الأحد، 15 أبريل، 2007

وقفة مع وقفة الامس



أمبارح كانت الوقفة الي دعي ليها بعض شباب الاخوان المدونيين والي اثير قبلها وبعدها كلام كتير سواء من الاخوان او غيرهم ذي الكلام الي اثير هنا وهنا وهنا وهنا هنا .
بشكر كل الي اهتم بالوقفة سواء بالتشجيع او بالنقد ، بالمشاركة أو بالد عوة لمقاطعتها ، بشكر كل واحد الوقفة ده مرت حتي علي باله المواقف ده والوقفة ده هتفتح معانا مواضيع مهمة جدا مسكوت عنها من زمان . ونيجي للمهم
الوقفة
بداية تقيمي للوقفة انها نجحت علي المستوي الاعلامي ( وكفاية أن صوتنا وصل امبارح اكتر من 4 دول ) وحققت فوق المطلوب منها وكان الحشد الاعلامي فوق الخيالي بالنسبة للعد الذي لم يتجاوز 40 فرد أمام اكتر من 70 اعلامي .
الوقفة لم تنجح والي عايز تقول فشلت ممكن برده علي مستوي الحشد والاسباب كتيرة جدا للموضوع ده
ممكن يكون استعجال ذي ما قال محمود وممكن يكون لان محدش اتبناها سواء اخوان أو كفاية وممكن يكون اي سبب .
الاهم
هل حققت الوقفة هدفها ؟؟؟
أه ونص وتلات اربع
لان ببساطة قضية منعم سمعت في كل حتة بسبب الوقفة علي المستوي الاعلامي وياريت مننساش ان المظاهرات في الاول والاخر هدفها الاول مش حشد جماهير بل توصيل صوت والي تم امبارح ان الصوت وصل لاماكن لا تحققهها مظاهره جرارة من ام 1000 وانت طالع.
أمر هام برضه كنت عايز اتكلم فيه الا وهو كواليس الوقفة
1- الوقفة ده كانت فكرتي وفكرة ميت وعلي فكرة كنا هننزلها لوحدنا بس وميت ليه تجربة لانه مرة تظاهر وحده قدام روز يوسف .
2- قلنا ندعو ليها وكانت المشكلة ندعوا باسم مين ؟ مفيش وقت ناخد اذن كفاية عشان تبقي باسمها ولا شباب من اجل التغيير ولا الاخوان طبعا - وعلي فكرة احنا مندمجين في كل دول - فبقي الحل اننا ندعولها احنا بصفتنا التدوينة والاخوانية والي هي الصفات التي لا يسقطها عننا كونا خدنا اذن ولا لا وهي نفس الفصيل الي انتمي ليه عبد المنعم - مدون اخوان - ومش حاجه تاني .
3- البعض اعترض عالمعاد وده كان وارد في خططنا ومنهم حتي اصدقاء منعم المقربين ولحل الموضوع ده اجتمعنا وكنا 4 من المدونيين منا 3 اخوان وواحد كان اخ وفلسع وحطينا موبيل في نص التربيزه وشغلنا الهند فري واتصلنا بناس كتير مهم نعرف رايها في الموضوع ده ذي اصحاب منعم , محامين , نشطاء , قيادات في الاخوان , صحفيين , وكالات انباء ......الخ وكان كل هدفنا نعرف هل ده في صالح منعم ولا لا , وهل التاجليل افيد ولا التنفيذ , وبعد ما خلصنا كارت الشحن كانت القناعه ان لازم بكره لاسباب
- الضغط علي الامن وخصوصا ان منعم لم يصدر امر بالقبض عليه يعني فيه امل يسيبوه لو لقوا الموضوع عامل شوشرة وهيصة
- نشر قضية منعم لان كتير مكنش متابعها بحجه انه لسه متاخدش
- ايضاح ان وضع منعم وهو هربان لا يقل عن وضع المعتقل ان لم يكن اسواء
وكفاية لحد كده اسباب
4- أحنا ناس بتحب منعم ومش لازم نستني لما كفاية تمن علينا بعمل لمناصرة منعم ولا السادة كبار المناضلين يدعوا لعمل ذي ده ولا الاخوان يكلفوا القواعد انهم يتحركوا وكانت حركتنا شخصية والي استجاب لنا كانوا ناس مقتنعيين بكلامنا
5- اخ واحد بس من كل اخوان امبارح كان مستاذن مسوله والغريبة بقه ان مسوليين قالوا اه وتانيين قالوا لا وبشده ومحدش عارف السبب
6- اخوان اون لاين دعت للوقفة مش عارف ليه وده كان فوق تصورنا ومش مصدقينه لحد دلوقت لدرجة اني كل شوية افتح الصفحة ابص عالاعلان واقفل تاني ومش محبذ موضوع انهم اعلنوا تحت ضغط لان متمش ضغط اصلا .
7- حد لعب من ورانا عشان يفشل المظاهره وهو مين معرفش حتي الان والحد ده اتصل مثلا بناس قبل المظاهره بساعه بعت رسايل يقول فيها منعم مش عايز حد يروح المظاهره
واليكم المفاجاة
رفيق منعم طول يومين الهرب والي كان اخر واحد يشوفه قبل ما يدخل المطار ويتقبض عليه قال ان منعم كان سعيد جدا بالوقفة وبتوقيتها بالرغم انه تردد في الاول وانه كان بيدور علي اخبارها لحاد الساعه 10 لما دخل المطار وحتي لحاد 1 لما اتقبض عليه من جوه الطيارة .
نيجي للمهم
التجربة اثبتت ليا وبشكل كبير ان تجربة الاخوان التدوينية لم تنضج بعد وان احد جناحيها عالاقل- وهو الاخوات - لسه عليهم بدري اما الاخواه فلسه مش مقدرين يعني ايه تدوين واتمني من الاخواه دول يراجعوا مسوليهم وافكارهم وكتبهم عشان يرجعوا يفهموا ان عمل ذي ده لا يتعارض ابدا مع الي اتعلموه ومع اهداف الجماعه .
وهحكي هنا موقف بسيط واحد قالي غلط لانك مش مستاذن قلت له وهل انت بتستاذن قبل ما تدون ؟؟ قال لا , قلت له ده التدوين اكبر من العمل ده بالف مرة يبقي اذاي متستاذنش ؟
اتمني اننا نعالج الانفصال في الشخصية ده
اخيرا
انا اخ وهفضل طول عمري اخ مصلحة جماعتي فوق مصلحتي
هعيش
الله غايتي
والرسول قدوتي
والقران دستوري
والجهاد سبيلي
والموت في سبيل الله اسمي امنياتي
ولاني شايف ان الي بعمله ده في مصلحة جماعتي ولاني مش لوحدي عمل كده ولكم في منعم مثال فانا شايف ومقتنع ومومن ان التجربة التدوينة الاخوانية من الحاجات الي هتكون سبب في بث روح جديده شابة للجماعه وانها هتحافظ عليها وتنيمها كتير جدا
والحرية لمنعم

هناك 10 تعليقات:

محمود سعيد يقول...

أول الكلام كنت عاوز أضربك آخر الكلام إتكلمت كويس

اول فقرة عاملة زى كلمة السادات أشكر اللى انتخبونى والذين لم ينتخبونى

ثانى حاجة
ملكش حق تدعى أنك أخ وكمان عامل
تقدر بس تقول أنا إخوان
فكرياً وتنظيمياً متقدرش تثبت

الوقفة فشلت
على جميع الأصعدة
أو لم يكن محدد لها أهداف أصلاً نقدر نقيس بيها نجحت ولا فشلت
بس انا مش شايف أى حاجة إعلامية :-)

حكاية رفيق منعم ديه بقى تعتبر كلام مرسل مالم توثقها
بس أنا مصدقك

وآخر الكلام جميل
بعد اللى فى الأول

محمود سعيد يقول...

آه نسيت الإخوات

يا راجل ده عددهم أكثر من الإخوة
وشوف مستأذنين ولا لأ بقى :-)

ميت يقول...

محمود
ياليتك لو سمحت يعني كده
تقعد في بيتك وتسيب الأخوات المدونات همه إلي يشتغلوا

Reformer1976 يقول...

كلامك رائع يا أحمد ومتفق معاك إن الوقفة امبارح كانت مهمة جدا جدا جدا وصدقني لولا إني ما اضمنش الإخوان في مواقفهم وإن محدش يتاجر بيا على أساس إني مسيحي كنت نزلت معاكوا بس إنتوا غلطتوا لما قلتو الدونين الإخوان هما اللي بيدعوا للموضوع... بس كلامك صح جدا وأنا علقت تعليق مطول عند محمود سعيد عبرت فيه عن رأيي في الموضوع وأحزنني جدا ندم الأخ محمود على نزوله المظاهرة دون استئذان بل والأفدح أنه يعلن ما يشبه الاستتابة عبر تدوينته تلك حيث قال نصا إنها كانت غلطة ومش هتتكرر تاني!! يا اخواننا ما يصحش كدة!!! نصرة الحق يا احمد زي ما انت قلت مش محتاجة رأي ولا إذن من حد!!! وأنا قلت لمحمود روح قول لمسئولك إن المدون المسيحي مينا أعلن تضامنه مع عبد المنعم الإخواني من غير إذن من قسيس كنيسته ولا من قائد اجتماعه على الرغم من إنه ملتزم بدينه إلى أقصى حد!! الناس محتاجة فعلا تبطل فصام وفصامية وتتسق مع نفسها ومع قيمها بقى

وفي النهاية كان الله في عون منعم وفي عون كل شاب مصري مؤمن بهذا الوطن

Alaa يقول...

يا جماعة صعب جدا تقييم حاجة مخدتش فرصتها في الدعاية بالشكل ده

خد عندك مثلا الاعلان على مدونتي اتشاف أقل من 300 مرة قبل موعد الاعتصام و (نسبة منهم هتكون ناس ضلت طريقها بالخطا) من ال300 دول لا تتوقع أن أكثر من 10% يفكروا يشاركوا و من ال30 دول كام واحد هيتصادف أن يناسبه الميعاد المبلغ عنه باستعجال كده؟

طبعا كل التفاصيل خاضعة للتقييم لكن في رأيي صعب جدا تقييم أي تفصيلة مادام الأمر تم مستعجل كده.

مفهوم أسبابكم للاستعجال و ان كان ده تفائل شديد منكم، لا أظن أن أي حشد كان ممكن يوقف قرار حبسه، الكلام ده ينفع لو اتلك من الشارع في وسط مظاهرة و محتجز في مكان مؤقت لحين صدور قرار من فوق. منعم حاولوا يقبضوا عليه من بيته و في نفس اليوم اللي حصل فيه أكثر من اعتقال يعني القرار متاخد (أنا بتكلم عن قرار سياسي طبعا مش قرار نيابة).

مقصدش أن مفيش فايدة من الاعتصام، أقصد أن مفيش فائدة من الاستعجال، لكن حتى لو أقرينا بضرورة الاستعجال، للاستعجال ثمن و هو قلة المشاركة بسبب غياب الفرصة للتنسيق و الدعاية و الحشد.

sharkawoo يقول...

يا سيدي الفاضل أحمد باشا ...

أعتقد أن إحنا نطوي هذه الصفحة سريعة بعد أن نكون تعلمنا من هذه التجربة من خلال سلبيتنها وإيجابيتها ...

ونشوف هنعمل إيه خلال الفترة القادمة ولا نشغل أنفسنا بصراعات أو أشياء لن تفدي معنا في شئ حالباً...

وإن إلي علينا أن الوقفة دي تكون دافعة للعمل مرة آخر ...

ويا ريت تكون همتك زي ما كانت في شارع البورصة كدا ... أوف ي التكعيبة ...

أحمد عبد الفتاح يقول...

محمود
مش هعلق غير علي موضوع الاخوات
انا سعيد جدا انهم جم بس انا بقول تجربتهم التدوينه لم تنضج بسس حاجات تاني اهمها انهم لسه بيتعاملوا بمبدا الاستاذن مع التدوين واهتمامهم بمواضيع محدده قوي وده مش صح علي حد زعمي
----------------------------
العزيز مينا
مش هنسي طول عمري انك اول واحد عمل بانر تضامن مع منعم مغرق كل المدونات في خلال 10 د من علمك بخبر اقتحام بيته
ومش هنسي انك رجعت لعالم التدويين مخصوص لمده 10 د عشان منعم
مينا بجد انت حد ميتعوضش والتدوين هيخسر من غيرك
------------------------
علاء بجد انا سعيد انك هنا بعد غيبة
بس كنت اتمني ان المناسبة احلي
انا معاك في كل كلمه وحرف قلته
بس صدقني ويمكن انت كنت معانا عالتليفون وعارف ان الموضوع قتلناه بحث ووصلنا للكلام ده وكان لازم الاستعجال
والنتايج كانت طيبة وكسبنا بنط
------------------------
شرقاوييي
أكيد بنتعلم
ومن الحاجات الي اتعلمتها انك حد يعتمد عليه جدا ويشرفني صداقتك

البتول يقول...

احمد انا سعيده بالوقفه وكنت اؤيدهاواتمني ان اشارك فيها نصرة المظلوم مهما كان جنسه او لونه او دينه واجب احساس المظلوم انه ليس وحده وان هناك من يسانده شيء كويس جدا والله انا حاسة ان منعم ابني او اخويا كل اللي يشوفني يسالني مالك وتذكرته طرل اليوم ودعوت له وللاخرين

البتول يقول...

الحاج جرجس انت مثل حي علي مبدا المواطنه التي يدعون انهم يبحثون عنها انا مش عارفة ادخل علي مدونتك ويسعدني تراجع نفسك في اغلاق المدونه ونرجوا الا تعود مواطنا عاديا بل نريدك مدونا مميزافهذه رسالة يكفيك شرفا ان تعيش لها

AbdElRaHmaN Ayyash يقول...

كلمة الحاج جرجس خطيرة فعلا
ان الاخوان او مدوني الاخوان هم اللي يشاركو

بص يا عم احمد كلامكم جميل جدا وراقي فعلا
عجبني نقدك بجد
جزاكم الله خيرا يا سيدي
تحياتي
وان شاء الله تشاركونا في الفعاليات الجاية
سلام

شارك مع اصدقائك

Share |