الجمعة، 23 مارس، 2007

كل سنة وانتم طيبيييييييييييييييييييييييييين




الزملاء والزميلات الاعزاء
عاملين ايه ؟
أكدبوا بقه وقولوا كويسين
ممكن نكتفي بالحمد لله عشان منبقاش كدابين
بصراحه انا كنت عايز اسالكم سوال بس الاجابه ياريت تكون صريحه
ايه رايكم في العيد ؟
سامع واحد بيقول ايه العبيط ده الي بيسال عن العيد ده ده ياعم الفالح يا كاتب المقال العيد فرحه واجمل فرحه وصلينا العيد واللبس جديد وعيديه وخروف وشغل يعني وبعد كل ده تسال السوال العبيط ده ؟
وانا هنا ليا مزاج ارد علي الاجابة المفحمة بتاعه صاحبنا ده واقوله طب رد عالاسئلة ده
ايه رايك في العيد الي اول خبر فيه اعدام رئيس جمهوريه كده عالريق قبل حتي ما نصحي من النوم وياسلام لو كنت من العبط امثالي الي بيناموا وهما مشغلين جنبهم اذاعة بي بي سي وتصحي عالخبر كده طازه ؟
طب بلاش ده هسالك سوال بس جاوبه بصراحه
بذمتك وانت بتسلم عي اصحابك بعد الصلاة حسيت ان ده سلام وحضن السنة الي فاتت والي قبلها ؟ ولا حتي ده كل سنة وانت طيب بتاعه السنين الي فاتت ؟
طب بلاش ده وحضرتك بتدبح الخروف - لو كنت مليونير طبعا - حسيت بالفرحه بتاعه زمان ؟ حسيت ان عيال العيلة فرحانة ؟ بتجري ؟ بتضحك ؟ طب حد بذمتك من العيال المجرمين دول فرقع فيك بمب ذي زمان او حتي حط خرطوشه تحت منك ؟
انا طبعا مش هسالك ايه رايك في العيد ي دول ذي فلسطين والعراق ولبنان ......... الخ ( بالمناسبة لسطين العراق لبنان والعراق . الخ بقت لزمة لكل الكتاب في كل المقلات وعشان كده ممكن نقول والصومال ده ان كنت واخد بالك ان الصومال مسلمة وعربية زينا والله ) باعتبار ان ده تدخل في امور دولة ذات سياده - نقلا عن زعيمنا الملهم - . سيدي الفاضل اليك الصدمة التالية
بس في الاول انصحك تقعد لحسن تقع من طولك وياريت تبعد شويه عن الكمبيوتر لاحسن تقع عليه تبوظه وانت عارف الجهاز غالي وعليه اقساط
المفاجأة أن كلنا بنعمل فرحانين
اه والله بنعمل فرحانين بنعمل اننا مبسوطين كل واحد قبل ما ينزل الصبح وبعد ما يتخانق مع امه ويسمع الخبرين اياهم من الجزيرة -الله يخرب بيتها ذي ما هي منكده علينا - يقو يلبس اللبس - الي هو مش جديد قوي - ويقوم لابس ابتسامه صفراء باهته وبعدين الجزمه - الي هي الحزاء يعني لو كنتم شايفين الجزمه عيب - وينزل يصلي ويقابل الناس الي هما بيعملوا ذيه مبسوطين ويقعدوا يمثلوا مسريحية من فصل واحد اسمها العيد فرحه - مش فرخه هه ؟ - وبعدين يروحوا يدبحوا وكل واحد يمسك الموبيل وهو مش طايق يكلم حد فيقوم يرن علي الناس وخلاص كده قالهم كل سنة وانتم طيبين أو بالكتير يبعت لهم رساله من علي نمرة واحد ببلاش فيها كلام جامد ذي الثلج .
بذمتكم ده عيد ؟ بذمتكم ده فرحه ؟
طب لو مش مصدقني افتحوا التلفزيون علي الاولي وا التانية وشوفوا المذيعه النميسه وهي علي الهواء مباشرة من جنينه الحيوان تنقل بث مباشر لمسرحية العيد فرحه الي متخلش علي عيل في كي جي 1 ثم تنقل الكاميرا للمذيعه النميسه التانيه الي في دريم بارك الي فاضيه اكيد عشان تكمل المسرحية .
طب السوال احنا ليه مش فرحانين ؟
طبعا سوال غبي وانا مودب ومش هرد عليه
بس احب اوضح نقطه من بحر الي مخليانا كده
أيها الساده الافاضل احنا بنواجه موامرة
اه والله موامرة عشان منفرحش لما النظام العظيم بتاعنا حس اننا ممكن نفرح شويه العيد ده - مش عارف حس الاحساس الغريب ده منين - المهم راح ادانا المنحه السامية اياها بتعديل الدستور بجد صعبوا عليا لانهم لو كانوا يعرفوا ان اخوانهم الامريكان هيتكفلوا بالامر في اخر لحظه باعدام صدام كانوا وفروا التعديلات ينكدوا بيها علينا قدام شوية .
سامع واحد بيقول جزاك الله خيرا يا عم احمد ياريت تقوم تروح ومنشوفش وشك تاني
بس انا لسه عندي كلمتين هما غراب بس حاسسهم
امبارح واحد اعرفه قالي ده مبدأ عندي لازم افرح رغم اي شئ وعلي فكره انا شايف ان ده سر حياة الشعب ده وغيره من الشعوب المحظوظه بحكم الروساء الملهمين امثال مبارك لها انهم عندهم مبدأ ولو كان المبدأ ده مبدأ واحد بس انهم يفرحوا رغم اي شئ.
وكل سنة وانتم طيبيييييييييييييييييييييييييييييييييييين

هناك تعليق واحد:

maha miho يقول...

عيد سعيد..عيد مبارك..عيد جميل غضب عن أي واحد نفسه ومنى عينه ينكد علينا.. عيد فطر عيد أضحى عيد ميلاد هنفرح يعني هنفرح.. مش هما اللي هيفرحونا بمزاجهم وهما هما اللي ينكدوا علينا برضه بمزاجهم
تعرف يا أحمد شعبنا ده ماشي بدماغه على فكرة وفاقس كل الحركات ومع ذلك بيطلع يضحك في القناة الأولى لما المذيعة تسأله بتعمل إيه أول يوم في العيد؟ ويقعدوا يتنططوا ورا اللي بيتكلم ويشاوروا ويلوحوا ويا سلام تقولش في الحجاز وبيشاوروا لأهاليهم ولو اني بلوم ع اللي بيعملوا كده
نهايته.. سيبك مننا ما تدوشش دماغك بينا.. احنا أصلا لنا الله
أحمد .. كل سنة وانت مصري فرحان بالعيد وطلع لسانك بالقوي وقولهم عيد مباااااااارك

شارك مع اصدقائك

Share |