الأربعاء، 30 مايو، 2007

مبروك منعم خرج بس لسه 18 الف منعم


بجد انا فرحان انا اسعد واحد النهرده بالرغم من ان الامتحان كان رخم بس مش مهم الامتحان المهم ان منعم خاااااااااااااااااارج

وحشني يا منعم... وحشني قوي بجد وحشتني رخامتي عليك في الموبيل واتصالي بيك كل 10 دقائق واقولك الحق العيال خدوا افراج او ابعت لك رسالة كلمني عشان رصيدي خلص وانت تتصل
وفرحان طبعا عشان هشيل العداد الي فوق ده الي كان كائبني علي طول .
طيب لحاد هنا كفاية تهاني بقه وكفاية التهاني الي نازله عالواد من الصبح ونتكلم في المهم
النهرده يوم تاريخي لكل مناضل وكل نشط وكل حقوقي في البلد ده ، لكل واحد ناضل وبيناضل من اجل الحرية .
منعم خرج اليوم بفضل الله اولا طبعا ، وبمجهود عدد كبير جدا من الناس اغلبهم مكنش يعرف منعم اصلا بس كانوا بيعرفوا الحرية كانوا بيدافعوا عن الحرية كانوا بيحلموا بالحرية لكل بني ادم في الارض ده
يمكن منعم محظوظ لانه لقي الي يكتب عنه والي يسوق قضيته والي يهتم بيه بس ارجع وااكد ان ده كله كان لان كل دول بيدافعوا عن المبدا الي هو الحرية .
بفكر كل دول ان لسه في 18 الف معتقل في مصر وملاين في العالم كله .
ومتيقلي ان دورنا يادوب ابتدي بالافراج عن منعم ...
المسولية كبيرة والمهمة صعبة والطريق طويل.. بس احنا والحمد لله عفاريت وقدها والي خرج منعم قادر يخرج ال18 الف الي باقين بس احنا ناخد بالاسباب .
بدعوك تفكروا معايا اذاي ندعم 18 الف معتقل في بلدنا المنكوب مصر واذاي نرفع عنهم الظلم الي هما فيه .
أما انت بقه يا عم منعم فهنديك اجازة لمدو 24 ساعه بس تسلم عالحاج والحاجه وتطمن عليهم بعد كده لو ملقتش كلامك مالي المدونة والاماكن الي انت شغال فيها ونشاطك مكسر الدنيا صدقني انا هيبقي ليا معاك تصرف جامد وانت عارف بقه امكانيات التنظيم الخاص التابع لجماعه المدونين الاحرار وعارف ممكن يعملوا ايه .

هناك 6 تعليقات:

فلسطينية الهوى يقول...

صدقا أنا حتى اللحظة مش مصدقة


قاعدة أفتكر وقفتنا عند النيابة


كلامنا واننا نفسنا نعمل حاجة


حرقة دمنا بسبب اللي بيعملوه فيه


وكل التخطيطات اللي عملناها


وفجأة بقدرة قادر يخرج


أول ما عرفت الخبر

فرحت جدا وقلت اهي كل تخطيطاتنا طارت

و الحمد لله


وفي هم وانزاح


بعدين افتكرت القضية الاكبر


وان منعم مش أول واحد ولا هيكون الأخير في ظل نظام كده


فقلت فين الصوت للباقي

الصوت لكل معتقل


يارب يكون أعضاء ( مش هتاخد )


الصوت ده

البتول يقول...

طبعا احنا سعداء بعودة منعم وزملائه سالمين وبنقول يارب عقبال الباقيوربنا يفرج كرب كل مكروب ومبروك لاهالي المعتقلين اباء وامهات والله انا حاسه ان كل شاب افرج عنه ابني بجد اللهم انصر كل مظلوم

قلمي الحر يقول...

السلام عليكم
مبروك على خروج منعم
خروجه نصر للحرية , حرية كل واحد صاحب كلمة..حمد لله على سلامتك يامنعم
وعقبال18 ألف عتقل ...يارب

ibnyosry يقول...

الف مبروك لكل مدون لكل صاحب قلم حر لكل صاحب ضمير صاحى
بن يسرى

citizenragb يقول...

تعرف انك انت الوحيد اللي
افتكرت
الباقيين

سبحان الله

إخوانية مصرية يقول...

ياااااااااه بجد الواحد كانت اعصابه خلاص
الف مبروك لمنعم والي معاه
وعقبال الالاف التانين يارب
وربنا يتقبل منهم ويجعله في ميزان حسناتهم

شارك مع اصدقائك

Share |