لاني ضدهم مدام ... هما " أنا بوليس " يبقي " أنا حرامي "

الموضوع بدا بتدوينة قريتها في جبهة التهيس تسالت فيها زعيمة الجبهة وقال هو احنا هنسكت علي انا بوليس ؟
فكرت وخطط وتكتكت ووصلت لفكرة
احنا هنرفض انا بوليس بطريقتنا
كل الي رفضوا انا بوليس في العالم عملوا موتمرات موازيةاحنا طبعا مش هنقدر نعمل موتمر
بس ممكن نعمله بالطريقة الي احنا عارفينها وفاهمينها كويس
عالنت
قرننا نعمل موتمر موازي وساحة للحوار عبارة عن مدونة وسميناها أنا حرامي
والسبب ورا الاسم بسيط وهو اننا ضدهم هما اختاروا انا بوليس يبقي احنا نختار انا حرامي
وده بنفس مبدا لو المقاوم هيقولوا عليه ارهابي فانا ارهابي
شاركنا برايك وتدوياتك وكل افكاركم علي مدونتنا الجديدة أنا حرامي ضد انا بوليس
ابعتوا لنا بافكاركم واراكم وطلباتكم للاضافة كمحررين للمدونة لانها مفتوحة للجميع
علي ميل ahmedikhwan@gmail.com

مبروك يا استاذي ... مبروك يا بن كفر البلاص

بن كفر البلاص في احد لحظات التجلي

من زمان كان الواحد عايز خبر يفرحه والحمد لله اخيرا خبر يفرح
الصعيدي القناوي ابن كفر البلاص - ده اسم بلده بجد وبيدلعوها وبيقولوا عليها المحروسة - ابن ارض القصب فاز بجائزة احمد بهاء الدين
استاذي الجميل والعظيم احمد زكي اخيرا فرحني بيه قبل ما اموت وعشت وشوفته وهو بيستلم جائزة احمد بهاء الدين
الخبر بجد كان فوق رائع وكان مفاجاة لاغلب اصدقاء احمد الا اتنين انا واحد منهم ، كنا متاكدين ان الجائزة مش هتخرج من ايد زيكو
بالرغم من الي يشوفني انا واحمد علي القهوه يقول الاتنين دول مولودين فوق روس بعض وهيلاحظ كم من المناكفة محصلش بيني وبينه يبدا بمقولته المشهورة - الي تقريبا فاكرها شتيمة - لما يقول لي يا اخواني اروح رادد عليه علي طول يا شيوعي يالي مبتسحماش وحتي يصل الامر الي ان اشتمه بالفاظ جامده جدا من نوعية يا تفكيكي يا برجوازي ، وياسلام لما يشاركنا في وصلة التريقة اخونا التالت ادهم الصفتي مخرج الكوارث ويدخل معايا عالخط ونستفز العرق الصعيدي في بن كفر البلاص بس بالرغم من كل ده يظل بن كفر البلاص هو استاذي الجليل .
أدين له بحاجات كتير يمكن اهمها انه هو الي دخلني ذلك العالم الساحر الذي يسمونه وسط البلد ، لسه فاكر اليوم ده كويس كان في شهر يناير السنة ده - 2007- كان هو ساعتها بيدربني في دورة تابعه لمركز القاهره وكان هو المشرف علي الدورة ، اول مرة سمعت عن العهد الدولي للحقوق المدنية والسياسية والشرعه الدولية والكلام ده كله كان منه لحاد لما يوم سالني انت بتدون يا احمد ؟ قلت له اه قالي طب انا عايزك تيجي تتعرف علي اصحابي عالقهوه في وسط البلد ، ياعيني كان خايف تقريبا لانه كان بيشوفني كل يوم بالبدلة والكرافتة ودبوس البدلة مرسوم عليه شعار الاخوان بس شكله قال خليها عالله ونجيبه معانا ، وبالفعل في يوم بعد انتهاء الدورة خدني معاه عبرنا جاردن سيتي حيث مركز القاهره الي ميدان التحرير ومنه الي ميدان باب اللوق ودخلني قوة صغيرة جدا وشكلها من القرن ال 14 كان اسمها سوق الحميدية ومكنتش اعرف ساعتها ان الحميدية بعد كده هتبقي بيتي التاني .
قابلت يوميها اتين او ثلاثة من اصدقاء احمد اغلبهم التزم الصمت والترقب من الضيف الجديد الي كان شكله غريب بعض الشئ بالبدلة والدبوس والجرافته بس برضه مكنتش اعرف ان الكام واحد دول ومعاهم كام واحد كمان هيبقوا فيما بعد من اعز اصدقائي .
وتمر الايام ويزداد تغلغلي بوسط البلد وعشقي لها وتعلقي بها وكل يوم وانا نازل من المكروباص في ميدان التحرير متجه لسوق الحميدية اتذكر احمد زكي واتذكر انه اول من جابني هنا .
مبروك يا استاذ يا كبير ويمكن محدش هيصدق ان الكتاب الي فاز بيه احمد زكي بالجائزة هو كتاب اتكتب في 3 ايام واتراجع في يوم وبارغم من كده طلع تحفة .

مش بقول لكم عبقري من يومه

كونوا مع ابناء مصر يوم الجمعه بكفر العلو

ده دعوه نداااااااااء عاجل لأصحاب القلوب الرحيمة واللي مش رحيمة واللي ماعندوش قلب أصلا أساسا أهو ندااء للكل و خلاص علي راي مريم من المعادي
ده دعوه لاي بني ادم عشان يقف مع اهلنا كفر العلو
ابناء مصر هينزلوا لكفر العلو يوم الجمعه لتقديم مساعدات انسانية ومحتاجين لاي دعم منكم
الي يقدر يساعد باكل او فلوس او لبس او وقت او مجهود او اي نوع من انواع المساعادات يتصل علي الرقم ده
0106778994

بجد لازم نتحرك
عشان الناس ده
تفاصيل ماساة كفر العلو هنا

هل حقا اعتذر صاحب اوف لاين ؟؟؟؟

جائتني من مصادر موثوق فيها ان صاحب اخوان اوف لاين تقدم باعتذار الي احد قيادات جماعه الاخوان المسلمين عن تاسيسه موقع اخوان اوف لاين وانه شرح في اعتذاره هذا سبب انشائه الموقع واعرب عن ندمه عما فعله
وان كانت هذه الرواية صحيحة فالسوال وبالتاكيد هو موجه لصاحب الموقع
1- هل حقا هذه الرواية صح ام خطأ ؟
2- ان كانت صحيحة فلم اختار هذه القيادة بالذات بالرغم من انها بعيدة كل البعد عن الامر ؟
3- هل يجوز ان يكون الاعتذار ( سكيتي ) كده ؟ ولا هو نظام خاصمني في شارع وصالحني في عطفه ؟
4- لم لم يعترف صاحب الموقع بخطاه علنا حتي الان ولا يزال يدلي باحاديث اعلامية تصب في نفس فكرة الموقع ؟
5- هل يكفي اعتذار صاحب الموقع كتعويضا عما حدث ؟
لا اتوقع ان يملك صاحب اوف لاين الشجاعه للرد علي الاسئلة لانه اصلا لم يملك الشجاعه للافصاح عن نفسه
ولكن علي كل حال ... تبقي الاسئلة

مع السلامة يا ابن الناظر ... مع السلامة يا بوجي

قاعد في القطر سرحان في منظر الخضرة الي بشوفه كل اسبوع لمدة 12 ساعه واذ فجاءة يهتز موبيلي جوه جيبي هزة مميزة تبشرني بورود رسالة تويتر جديدة تعكر عليا ، وكعادتي اخرج الموبيل من جيبي لانظر الي الرسالة .... بس .... ثانية واحده
الرسالة المرة ده مختلفة ده مش بتتكلم عن فتح ولا حماس ولا اولمرت ولا مبارك ولا ابنه ولا العراق ولا فلسطين
الرسالة كانت بتقول

وفاة الفنان يونس شلبي بعد صراع مرير مع المرض

يالله يا حي يا قيوم ... خبر بجد صعب قوي قريت الرسالة مرة واتنين بس بعد كده جالي خاطر غريب ... غريب جدا
الخاطر قالي هو يونس شلبي كان هيقعد في زمنا ده ليه ؟
زماننا ده مش هينفع لبوجي

معقول في زماننا ده حد يصحي الصبح بليل ذي ابن الناظر في مدرسة المشاغبين ؟
معقول حد في زماننا ده بعد ما يقرا المصري اليوم عالريق ووراه الدستور ووراههم يتفرج عالجزيرة يقدر بعد كل ده يشك في ان ابوه هيهرب مع عمته مع ان الغبي نسي ان عمته ده متجوزة ذي عاطف بن رمضان واخو سلطان في مدرسة المشاغبين ؟
معقول في زماننا ده عم شكشك هيلاقي شباك يبص منه علي حارة نضيفة ويرش ميه قدام الشباك ويستني بوجي وطمطم يعدوا من قدامه عشان ينكد عالي خلفوهم ؟
معقول في زماننا ده بقه ممكن حد يغني ويقول " جموسة راحت تقابل جموسة ملقتهاش جموسة لقيتها بقره " ؟ لا تتصوروا ده ممكن بس نغنيها بعد اجتماعات القمة العربية
الله يرحم بوجي مات لانه مقدرش يعيش في زمن مكشر ذي ده
الله يرحمه مكنش ينفع برائته تعيش في غابتنا الي اسمها الدنيا
الله يرحمه ويسكنه فسيح جناته ويرزقه من الحور العين من هي اجمل من البت ساهير الي كان بيبربش لها في مسرحية مدرسة المشاغبين والي كانت هي كمان بتبربش له وكانت بتحط جاز في شعرها
اسيبكم مع لقطات اعتقد انها هتخلد ذكراه في قلوبنا

ده تتر اول حلقات لبوجي وطمطم في تاريخهم

وده تتر بوجي وطمطم مع فلافيلو

أما باقي اللقطات فهي اكيد موجوده علي اجهزتكم

سهلبيسة سهلبيسة هلا هلا عالبعليصة يا بتوع المصري

فعلا عفارم عالمصري اليوم
ويستحق اقولها له من كل قلبي

هلا هلا عالبعليصة

الكلام الي متبروز النهرده في اول المصري اليوم احترت في وصفه
هل هو خبر ؟ تحقيق ؟ ولا ايه ؟
وبعد تفحيص وتمحيص والرجوع الي بطون مراجع المواد الصحفية اكتشفت ان اللفظ الذي يطلق علي هذا الشئ هو البعليصة
تقريبا فيه حد من القراء مش عارف البعليصة
اوك نشرح
قال عادل امام في تحفته الواد سيد الشغال ان البعليصة هي طبخة مكونة من الخضروات مدفون بها قفا حمار صاحب صاحبه وتوضع في الفرن عشان تستوي
طيب السوال وايه علاقة ده بخبر المصري اللوذعي ؟
العلاقة واضحة فالصحفي اللوزعر جاب الخبر اللوزعي كعادته دائما من قعده القهوه مع صاحبه ( في اشارة الي المكون الرئيسي للطبخة )
بجد انا ضحكت النهرده حتي الثماله من الي قريته
وجات لي تليفونات كتير من اصحابي بتسالني يا تري يا احمد انت ماسك ايه في مكتب ارشاد الشباب ؟
كنت برد بمنتهي التلقائية المكتب السياسي والاعلامي مع بعض كده ومش عايز مرتبة المرشد لانها محجوزة
نتكلم بقه حبة جد وفي نقط حفاظا علي صوابعي والكي بورد من كتر الكتابة
1- لنعترف جميعا ان اكبر صحيفتين يوميتين بيوزعوا في مصر طلعوا ضريبة اخبار ( شوفتوا الاكتشاف ؟) والي هما بدون ذكر اسماء المصري اليوم والدستور
2- مدوني الاخوان بوجه عام والشئؤن الداخلية للاخوان بشكل خاص اصبحت مادة خصبة للمتطفلين والفاضيين والي مش لاقيين حاجه يعملوها من الصحفيين الاشاوس وكل دول احب اقول ابشروا لقد فقدتوا مصداقيتكم عند كل الناس وبجدارة
3- متيقلي الظروف اصبحت تحتم علي الاخ صاحب فكره اخوان اوف لاين انه يكشف عن نفسه ويتكلم ويدافع عن فكرته الي كل واحد فسرها ذي ما حب وان كنت لا اعتقد انه يملك الشجاعه الكافية بس مش مهم انا بقول كلمة لوجه الله والسلام
4- هو سوال رفيع عالماشي هو مين مرسي عزيز ده الي قابله شباب الاخوان ؟

شاهد معنا حلقة برنامج علي الهوا عن الفيس بوك

ده حلقة برنامج علي الهوا الي اتكلم فيها العبد لله عن الفيس بوك واذاي ان المدونين ونشطاء الانترنت الاسلاميين ليهم نشاط واسع عليه والتعايش بينهم وبين مختلف التارات والي كان بيتكلم قدامي كان بيتكلم عن جروب عامله اسمه مش عايزين اخوان
المناقشة كانت ممتازة
حتي شوف بنفسك

أفخر بانني من الاخوان .. أفخر باخوان اون لاين ... افخر بمصطفي النجار

اتصل بي أخ غالي عزيز يقول لي
قرات مقال مصطفي النجار ؟
قلت له اين ؟
قال علي اخوان اون لاين
قلت له النجار المدون ؟
قال نعم
قلت لا

الي جميع المتشدقين باستبداد الاخوان واستبداد موقعهم الرسمي
الي كل المتغنين بانشاقاق مدوني الاخوان
الي كل الي عارفين نفسهم
اقروا المقال ده
واقولها باعلي صوتي

افخر انني من الاخوان ... أفخر بأخوان اون لاين ... أفخر بمقال النجار

*ملحوظة : النجار هو صاحب مدونة امواج في بحر التغيير

اسلام نبيه خد 3 سنين .... مبروووووووووووووووووك

الله اكبر ولله الحمد
وميت فل و35 الف
اخيرا وبعد طول انتظار فاز المدونون والحقوقيون والنشطاء وكل حد بيحب البلد ده في معركه كانت الاهم في ملف التعذيب
مبروك بجد
والخبر بتاع جلسة النهرده اهه

الحكم علي ضابط شرطة متهم بهتك عرض مواطن وتعذيبه بثلاثة سنوات سجن

كتب أحمد عبد الفتاح

في جلسة لم تتجواز مدتها العشر دقائق ووسط اجرائات امن هي الاصعب علي الاطلاق وتغطية اعلامية هي الاوسع حكمت اليوم محكمة جنايات الجيزة علي ضابط الشرطة اسلام نبيه ومندوب الشرطة عبد الفتاح علي والمتهمان بتعذيب المواطن عماد الكبير وهتك عرضه بالسجن ثلاثة سنوات لكل منهما وتغريمهما بمبلغ 4 الاف جنية والازامهم باتعاب المحاماة .

وفور نطق القاضي بالحكم ضجت القاعه وتباينت المشاعر فعماد الكبير ( المجني عليه ) وقف في وسط القاعه واخذ يصرخ اليوم اخدت حقي اليوم اخدت حقي وهو ما ادي الي تجمهر وسائل الاعلام والناشطين الحقوقيين الذين يتابعون جلسة المحكمة حوله لتهنئته علي الجانب لاخر قامت قوات الشرطة وفي سرعه البرق باخراج اسلام نبيه وعبد الفتاح علي واخفائهم عن عدسات المصورين ولوحظ ان اسلام نبيه كان في حاله من الانهيار الشديد بالرغم من انه حضر الي الجلسة في الصباح مرتديا قميصا احمرا وتظهر علي وجهه علامات السعاده وهي التي تلاشت في نهاية الجلسة .

عماد الكبير وصف الحكم انه اعادة الحق لاصحابه وان الحكم هذا قد براه هو شخصيا من اتهامات كثيرة وجهها له دفاع المتهم اسلام نبيه .

اليوم علي اوربت ... مدوني الاخوان بين الرفض والقبول من العالم الافتراضي

اليوم علي قناة الصفوة التابعة لشبكة اوربت
برنامج علي الهواء
من الساعه 8,00 الي الساعه 10,00 مساءا
نناقش معا ظاهره مدوني اونشطاء الانترنت المنتمين للاخوان
بين رفض البعض لهم وترحيب البعض
تابعونا

ادعو لها فهي تحتاج دعائكم

جائني صوته عبر اثير الهاتف مكتئبا حزينا ومرهق الي ابعد حد ليس هذا الصوت الذي اعتدت ان اسمعه بعد ان تذدان كل مرة شاشة هاتفي المحمول باسمه ويصدح بالنغمه المميزة التي كانت دائما وابدا تبشرني ان من يتصل بي هو استاذي وصديقي واخي ومديري بالعمل ، فعلي الرغم من ان علاقتي به لا تمتد في الماضي السحيق الا انها اصبحت وفي ايام قليلة علاقة وطيدة الي ابعد حد والسبب وراء ذلك لا يهمني كثير الان لكن ما يهمني ان صوته الذي جائني عبر الهاتف لا يحمل ورائه الا امر جلل.
تحدثت معه قليلا حول بعض الامور العامه ثم تذكرت ان اساله عن ابنته التي كانت تعاني منذ يومين من مرض الانفلونزا فاجابني ان الموضوع اكبر بكثير من الانفلونزا وانها في حاجه عاجله الي عملية جراحية ، وبالقطع وعرفت ه ان مرض ابنته هو السبب وراء كل ما هو به من حزن .
انها ابنته الكبري لم تتجاوز من العمر الاعوام التسعه لم ارها سوي مرة واحده بنت مرحه وكبيرة اخواتها الاثنتين يوم ان رايتها كانت تنشد بانشوده جميلة لا اتذكر منها الان شئ الا انني اتذكر جيدا كيف انها كانت تنشدها بمرح وحب وكيف انها اضفت علي هذا اليوم نوع جميل من انواع المرح هي ولفيف من ابناء زملائي في العمل .
غالبني الحزن وانا اكلمه الا انني تمالكت نفسي وحاولت ان امزح معه في الكلام كما اعتدنا دائما ولكن للاسف كان كلماتي من وراء قلبي وكانت ضحكاته ممزوجه بحزنه الدفين .
أنتهت المكالمة علي وعد بلقاء وحديث اخر ولكن بقي لي عندكم طلب صغير
لا تنسو صغيرته في دعائكم فهي في امس الحاجه الي دعائكم ووقوفكم الي جوارها في ذلك الموقف الحرج

ولا تنسوا ان دعاء الملسلم للمسلم بظهر الغيب مستجاب