الخميس، 26 يوليو، 2007

ذوات الدم الرخيص



العالم ثائر من اجل 22 نفر وساكت علي 8000 نفر
حقا استحققنا وبلا منازع في هذا الزمن لقب " ذوات الدم الرخيص "

بجد انا طهقان ومش طايق الي بيجري حوليا


لو كنت حضرتك من البشر الي لسه ليهم نفس يتفرجوا علي نشرة اخبار هتلاحظ ان أخر 8 ايام مكنش فيه سيرة في النشرات الا عن 22 كوري جنوبي مختطفين في افغانستان .


22بني ادم الدنيا مقلوبة عشانهم والدول بتجتمع وقبلهم كام ممرضة بلغارية نقلوا لاطفال ليبيا عدوي ايدز والمجتمع ادولي كله فضل وراهم لحاد لما خرجوا وقبلهم الان جونسون الصحفي الجدع قوي الي قعد العالم كله بيقول الحرية ليه وانا كنت واحد من العالم ده وقبلهم الجندي الهمام جلعاد شاليط .


كل الناس ده الدنيا قامت ومقعدتش الا لما خرجوا او لسه بتطالب بخروجهم وحريتهم وحقوقهم .


طاااااااااااااااايب ماااااااااشي مش معترض رغم اختلافي مع بعضهم


بس يا مجتمع يا دولي يا مجتمع يا مدني يا بشر يا خلق يا هو فيه 8000 بني ادم بيموتوا محتجزين مش لاقين يا كلوا ومش لاقين حتي ميه يشربوا


يالي بتدعو انتمائكم للحضارة البشرية


فيه 8000 بشري محرومين حتي من النوم ... فيه 8000 مواطن فلسطيني مرمين عي حدود مصر في شمال سينا ممنوعين من دخول بلادهم


ورغم كل ده مفيش حد اتحرك ليهم الا ما رحم ربي


يا من تنادون بحقوق البشر او حتي الحيوان ....أنتم فين ؟


مش فاضين ؟


هل 22 كوري اهم من 8000 فلسطيني ؟


هل جلعاد شاليط اهم من 8000 فلسطيني ؟


عالعموم انا مش هسكت


وبقولها باعلي صوتي مش ساكت


ان شاء الله مسافر الاسبوع الجاي تاني رفح وهحاول اعمل حاجه للابطال دول


وفيه شوية قرارات تاني


1- قررت اني لن ادون علي يالالاللي عن اي موضوع وحتي نهاية ازمة 8000 عالق فلسطيني الاعن ازمة العالقين الفلسطينين


2- قررت تغير اسم مدونتي موقتا وحتي انتها الازمة من يالالاللي الي الحرية للعالقين ( يالالاللي )


3- قررت اني مش هسكت ابدا عن الي بيحصل ده وهنشر القصضية في كل حتة ... مه يا اما نبقي بني ادمين بجد ونتحرك يا اما نتنازل عن اللقب ده لاي جنس تاني عارف متطلبات اللقب ده ويقدر يوفي بيها


قبل ما امشي بحب افكركم بمطفي الي النهرده بقه عنده 23 يوم ولا يزال مصطفي اصغر عالق فلسطيني


بقول لمصطفي متقلقش فيه حد حاسس بيك

هناك 6 تعليقات:

اه يا دماغى يقول...

ازيك يا احمد

انت كمان نسيت ال4 ممرضات البلغاريات والطبيب
وازاى الدنيا قامت وقعدت عليهم

وطبعا كان معاهم بلدهم قبل كل شىء
والاتحاد الأروبى

وامريكا شوية
لكن فى مصر وكل الدول العربية
المواطن مالوش تمن نهائ

إلا له ضهر مش بيضرب على وشه

خالص تحياتى

Bella يقول...

لو كنت شفت حلقة الاتجاه المعاكس الاسبوع ده والضيف السمج اللى اسمه الدكتور جهاد عودة ووصلة الردح اللى ردحها للضيف الفلسطنيني اللى بيشكو من سوء وضع الرهائن الفلسطينيين وطريقة سي جهاد في الكلام معاه وان العالقين حالتهم كويسة ومافيش اي حاجة بيشتكوا منها وان اللى بيتقال ده كله تلفيق

كنت اتفرست

الراجل نقطني بقلة ادبه وكذبه المباشر وطريقته الوقحة في الكلام

مش مشكلة الكوريين ان بلدهم مهتمة بهم

ولا البلغاريات اللى مش بس بلدهم مهتمة بهم من 9 سنوات ولم تكل

الاتحاد الاوربي كله بذل كل جهوده وخرجهم وكمان رئيسهم استقبلهم في المطار

العيب عندنا احنا لان المواطن عندنا ليس له اي قيمة وكويس قوي انهم سايبينه يتنفس

الواحد قرف والله

حسبنا الله ونعم الوكيل

sokoothansawat يقول...

يا احمد
مفيش حد اغلى من حد..و مفيش حد ارخص من حد..الغالي غالي عند اهلة و ناسة..والرخيص برضة رخيص عندهم...يا كسفة وشي من الفسلطينيين و قبلهم السودانيين ... ان كانوا رخصوا عند الحكومة..فوالله هما عندي غاليين قوي..وضفرهم يسوى الدنيا..يا ريت كان في ايدي حاجة اعملها اكتر من البكا عليهم والنواح..ليل و نهار..
أحمد..ما رأيك ان نتبنى حملة ضخمة من الخطابات شديدة اللهجة مدعومة بالصور توجه لوزارة الخارجية و مجلس الوزرا
نسعى لعمل مليون جواب...و ننشرهم في وسائل الإعلام المختلفة...اهي صرخة جايز حد يسمعها..
بالمناسبة..تعالى شوف حملة الكيف عند صاحب البوابة

مقاومة يقول...

مش عارفة اقول ايه .. بجد على رأيك .. بقينا عن جدارة ذوات الدم الرخيص ، الكوريين و البلغاريات اغلى من الدم العربي و و الوزير بتاعنا رايح القدس يعرض مبادرة عربية جديدة او بمعنى أصح تنازلات عربية جديدة .. دمنا بقى مالوش ثمن للدرجة دي .. خلاص النهاية قربت متقلقش حق مصطفى أكيد عند الذي يمهل و لا يهمل .. و نعم بالله

m.fouad يقول...

والله يا جماعة حاجة تحرق الدم
أنا نفسى أعمل حاجة بس مش عارف أعملهم ايه
ربنا يتولانا و يتولاهم برحمته التى وسعت كل شىء

Medo Magdy يقول...

انا مش لاقي حاجة اقولها بجد الموضوع ده بيخنقني جدا
دي حاجة مش عارف اقول ايه
المهم احنا اللي رخصنا نفسنا عند الحكومة لما شكتنا على اللي بيعملوه فينا
بس هقول ايه
فلتسقط جمهورية الصمت

شارك مع اصدقائك

Share |