الأحد، 15 يوليو، 2007

عاش امن مصر الهلاهؤه.... والارهابين يركبوا من المعادي


الامن المصري الهلاهؤه يتقمص شخصية بوند جوه محطات المترو ... يالالاللي

مش عارف ابتدي الحكاية منين ... بس بصراحة انا تعبت جدا
يمكن انا حذرت من 4 ايام من ركوب مترو الانفاق لانه بيحيطه اجرائات امنية منيلة بنيلة وتركزت الاجرائات ده عالمنتقبات والملتحين لكن الواضح اني ماخدتش بنصيحتي .
اول امبارح كنت خارج مع والدتي وقررت امي - ربنا يسامحها - نركب المترو واول ما دخلت محطة حلوان اتفتشت عادي مع اني كنت داخل مع امي ، وارجعت الموضوع بسبب الشنطة الي بمشي بيها دايما وفيها ورقي وبسبب لحيتي الي طولت حبتين اليومين الي فاتوا .
المهم النهرده صحيت الصبح بدري ذي الشاطر حلقت دقني لاني كنت عارف اني هروح اعزي واحد صاحبي ساكن جنب محطة كلية الزراعة والي جالي معلومات انها تحت الحصار وانه مش هينفع ابدا اخترقها بدقني وفعلا حلقت دقني ونزلت وركبت المترو من محطة المنيب عشان اتفتش تفتيش تمام ولما فتح الراجل شنتطتي وجد ورق وجرنان - يال العجب !!!- الراجل اذبهل وقال انت بتشتغل ايه ؟؟؟ قلت له صحفي - باعتبار ما سيكون - قال لي انا بعز الصحافة جدا قلت له الداخلية كلها بتعز الصحافة مش انت بس قالي لا ده انتم السلطة الرابعه وعديت والحمد لله لاصل الي كلية الزراعة وياريتني ما وصلت .
أول ما وقف المترو فوجئت بالناس بتجري بسرعه عرفت بعد كده انها بتجري عشان تلحق مكان في طابور التفتيش ولكن خاب ظنهم فالتفتيش للداخلين فقط وليس للخارجين ايضا ولكني لاحظت اجرائات غير عادية بالمحطة لاحظت بوابة كشف عن معادن - والغريبة انها شغاله كويس وكان واضح انها جديده - علي بوابة واحده فقط يدخل منها الجميع ويتم تفتيش كل الحقائب ولبعض من ذوي اللحي اياهم يفتش ذاتيا ولا حظت اعداد كبيرة جدا من افراد الامن وكلاب بوليسية وخارج المحطة كان كل شئ ملئ بالعسكر سالت احد العساكر هو فيه ايه ؟ قالي ملكش دعوه ده الباشا مدير الامن جاي - قصد مدير امن القليوبية طبعا - فقلت له طيب عربيات الوحده فين بقه ؟؟
تجولت قليلا امام المحطة ولما سئمت مراقبة الشرطة قلت اراقب الحرامية - اقصد المواطنين - كان الناس في حالة رضا غريب وخنوع مريب ذكرني خنوعهم باحد النكات التي سمعتها من صديق يوم ما علي جمهورية الماو الماو فزعيم الماو الماو لما سئم شعبه استدعي وزيرة وقال له غلي الاسعار فغلي الاسعار ولكن لم يثر الشعب فقال له اقمع المعارضين فلم يثر الشعب فقال له اجعل علي اول الكوبري الرئيسي بالبلد رجل يضرب كل من يعبر الكوبري ( بالقفا ) ان اراد ان يعبر وخرج الحاكم يتفقد احوال رعيته الذي ظن انهم سيثورون وعندما وصل للكوبري وجد الواطنين في قمة الثورة سال احد المواطنين ايه الاخبار - فاكرين لما الرئيس اياه سال عامله بمصنع انتي متجوزه فقالت لا فسالها انتي عندك عيال !!! - فقال له المواطن ده ظلم ياريس لازم تذودوا عدد الناس الي بتضرب عشان الواحد بيبقي مشتاق قوي للضرب وواحد بس مش بيكفي عشان يضرب كله .
بالفعل عاش شعبنا مدمن الخنوع وعاش امننا الهلاهؤه وبالنسبة للارهابين فاحب انصحهم ان محطة المعادي مفهاش تفتيش خالص وممكن بيدخلوا منها عادي خالص وكله تمام .
وبمناسبة الامن الهلاهؤه اليوم رايت عالكورنيش حادثة عربية نقل دون نمر او رخص او اي شئ صدمت عربية ملاكي واصابت من فيها وبالرغم من ان القسم يبعد نص كيلو عن موقع الحدث الا ان سيارات الاسعاف وصلت ونقلت الماصابين وتجمهر الناس حول السائق وفتكوا به دون ان يصل عسكري واحد لمكان الحادث طبعا كلنا عارفين ليهع ... عشان بيامنوا المترو يا فالحين .

هناك 3 تعليقات:

اه يا دماغى يقول...

انت قولت لى انك بتفتش فى المترو

بس بصراحة متخيلتش ان فى كل التشدد

دا من بوليس وكلاب بندماية

اقصد بولسية

احلق ذقنك اليومين دول لحد ما تعدى الازمة على خير
وترتاح من البهدلة والتفتيش
وربنا يستر
خالص تحياتى

bluestone يقول...

برضه لازم تعذرهم
الجرايد بتقول انه فيه عربية فيها شحنة متفجرات دخلت القاهرة وفيه كلام على ان فيه عملية كبيرة قريب هتحصل في المترو باعتباره اكبر مكان ممكن يحقق خسائر في الارواح
حتى لو كانوا بيتعنتوا شوية اعتقد انهم بيعملوا شغلهم .. وبيحاولوا يمنعوا مصيبة هيروح فيها ناس كتير ..
المترو مش مشروع سياحي ولا مكان حتى السياح بيركبوه .. ده مشروع مصري بحت لخدمة المصريين .. وهم هيكونوا أول الضحايا لو حصل حاجة ..

اعتقد اننا لازم نتعاون طالما فيه مبرر للاجراءات المتشددة .. لانها حاجة بتحصل في كل بلد

Bella يقول...

مش عارفة انت زعلان ليه؟؟

تصور لو لاقدر الله حصل انفجار في المترو ح يروح فيها كام ضحية

بخلاف اللى ح يموتوا تحت الرجلين من اندفاع الناس والفوضى اللى ح تحصل

اعتقد افضل نستحمل بعض شوية بدل مايحصل مصيبة ونرجع نقول انهم قصروا في حماية المواطنين

ايام معرض الكتاب لما بيحطوا ستات مالهمش ملامح بيفتشوا شنط الستات اللى داخلة بيضايقني جدا انهم بيفتشوا بشكل روتيني غير حقيقي او بمعنى ادق بشكل صوري

الاهمال من شخص ممكن يسبب كارثة في مثل هذه المواقف

لازم تعذرهم لان وصلهم بلاغات بوجود قنابل في المترو

مفروض يعني بنتظروا لما تحصل مصيبة

معلش نستحمل شوية وربنا يستر

شارك مع اصدقائك

Share |