الثلاثاء، 6 مايو، 2008

حد فاهم ايه الي بيحصل الليلة في مصر ؟

انا مش قادر افهم
البلد بتغلي
الناس ماشية تسب للريس في الشارع وبتشتمه شتائم قبيحة
البلد زحمة جدا الليلة
ومفيش محطة بنزين شغالة كله قافل بعد القرار الجديد
والي فاتح منها زحمة جدااااا و بيتخانق فيه الناس مع صاحب البنزينة والعمال فيها
المترو زحمة بطريقة بشعه وشنيعة الساعه 1 بليل
مفيش عربية رايحة اي حتة
كل المواصلات تقريبا مفيش
موقف عبد المنعم رياض فيه بتاع 20 عربية
ورغم كده الشارع زحمة
سواق وصف ليا اليوم النهرده انه اليوم الاسواء في حياته وفي حياة اي سائق لانه ببساطة غلي اهم حاجتين عند السواق
السجاير والبنزين وكله هيطلع عالزبون اوب 30%
حد فاهم ايه الي بيحصل ؟
هي البلد ده رايحة فين ؟
النهرده لاول مرة يتسرب ليا احساس ان افضل حل انهم يعتقلوني لاني بجد تعبت
وبجد اعصابي مبقتش مستحملة
الي عنده حل تاني يتفضل بيه

هناك 4 تعليقات:

Bella يقول...

الواحد قرف خلاص

مش منظر ابا الارتفاعات في السلع دي كلها

حرام عليهم
وبعدين طالعين يبرووا ويقولوا ان الزيادات دي ح يستفيد منها محدود الدخل

ازاي يعني مش فاهمة

وبعدين قال ح ياخدوا من الاغنيا يدوا الفقرا

طيب امال احنا بياخدوا مننا ليه

الشعب اغلبه فقير اصلا وهو اللى ح يدفع

مش عايزين العلاوة دي خالص اصلا

جبهة التهييس الشعبية يقول...

يعني اكيد مش الحل انك تعتقل
ولا الراحة كمان
انت باين عليك هيست زيي
ما انا برضه عمالة اخرف مش عارفة اقول ايه
قفايا ورم قوي

دعاء يقول...

الحقيقة أنه يبدو شعور قوي عند الجميع الكل حاسس إن في حاجة بجد هتحصل ،أن بتعبير العامي كده (الكيل طفح) الامور زادت عن حدها ،الامور بجد تخلي ضغط الواحد يرتفع و يتغم ،ولكن الحل بتأكيد مش إنه يتقبض عليك ،المفترض نلاقي حل أصعب شيء أن تكون مشكلة مصيريه زي دي والكل بيبصلها ومش لاقي ولا عارف فين الحل..

ربنا يستر..

البتول يقول...

تعلمنا ان نسال العافيه ولانساله البلاء اللهم عافنا ولعف عنا وارحمنا ولا تؤخذنا بما فعل السفهاء منا

شارك مع اصدقائك

Share |