الخميس، 12 يوليو، 2007

هتركب المترو؟؟؟ لاحول ولا قوة الا بالله


ناوي تركب المترو ؟؟؟ لاحول ولا قوة الا بالله
طب وايه ذنب عيالك ومراتك والناس الي بيحبوك في الي هيحصل بس
ناوي تركب مترو ؟؟؟؟ لا حول
ولا قوة الا بال
طب متنساش البطاقة وجواز السفر وشهادة المعافاة من التجنيد وشهادة التطعيم ذد الكوليرا وشهاده محو الامية
ومتنساش بطاقة التموين وشهادة حسن السير والسلوك وشهاده من اتين موظفين مش عارف بخصوص ايه
ناوي تركب المترو ؟؟؟؟ لا حول
ولا قوة الا بال
متنساش توكيل المحامي وتبليغ كل مراكز حقزق الانسان انك هتركب المترو والتربيط مع مركز النديم لتاهيل المعتقلين عشان يحجزوا لك مكان
ناوي تركب المترو ؟؟؟ لا حول
ولا قوة الا بال
بوس عيالك قبل ما تنزل وياريت تطلق مراتك عشان ملهاش زنب تفضل كل ده من غير جوز وقول لامك انك مسافر السعودية عقد عمل 150 سنة ولابوك انك هتستشهد فداء للوطن
ناوي تركب المترو ؟؟؟ لاحول
ولا قوة الا بال
أنصحك اكشف عند 4 دكاترة نفسين عشان تتاكد من قواك العقلية
قبل ما تركب المترو خد الخبر ده
في المترو يتم القبض علي اي شاب لمجرد الاشتباه وتفتيشه ذاتيا
حاولت استقصاء المسالة وسالت سواقين المترو فقالوا رد واحد بس المترو مستهدف دن دن داااان دش
الظاهر بجد يشعه 4 ايام دلوقت المترو مليان رعب وكل حد بيتاخد فيه
وبعد كل ده ناوي تركب المترو ؟؟؟؟ مش قولت لك لا حول الله يارب

هناك 19 تعليقًا:

zenzana يقول...

يا سيدي ريحنا واركب توك توك

البتول يقول...

الحمد لله انا باركب المترو بس انا واحدة ست متهيا لي انهم بيقبضوا علي الرجال فقط احسن يريحونا وكله فدا الرطن معلهش

سارة يقول...

وماله المترو بس ده من اجمل الموصلات الي منزلنا وسعره الي لان معقول يعني ايه شوية اجراءات امنية رحوا منكم لله دايما تشوهوا كل حاجه حلوه كده وخلاص بمناسبة الحاجه الحلوة مبروك النجاح

Bella يقول...

المترو يعتبر من أخطر الاماكن التي لو لاقدر الله تعرضت لعملية ارهابية ستكوت كارثة بكل المقاييس خاصة في مصر بلد الفوضى

الاحتياط واجب

بس المهم يكونوا بيفتشوا الناس كويس

مش شغل كروتة زي مابيعملوا ايام معرض الكتاب ويبصوا بصلة مالهاش لازمة ومالهاش علاقة بالتفتيش

مدونة أيام و بنعيشها يقول...

اسمها، يا حول الله يا رب، يا عم الشيخ

saad alshater يقول...

المتر لا حول ولا قوة الا بالله

شـــــهــــروزة يقول...

وهى دى ميزة انك من سكان الأقاليم

حيث لا مترو ولا يحزنون

هو التاكسى ولو الحالة صعبة يبقا لاحنطور او التوك توك

اللهم اكفينا شر المتروهات وما يترتب عليها

Xee يقول...

طب و اللي عامل ابونيه، بيفتشو جيبه اليمين بس ولا ايه؟

عيلة و عايزة افهم يقول...

الناس قالوا اهم يا عم
اسمها لا حول و لا قوة إلا بالله

أما المترو بقى
فاصحابي قالولي خبر غريب و عجيب
ان نفس الاجراءات تقريبا في سيتي ستارز !!!


ان ان ان

مع اني مش شايفة اي وجه علاقة بين المترو و سيتي ستارز ( اللي شايف يقوللي )

و الاوشاعات طالعة في البلد اليويمن دول إن المترو و سيتي ستارز مستهدفين ... اوشاعات من مين ؟؟ و لا عندي ادنى فكرة ... طب مستهدفين من مين ؟؟ لو عارفة كنت قلت ... طب مستهدفين ليه ؟؟ لما نعرف مستهدفين من مين نسأله و نعرف منه هو مستهدفهم ليه !!!

و اللي فاهم يفهمني ...

بس

أحمد عبد الفتاح يقول...

أسف جدا عالخطاء في عنوان البوست وهو غير مقصود

أحمد عبد الفتاح يقول...

راندا
انا لو ركبت توك توك يبقي هوصل وسط البلد مرتين في الاسبوع

أحمد عبد الفتاح يقول...

البتول
والستات هيعلموا ايه من غير رجالة
علي فكره البتول هي سارة بس تموين بقه

أحمد عبد الفتاح يقول...

بلا
مه لو اتبهدلتي بهدله الناس الي بتتبهدلها في المترو مكنتيش قلتي كده
هي فعلا تفتيش سوري جدا الغرض منه المنظره

أحمد عبد الفتاح يقول...

شهروزة
مسيرك تنزلي العاصمة وتركبي المترو وتتفتشي تفتيشه من اياهم عشان متغظيناش

أحمد عبد الفتاح يقول...

زياد
لا هيفتشوا الابونية

أحمد عبد الفتاح يقول...

الاستاذه عيلة
طبعا فيه علاقة
بين سيتي استارز والمترو وهي الفخامة ولا انتي مش بتاخدي بالك من النقطة ده ؟.

اسكندراني اوي يقول...

هههههههههههههههههههههه
طب لما انزل القاهره مااركبش المترو يعني

اسكندراني اوي يقول...

هههههههههههههههههههههه
طب لما انزل القاهره مااركبش المترو يعني

MEMO يقول...

انا كان حصللى بردو الموقف ده فى المترو والمشكلة انى من اسكندرية ومعرفش النظام فى القاهرة وفعلا اشتبهوا فيا وقادونى الى احد الغرف فى المترو وقعدت نص ساعة فى تفتيش شنط وتفتيش ذاتى وأسئلة غريبة وخرجت بس خرجت وانا ساخط على النظام وعلى المعاملة الرديئة. وشكرا

شارك مع اصدقائك

Share |