بصراحة يا جدعان انا كاتب الكلام ده لواحد من قرائي الاعزاء قوي وهو طبعا عارف نفسه ، القارئ العزيز ده قالي انه مكتئب وراح لدكاترة نفسين وانهم لم يفيدوه وان كلامي عجبه وكلام من ده ، وعشان كده انا كاتب التدوينه ده ليه .
النهرده هنتكلم عن مرض العصر والظهر والمغرب كمان ، هنتكلم عن المرض الي ممكن يقتل شعب مش شخص وبس ، هنتكلم عن محطم العزائم ، مذل الجبارين ، هادم الحضارات ، طبعا مش هنتكلم عن امريكا ... لا احنا بنتكلم عن الاكتئاب .
علي فكره كل الكلام الي فات ده مش كلامي ده كلام اساتذه الطب النفسي المعقدين ، والي باكلوا عيش من وراه ، أما انا فليا راي تاني .
ربنا مخلقش حاجه الا وليها لزمه في الدنيا سواء كانت صحة او مرض حاجه حلوه او وحشه حتي لو كنا احنا مش شايفين ليها لزمه - بالمناسبة مرة قضيت فترة حوالي اسبوع بدور عن فايده الذباب في حياتنا ومتتصورش اكتشفت نتائج جامده اذاي بس مش وقته - .
المهم ان كل شئ وله فايده حتي الاكتئاب ومتبصليش كده ايوه مفيد .
وتعالوا نحسبها
الحيا ةلو ضحك علي طول تبقي حياة مملة ولو تكشيرة علي طول تبقي أكثر ملالا ، البني ادم محب للتغير ميحبش حاجه واحده وبس حتي لو حلوه ، لو واحد مثلا غني طول عمره هيزهق ويقول يارب حبة فقر ... وهكذا .
الاكتئاب في مرحلة ما ليه بيبقي ده وظيفته انه يعرفنا قيمة الضحكة عشان لما تيجي تيجي من القلب قوي تهز الدنيا وفي نفس الوقت بيدينا فرصة عشان نعرف نفكر في الحياة ماشية اذاي ونعيد تحديد اهدافنا ونراجع نفسنا .
بس لما الموضوع يذيد والبني ادم يستحلي الاكتئاب يبقي مرض ، وعلي فكرة أنا قاصد موضوع يستحلي ده ، ومحدش يزعل مني احنا الي بنعمل في نفسنا كده تبقي قدامنا الحياة حلوه وجميلة وناس كتير بيحبونا وبنحبهم ونسيب كل ده ونقعد نفكر في الشخص الفلاني الي سابنا والي باعنا - واغاني ايهاب توفيق الحمضانه ده - نسيب كوباية كبيرة قوي ملايانه ونبص لاخر 1 مم فيها الي مفهوش ميه ، نسيب ناس هيموتوا عشانا عشان ناس ولا تستاهل وهديك الدليل .
فلنفرض جدلا انك اتعس مخلايق الارض قاطبة - حلوه قاطبة ده - وان الحياة هباب ابوك ميت وامك في الجيش أخواتك ماتوا في العبارة وعيلتك في قطر الصعيد ، عليك ديون لكل خلق الله قعدت 2416513 سنة في جوانتموا ويوم ما جالك عقد عمل بره حالك عقد عمل في الصومال وقامت الحرب هناك وامريكا خدتك جوانتموا تاني 58468 سنة وحط تاني كل الي ممكن تتخيله من اسباب التعاسة والشقاء والاكتئاب .
عارف بعد كل ده نسيت اهم حاجه تنسيك كل ده .
عارف ايه هي ؟؟؟
واحد بيحبك قوي مستنيك بس انت ولا واخد بالك ... بيناديك وانت ولا هنا- عامل عبيط يعني - واحد عمل لك كل شئ حلو في الدنيا وانت حتي مشكرتوش علي عمله معاك ... واحد مستني منك كلمة عشان يزيل عنك كل ده .
عارف مين ده ؟؟؟
ده ربنا وربنا وبس
هو الوحيد الي في ايده حل كل ده ولو الواحد مش هيعيش الا علي حبه تبقي الحياه اخر نعنشة وجمال ولذاذه
مرة واحد بحبه قوي قالي مره " اذا اصبك هم فلا تقل يارب لي هم كبير ولكن قل ياهم لي رب كبير "
بصراحه انجز ففلحس - معرفس فلحس ده يعني ايه - من الاخر جاب التيته وعرف ديتها
عندك اكتئاب ... مضايق ... الدنيا اقل من خرم ابرة ... مش لاقي الضا ... حسني مبارك بيحكمك - مفيش طبعا اكثر من كده هم - ...
الحل عندي
روحله كلمه حبه بس حبه بجد هتلاقيه معاك
اقولك وصفه انا مجربها
بالليل والدنيا ضلمة ... والديابة بتعوي ... والمطر بيمطر ... معلش دخلت في مسرحية تانية
بالليل بعد ما الناس تنام اتسحب بس مش للمطبخ لا قوم اتوضا وضلم الدنيا وقبل الفجر بساعه صلي ركعتين مش مهم تقرا قران كتير المهم اسجد وسيب نفسك انت وربنا وبس أحكيله اشكيله عيط له مفيش ممنوع كله مباح ده الي خلقك انت قدامه كيوم ولدتك امك وصدقني هتخلص الركعتين دول بني ادم تاني ومتنساش تدعيلي .
مش لازم تصلي اقعد في البلكونه احكيله اكيب له حتي جوابات مش مهم المهم روح له وحبه عشان تتحل كلا مشاكلك .
