الجمعة، 6 يوليو 2007

مطيع المصري قوي


عم احمد مطيع جدي مع اخر احفاده زياد واخويا الرخم ياسر
مرتديا الذي الرسمي لازواج مصر

الو ايوه يا احمد الحق انا بموت بطني هتموتني
ده كان نداء جدي الساعه 2 بليل في في التليفون طبعا نزلت اجري جبت تاكسي وروحت لبيت جدي الي يبعد عن بيتنا 3 دقائق مشي ، اخويا ساعده عشان ينزل السلم وركب التاكسي ويادوب التاكسي مشي 500 متر ولقيت جدي بيقول باين يا واد يا احمد انا بقيت كويس والظاهر نزول السلم خلا بطني تفك طبعا السواق سمع الكلمتين ووشه جاب الوان وزعل عالتوصيلة وقلت لجدي خلاص تعالي ننزل ونتمشي وفعلا اديت للسواق 5 جنية ونزلنا واتمشينا واخترنا اطول طريق للبيت ماشين احنا الثلاثة بس في الشارع .
مشينا في الشارع واول ما مشينا جدي بدا يحكي ...ياااااه كان بقالي كتير مسمعتش الحكاوي ده حكي عن الجيش المصري الي كان فيه ايام مش فاكر سنة كام والجيش الانجليزي الي برده اشتغل فيه والكويت وقطر الي سافرهم وهو لسه متجوز جديد وعابدين والقصر والملك والحتة الي اتربي فيها الغريبة ان كل الحكاوي ده سمعتها قبل كده بس كنت سعيد اوي وانا بسمعها تاني ، كنت مبسوط قوي وجدي ماشي في وسط الشارع يحكي بصوت عالي ويشاور بايده وكنت بسال نفسي هو الراجل ده مش كان تعبان ؟ ده عالم غريبة قوي صحاني من سوالي صوته وهو بيقول هوب الجرار سحب العربية وحاولت ادي السواق بتاعه الهندي اي حاجه مرديش او حتي اعزمة علي حاجه ساقعة كانت ده جزء من حكاية سمعتها قبل كده 75 مرة عن مغامرة من مغامراته في قطر لما المقطورة الي سايقها غرزت بالاربع عجلات - شوفتوا النحس ؟ - واذاي سواق هندي ساعده جدي مكنش عارف يكلمه خالص لانه مبيفهمش عربي .
رروحت بيتنا بعد ساعتين كده بعد ما وصلته واطمنت عليه وطول الليل عمال افكر في الي حصل في الليلة ده .
تاني يوم كنت في المحكمة بغطي 5 قواضي لوكشة واحده امي اتصلت قالت الحق جدك تعبان وبصراحه معرفتش اتعتع من المحكمة وكنت كل شوية اتصل اعرف عامل ايه بس كنت في سري بضحك وعايز اقول لامي نزلوه يقعد عالقهوه في السيدة ولا عين الصيرة مع اصحابة وهو هيرجع 40 سنة لوراء .
الله عليك يا جدي مصري بجد ..... وبجد قوي كمان .
ملحوظة : جدي مريض بفيروس سي .... ربنا ياخد الي كان السبب ... طبعا عارفينه

هناك 17 تعليقًا:

صاحب البوابــة يقول...

ملحوظة : جدي مريض بفيروس سي .... ربنا ياخد الي كان السبب ... طبعا عارفينه


--------------

لا مش عارفينه يا أحمد

:)

ممكن تقلنا عليه

:)

Xee يقول...

ربنا يديله الصحة يا رب

و الف سلامة عليه


انا عارف اللي كان السبب على فكرة
:)

غير معرف يقول...

احمد باشا انا مش قلت لك لا تتحدث عن اسرتنا علي المدونة وبعدين ياسر مش غلس ده حزب وطني وعسل وسكر ودمه اخف منك تنكر سمعت ان فيه حد هيعلن الحرب عليك قريبا لم الدور خليك في السياسة والبطيخ اللي انت فيه يا اخواني

غير معرف يقول...

انا اعرف جدك حاجه كده ما حصلتش ومش هتحصل نبع عطاء فياض لا يمل ولا يفتر ولا ينتظر من الاخرين مقابل عطاءه يعمل لوجه الله ربنا يجعله في ميزان حسناته ولكنه عصبي جدا الحقيقة كده بس طيب

غير معرف يقول...

والله وانا بقرأ كلامك ده حستني عايزة اتكلم انا كمان عن جدو أنا.. أصله برضه بقاله كتير ما حكاليش القصص بتاعته اللي كنت قربت اسمعهاله انا كمان من كتر ما قالهالي..الناس دي احنا مقصرين معاهم اوي، بقالي كتير ما قعدتش معاه ... جيالك يا جدووووووووووووووو

غير معرف يقول...

حلوة قوي يا احمد الم.قالة دي

أحمد عبد الفتاح يقول...

صاحب البوابة
بسم الله الرحمن الرحيم الاجابة تونس

أحمد عبد الفتاح يقول...

زياد
ابقي ابعت لصاحب البوابة قوله مين السبب

أحمد عبد الفتاح يقول...

صحيح انا عامل البوست ده بناء علي طلب زياد
اي خدمة يا مان

أحمد عبد الفتاح يقول...

البتول
احنا مبيهمناش
وبهدد انا هلغي تعليق المجاهيل

أحمد عبد الفتاح يقول...

سارة
ده اقل حاجه عندنا
ده احنا عيلة جامدة قوي

أحمد عبد الفتاح يقول...

مها
انا سعيد بجد سعيد اول مرة تعبري المدونة بتعليق
اكيد احنا مقصرين انا معترف وان اولكم

أحمد عبد الفتاح يقول...

ميدو
ربنا يكرمك
انت احلي

Xee يقول...

:)

غير معرف يقول...

مجاهيل مين يابني اللي بتهدد بالغاء تعليقهم نفسي تنفذ تهديدك

غير معرف يقول...

اعتقد ان هناك سلسلة من الكتابات عن العائلة
كان اولها حملة نظافة الست الوالدة وثانيها جدو الله اعلم الدور على مين

اسكندراني اوي يقول...

الف سلامه وربنا الشافي ان شاء الله

على فكره الحكاوي دي هي اللي كونت شخصيتي
كنت بسمعها من جدي لوالدتي الله يرحمه

عارف نفسي ارجع صغير تاني واقعد جنبه على السرير واسمع نفس الحكاوي تاني

شارك مع اصدقائك

Share |