الأربعاء، 9 مايو 2007

متهم جديد ... بتهمة جديدة خااااااااااااااااااالص

اولا بخصوص منعم وقضية طلاب المعهد الزراعي فانا للاسف لم احضر عرض النيابة ومن الممكن لمن يريد التفاصيل ان يزور
ميت - انسي - أخوان اون لاين - أخوان ويب

والصورة لطالبين قاما بتسليم نفسيهما اليوم للنيابة في نفس القضية " فك الله اسرهم واسر كل شريف واصلاحي

ثانيا مبروك ومليون الف مبروك لشرفاء الوطن واصلاحيه لخيرت الشاطر واخوانه علي الحكم التاريخي ببطلان قرار رئيس الجمهورية


ثالثا موضوع متهم جديد ........ وتهمة جديدة خاااااااااااااااالص
انا ولله الحمد دلوقت في القاهره وصلت من ساعات فقط وبصراحة شديدة لم اكن ارهن كثيرا علي امكانية وصولي للقاهره قريبا والسبب ببساطة انني اصبحت شبه مطارد في الفترة الاخيرة وكنت ابيت كل يوم وانا انتظر قدوم زوار الفجر وبعثة كسر الابواب التابعة لهم لاصطحابي الي رحلة المجهول .
الموضوع ببساطة بداء منذ حوالي 25 يوم عندما جأئني احد المعيدين في الكلية والذي كنت علي خلاف معه في الاصل وصل الي حد طلبي من رئيس القسم ومشرف المادة تغيريه من سكشن دفعتي وطلبت رسميا انا ودفعتي ان لا يدرس لنا هذا الشخص ، فوجئت بهذا الشخص في احد الايام ينادي علي ويقول " أحمد تعالي عايزك " ومشي معي في احد ردهات الكلية وعندما اصبحنا وحدنا قال لي " أنت ليك مشاكل ايه مع الامن ؟ " أجبته مفيش غير اني في سنة أولي اتخانقت مع دكتور وأخدت أسبوعين فصل عادي يعني " قالي وايه تاني ؟ " قلت له " غير اني من طلاب الاخوان وهذا امر معروف مفيش " قال لي " لا انا قصدي حاجه تاني " قلت له وما هي هل يوجد جديد ؟ " قال " أه فيه امين شرطة من امن الدولة بلدياتي بيجي الكلية بقاله اسبوع بيسال عليك وبيقول انك ناشط حقوق انسان " لم اتمالك نفسي من الضحك وقلت " وهي حقوق الانسان بقت تهمه ؟ " قال " أنت عارف يا ابو حميد هنا اه تهمه ونص وعالعموم هو عرف اني بدرس لك في السكشن وسالني عنك وعن الي بتقوله لزمايلك وكده وانا قلت له انك واحد كويس وطيب وعادي جدا ذي زمايلك بس شايف نفسك بس وبتلبس كويس وبتلبس نظارة نظر غامقة لانك من القاهره وغاوي منظره " قلت له " كتر خيرك يا دكتور مكنش له لزمه تتعب نفسك " قالي " لا ابدا انت ذي اخويا وانا خايف عليك وخليك جنب الحيط .... الخ " وأمطرني بسيل من النصائح اياها الذي يحفظها جميعنا .
وعرفت منه ان من ابلغ عني هو احد العصافير زميل لي في الدفعه اعلم جيدا انه عصفور وتاكدت من هذا بانه سرد لي كل التفاصيل التي كان يعلمها هذا العصفور بالنص دون حرف زائد او ناقص لتتضح لي الصورة .
الامر ببساطة ان احد اصدقائي الاعزاء والذي يعلم عني الكثير دردش بحسن نية مع هذا العصفور الكبير وحكي له عن انبهاره بشخصية احمد والانشطة الغريبة التي يقوم بها والمحاضرات الدورات والكام مرة الي شافني فيهم عالجزيرة ... الخ ليمارس هذا العصيفر - تصغير لعصفور - ويبلغ الغربان الكبيرة والتي تعاملت مع الامر بمنتهي الجدية فتحرت عني واصبحت انا بكل بساطة متهم .

قلت ايه ؟
قلت متهم
سمعني كده قلت ايه ؟
قلت متهم
والتهمة ايه ؟
والتهمة اني ناشط حقوق انسان
بتقول ايه ؟
ناشط حقوق انسان


وذغرتي يا بهية علي القوانين ذي ما قال عمنا نجم ففي زمن مبارك لم تصبح حقوق الانسان فقط ترف وبدعه لا اصبحت بالمرة تهمه .
ابلغت احد اخواني بالجامعه والذي دهش وقال لي " طب اخوان وعارفين ديتها ايه وههتتحبس فين وهنعرف نبعت لك محامي او تترفد لك اسبوعين بالكتير تيرم لكن حقوق انسان ده ديتها ايه " قلت له "علمي علمك " فاجابني " ان الموضوع خطير ولازم تاخد بالك " .
ومر الوقت وقاربت ان انسي الموضوع حتي حدث صدام بين احد الطلاب من دفعتي مع نفس المعيد ووصل الامر الي ان ذهب الطالب للعميد وقال انه سيرفع دعوي سب وقذف ضد المعيد وتدخل رئيس القسم وهذا الوضع وقابل المعيد بالطالب ولان هذا المعيد الالمعي " مسحوب من لسانه " قال امام رئيس القسم والله انا بحبهم والدليل ان فيه واحد منهم وقع في مشلكة مع الامن وانا عملت كذا وكذا وكذا وقال وانا ممكن اعمل عكس كده مثلا مع محمد - الطالب الشاكي - واوديه في داهية .
بالطبع شعر رئيس القسم بانه اهين لان معيد لا طلع ولا نزل بيهدد طالب قدامه وقدام لفيف من دكاترة القسم ليطلب من الطالب - محمد - ان يغادر الغرفة ويبلغني محمد بما حدث لاعلم ان الموضوع مازال مفتوح وان هذا المعيد يمكن ان يستغله ضدي وخصوصا بعد علمي عن طريق سكرتارية القسم ان قرار رئيس القسم بمنع هذا المعيد من البعثات الخارجية - وهو عقاب صعب للغاية - ومنعه من التدريس لطلاب الفرق الثالثة والرابعه .
كثير نصحوني بتغير محل اقامتي واتخاذ بعض الاحتياطات الامنية وخصوصا بعد القبض علي 8 من طلاب الاخوان زملائي في الجامعه أول امس وتعذيب اثنين ونهم وتحويل 6 للنيابة وتلفيق قضيه لهم ولن اخفيكم سرا فقد جلست 10 ايا م انتظر كل يوم قدومهم ولكنهم لم ياتوا .
واخيرا وصلت للقاهره وكان من المفترض ان امكث بها 3 ايام لاعود للكلية واذاكر اسبوع قبل الامتحنات ولكن بعد ما حدث قد اضطر الي البقاء بالقاهره مدة اطول ولا اعود الا في وقت الامتحنات .
أخيرا اقولها وبكل فخر

اتحرقوا بجاز وسخ
انا مش هبطل
سلطوا كلابكم وعصافيركم واي حيوانات منكم وصدقوني حتي لو رحت انا فمصر فيها ملايين غيري هيطلعوا عينكم
واذا كنتم اتهمتوني اني ناشط حقوقي
فده شرف كبير يارب اكون قده
واهدي اليكم بعض الصور لي في بعض الانشطة الحقوقية يمكن تنفعكم في ملف القضية








ولو عايزين فيدو كمان موجود عالمدونة

وعلي الهامش

لا استطيع اخفاء دهشتي من تقبل رئيس القسم والاستاذه بمتهي البساطة وجود الامن داخل الكلية بل والسكاشن وسوال المعيدين وان ظهر الامر طبيعي في ظل دولة البوليس التي نحيا بها ولا اخفي في نفس الوقت تحيتي للرئيس القسم علي وقوفه بجانبنا.

قال لي احدهم : لم لا تسافر وتريح دماغك قلت له واسيبها لهم مخضرة ده بعدهم ده بلدي وانا قاعد فيها ومش هسيبها والظالم والحرامي والطاغية هو الي هيمشي منها .

ترردت كثير قبل كتابة هذه التدوينه فهي وبلا شك ستقلق كثير ممكن يحبوني علي وعلي احوالي وفي النفس الوقت قد تفهم خطا من جانب البعض وبالفعل لم اكن اتوقع ان اقدم علي كتابتها لولا ان التهمه الجديده تستحق منا الكتابة والتحدث ولنري سروية ما وصل اليه حالي مصرنا المنكوبة ، اتمني ان لا يقلق احد علي فانا بخير والحمد لله واعي تماما اين اضع قدمي قبل ان اخطوا اي خطوه .

هناك 14 تعليقًا:

مُرَاقِبْ مِصْرِي يقول...

منتهى العبثية يا أحمد

لا يوجد وصف يصف ما يحدث سوى أنه عبثية مرعبة ومهزلة تتجسد فيها فصامية هذا النظام وللأسف فصامية المجتمع الذي أنتجه هذا النظام البوليسي العسكري القمعوي

ربنا معاك

غير معرف يقول...

بتشتغل في حقوووووق الإنساااان !!!!!يا نهارك مش فايت يا مجرم يا عتيد الإجرام. أولا دي مش جريمة واحدة، دول جريمتين الأولى جريمة الحقوق !! والتانية والعياذ بالله هي ذكر وجود الأنسان في بلدنا الشريفة !!!! شوف يابني أنت لازم تتوب إلى الله و ترجع عن السكة دي و تشوفلك بنت صايعة تلف معاها سجاير و تطرد الوساوس من دماغك و تملأ مكانها دخان أزرق، لعل سيدنا النظام يرضى عليك و تبقى شاب ضايع و لذيذ

مقاومة يقول...

هي تهمة حقوق الانسان دي ، يعني ألحق استخبى انا ؟
ياعم سيبك اياكش يولعوا ، كمل و لا يهمك أكيد أنت عارف اننا في الطريق اللي ماشيينه يا تصيب يا تخيب و ندفع التمن ، و أكيد هايكون ارحم من تأنيب الضمير
بس خلي بالك من نفسك ، عايزينك برة

sharkawoo يقول...

يا بني أنا قولتلك من زمان (مش من زمان اوي يعني) بلاش السكة دي إنت إلي لم تسمع الكلام ....

ربنا يسترها إن شاء الله ... دونت وري هندعيلك وما في قلق...

وفي الأجازة ربنا يسترها ...

علي العموم إذا رأيت أنت ما تفعله خطأ فلا تفعله مرة آخري ... أما إذا رأيتت أنك الحق فلا تبالي ...

محمد هانئ يقول...

نهار ابيض
هي بقت تهمة
ما علينا
بس بجد يا ابو حميد حلوة الصورة الوحيدة اللي انا طلعت فيها
ولا يهمك با احمد ياما دقت ع الراس طبول يا بني
ربنا يهد الظالم والمفتري وابن الحرام

قلمي الحر يقول...

ههههههههههههه..والله نكتة, وإن شاء الله بقي الحكم فيها مؤبد ولا إعدام
اقولك مش بعيد بعد كده اللي يتغل في الخدمة الاجتماعية أو التنمية البشرية أو تنمية المجتمع برده يشلوه تهمة , يلا على خيرت الله....مع حكومتنا المصونة التهم عندهم , العدد في الليمون

أحمد عبد الفتاح يقول...

المراقب
عبثة فصامية شيزوفرنيا برانويا الي تحسبه المهم انك لازم تراقب كويس الي جاي

أحمد عبد الفتاح يقول...

مجهول
والنبي هي حقوق بواو واحده بس لاحسن انا مش عارف الخمس واوات دول ممكن يودوني فين

أحمد عبد الفتاح يقول...

مقاومة
تخيب اذاي ؟
صايبة طبعا مدام احنا صح
واستخبي فعلا لانك في الصورة

أحمد عبد الفتاح يقول...

شرقاوي
طبعا لا ابالي ده احنا شباب التكعيبة المخلصين الي قطعوا البطايق وحتي كروت الميناتل قطعوها وماشين بستر ربنا

أحمد عبد الفتاح يقول...

المصري
احلي سلام علي احلي مصري
متتصورش حسيت بايه لما كلمتني النهرده تتطمن عليا لازم تطلع من المصري ابو المصرية كلها
اما بقه موضوع الصورة ده لضمان الصحبة الحلوه ولا ايه رايك يا نجم ؟

أحمد عبد الفتاح يقول...

قلم حر
من كام سسنه كده بعد ما مسك ريسنا الجامد قوي كان في معرض الكتاب في لقاء المفكرين فقام سعد الدين ابراهيم وقاله يا ريس لازم نوسع المجال للمجتمع المدني فرد عليه الريس بالثقافته المعروفه عنه وقاله والعسكري ماله ما هو كويس برده
في دولة ده رئيسها لازم تبقي حقوق الانسان تهمه

mohamed يقول...

يانهراك الوان

حقوق الانسان ياحمد

حقوق انسان مره واحده كدا كدا دي تهمة كبيرة يبني



لا بجد بحس بتخلف المخبرين دول

abderrahman يقول...

ياللعار
!!

شارك مع اصدقائك

Share |