الثلاثاء، 30 أكتوبر 2007

وكمان خبر الدستور ليه بقيه؟؟!! مبروك الدستور غلب المصري في الهجص

تحديث
التعليق ده جالي عالبوست الي فات
بيقول صاحبه
هههههههه
مش عارف اقول ايه؟
بس لما قريت الخبر ده
فعلا فطست علي نفسي من الضحك
يا راجل ده لما الخبر بتاعنا نزل غسلتوا بكرامه اهلنا الارض

فين بقي التدوينات اللوزعيه عن منعم

الواضح ان الفرق مش كبير بينهم وبينكم
احمد رجب
صاحب الخبر الاول اللي اتشتم واتهم بالعماله للامن
واللي واحد من اصدقائكم اسمه مجدي عمل فيه حركة قليلة الادب


ولاحمد رجب احب اقول
والله ما عارف اقول لك ايه
بس واضح ان حتي في الكتابة عن الاخوان ينطبق المثل القائل الي ملوش ظهر بيضرب علي بطنه
يارب تكون فهمتني

------------------------------------------------------------------------
صدق او لا تصدق
هتشه الدستور بتاعه امبارح عن مدوني الاخوان واول اول امبارح ليها بقيه النهرده
وبكده تبقي هتشه علي 3 اجزاء
النهرده بقه كان الجزء الاكثر مسخره
لان امبارح كان الخبر بيتكلم عن دعوه لمدوني الاخوان للجماعه بتقليد الوطني ومقلش الخبر في ايه ومجبش سيرة
وقلنا خلاص الديسك بيهزر عادي متعودين عليها من المصري والدستور وساعات البديل
محصلش حاجه
لكن الجزء التالت بتاع النهرده كان فيه الصاعقة والي المفروض هو جزء من خبر امبارح وقع في الديسك
بيقول الخبر ان صاحب مدونة يالالالي طالب بانتخابات قاعدية ذي بتاعه الوطني.
نقطة ومن اول السطر
سمعني كده تاني
صاحب مدونة ايه يا عم الجورنان ؟
وقال ايه ؟
ده والله اعلم قصده انا
تقريبا فعلا
اه انا بشبه عالاسم ده
بقه صاحب مدونة يالالالي قال انتخابات قاعديه ذي الوطني ؟
طب بزمتك وردت ده فين ؟
والله ما عارف الاخوه الصحفين بقه بيسمعوا منين بالضبط
وعالعموم عشان يمكن هو اتلخبط ولخبط ورق موتمر الحزب الوطني بورق لقاء المدونين احب اوضح له النقطة تاني
النقطة اثارها احد المدونين عن مشاركة الشباب من الاخوان في السياسة
وهنا ادخلت في النقاش وقلت ان الشباب المفروض يبقوا اكثر مشاركة سياسية وطلب د\ مرسي عرض مقترحات عملية
واقترحت انا ان الشباب لازم يبقي ليهم راي اكثر في بعض الشخصيات التي تمثلهم ذي امناء الاتحادات الطلابية سواء الحرة او العادية التي ترشح باسم الجماعه
يعني تتعمل انتخابات جوه الجماعه وبين شبابها حولين مرشحيهم
والموضوع يكبر ونعمل انتخابات لمرشحبي مجلس الشعب
ومجبتش ابدا سيرة وطني ولا اوطان ولا اي وطن علي لساني
ومش عارف والله الاخ الصحفي اللوزعي جابها منين
طيب وما المستفاد من الخبر ؟
يمكن المستفاد قلته في البوست الي فات بس هزود عليه هنا شويه حاجات
اولها : ان بقه واضح جدا ان فيه في مصر مصطح هيظهر اسمه صحفي اخوان متخصص شوون الاخوان يعني , ومرهوش شغلانه غيرهم وده مش وحش
بس الوحش انه لما ميلاقيش حاجه يكتبها يكتب عن اي حاجه والسلام
تاني حاجه بقه واضح ان مفيش فرق يذكر بين المصري والدستور
الاتنين ضريبه اخبار
بس يمكن الفرق الوحيد ان المصري اكثر مهنية في الحبكة الصحفية والاسلوب الصحفي واللغة والشكل والمراجعه والكلام الفني ده
ويارب بقه نسمع صوت اخواننا الي قعدوا ينتقدوا المصري لما نشر تمرد مدوني الاخوان هيقولوا ايه المره ده وان مكنتش مستني كتير منهم لان الدستور بالعربي كده مفيش عالحجر غيره - ويارب كل واحد يفسر الجملة ده بالي يحبه -
ثالثا وده الاهم بقه والي بجد قربت اتشل بسببه
ان لسه مفيش حد عارف يكتب اسم مدونتي صح
يا جماعه والله اسمها يالالاللي مش يالالالي
اتنين لام قبل الياء الاخيرة
ويارب بقه تتعلموا
في النهاية احب انشر هنا حاجه
هو ميل وصلني من صديق عزيز
بيقول فيه مذكرني بقول الامام الشهيد حين البنا
أيها الشباب ميدانكم الاول انفسكم ، فإذا انتصرت عليها كنت على غيرها أقدر ، وإذا أخفقتم فى جهادها فأنتم عما سواها أعجز . فجربوا الكفاح معها اولا ، واذكروا أن الدنيا جميعا تترقب جيلا من الشباب الممتاز بالطهر الكامل والخلق القوى الفاضل ، فكونوا أنتم هذا الجيل ولا تيأس

هناك 8 تعليقات:

citizenragb يقول...

ههههههههههه
هههههههههههههه
مش عارف اقول ايه ؟
معلش يا ابو حميد
بس السؤال
انا كنت عميل للامن
امال عبد المنعم محمود عميل لايه...تفتكر للاخوان

احمد رجب

فلسطينية الهوى يقول...

معلش يااحمد

العتب عالسمع بردوا

انا مش عارفة فين الامانة في نقل الحدث

حاسه اننا عايزين نظهر وخلاص اننا صحفيين ومش يهمنا حاجة وبنجيب كل الحقايق

بس تقريبا في النص ملقناش حقيقة فألفناها

خير

ربنا يهدي

محمود سعيد يقول...

كبر دماغك يا عم الحاج عادى

مانا قولونى كلام أنا كمان ...
واللى قاله واحد اسمه شبه إسمى

وأنا مفتحتش بقى أساساً فى القعدة

قولونى إيه

اه ، حكاية الدعوى والسياسى

كبر دماغك

أحمد عبد الفتاح يقول...

أحمد رجب
لا تعليق والله ما عارف اقول لك ايه

أحمد عبد الفتاح يقول...

فلسطينة الهوي
متيقلي تفسير التصرف ده متروك لصاحبه لوحده مش لينا
وانا عن نفسي لن اسعي لتفسيره

أحمد عبد الفتاح يقول...

محمود سعيد

اكبر دماغي من ايه ؟
ده حد اولني كلام
اسكت ؟
سيبك مني
ده لبس الجماعه كلها موقف غريب وملتبس ومش بتاعها
يبقي نسكت برده ؟
متيقلي انت مقلل من اهمية الموضوع 7 حبات

محمد السيد..مش حاسكت يقول...

لا تعليق ...

المصرى الجديد يقول...

متزعلش نفسك الجرايد اللى فى مصر كلها بما فيها المصرى اليوم والدستور بتتعمل خصيصا عشان يتحط عليها الاكل وعشان تشرب الزيت بعد القلية فعادى جدا لما تطلع عميل وخاين وكام حاجة زيهم
وبعدين انا مكونتش موجود فى الاجتماع ده بس شاهد مع السيد الصحفى انك قولت كده
والسلام ختام
http://newegyption.blogsome.com/

شارك مع اصدقائك

Share |