الأربعاء، 28 مارس 2007

هنغني ضد التعديلات

المقاومة انواع
والاعتراض ليه مليون طريقة ، ومن رايي ان الشعب يتقاس نسبة تحضره بالطرق الي بيعترض بيها
المهم ان اليوم اثبت طلبة جامعة حلوان ( كعادتهم ) انهم من الطلبة المتحضرين ومتحضرين قوي كمان
طلاب حلوان اصحاب يوم الكوسة والملحمة المشهورة بتاعته الي اترفد علي حسها 29 طالب لممد وصلت لثلاثة سنوات النهرده اتحفوني بعمل اقل ما يقال عنه انه متحضر وراقي ورائع .
اليوم أقام طلاب الاخوان المسلمين بجامعة حلوان مهرجان الفن الاسلامي وكان تحت عنوان ضد التشويهات الدستوريه .
علي انغام الدفوف وصقفة الشباب غني الشباب ضد أنتهاك حريتهم ... ضد مصادرة ارادتهم ... ضد بيع الوطن من غير تمن لمبارك وعيلته ..ز ضد رئيس جمعتهم الي فصلهم وشردهم وفي عهده كانت اعلي مصاريف جامعه في مصر هي مصاريف جامعة حلوان .
غير الغناء كان فيه التمثيل والاسكتشات الي كانت تجنن وكان فيه المسابقات والحبشتكنات (وخناقات مع الامن كمان ) الي خلت اي حد مجاش اليوم ده بجد فاته كتييييييييير .
هسيبكم مع الصور هتعرف تتكلم احسن مني


كتير هيسالني هما بنوا المسرح ده من غير الامن ما ياخد باله ؟؟؟
وللاخواة السالين هرد اخر البوست

3 ساعات في الشمس بس كانوا 3 ساعات يستاهلوا بصراحة



الشراكة والتعاون ضد الشمس


ده بقة الفرقة ... وانتم عارفيي ن الفرقة صعبة اذاي

ان شاء الله هنشر لكم فيديو من الحفلة لاول ما الاخ ابو قميص بمبة ده يديني السي دي
وعلي فكره هو مش مصور الامن مصور الامن جايب صورته بعد شوية





الحميل في الحفلة انها كانت لمة الكل
من اول الي كاتب علي كشكوله بحبك وحشتيني

لحاد بتوع المصاحف







حين تعانقت الايادي ... في حب مصر


ده 6630 كاميرا 1.3 ميجا بيكسل

هو الطبيعي بتاعه كده مكشر ... بس الحفلة كانت حلوه والله


دلوقت بقه صور الامن وللاسف مش انا الي مصورها لاني مكنتش فاضي اصور ساعتها

ده مصور الامن الي كان معاه كاميرا سوني هاند كام من ام الفين وشوية

وده وهو بيعاياين الصيده بتاعته

وطبعا قامت خناقة



بس سيبك ساعة الحظ مبتتعوضش

كتير سالوني بصفتي خبير في الشوون الامنية والتنظيمية يا استاذ أحمد هو المسرح والساوندات ومولدين الكهرباء والهلمة ده دخلت الجامعه اذاي ؟ وكان من الي سالوني زميلة صحفية في أحد الجرائد .
وللسادة المتسالين احب ارد عليهم واقول
الموضوع بمنتهي البساطة ان الحاجه بتدخل بنظام طرق الحكم في افرقيا
وطرق الحكم في افريقيا بتنص ان الي يصحي بدري يحكم البلد
وهو ده الي بيتم
طلاب الاخوان بيصلوا الفجر ويتكلوا علي الله يلموا بعض بره الجامعه ويدخلوا بالحاجه
طبعا الساعه 6 لا بيبقي الامن المركزي جه
ولا البهوات الضباط وحرس الجامعه جه
ولا اي حاجه
يادوب عسكري غلبان يمسك الاسلكي ميلقيش حد يقوله حاجه
كفاية كده عليكم نصايح امنية .
وبرافو ياشباب حلوان

هناك 7 تعليقات:

غير معرف يقول...

منك لله يا احمد لازم تنشر الـموضوع اديك خلتني اندم اني مرحتش في اليوم ده

و شكراا على التغطية الممتازة و على الصور الرائعة

أحمد عبد الفتاح يقول...

ومنك للي كلت دراع جوزها يا عم ماجد
ده علي فكره وظيفة من وظايف الصحافة
انها تشعرك بالندم

غير معرف يقول...

هو انت بتعرف احداث جامعة حلوان ازاى
احنا فى انتظار الفيديو
ميرسى اوى على التغطية الجامدة
بس بجد بتعرف ازاى

أحمد عبد الفتاح يقول...

العويز مجهول
بالرغم من ان مصادر الصحفي تعتبر سرية
وبالرغم من ان قانون النقابة -هأأو يا نقابة - بيكفل لي عدم ذكرها
بس هعلمك حاجه للزمن
عشان تعرف اي حدث في البلد البوليسي ده تربط ومع واحد من اتنين
يا منظم الحدث يا الامن لاننا في بلدنا الزاخر مفيش عيل بيتولد الا لما الامن ياخد خبر ... ممكن بعد ما الواد يبقي عنده عشرين سنة بس لازم ياخد خبر
هو ده الي حصل في جامعة حلوان
الامن خد خبر بس بعد ما الي تم تم
فانا مربط مع واحد من اتنين
يا الطلاب المنظمين يا الامن
شوف انت بقه أنا مربط مع مين فيهم

غير معرف يقول...

حلوة التغطية دي بس قولي يا احمد افندي اظن ان عندك كلية عملية ولازم تخلص بقي ولا ايه

سكوت هنصوت يقول...

الصور فعلا اكتر من رائعة...و معبرة جدا..افتكر اني حضرت في جامعة القاهرة عرض مشابه نظموه برضة الإخوان ...كانوا مقدمين فية مسرحية رمزية رائعة..ومجموعة من الإسكتشات والأغاني الرائعة..بس في جامعة القاهرة مش محتاج تيجي بدري .. الراجل الي عالباب ممكن يدخلك بفيل لو عايز بس تكون محضر خمسة جنية حلوة كدة..ويا سلام لو معاك عربية .. هتوفر الخمسة جنية...

أحمد عبد الفتاح يقول...

الأخ/ت العزيز/ة سكوت هنصوت ( نفسي اعرف هتصزتوا علي مين )
تحية طيبة
شكرا عالزيارة الاولي وتعلقاتك الجميلة
بس احب اقولك ان الراجل بتاع جامعة القاهرة مبيدخلش النايس عشان الخمسة جنية لا عشان هو مش قد الناس الي داخله ده
فهمت ؟

شارك مع اصدقائك

Share |