسال يعني ايه الكلمه ده ؟ بس متقلقوش مش شتيمة - من الاخر يا جدعان الراجل ده طلع مشكلة من مشاكل الزمن .

د خالد اكتشف اكتشاف جيولوجي كبير جدا في الاقصر كان الاكتشاف ده بتتنافس عليه مصر واسرائيل واسبانيا وكوبا وكل واحد عايز يثبت انه في ارضه وبالرغم ان ميزانية البحث العملي في اسرئيل اضعاف ميزانيتنا بمئات المرات بس د/ خالد لم يياس واشتغل من عام 96 ولحاد 2002 لا والاجمد ان الدولة كرمته وبالتحديد د/ مفيد شهاب وقال عليه نابغة من نوابغ مصر واكد لكلام ده بعده د/ نظيف وقبل ما يعتقلوه بكام يوم جه علماء من كل انحاء العالم لسببين 1- انهم يكرموا العالم الفذ ده والتاني انهم يبداو شغل ودراسات في اكتشاف د/ خالد . بس تقول لمين والوفود ده كلها قاعده مستنية في الاقصر وصول د/ خالد وصلهم ان د/ خالد اعتقل ليه ؟ عشان اخوان ، ومش عايز احكي لكم عن الي دار بعد كده وفود دول رجعت بلدها تاني وهي بتسب وتلعن الداخلية المصرية والنظام المصري والهبل المصري وده كان وفد بلجيكا وانجلترا اما بقه المريكان والفرنسين فهما لسه قاعدين في الفندق مستنين الفرج بخروج الدكتور - ابقوا قابلوني - المهم ان كل وفد عمل لمصر في بلده فضيحه بجلاجل .

الدكتور خالد فوق كل ده عنده 3 مصانع واحد للخسب وواحد للملابس وواحد للبلاستك ده غير شركة لتجارة مواد البناء وكل المصانع ده فين ؟ في اسيوط افقر محافظه في مصر الي مبارك كل شوية هو ونظيف يقعدوا يبوسوا ايد رجال الاعمال عشان يستسمروا ولو 100 ج حتي في الصعيد وطبعا محدش بيعبرهم لان ده الصعيد يارداله .

يعني من الاخر الراجل الي في السجن ده واحد من المع العقول المصرية وانجح رجال الاعمال وبعد كل ده يعتقل عارفين العيب فين ؟

اكيد مش في النظام لانه اتعود علي كده العيب في د/ خالد لانه فضل قاعد في البلد ده ومعملش ذي زويل وغيره وكت علي بره .

الراجل التاني بقه هو د/ خيرت الشاطر وخيرت الشاطر ده بقه محدش يعرف عنه كتير لانه مختفي دايما لحاد لما طلعت علينا الدستور من 4 اعداد كده بمقاله لواحد شيوعي تروكستي حكي فيها عن زميل دراسته في هندسة اسكندرية د / خيرت الشطر وصدقوني انا مبقتش مصدق .

خيرت الشاطر- كما يصفه كاتب المقال- زعيم طلاب اسكندرية وقائد انتفاضة طلاب مصر بعد النكسة والاول علي دفعه علي طول الخط وفوق ده وده هو رجل اعمال فوق الوصف كل شوية الحكومه تقفل له شركاته لكن هو يبنيها من الاول ويبقي اقوي واغني وهو صاحب شركة سلسبيل اول شركة برمجيات بجد في مصر والي اتقفلت طبعا لان خيرت اخوان .

انا بجد مش قادر احكي كل الي عندي لانه كتير قوي وايدي وجعتني من الكتابة عالكي بورد وعشان كده انا هكتفي بكلمة صغيرة هقول فيها النظيف مينعش يعيش في بيئة وسخه وعشان كده ناس امثال د/ خالد و د/ خيرت مكنش ينفع يقعدوا بره السجن . عقبالنا يارب .




في06,آذار,2007 - 09:50 صباحاً, مجهول كتبها ...
الحقيقة ان الدكتور خالد عودة هو اكثر مما ذكرت في مقالك اسأل طلبته زملائه وكل من تعامل معه ،هو بدون مبالغة اكثر انسان احترمته في هذا العالم

ليست هناك تعليقات:

شارك مع اصدقائك

Share |