الاثنين، 30 يوليو 2007

يالي فاكرين نفسكم حلتوها ...هأأو باقي من العالقين 7500

بسم الله ما شاء الله
ربنا رازقنا يبشوية تحف يحكومونا ويتحكموا فينا... الاسبوع الي فات طلع علينا التحفة بتاعنا مع تحفة فلسطين مع تحفة الكيان الصهيوني يعلنوا لنا ان مساعي مصر الجامده جدا اخيرا توصلت لحل لازمة العالقين .
طب خير والله ايه هو الحل يا روساء ومتاسفين علي كلمة تحف الي فوق ؟؟؟
الحل اننا هنعدي 600 واحد بس من العالقين عبر معبر العوجه ثم ايريز ثم غزة بشرط ان يتم الموافقة علي الاسماء من قبل الكيان الصهيوني والسلطة الفلسطينه هي الي تختارهم . الخبر هنا وخلي بالك من ضغط دمك وانت بتقرا
هأأوأوأو كمان
ياسلاااااااام شوفتوا الحل يا شعوب يا بهايم ؟؟ هي د ه الحلول
مش تقولي نفتح معبر رفح والهبل ده
وواحد تاني يطلع يقول لي نعدي المرضي والعجائز
وواحد تالت يطلع يقول مش هينفع ايريز او العوجة كرم ابو سالم
بقه انتم بتفهموا ؟
اسيادكم الي ربنا سلطهم عليكم جابوا الحل للازمة
بوسوا ايديكم شعر ودقن
من الاخر ومن غير لف ودوران
وعشان مرارتي الي اتفقعت بسبب تليفونات من عالم تحف اتصلت بيا تقول مبروك ازمة العالقين اتحلت
تمثيلية معبر العوجة الهدف منها حاجتين
1- عبور بعض العناصر التابعه لدحلان والي كانوا محتجزين لوحدهم في رفح بعيد عن بقية العالقين عشان اي فلسطيني فتحاوي او حمساوي او حتي هندي كان لو شاف وزاحد منهم كان شرحه فكان الحل انهم يدخلوا فلسطين
2- طبعا تليميع وجه حكومة فتح او ما يسمي بحكومة فياض والي يعني اظهار حماس بمظهر الضعيف
بصوا يا شباب بالرغم من اني اعلنتها من اول الازمة اني مش مع حماس ولا فتح في الموضوع ده بالرغم من اني اتفق مع حماس في الايدولوجيا هقولها بكل صراحه
من ال شفته... حماس متبعه اقسي درجات ضبط النفس والحكمة .. حماس ممكن بكره تفجر المعبر وممكن بكره تحرض 7000 بني ادم عالق للثورة في مصر بس هي رافضة لاسباب كتير جدا وده عين العقل
بس احب عم الريس بتاعنا ان صبر الفلسطينين ليه حدود
وخدي بالك يا عم الحاج ؟؟؟؟
اخيرا احب اوصل رسالة من الطفل محمد العالق الي عنده 15 سنة محمد اتصل بيا يبكي ويقول لي ابي بتموت ومش رادين يعدوها بالرغم من اني وعائلتي كلها ملناش حتي علاقة بحماس .
حتي محمد عرف التربيطات السياسية
ياتري دموع محمد في رقبة مين ؟
اسرائيل ولا مصر ولا السلطة ولا حماس ولا فتح ولا شعوب الدول ده الي نايمة في الذرة ؟؟؟
احب افكركم ان مصطفي اصغر عالق تم اليوم 35 يوم وعندي معلومات ان مصطفي فقد لقب اصغر عالق لان فيه جداد اتولدوا بس لسه معنديش معلومه اكيده
مصطفي سامحني لاني اعترف اني بقيت عاجز اعمل لك حاجه
مصطفي يوم ما تقف قدام ربك ياتري هتقول له ايه عني ؟؟؟ هتقول انه اتخلي عننا ؟؟؟
مش هقدر الومك يا مصطفي لانه بصراحه حقك

الخميس، 26 يوليو 2007

ذوات الدم الرخيص



العالم ثائر من اجل 22 نفر وساكت علي 8000 نفر
حقا استحققنا وبلا منازع في هذا الزمن لقب " ذوات الدم الرخيص "

بجد انا طهقان ومش طايق الي بيجري حوليا


لو كنت حضرتك من البشر الي لسه ليهم نفس يتفرجوا علي نشرة اخبار هتلاحظ ان أخر 8 ايام مكنش فيه سيرة في النشرات الا عن 22 كوري جنوبي مختطفين في افغانستان .


22بني ادم الدنيا مقلوبة عشانهم والدول بتجتمع وقبلهم كام ممرضة بلغارية نقلوا لاطفال ليبيا عدوي ايدز والمجتمع ادولي كله فضل وراهم لحاد لما خرجوا وقبلهم الان جونسون الصحفي الجدع قوي الي قعد العالم كله بيقول الحرية ليه وانا كنت واحد من العالم ده وقبلهم الجندي الهمام جلعاد شاليط .


كل الناس ده الدنيا قامت ومقعدتش الا لما خرجوا او لسه بتطالب بخروجهم وحريتهم وحقوقهم .


طاااااااااااااااايب ماااااااااشي مش معترض رغم اختلافي مع بعضهم


بس يا مجتمع يا دولي يا مجتمع يا مدني يا بشر يا خلق يا هو فيه 8000 بني ادم بيموتوا محتجزين مش لاقين يا كلوا ومش لاقين حتي ميه يشربوا


يالي بتدعو انتمائكم للحضارة البشرية


فيه 8000 بشري محرومين حتي من النوم ... فيه 8000 مواطن فلسطيني مرمين عي حدود مصر في شمال سينا ممنوعين من دخول بلادهم


ورغم كل ده مفيش حد اتحرك ليهم الا ما رحم ربي


يا من تنادون بحقوق البشر او حتي الحيوان ....أنتم فين ؟


مش فاضين ؟


هل 22 كوري اهم من 8000 فلسطيني ؟


هل جلعاد شاليط اهم من 8000 فلسطيني ؟


عالعموم انا مش هسكت


وبقولها باعلي صوتي مش ساكت


ان شاء الله مسافر الاسبوع الجاي تاني رفح وهحاول اعمل حاجه للابطال دول


وفيه شوية قرارات تاني


1- قررت اني لن ادون علي يالالاللي عن اي موضوع وحتي نهاية ازمة 8000 عالق فلسطيني الاعن ازمة العالقين الفلسطينين


2- قررت تغير اسم مدونتي موقتا وحتي انتها الازمة من يالالاللي الي الحرية للعالقين ( يالالاللي )


3- قررت اني مش هسكت ابدا عن الي بيحصل ده وهنشر القصضية في كل حتة ... مه يا اما نبقي بني ادمين بجد ونتحرك يا اما نتنازل عن اللقب ده لاي جنس تاني عارف متطلبات اللقب ده ويقدر يوفي بيها


قبل ما امشي بحب افكركم بمطفي الي النهرده بقه عنده 23 يوم ولا يزال مصطفي اصغر عالق فلسطيني


بقول لمصطفي متقلقش فيه حد حاسس بيك

الثلاثاء، 24 يوليو 2007

الحقوا العالقين ... الموضوع وصل للجرب

قاعد لا بيه ولا عليا في الموقع مستني اجتماع التحرير قلت اتصل بالمصدر بتاعي في رفح اطمن عالناس هناك
لقيت الراجل بيقول لي انا كنت ليه هتصل بيك
قلت له خير ؟ انت مش متعود تكلف نفسك مكالمات الا لو فيه مصيبة
قالي هي فعلا مصيبة فيه واحد النهرده من الفلسطينين المحبوسين في مطار العريش اتحول للمستشفي لانه مصاب بالجرب
قلت له جرب ؟؟؟!!!!!!!!!!!!!!!!!!!!!!
بتاع زمان ده ؟ بتاع كتب التارخ ؟
قالي اه هو
الخبر عالعموم هنا
بس يا تري بعد كل ده هنفضل ساكتين ؟؟؟ يارب نتحرك
أنا خلصت النهرده مونتاج الفيلم التسجيلي الي صورته في رفح والعريش وهحاول ارفعه النهرده يو تيوب
بس عالعموم الي محتاج الفيلم علي سي دي بجوده عالية يبعت لي ميل وانا مستعد اوصله للبيت عنده مدام هيعمل حاجه
الفيلم اسمه عالقون ومدته نص ساعه

السبت، 21 يوليو 2007

هنا مدينتي رفح والعريش المحتلتين


هكذا كنت في رفح

لسه واصل من معبر رفح من دقائق ... وحتي لسه مغيرتش هدومي ... بس انا مستعجل جدا عالكتابة لان الكلام الي جوايا والي شفته لا يحتمل التاجيل .
انا جاي دلوقت من عند 7000 بني ادم بيعانوا اصعب ظروف العيش ... انا جاي دلوقت من عند 7000 بني ادم كل امانيهم في الدنيا دخول وطنهم حتي لو كان الموت علي اعتابه هو مصيرهم ... لم استطع في البداية فهم مبدا هولاء البشر ولكني مع الوقت انهم يجسدون معني الاخواة والوطنية والايثار في ابهي صوره .

فلسطيني ... شموخ وعزة

مش عارف ابتدي منين واحكي ايه ... احكي عن ماساة انسانية بكل المقايس شفتها علي ارض رفح والعريش ؟
أحكي عن وجه قبيح لم اكن اعلمه لنظامنا المصري رغم تعدد اوجهه القبيحة ؟
احكي عن ناس بتموت من الجوع ومن العطش ومن المرض ومن الامراض النفسية ؟
احكي عن 7000 عالق كلهم تقريبا اصبحوا مرضي نفسين بسبب ما هم فيه ؟
أحكي عن قوافل طبيه اصبحت الادوية رقم 1 في قوافلهم هي الادوية المضادة للاكتئاب ؟
احكي عن شعب تكالبت كل شعوب الارض عليه للامعان في اذلاله واخضعاعه ولكن هيهات ؟
أحكي عن شعب اصبح الشتات له عنوان ؟
احكي عن نظرة كانت هتقتلني يقول صاحبها لي في كل لحظه افتحوا لنا المعبر يا ظلمه ؟
احكي عن ايه ولا ايه ولا ايه ؟

علي المعبر ... عالقون

يومين في رفح والعريش غيروا من نظرتي للحياة فانا بالرغم من انني لم اشرب سوي المياه المعدنية ول اكل سوي افخر اكل وانام في افضل الامكاكن كنت اتسائل كل 10 دقائق كيف لا يثور هذا الشعب علي ما به من وضع مزري فلا مياه للشرب ولا خدمات ولا اي شئ ... فما بالنا بسبهة الاف عالق فلسطيني بلا سكن ولا مورد للعيش ولا اي شئ ؟؟؟!!!
مش عارف اذاي احكي لكم عن ناس معهاش ختي حق الاكل او المياه الي يشربوها ...
مش عارف اذاي ممكن احكي عن ناس ممنعون من الحديث ومن السمر ومن التجمع ومن التنقل ولو من شارع لشارع ؟
عالعموم انا هحاول بعده طرق وربنا يوفقنا
1- تقارير صحفية في اكتر من مكان اولهم اخوان اون لاين عن رحلتي الاخيرة لرفح والعريش
2- فيلم تسجيلي شغال فيه دلوقت بعنوان عالقون عن ماساة عالقي رفح والفيلم متصور بكاميرا صغيرة جدا وامكانيتها صغيرة جدا بس ربنا معانا
3- مجموعه كبيرة جدا من الصور الي صورتها هناك والي هعرضها لكم هنا وفي اكتر من مكان
4- افكار تانية لسه محسمتش رايي فيها
بس متنسوش الفلسطينين ولو بالدعاء حتي

ويبقي الامل



الجمعة، 20 يوليو 2007

من علي معبر رفح قلب المأساة



تحديث 1
منعت قوات أمن الدولة فريق تصوير من وكالة الانباء الالمانية
يضم مذيع ومصور ومساعد مصور من التصوير في رفح
أثناء تواجدهم في منطقة السوق التجاري برفح
وأخذتهم قوات الامن الي مكان لم يحدد بعد
* ** ** *** **** *** * ** *** ***
انضمت يا لالالي لوفد هيئة الاغاثة الانسانية بنقابة الاطباء الذي اتجه لمدينة رفح بمحافظة شمال سيناء أمس
الخميس لتقديم بعض الخدمات الطبية للعالقين من الفلسطينيين علي معبر رفح .
فكان هذا التقرير :

استطاع افراد هيئة الاغاثة الانسانية الوصول الي مدينة العريش امس
في الثانية ظهرا، وقدموا خدماتهم لبعض المجموعات
من الفلسطينيين الموجودين بالعريش، بعد أن قامت قوات أمن
الدولة باخلاء مخيم كان من المفترض يتم فيه تجميع العالقين لتقدم به خدمات الاغاثة
للفلسطينييين ، ولم يسمح من بالخروج
من المطار للمدينة الا فرد واحد من ذوي الاحتياجات الخاصة.


ومع اول ضوء لفجر اليوم اتجه وفد الاغاثة الانسانية،
الي معبر رفح لتقديم خدماته للعالقين، وحتي الان تم تقديم
الاغاثة لحوالي 900فرد ، ولازال الكثيرين في انتظار مزيد
من المساعدة، حيث تم وصول قافلتين اغاثة الي المعبر
الاولي من القاهرة، والاخرى من الاسكندرية، الي مدينة رفح، والعريش



كما أعلنت محافظة شمال سيناء افتتاح سبع مخيمات لتقديم الاقامة الغذاء
والعلاج للعالقين من الفلسطينيين، في رفح والعريش، سعة كل مخيم 150 فرد، في
حين أن الذي تم افتتاحه مخيم واحد فقط لمجرد الايواء، دون تقديم الغذاء، والعلاج، ويحوي
حتي الان 85 فرد فقط، ، كما
تظل هناك بعض مجموعات من الفلسطينيين يصعب الوصول اليها في
بعض المناطق مثل مطار العريش، وميناء سفاجا، في ظل وضع مأسوي .
هذا وقد أرتفع عدد المتوفين علي المعبر حتي وصل الي 35متوفي منذ بداية الازمة وحتي اليوم.


كما يتعرض الان وفد الاغاثة الي بعض المضايقات الامنية، كما
تم منع التصوير، أو الحديث مع المرضي والعالقين، وتم
منع استخدام الاوراق والاقلام مثلما تم خلال أخر
جلسات المحاكمات العسكرية لقيادات الاخوان.

الأربعاء، 18 يوليو 2007

غدا تبدا الرحلة الي رفح


ينطلق غدا في تمام السادسة صباحا من امام نقابة الاطباء وفد هيئة الاغاثة الانسانية النتجة الي مدينة رفح المصرية لاغاثة الفلسطينين العالقين بمعر رفح
العبد لله مرافق للوفد بصفته ملحق صحفي
انتظروا معانا تفاصيل الرحلة ثانية بثانية علي يالالاللي وبس

الاثنين، 16 يوليو 2007

صور جديدة لنج من العسكرية


كنت قولت في البوست الي فات ان الصور الي صورتها كلها بكاميرا احد الزملاء باظت ولم تفتح اصلا
بس الحمد لله
كنت التقطت شوية صور بموبيل اخت كانت سايبة موبيلها معايا
والصور وصلت
هيييييييييييييه
بس احب اذكر بحاجتين
1- ان الصور ده كانت مش الاصل لاني كنت بصور بالكاميرا
2- الجودة قليلة كتير
مع الصور




وبدا الحضور


زوجة حسن مالك .... اشعر في كل مرة القاها انها امي .... ربنا يخليها لينا
وكم المني بكائها بعد الجلسة


الشماسي ... أخر تقاليع الحرية


عبد المنعم عبد المقصورد وئيس هيئة الدفاع ... رجل بالف رجل ... ومحامي بالف محامي .... صمت الواثق ... وثقة القانع
تحية لفارس محامي الاخوان


الشماسي ... كانت ابطال اليوم خصوصا في غياب اطفال من اجل الحرية بقمصانهم المميزة



المحكمة تحت الحصار



انا وانا حارق دمي عشان الصور الي باظت



ميت وشاويش اثناء اعداد احد التقارير لجهة مش مشبوهه


مدوني الاخوان في نقاش كان قمة في الجراءة وان عاني بعض الانغلاق
كان من اجمل ما في هذا الجلسة


جانب من النقاش

شاويش اثناء النقاش


ومتابعه عن كثب من قبل طواقم الاعلام للنقاش عبر الاسلاك وزجاجات الشويبس
علي فكره مرة واحده لقيناهم بيقولوا سيبوا الاستاذ يوضح وجهة نظره اصله كلامه كويس
كانوا مركزين قوي


المحكمة كانت قمة في الاثارة


الاثارة تظهر عالمدونين


مش قلنا اثارة


المدونين في صورة جماعية
كده انا عملت الي هعليا لامن الدولة
ناقص اديكم العناوين


أخر صور الاثارة


شاويش بيحقق مع علاء
وبيسالعه اتغديت ايه النهرده ؟


شاويش بيفكر في اجابة السوال


وبعد
لتبقين يا بلدي درة البلاد
وليبقي شعبك خير الشعوب
حين اتامل ماضيكي اشعر بالفخر
ومستقبلك اشعر بالامل
اما عن حاضرك فاشعر بالمرارة والحزن


لتبقين انتي احلي بلاد الارض
اجمل بلاد الارض
واكثرهن ابتلاء
وليبقي الشاطر واخوانه رموز الحرية والكرامة التي اصبحنا نتشوق اليها كل يوم
ولتبقي محكمة العسكر الدليل علي ان بهذا الوطن شرفاء ما ارتضوا الذل
ما ارتضوا المهانة
فكان مصيرهم اليها


لتبقي حريتك
حلمي في كل مساء
وعملي في كل صباح
اما حرية شرفائك
فهي هدف ما اسماه
ليبقي حبك ... ولو بعد الف محاكمة عسكرية
وليبقي الشوق اليكي ... مهما عانينا علي ارضك
وليقي الهيام فيكي... مهما شوهوا جمالك

وليبقي غروبك رمز لقرب افول نجم الظلم علي ارضك
ووعد بنصر قريب
وليبقي غروبك ... ملهم الاحرار في كل بلاد الارض قاطبة
وليبقي ... صرخة المظلوم عبر القضبان ليسمع العالم صوته
امل ابن بعوده ابيه ذات يوم بالحلوي
أو امل زوجة بمسحة علي راسها من زوجها الذي غيبته اسوار السجان
اتبقين انتي معشوفتي



* مش عارف الكلمتين الي في الاخر دول جم منين
بس حسيت اني عايز اقولهم معلش





هنا معبر مبارك وابنه الحدودي ... ومتقوليش لا رفح وكرم ابو سالم


يتابع العسكرية عن كثب ويقوم بمهام عمله... ويسمع مزيكا ويقول الاذكار كل ده مع بعضه
مستنين مني ايه في البوست ده ؟
تغطية لجلسة المهزلة العسكرية رقم 3 ؟؟؟
لا لا لا لا لا لا لا ومية الف لا انا مش قادر اكتب صرح واشاد ونيل
عايزين صور ؟؟؟ روحوا موتموا ايمان عبد المنعم سلفتني كاميرا اصور بيها وكالعاده صورت بلاوي بس مشتغلتش
عايز تغطية وبرده انا الي كاتبها يبقي اقرا دول ستة تقارير ليا من اهيك استيب كتبتها لاخوان اون لاين وبالتحديد من علي البوابة الحدودية لبوابة ايوب
التقارير هي
مشادات واعتقالات في الجلسة الثالثة للمحاكمة العسكرية لقيادات الإخوان


الإفراج عن المدوِّن معتز عادل واعتقال الجيزاوي

مؤامرة.. دس 108 رصاصات بأحراز د. خالد عودة في القضية العسكرية


في جلسة اليوم.. الشاطر ومالك وحشيش يكشفون التلفيق والسرقة في الأحراز


تأجيل محاكمة قيادات الإخوان في القضية العسكرية إلى 5 أغسطس


كلارك وخوريس وريدلي يغادرون الهايكستب بعد منعهم من دخول المحكمة

وكفاية كده تقارير وتصريحات عشان انا زهقت من 12 ساعه متواصلة من الكلام ده
نيجي بقه للمهم
انا عايز اكتب شوية خواطر عن الجلسة بس في نقط
1- قضية اعتقال الجيزاوي ومعتز عادل
بصراحة الموضوع لا يسكت عليه لانه قمة في الاهمية واحد منهم علالاقل وهو معنتز ثيبت انه اعتقل لاجل ما دون وده منحي خطير ولازم يكون لنا موقف
ايه هو ؟ مش هقدر اقول دلوقت لانيي مهنج
2- انا مليش اشكر اي حد جه الجلسة بس انا لو مشكرتش الناس الي في دماغي هيجرالي حاجه
المدونة والاخت العزيزة سكون هنصوت وكان معها زميل للاسف لم اتعرف عليه كما يجب بسبب انشغالي الرخم اثناء المحكمة
علي فكرة الاتين مش اخوا ن ...بس مصرين
ملهمش حد معتقل .... بس الشاطر بالنسبة لهم رمز لابهاتهم واخواتهم وازواجهم الي ممكن يبقوا مكانه
مش صحفين جاين يغطوا ... بس شباب بيحب مصر بجد وفضل انه ينقل الاحداث عبر مدوناته
والي خلاني بجد اقدر موقفهم اكتر هو ان مدونة سكوت هنصوت مقلتش لاهلها انها جاية المحكمة واهلها واصحابها كانوا بيتصولا عالموبيل والي طبعا مكنتش بترد عليه لمده 10 ساعات متواصلة ربنا يجعله في ميزان حسانتها وحسناتهم
بالنيابة عن ناس كتير قوي بحيي الاتنين وبحي اي حد جه يساند المحالين للعسكرية
3- المفروض اقول حاجه لاسر المعتقلين بس اقول ايه اكتر من انكم الي علمتونا اصمود ... يمكن منظر خالتو زوجة حسن مالك وهي طالعة بتبكي من الجلسة هزني ومنظر اوشة - الي هي عائشة - وانس وهما بيبكوا والي حتي خلاني مش عارف اهزر معاهم ذي ما اتعودت في الموتمرات بس برده هقولها وباعلي صوتي علمني الشاطر ورفاقة واهلهم معني الصمود
4- قابلت ناس كتير واتعرفت بناس اكتر واتناقشت كتير واختلفت كتير واتفقت كتير وكانت حوارات في قمة الانفتاح وان كان البعض في قمة الضبابية ... كل ده محصلش في موتمر حنجوري من اياهم ده حصل في العسكرية ... بجد اليوم فرق في حياتي
وهكتب عمه كتير
اما تعليقي عالعسكرية فانا كنت مصور صور كنت احطها في الحتة ده بس للاسف ذي ما حكيت الكاميرا عملتها بس هستعير صورة من شاويش ليا ... اقصد للكوتشي بتاعي بتعبر بجد عن تعليقي عليها

شكر خاص لشاويش صاحب الصور



الأحد، 15 يوليو 2007

القبض علي منفي والجيزاوي


تحديث
14:35

تم اﻻفراج عن معتز عادل قبل دقائق

وفي تصريح له أكد علي

انه تم القاء القبض عليه من قبل مباحث أمن الدولة من امام منزله

فجر اليوم
وتم استجوابه بمقر أمن الدولة بالمنصورة

حول عﻻقته بجماعة اﻻخوان المسلمين وأنشطته

وما كتبه علي مدونته حول المحاكمات العسكرية

واصراره علي السفر من المنصورة للقاهرة

لحضور جلسات المحاكمة
*** ** *** *** ** ****
تم صباح اليوم في الساعة الثامنة القبض علي كل من

معتز عادل صاحب مدونة منفي

وأحمد الجيزاوي صاحب مدونة أنا بحبك يا مصر

وهم في طريقهم الي الهايكستب

لحضور جلسة محاكمة قيادات اﻻخوان

المقدمين الي المحاكمة العسكرية

عاش امن مصر الهلاهؤه.... والارهابين يركبوا من المعادي


الامن المصري الهلاهؤه يتقمص شخصية بوند جوه محطات المترو ... يالالاللي

مش عارف ابتدي الحكاية منين ... بس بصراحة انا تعبت جدا
يمكن انا حذرت من 4 ايام من ركوب مترو الانفاق لانه بيحيطه اجرائات امنية منيلة بنيلة وتركزت الاجرائات ده عالمنتقبات والملتحين لكن الواضح اني ماخدتش بنصيحتي .
اول امبارح كنت خارج مع والدتي وقررت امي - ربنا يسامحها - نركب المترو واول ما دخلت محطة حلوان اتفتشت عادي مع اني كنت داخل مع امي ، وارجعت الموضوع بسبب الشنطة الي بمشي بيها دايما وفيها ورقي وبسبب لحيتي الي طولت حبتين اليومين الي فاتوا .
المهم النهرده صحيت الصبح بدري ذي الشاطر حلقت دقني لاني كنت عارف اني هروح اعزي واحد صاحبي ساكن جنب محطة كلية الزراعة والي جالي معلومات انها تحت الحصار وانه مش هينفع ابدا اخترقها بدقني وفعلا حلقت دقني ونزلت وركبت المترو من محطة المنيب عشان اتفتش تفتيش تمام ولما فتح الراجل شنتطتي وجد ورق وجرنان - يال العجب !!!- الراجل اذبهل وقال انت بتشتغل ايه ؟؟؟ قلت له صحفي - باعتبار ما سيكون - قال لي انا بعز الصحافة جدا قلت له الداخلية كلها بتعز الصحافة مش انت بس قالي لا ده انتم السلطة الرابعه وعديت والحمد لله لاصل الي كلية الزراعة وياريتني ما وصلت .
أول ما وقف المترو فوجئت بالناس بتجري بسرعه عرفت بعد كده انها بتجري عشان تلحق مكان في طابور التفتيش ولكن خاب ظنهم فالتفتيش للداخلين فقط وليس للخارجين ايضا ولكني لاحظت اجرائات غير عادية بالمحطة لاحظت بوابة كشف عن معادن - والغريبة انها شغاله كويس وكان واضح انها جديده - علي بوابة واحده فقط يدخل منها الجميع ويتم تفتيش كل الحقائب ولبعض من ذوي اللحي اياهم يفتش ذاتيا ولا حظت اعداد كبيرة جدا من افراد الامن وكلاب بوليسية وخارج المحطة كان كل شئ ملئ بالعسكر سالت احد العساكر هو فيه ايه ؟ قالي ملكش دعوه ده الباشا مدير الامن جاي - قصد مدير امن القليوبية طبعا - فقلت له طيب عربيات الوحده فين بقه ؟؟
تجولت قليلا امام المحطة ولما سئمت مراقبة الشرطة قلت اراقب الحرامية - اقصد المواطنين - كان الناس في حالة رضا غريب وخنوع مريب ذكرني خنوعهم باحد النكات التي سمعتها من صديق يوم ما علي جمهورية الماو الماو فزعيم الماو الماو لما سئم شعبه استدعي وزيرة وقال له غلي الاسعار فغلي الاسعار ولكن لم يثر الشعب فقال له اقمع المعارضين فلم يثر الشعب فقال له اجعل علي اول الكوبري الرئيسي بالبلد رجل يضرب كل من يعبر الكوبري ( بالقفا ) ان اراد ان يعبر وخرج الحاكم يتفقد احوال رعيته الذي ظن انهم سيثورون وعندما وصل للكوبري وجد الواطنين في قمة الثورة سال احد المواطنين ايه الاخبار - فاكرين لما الرئيس اياه سال عامله بمصنع انتي متجوزه فقالت لا فسالها انتي عندك عيال !!! - فقال له المواطن ده ظلم ياريس لازم تذودوا عدد الناس الي بتضرب عشان الواحد بيبقي مشتاق قوي للضرب وواحد بس مش بيكفي عشان يضرب كله .
بالفعل عاش شعبنا مدمن الخنوع وعاش امننا الهلاهؤه وبالنسبة للارهابين فاحب انصحهم ان محطة المعادي مفهاش تفتيش خالص وممكن بيدخلوا منها عادي خالص وكله تمام .
وبمناسبة الامن الهلاهؤه اليوم رايت عالكورنيش حادثة عربية نقل دون نمر او رخص او اي شئ صدمت عربية ملاكي واصابت من فيها وبالرغم من ان القسم يبعد نص كيلو عن موقع الحدث الا ان سيارات الاسعاف وصلت ونقلت الماصابين وتجمهر الناس حول السائق وفتكوا به دون ان يصل عسكري واحد لمكان الحادث طبعا كلنا عارفين ليهع ... عشان بيامنوا المترو يا فالحين .

السبت، 14 يوليو 2007

مراجيح

واحد : باين الواد احمد متنشن قوي النهرده شكله مضايق من حاجه ايه رايك ؟
واحد تاني خالص : انا برده شايفه كده ... بقولك متيجي نقلبها مراجيح

وفي احد الندوات الرخمة الكتير الي بنحضرها

واحد غير الاتنين الي فوق : بقولكم ايه انا مش طايق المحاضر ده
واحد تاني : وانا شرحك بقولك متيجي نقلبها مراجيح
ولا تكاد تمر 3 دقائق الا وتري الندوة كلها سابت المحاضر الي عالمنصة ومركزة مع شوية العيال الي قاعدين في اخر صف متعرفش ليه

مراجيح ... انها كلمة السر السحرية ومفتاح عالمنا الخاص والخاص جدا
بمجرد ان تسمعها منا اعلم ان اتون الضحك سيفتح وانك ستنتقل في خلال لحظات الي عالمنا الذي اخترناه لانفسنا لا الي العالم الذي فرض علينا ان نحيا فيه.
بمجرد ان نتفوه بحروفها ننتقل من اي مكان في الارض سواء كان هذا المكان حي الوليدية الشعبي بمدينة اسيوط او شارع البا شيرا بروما او احد ارقي شوارع العاصمة الخرطوم - علي اساس انن فيها شوارع راقية اصلا - او حتي مدينة دسوق بشمال مصر في لحظة واحده الي ذلك المقهي الصغير الواقع بميدان الفلكي بوسط البلد حيث نجد ناصر منتظر بلهفة ليباغتنا باكواب الماء المثلج ليقول لنا هتشربوا ايه النهرده ؟ - ده طبعا بعد ما يقلبنا في كل الرجايد الي معانا -
مراجيح .... هو نداء اللسان الي الروح لكي تنفك عن قيودها التي تغلغلها وتنطلق الي عنان السماء حرة طليقة بعيده عن اجساد انهكتها الحياة في ظل قوانين الجاذبية السخيفة وعيون اصبحت تري القبح كمنظر مكمل للمنظر العام في حياتنا اليومية ان لم يكن هو الاصل في هذا المنظر ، واذن اعتادت ان تسمع ضوضاء علي اساس انها موسيقاها التي تتغني بها ، وقلب حيا طوال عمره لا يفكر الا في لحظة واحده يحياها حرا في بلد حر ووسط شعب من الاحرار - ابقي قابلني -


مراجيح ... قد يكون اسم لعالم لا نحيا به سوي لحظات ، حيث هذه اللحظات في حقيقة الامر هي كل اعمارنا التي عشناها حقيقة حيث لا تمثيبل فيها ولا خداع بل هي حياة مجرده من كل ما هو قبيح .

بقولكم ايه من الاخر
مراجيح ده اسم المدونة الجديدة الي قررنا نكتب فيها عن نفسنا وعن احلامنا وعن حياتنا بعيد عن السياسة وومبارك وابنه وحتي امه .
ونتمني تشاركونا معانا المراجيح ولو لدور واحد وجرب مش هتندم .


*الصور نقلا عن مواقع مش فاكرها

الخميس، 12 يوليو 2007

هتركب المترو؟؟؟ لاحول ولا قوة الا بالله


ناوي تركب المترو ؟؟؟ لاحول ولا قوة الا بالله
طب وايه ذنب عيالك ومراتك والناس الي بيحبوك في الي هيحصل بس
ناوي تركب مترو ؟؟؟؟ لا حول
ولا قوة الا بال
طب متنساش البطاقة وجواز السفر وشهادة المعافاة من التجنيد وشهادة التطعيم ذد الكوليرا وشهاده محو الامية
ومتنساش بطاقة التموين وشهادة حسن السير والسلوك وشهاده من اتين موظفين مش عارف بخصوص ايه
ناوي تركب المترو ؟؟؟؟ لا حول
ولا قوة الا بال
متنساش توكيل المحامي وتبليغ كل مراكز حقزق الانسان انك هتركب المترو والتربيط مع مركز النديم لتاهيل المعتقلين عشان يحجزوا لك مكان
ناوي تركب المترو ؟؟؟ لا حول
ولا قوة الا بال
بوس عيالك قبل ما تنزل وياريت تطلق مراتك عشان ملهاش زنب تفضل كل ده من غير جوز وقول لامك انك مسافر السعودية عقد عمل 150 سنة ولابوك انك هتستشهد فداء للوطن
ناوي تركب المترو ؟؟؟ لاحول
ولا قوة الا بال
أنصحك اكشف عند 4 دكاترة نفسين عشان تتاكد من قواك العقلية
قبل ما تركب المترو خد الخبر ده
في المترو يتم القبض علي اي شاب لمجرد الاشتباه وتفتيشه ذاتيا
حاولت استقصاء المسالة وسالت سواقين المترو فقالوا رد واحد بس المترو مستهدف دن دن داااان دش
الظاهر بجد يشعه 4 ايام دلوقت المترو مليان رعب وكل حد بيتاخد فيه
وبعد كل ده ناوي تركب المترو ؟؟؟؟ مش قولت لك لا حول الله يارب

الجمعة، 6 يوليو 2007

مطيع المصري قوي


عم احمد مطيع جدي مع اخر احفاده زياد واخويا الرخم ياسر
مرتديا الذي الرسمي لازواج مصر

الو ايوه يا احمد الحق انا بموت بطني هتموتني
ده كان نداء جدي الساعه 2 بليل في في التليفون طبعا نزلت اجري جبت تاكسي وروحت لبيت جدي الي يبعد عن بيتنا 3 دقائق مشي ، اخويا ساعده عشان ينزل السلم وركب التاكسي ويادوب التاكسي مشي 500 متر ولقيت جدي بيقول باين يا واد يا احمد انا بقيت كويس والظاهر نزول السلم خلا بطني تفك طبعا السواق سمع الكلمتين ووشه جاب الوان وزعل عالتوصيلة وقلت لجدي خلاص تعالي ننزل ونتمشي وفعلا اديت للسواق 5 جنية ونزلنا واتمشينا واخترنا اطول طريق للبيت ماشين احنا الثلاثة بس في الشارع .
مشينا في الشارع واول ما مشينا جدي بدا يحكي ...ياااااه كان بقالي كتير مسمعتش الحكاوي ده حكي عن الجيش المصري الي كان فيه ايام مش فاكر سنة كام والجيش الانجليزي الي برده اشتغل فيه والكويت وقطر الي سافرهم وهو لسه متجوز جديد وعابدين والقصر والملك والحتة الي اتربي فيها الغريبة ان كل الحكاوي ده سمعتها قبل كده بس كنت سعيد اوي وانا بسمعها تاني ، كنت مبسوط قوي وجدي ماشي في وسط الشارع يحكي بصوت عالي ويشاور بايده وكنت بسال نفسي هو الراجل ده مش كان تعبان ؟ ده عالم غريبة قوي صحاني من سوالي صوته وهو بيقول هوب الجرار سحب العربية وحاولت ادي السواق بتاعه الهندي اي حاجه مرديش او حتي اعزمة علي حاجه ساقعة كانت ده جزء من حكاية سمعتها قبل كده 75 مرة عن مغامرة من مغامراته في قطر لما المقطورة الي سايقها غرزت بالاربع عجلات - شوفتوا النحس ؟ - واذاي سواق هندي ساعده جدي مكنش عارف يكلمه خالص لانه مبيفهمش عربي .
رروحت بيتنا بعد ساعتين كده بعد ما وصلته واطمنت عليه وطول الليل عمال افكر في الي حصل في الليلة ده .
تاني يوم كنت في المحكمة بغطي 5 قواضي لوكشة واحده امي اتصلت قالت الحق جدك تعبان وبصراحه معرفتش اتعتع من المحكمة وكنت كل شوية اتصل اعرف عامل ايه بس كنت في سري بضحك وعايز اقول لامي نزلوه يقعد عالقهوه في السيدة ولا عين الصيرة مع اصحابة وهو هيرجع 40 سنة لوراء .
الله عليك يا جدي مصري بجد ..... وبجد قوي كمان .
ملحوظة : جدي مريض بفيروس سي .... ربنا ياخد الي كان السبب ... طبعا عارفينه

الخميس، 5 يوليو 2007

تاني تاني تاني ... مدبحة المهندسين تاني

البوست ده مشترك بيني وبين زنزانة .. ومحدش يسال اذاي


بعد نجاح مدبحة المهندسين الاولي يوم 30/12/2005 نجاح ساحق في تجميل وجه مصر امام العالم الخارجي لدرجة ان مصر حصلت علي كرسي - منجد وغالبا هيدروليك كمان - في مجلس حموم الانسان الدولي ارادت الداخلية المصرية ان تستعيد امجادها مرة اخري وتصنع جزءا اخر لمجزرتها للتاكيد علي مدي استحقاق مصر للكرسي .
الموضوع باختصار يا جدعان ذي ما ورد هنا وهنا ان الشرطة المصرية اطلقت النار علي اكثر من 29 سواداني علي الحدود المصرية الصهيونية وكانت النتيجة وفاة احد اللاجئين وجرح اثنين ونجاح 26 في دخول اسرائيل واكيد ترقية للضابط الهمام الي امر بهذا الامر وطبعا جزاء لكل العساكر الي ممتوش حد من السودانين الكخة وترقية لرتبة جنرال للعسكري الشجيع الي قتل السوداني .
والله عفارم علي عساكير وضبابيط مصر الاشاوس ... والله بيتعبوا... يعني الواحد منهم يعمل ايه ولا ايه
يقرف الناس في الشارع
ولا يلفقوا قواضي
ولا ياخدوا العربيات من المواقف عشان توصلهم مشاويرهم
ولا يصطاد حمام قصدي سودانين
ولا يحمي حدود الدولة الانتيم بتاعتنا اسرائيل
لا بيتعبواطحن
اما بقه العالم بتوع الدول الافريقية اياها - باعتبار ان سيناء تبع اسيا - فدول عالم حقيرة يستحقون كل رصاص الداخلية مش كام رصاصة عالسريع كده
بقه يعني عشان الواحد منهم طالع 33333333 عين اهله ومش لاقي الميه مش هنقول العيش الحاف وابنه عنده ملاريا وهو عنده ايدز ومراته عندها السل وعشان كل الدول قفلت الطريق قدامه وعشان هو حس ولو للحظة انه ممكن يعيش بني ادم في الدولة الصديقة الانتيم لنا يقوم تسول له نفسه انه يتسلل لاسرائيل
هبل دول ولا ايه
اذاي الحشرات ده تدخل اسرائيل
امال احنا هنشتم ونقتل مين ؟؟؟
ومين هيشتغل عثمان طيب ؟؟؟
ومين هنطلع 6666666 عين اهله هنا
طب نسيبنا من كل ده ونيجي للي مش اهم- باعتبار مفيش اهم من حياة بني ادم -
حدودنا
قصدي حدود الي خلفوهم
الي ملاحظ هيلاقيني بقول الشرطة عملت والشرطة ضربت مع ان ده حدود
الله ؟
امال فين حرس الحدود بتوع الشورتات والجمال وفيلم عبود عالحدود ؟
والرد طبعا جاهز
يا جاهل قبل ما تسال سوال ذي ده راجع كامب ديفيد
مش كامب ديفيد عزبة ريئس امريكا ولا البلد ولا المحطة
كامب ديفيد الاتفاقية
والي بتقول انه مفيش جيش في سينا
وبتقول
سينا رجعت تاني لينا مصر اليوم في عيد
والاتفاقية بتقول برده
ان من يحرس حدود مصر هم الشرطة
ياحلو حلو يالولو
وايه النتيجة
النتيجة معروفه
مصر اصبحت وبجدارة من اهم الدول في الاتجار بالبشر
ومعبر رئيسي للعاملات بالدعارة وتجارة الجسد المهربات لصاحبتنا الانتيم اسرائيل
والجديد بقه
انها بقت معبر لهجرة غير مشروعة من افريقيا الي اسرائيل
والدليل انه قبل المذبحة الي حكيت عنها بيوم عبر الحدود بالفعل بين مصر واسرائيل 20 سودانيا من دارفور بينهم سبعة اطفال تتراوح أعمارهم بين شهرين و7 سنوات حاولوا التسلل بالطريقة نفسها. كما اعترضت قوات الأمن المصرية 6 سودانيين وصوماليا وأريتريا في وسط سيناء يوم الخميس الماضي حسب ما موقع العربية .
مبروك علي مصر كام لقب في خبطة واحده
لقب الجزار مع مرتبة الشرف
لقب القامع مع سرير الشرف
لقب التاجر بالبشر والاعراض مع كنبة الشرف
لقب الاهبل واللطخ الي سايب حدوده لعساكير الامن المركزي يحرسوها مع خددية الشرف
لقب الدولة الندلة التي تقتل جيرانها مع كرسي الشرف
وطبعا لقب عضو المجلس الدولي لحقوق الانسان مع مرتبة وسرير وكنبة وخددية وكرسي الشرف الي فاتوا علي بعض
وصدقني احلي من الشرف مفيش

الأربعاء، 4 يوليو 2007

محاكمة اسلاك نبيه

وسط حراسة مشددة من الشرطة تم نظر قضية محاكمة الضابط
اسلام نبيه وامين الشرطة رضا فتحي المتهمين بانتهاك عرض
المواطن المصري عماد الكبير سواق الميكروباص في موقف شارع ناهيا ببولاق الدكرور
تم تأجيل القضية الي جلسة 2 سبتمبر القادم أى ان "المتهمين سيقضيان فترة حبس احتياطي
ربما أطول من العقوبة"، حسب حديث أحد أعضاء فريق دفاع المتهم الاول
ربما لثقة المحامي في ان عقوبة المتهمين لن تزيد عن الستة أشهر
ومن أهم أحداث محاكمة اليوم ترافع ستة محامين عن المتهمين أحدهم يدعي عادل عبد الحي
جاء للدفاع والتضامن مع اسلام نبيه ورضا فتحي من اللجنة المحامين الافروأسيوية (اول مرة اسمع الاسم ده)وركز
دفاعه علي استناد عماد الكبير لدعم منظمات المجتمع المدني وحقوق الانسان
التي تتلقي تمويل من الخارج ، كما استشهد بصفحة من مدونة الوعي المصري طالبت
بلجنة تحقيق دولية في حادث اغتيال السادات ووصف المدونة الموقع الحقوقي !!!، بذريعة ان الحقوقيين يستعينون بالخارج للتدخل في الشؤون الداخلية وانهم يفعلون ذلك من اجل عيون العونة والمنح الخارجية
فيما ترافع محامي المتهم الثاني رضا فتحي مرافعة فلسفية عقيمة
أثارت اشمئزاز الحضور وهيئة المحكمة
تغطية كاملة للمحاكمة خلال ساعات علي مدونة يا لالالي ومراقب مصري

الثلاثاء، 3 يوليو 2007

انتظرونا غد وتفاصيل محاكمة اسلام نبيه

تابعوا معنا غدا
فصول محاكمة جديدة
تفاصيل جلسة محاكمة الضابط اسلام نبية
من داخل دار القضاء العالي
متابعه لحظة بلحظة
فقط علي يالالاللي وزنزانة

ندعوكم للتضامن مع عماد الكبير غدا بدار القضاء العلي الساعه التاسعه صباحا

متابعه بالصور لقضايا اليوم بمجلس الدولة

بداية احب اوضح نقطة
اتفقت انا والزميلة راندا صاحبة الزنزانة اني هروح جلسة دار الخدمات النقابية لتغطيتها وانها هتتولي نقطة التدوين لحظة بلحظة من شغلها ولكني فوجئت بحاجه تانية خالص
فوجئت ان فيه 5 جلسات في غاية الاهمية اليوم بمجلس الدولة
1- جلسة دار الخدمات
2- جلسة الافراج الصحي عن ايمن نور
3- جلسة التامين الصحي ووقفة كفاية التي الغيت
4- جلسة القرانيين
5- جلسة البهائيين
وكانت مفاجاة ليا اتابع ايه واسيب ايه
عالعموم هلتلاقوا متابعه تفصيلية للثلاثة جلسات انا حضرتهم هنا
والقرارت للجلسات الخمسة هنا
ونيجي بقه للمهم
الصور
الحتة بتاعتي وملعبي


المصورين والصحفيين ملطوعين ممنوعين من الدخول



الامن في كل مكان... ده لسه وهو بياخد مكانه


الناس وهي داخلة ... تقولش داخلين الجنة


المصورين استنوا ربع ساعه بعد الافراج عنهم من البوابة لدخول القاعه... العالم دول صعبوا عليا قوي


ده فاصل كوميدي


ده ضابط امن الدولة الي كان بيشرف علي دخول الناس لجلسة نور

انتم عارفين تصويرهم كيف عندي


محامين دار الخدمات

أحمد زكي في احدث طريقة لشرب السجاير

عرض عليا علي فكرة مبالغ كبيرة عشان امسح الصورة بس انا قلت زباين المدونة اولي

ده فاصل كوميدي تاني

علي فكره الفاصل ده في كل اوضة تقريبا

أحمد زكي تعب من كتر الشاي النهرده

الحضور للجلسة والي جه من نجع حمادي- يعني الصعيد الجواااااني

جانب تاني من الحضور - من ناحية اليمين يعني -


قاضي جلسة دار الخدمات




وده وكيل النيابة الي فضل طول الجلسة مبلم وفاتح بقه



لو مش مصدق شوف هنا





كمال عباس من ظهره





برده من ظهره





أحمد ذكي في الكيف





واخيرا من وشه هيييييييييييييه





أ/ رحمة محامية بمئة محامي








أ/ رحمة مع كمال عباس





ام احمد مظلوم المحبوس في تمثيلية كل جلسة











الجلسة بتاعه نور كان زحمة طحن





ده بيقرا الجرنان في الجلسة عادي يعني

وده نايم عادي برده

طبعا اي حد حضر مظاهره قبل كده عارف مين الحاجه بركة حزب الغد والمعارضة المصرية كلها

ربنا يخليكي لينا

كاميرا طايرة

وده بيتر مصور الكرامة مطير كاميرته - الجرنان بتاعه بيضرب مني صور بس هو زعلان من الحركات ده -

جميلة اسماعيل بعد قرار المحكمة

لحاد هنا انتهت الصور

بس احب اشكر احمد ذكي الي سلفني الكاميرا

واعذورني الصور مش اوي انا حاولت بس الظروف بتاعه الكاميرا صعبة قويييييييييي

وبشكر راندا الي تعبت معايا النهرده في التدوين

شارك مع اصدقائك

Share |