ناس كتير
كلهم مبحلقين للحيطه وبالتحديد للساعه
ومره واحده وفي صوت واحد "5...4...3... 2...1 " لتتقابل عقارب الساعه الثلاثة عند رقم 12 والنور يضلم عشان ينور تاني بعد دقيقه بالضبط .
اللي حكيناه ده بيحصل كل 365 يوم في اماكن كتير جدا من العالم اللي حكيناه ده طقوس استقبال السنة الجديده .
بس السوال الي سالته لنفسي ايه الفرق قبل ما النور يضلم وبعد ما وبعد ما ينور تاني ؟ أو ايه الفرق بين الساعه 11و 59 د و 59 ث يوم 12/ 31 والساعه 12 و ثانية واحدة يوم 1/1 ؟
الجواب الطبيعي اننا في سنه جديده
بس يعني ايه سنة جديده ؟
يعني الارض اتمت دورة كامله حولين الشمس .
طيب وده يعنينا في ايه ؟ طب خد ده الاض بتم دورتها كل 356 يوم وربع مش 356 بس وده الي بيعمل السنة الكبيسة كل 4 سنين .
اكيد في حد بيقول انت عايز توصل لايه ياعم الحج ؟
أنا عايز افهمكم يا شباب أن مفيش فرق بين يوم والتاني ولا سنة والتانية ولا حتي قرن والتاني والدليل اننا في احتفلات الالفية والي الوزير الفنان بعت جاب واحد فنان ذيه برده من اخر الارض - من فرنسا - واداله من فلوسنا عشان يوجع دماغنا بحاجات محدش فهم منها حاجه وقال ايه أحتفال الالفيه .
طيب ايه الجديد ؟ ايه الي حصل لما دخلنا الالفية ؟
بصراحه لا جديد
ورغم اني فيزيائي ومومن ان الزمن هو المطلق الوحيد وان كل شئ نسبي ذي ما قال المعلم أينشتين بس اينشتين مجبش سيرة تقسيم الزمن لايام واشهر وسنوات وقرون ... الخ .
طيب يعني لسه السوال موجود ايه لزمه الناس الي كانت مبحلقه والنور والشغل ده ؟
طبعا كالعاده هكح كحتين - عشان الكلام مهم - وهتحفكم بواحده من اجدد نظرياتي الا وهي نظرية الريستارت .
والريستارت للي ميعرفوش هو زرار في الكمبيوتر بيعيد تشغيله من جديد وغالبا لما بيكون واحد لخمه خالص وعك الدنيا عالكمبيوتر او الجهاز هنج يقوم يدوس عليه ويريح دماغه عشان يشتغل من جديد .
ونظرية الريستارت عند البني ادمين باختصار هي اننا بنقسم الزمان لازمان اصغر نبتدي عندها من الاول ونراجع نفسنا وهديكم مثال .
البني ادمين - الي هما احنا - بيقسموا الزمن لقرون وبيحطوا لكل قرن شوية اهداف ذي الحاجات الي كانت المجلات العلمية هريانه بيها وبتتكلم عنها ذي العربية الي بتطير ... الخ وعند كل اول قرن بيراجعوا نفسنا عملنا ايه وهنعمل ايه .
والقرن بنقسمه لسنين وعلي اول كل سنة البني ادم بيقف الساعه 12 يتمني عام جديد وسعيد احسن من الي قبله .
وبنفس الطريقه بيقسموا السنة لشهور واول كل شهر بيقبضوا مرتبتهم ويخططوا لشهر كامل ويشوفوا الملاليم الي بيقبضوها هتكفي اذاي ؟
والشهر بيقسموه لايام واول كل يوم لما البني ادم يصحي يبتدي يوم جديد بيتمني خلاله انه يحقق انجازات احسن من الي قبله .
وهكذا يفضل البني ادمين يقسموا الزمن والتقسيمات نوعين نوع عام لكل الناس ذي السنين والايام وتقسيم خاص بكل بني ادم ذي تاريخ ميلاده ويوم جوازه او حتي يوم وفاته .
باختصار شديد عند اول كل مرحلة مهما كانت كبيرة او صغيرة بيجاوب البني ادم علي ثلاثة اسئلة انا رايح فين ؟ انا فين دلوقت ؟ انا هروح اذاي ؟ - الثلاثة اسئلة اياهم فاكرينهم ؟- وطبعا الاجابات تختلف من موقف للتاني ومن زمن للتاني ومن تقسيم للتاني .
هاه يا ساده عرفتم فايده الناس الواقفه بتبحلق والنور والحاجات ده ؟
يبقي مش فاضل غير اني اقولكم كل سنة وانتم طيبين وعام سعيد
ونسيت اقولكم اني احبكم في الله 
ليست هناك تعليقات:
إرسال تعليق