الثلاثاء، 1 مايو 2007

جورج اسحاق في اسيوط بيفك خناقة


أمبارح قاعد في امان الله في الشقة الفخمة جدا الي ساكن فيها في اسيوط ومندمج للغاية مع كتاب الجوامد الجامد جدا وبالتحديد وانا في باب نظرية الالكترون الحر رن موبيلي بالنغمة الرخمة اياها وكان الي علي الخط الحسيني أمين شباب الحزب الناصري باسيوط والطالب في كلية الحقوق في اسيوط وصديقي العزيز بالرغم من انه اطول مني باكتر من نص متر ، حسيني قالي فينك يا احمد عايزك ضروري في الحزب جورج اسحاق جاي الحزب بعد شوية الساعه 7 .

الخبركان مهم اكيد بالنسبة ليا وكان قدامي نص ساعه عشان ابقي في الحزب وبالفعل لبست ونزلت وحاولت اتصرف في كاميرا بس صديقي الندل الي معاه الكاميرا فرقعني ومجاش يحضر اللقاء ، المهم وصلت الحزب لقيت المجموعه اياها بتاعه كل مرة موجوده محمد فاضل الناشط في كفاية والمشاغب اياه واثنين من اصدقاء الحسيني ومحمد فاضل في الكلية وكان الوجه الجديد صحفية اسمها سحر من الدستور ومقيمة باسيوط قعدنا دردشنا حوالي 10 د في المواضيع الي مبنتكلمش الي فيها الا وهي الاخوان والكلام الحمضان اياه ، وبالفعل وصل الحسيني للحزب ومعاه جورج اسحاق وفي خلال 5 دقائق كان الحوار شبه بدأ عرفنا منه انه بقاله 3 ايام بيلف في الصعيد وراح اسوان والاقصر وسوهاج ولسه هنبتدي نتكلم في المهم فوجئنا بدخول اثنين رجالة معرفهمش واحد فيهم كان معاه شاكوش سلمواوقعدوا ولسه هنكمل الكلام لقينا واحد فينا بيقول هو الحاج فاروق عارف اي بيحصل هنا ؟ وعرفت بعد كده ان الحاج فاروق ده امين الحزب في اسيوط ورد الحسيني علي الراجل ده وكلمه من هناوكلمه من هنا وفي خلال دقيقتين اتقلبت الاوضه الي كنا فيها لساحة حرب الحسيني بيزعق ويشتم الراجل والراجل ماسك كوباية وعايز يبطح الحسيني وجورج اسحاق يا عيني مزنوق في النص بيفك معانا الخناقة واستمرت الخناقة لمدة ربع ساعه لغاية لما هدي المتعاركين ووصل الدكتور أحمد ياسين رمضان رجل حزب العمل السابق وامين الحزب الناصري السابق والراجل الذي يحظي باحترام المعارضة كلها الدكتور احمد لقي الوضع كده فاخدنا كلناومعاناجورج اسحاق لبيته نكمل اللقاء هناك .

في الطريق دردشت مع الحسيني ومع الدكتور احمد حولين الي حصل وعرفت خلفيات الموضوع .

الموضوع ومافيه ان الدكتوراحمد كان امين الحزب الناصري باسيوط وحصلت مشاكل وامن الدولة ادخل في عمل الحزب واضطر الدكتوراحمد للاستقالة من من امانة الحزب ليتولي الامانه واحد اسمه الحاج فاروق وجه ومعاه طقم كله مخبرين في امن الدولة وبعد ماكان الحزب مقر للنشاط السياسي في اسيوط كلها ومقرلكفاية في اسيوط تحول لمكان ممكن تشرب فيه شاي بالكتير ، وبالغرم من كل ده رفض الحسيني معاه شوية من مجموعه الدكتور احمد الانسحاب ن الحزب وعشان ده حصل الي حصل .

من الخناقة الي شفتها ده عرفت ليه مفيش امل في الاحزاب المصرية وعرفت ايه سر الوكسة الي احنا فيها ده .

نسيبنا بقه من الوكسة ونرجع لاسحاق الجلسة معاه امتدت اكتر من 4 ساعات اتكلمنا فيها في حاجات كتير وعرفت منه حاجات كتير كان لازم اعرفها .

يمكن اهم الاجات الي عرفتها أن كفاية بدات تراجع اولوياتها في الشارع وصرح لينا جورج ان اهم القضايا الي هتتبناها كفاية في المرحلة الجاية هي قضايا التامين الصحي والتأمينات الاجتماعية وده يعتبر نوع من انواع التحول في اولويات كفاية بعد اهتمامهم لمدة سنة بالدستوروالقوانين .

الحاجه التانية كانت حولين قيادات كفاية والقلق الي حصل في كفاية السنة الي فاتت والي انتهي بتولي الدكتور يحي القزاز المنسق العام لكفاية . جورج اتكلم حولين قضايا كتير ومشاريع كتير بتفكر فيها كفاية في المستقبل .

وامابقه الكلام الي طلب جورج ان الصحفيين انهم ميكتبهوش وكان نتيجه كام سوال مني عن رايه في تحالف كفاية مع الاخوان والمراحل الي مر بيها من ايام مظاهرات القضاه ولحاد التعديلات الدستورية الي رفض الاخون فيها ينزلوا الشارع .

في النهية احب ااكد انه بالرغم من خلافاتي الكبيرة مع جورج اسحاق في الفكر الي اني اووكد ان اللقاء كان مفيد جداومهم جدا بالنسبة ليا .

هناك 7 تعليقات:

محمود سعيد يقول...

طبعاً أنا مش هافضح نفسى وأقول أن انا صاحبك الندل :-)

كان نفسى آجى والله يا با
بس إيه لما لقيتنى مش عارف جاى فين قد إيه يتكلم عن إيه
بمعنى أنك تروح تشوف وياإما تستفيد أو يضيع وقتك حسب الظروف

فللأسف مروحتش
بس ازاى الدكتور يحيى القزاز المنسق العام لكفاية
هما غيروه ولا إيه
من غير ما أعرف :-)

بس انت مقولتناش إيه اللى طلب من الصحفيين مينقولهوش
ثم هو انت صحفى
انت مدون

ابقى عدى عليا وقول لى

Gemyhood يقول...

ماشى

جورج اسحاق و راح اسيوط

ايه الفظيع فى كدة ؟؟

مقاومة يقول...

ايه ياعم الجامد ، فين المصايب اللي قالهالك ، ايه المشكلة لما اسحق يقولك على كام جملة من بتاعة التأمينات و كدة ، ياعم لو عايز تصريحات تصريحات قولي انا ابلغهالك بالنيابة عنه
هههههههههه
وبعدين اتهد بقى و ذاكرلك كلمتين هي كفاية دي هاتدخل تمتحن بدالك؟

أحمد عبد الفتاح يقول...

محمود
مين قال انك ندل ؟ ده انت حتي اسكندراني تبقي ندل اذاي ؟
عالعموم فاتك كتير يا نجم
والكلام السر هبقي اقولهولك بعدين
--------------------------
جيمي
انا مقلتش فظيع بس الموقف وجورج بيفك الخناقة وكلام جورج الي للاسف مش هقدر اقوله كان هو الي يستجق التدوين
وعالعموم انا ندمان عشان مكنش معايا كاميرا اصورلك جورج وهو بيحوش
--------------------------
سارة
أيه النباهه ده
بقولك كلام قال ياريت ميتقالش اقوله اذاي ؟
وعمالي صحفية ؟

مصطفى محمود يقول...

جاى امسى علييك واحييك على مدونتك وبالمرة اشوف اخبار جورج !!

غير معرف يقول...

السلام عليكم ورحمة الله وبركاته
بعد التحية ياعم الأخوانجى الكلام اللى كتبه تقريبا غالبيته صحيح وكويس أنك تكتب عن اللى حصل وان كانت نظرة التشفى والغبطة واضحة عليك تماما على الحال الى وصلته الأحزاب فى مصر من عفن وجمود ألا أن قيامك بعقد مقارنة بين الأحزاب دى (فى ظل المناخ القاتل اللى وجدت فيه)وبين جماعة الأخوان المسلمين (التنظيم السرى ) مقارنة ظالمة ومجحفة ولا يقبل بها أى عاقل لأنها ببساطة لاتتوافر بها أدنى درجات التكافؤ والمساواة فى الأمكانيات وما الى أخره من أمتيازات يتمع بها الأخوان دون سواهم وده اللى انتا مش مراعيه على الأطلاق

جورج أسحاق قال كلام خطير ومكنش أول واحد يقوله كل اللى متابعين ومشاركين فى فعاليات كفاية عارفينه وكتير من شباب الأخوان مدركينه وبدأت أصواتهم تجهر به وهو يتلخص فى ما يتمسك به المحافظين من الخوان من أن مصلحة وبقاء الجماعة تعتبر ذات مرتبة أولى من المطالب الوطنية ومن التحالف مع الجماعة الوطنية من القوى السياسية

تصحيح: الدكتور الكبير عبد الوهاب المسيرى هوالمنسق لحركة كفاية

نصيحة: ياعم أشترى كاميرا بقى ولو بالتقسيط علشان تريح محمود سعيد وتفيدك وكمان تفيدنا وتبطل سلفة وشحاته بقى

محمد فاضل

غير معرف يقول...

ولا يهمك يا احمد ان شاء الله هوفر لك كاميرا قريب بس ما تطلعش فيها

شارك مع اصدقائك

Share |