الجمعة، 23 مارس، 2007

وعلي المقهي كان اللقاء



كان لقائنا علي احد مقاهي وسط البلد - معقل الحركة التحررية في مصر - وعلي احد اصغر هذه المقاهي حجما وعلي منضده صغيرة تجمعنا نحن 6 اشخاص - بالمناسبة المقهي لا يحوي سوي 10 كراسي تقريبا - ووضعنا بوسط المنضده احد اجهزة الكمبيوتر المحمولة والذي كان مظهره لا يتناسب اطلاقا مع مظهر المكان العام .

أخذ كل منا يستعرض مدونته في سرعه نتقل من تدوينه للاخري نضحك علي هذا التعليق يستوقفنا هذا الموضوع أو تلك ، تحدثنا في السياسة والكرة وكل شئ تقريبا .

يييييييييييييه نسيت اقولكم احنا مين اصلا .

بصوا يا رجاله أحنا كنا 6 اشخاص 3 مدونين حاليين و 3 مش مدونين بس مهتمين بالتدوين .

أما المدنين فهما المدون المشهور الرجل الفاضل والمدون المهاب صاحب سبق المدون الذئب وعضو الهيئة العليا لحركة 30 فبراير الشهيرة الحاج جرجس صاحب مدونه كفاية حرام ، والمدونه الرقيقة البنوته المنطلقة دائما راندا صاحبة مدونه زنزانة ، والمدون الثالث بكل تاكيد هو صاحب النظريات الفلسفية العميقة والروئية التحليلية المستنيرة انه المدون الفذ أحمد عبد الفتاح صاحب مدونه A&A المعجزة - الي هو انا يعني ولا فخر .

و الـ 3 الي مش مدونين هما عثمان القناوي الي اتوقع انه ينضم للرهط المدونين قريبا والصحفيه الكبيرة دعاء الصحفية بجريده الجمهوري الدستوري الحر - والنبي يا شباب لو حد سمع عن حد شاف حد قال لحد انه مره اتحكاله عن حد شاف الجرنان ده مرة مع واحد ياريت يبلغني لانه واضح انه جرنان سري - واما الشخص التالث فهو عضوة حركة كفاية الثائرة دائما ( مش فاكر اسمها ) .

المهم اننا قعدنا ودردشنا وضحكنا واتخانقنا واختلفنا واهم حاجه اننا دفعنا الحساب ومشينا - بالمناسبة عثمان هو الي عزمنا وكان هيعيط وهو بيدفع الحساب كان 7.5 جنية - وعلي فكره احنا سوسنا حولين مدونين كتير ذي عمر القناوي وزعيم المدونين وائل عباس وبالطبع تنين العمرانية البمبي علاء سيف ومش هقول انت قلت عنهم ايه يا حاج جرجس لان الله ستار حليم ولا ايه رايك يا رانده ؟؟

اللقاء كان الهدف منه تقريب وجهات النظر بين الاطراف المختلفة ووضع روية مشتركة حول اهم احداث الساعه وخصوصا ظاهرة المدون الذئب التي اثارها الحاج جرجس في مدونته كفاية حرام .

وانا عايز زبايني الاعزاء يستنوا نتيجه مرتقبه من هذا التحالف المشترك بين قوي التدوين العامل في مجتع وسط البلد الثائر .

وبدعوكم لزيارة مدونات كفاية حرام وزنزانة علي الروابط :-

http://zenzana.blogspot.com/

http://kefaya7aram.blogspot.com/




في17,شباط,2007 - 11:29 مساءً, zenzana كتبها ...
شكرا ع التسييححححححححححح

انا اتشرفت بالجلسة ويا رب تتكرر، لانك فجأتني بتكتب عن عيد الحب، وبتسمع مزيكا، لا والكارثة انك بتحب
انت متأكد أنك ......
يا بني ما انت زيينا اهو امال في ايه؟

zenzanaراندا
في18,شباط,2007 - 12:40 صباحاً, الحاج جرجس كتبها ... (غير موثّق)
دا انت طلعت فضيحة يا راجل وما تتبلش في بقك فولة... هههههه بس كانت قعدة جميلة بصراحة... بس المشكلة أن أصدقاءك الإخوان ممكن يسحبوا منك كارنيه الإخوان لما يعرفوا إنك كنت قاعد مع الحاج جرجس المعروف بمواقفه المتشددة من الإخوان... يلا ربنا يساعدك يا ابني... أنا بس عايز أصلح إن أنا مش عضو في حركة تلاتين فبراير المجيدة للأسف وإن كنت أكن لها كل اعتزاز وتقدير ولكل قادتها الملهمين الثوريين... وأما بالنسبة للتسويس على الإخوة المدونين الأفاضل... لن أقول لك سوى ما قاله وزير الداخلية لا مؤاخذة لا فض فوه حينما قال اللي يخاف ما يتكلمش واحنا عيال مقطعة بطاقتها وما يهمناش لا مؤاخذة... ونشكر السيد الرئيس على توجيهاته وكذا السيد المحافظ والسيد علاء سيف والسيد وائل عباس وجميع السادة ظباط الموباحث في المنطقة
في18,شباط,2007 - 01:22 صباحاً, أحمد عبد الفتاح كتبها ...
توضيح للاخوة
1- انا اخوان من الراس للنخاع وممكن اوريكم كارنية الجماعه
2- الحاجات الي بتتكلمي عنها يا رانده بتاعه اي حد مش الاخوان بس أحنا بني ادمين
3- عايز اشوف التصريحات العنترية يا عم الحاج جرجس قدام القادة الثوريين بتوع 30 فبراير ومش بعيد يقرروا ان اول واحد يعدموله مدونته هو انت ولا نسيت السوال الاخير في استطلاع القنواي ؟؟؟
في18,شباط,2007 - 05:31 مساءً, zenzana كتبها ... (غير موثّق)
مقابلتك يا احمد غيرت الصورة النمطية عندي لشباب الاخوان، لان احتكاكي كان من فترة طويلة حوالي اربع سنين فاتوا، فا خلتني افكر في كلام احمد ان الناس ممكن تتكلم وتتحاور، ويكون في ما بينا نقاط التقاء. وان كنت احب اوضح اني لا يسار ولا ليبرال، انا محايدة جدا لكن لي قناعاتي الخاصة التي ادعي انها بناء علي خبرة احتكاك بتيارات مختلفة ، شكرا علي لقاء القمة وان شاء الله يكون في لقاء قمة تاني.
في19,شباط,2007 - 07:13 صباحاً, واحد مش معروف كتبها ...
والنبى يا حاج انا شايف انك بتتكلم فى حاجات كويسة ممكن اعرف ازى اعمل مدونة
في19,شباط,2007 - 11:51 صباحاً, مجهول كتبها ...
تصورا انا الظاهر اني مكشوف عني الحجاب عثمان القناوي فتح مدونة وسماها من دفتر الوطن وانا بدعوا الكل للدخول عليها ويارب تقرفوه في عيشته
الرابط
http://daftarwatan.blogspot.com/
في20,شباط,2007 - 03:52 مساءً, مجهول كتبها ...
انا ام احمد ياحج جرجس واحنا اتعلمنا ان الخلاف في الراي لا يفسد للود قضية ثم ان الخلاف شيء مطلوب لان الله سبحانه وتعالي لم يخلقنا نسخ مكرره بل نحن متفاوتون ومع الخلاف في الراي تتولد افكار متعدده

ليست هناك تعليقات:

شارك مع اصدقائك

Share |