الجمعة، 23 مارس، 2007

معرض الكتاب السنة ده يجنن


من الموكد انك كاي مصري تذهب كل عام الي معرض القاهرة الدولي للكتاب وتتابع اأهلالجديد وبالتاكيد لا تشتري كتب لان الكتب اصبحت اغلي من اللحم واغلي من حاجات تانية كتير واكيد لو حبكت معاك ثقافة اوي بتسحب علي سور الاسبكية تشتري شوية كتب مستعملة والي اكيد برده غالية .

المهم انا السنة ده حبيت اعرف ايه الجديد في المعرض وحبيت اسال حد راح قبلي المعرض السنة ده وللصدف السعيدة اخويا الاصغر مني راح قبلي للمعرض وجه وسالته ايه رايه في المعرض ؟ أخويا قالي بصراحه يا اخويا المعرض السنة ده يجنن ، بالتاكيد انا اذبهليت المعرض يجنن معقول ؟؟ ده فيه اكتر من 5 دور نشر كبيرة جدا والي هي بتبيع اكتر بيع في المعرض منها التوزيع والنشر مش مشاركة لانها اتقفلت في الحملة الامنية الجديده ، وعارف برده ان سعر اقل كتاب بقه 30 ج وعارف ان المعرض السنة ده منزوع الدسم السياسي ، طيب يبقي المعرض يجنن منين ؟

أخوايا اصر علي موقفه وبصراحه انا استغربت اخويا الي ملوش في الثقافة والي اكبر حاجه قراها كانت تتر المسلسل العربي عجبه المعرض ، اخويا الي بيكسل يقرا ترجمة الافلام الاجنبي وبيستني حد يحكيهاله يقول كده كان لازم يبقي ليا وقفه .

المهم هديت نفسي وابتسمت وسالته قولي بقه يا حبيبي المعرض بقه كان يجنن اذاي ؟ قام قالي تصور انهم رجعوا كل محلات الاكل الي كانوا شايلنها السنة الي فاتت ورجعوا الشورمة السوري تاني ، وهنا بالضبط عرفت ليه اخويا قال عالمعرض يجنن .

وان كان اخويا برده ليه تحفظات من قبيل عدم رجوع عروض الشيبسي وعروض المنتجات الصينية والسورية وقالي انه متوقع السنة ده ان ادوات الحجامه تحقق اكبر بيع .

وسلملي عالثقافة

ليست هناك تعليقات:

شارك مع اصدقائك

Share |