الجمعة، 16 مايو 2008

خواطر حول رسالة اينشتين عن الاديان


كنت اود ان أسمي هذه التدوينة " عندما أخطا الاستاذ ولكن بعد ان قرأت الرسالة موضوع التدوينة جيدا قررت ان اغير العنوان الي خواطر حول رسالة اينشتين عن الاديان .

تفاصيل الموضوع تعود الي أمس الخميس وتحديدا في مدينة لندن حيث بيعت رسالة كتبها العالم الفذ أينشتين - وأستاذي الاقرب الي قلبي - بمبلغ تجاوز 340 ألف دولار بعد ان كان متوقع لها ان تباع بمبلغ 128 الف دولار فقط .

رسالة اينشتين كان يتحدث فيها عن رايه في الاديان ووصفها بانها خرافات طفولية وتكلم اينشتين في رسالته حول دينين فقط هما اليهودية والمسيحية .

وقال اينشتين عن اليهودية بالنسبة لي الدين اليهودي شأنه شأن الاديان الاخرى ليس سوى تجسيد لخرافات طفولية جدا، والشعب اليهودي الذي، بسعادة، انتمي اليه، والذي تكونت من خلاله شخصيتي بعمق، لا يختلف بالنسبة لي عن الاديان الاخرى".

وقال آينشتاين: "بالنسبة لتجربتي لا اعتقد ان اليهود احسن حالا من باقي المجتمعات الانسانية، رغم انهم محميون من اسوأ السرطانات بسبب عدم امتلاكهم السلطة والقوة، وانا لا ارى شيئا "مختارا" فيهم".

والي هنا ينتهي الجزء الاول من تدوينتي التي كانت مجرد هدية لبني صهيون في عيد قيام كيانهم المزعوم

نيجي للجزء الثاني وهو عن استاذي اينشتين

ثبت تاريخيا ان اينشتين عاش فترة من حياته وهو ملحد وغير مومن باي من الاديان ثم عاد بعد ذلك ليلتزم الي حد ما بدينه الاصلي وهو اليهودية ولكن ما لفت نظري ان اينشتين لم يرد اي ذكر للدين الاسلامي في رسالته وهذا ما يدل علي جهل اينشتين بالاسلام او ربما جلهه بوجود الاسلام اصلا وهو الشئ الذي اثار تعجبي هل كان اعلم اهل الارض بالطبيعة جاهل بالاسلام ؟

سوال محير وخاصة ان عرفنا ان أحد مساعدي أينشتين هو الدكتور مصطفي مشرفة العالم المصري والمسلم ، هل لم يسمع اينشتين شئ من مشرفه عن الاسلام ؟ ام هل سمع ولكنه تجاهله في رسالته ؟

اي كانت الاجابة فاعتقد ان عدم ورود ذكر الاسلام في رسالة اينشتين هو لغز يحتاج الي تفسير .

السوال التالي لما انكر أينشتين الاديان اصلا ؟

لو عرفنا شخصية اينشتين جيدا لوجدنا انه رجل بسيطا للغاية وكان يبحث عن ابسط الحلول لاكبر المشاكل وحتي اشهر معادلاته التي وضعها لم تتجاوز 3 حروف وهو بالتالي عكس ماكس بلانك واضع نظرية الكم والذي كان يضع حلول معقدة للغاية ولكنها في نفس الوقت عبقرية ولعل هذا السبب الرئيسي وراء شهرة اينشتين مقارنه ببلانك بالرغم من ان اساس نسبية اينشتين يعود لكم بلانك .

ومن هذا المنطلق مثلا وضع اينشتين ما سمي بثابت التمد الكوني لكي يقول في احدي معادلاته ان الكون لا يتمدد مع ان المعادلة اظهرت ان الكون يتمدد ولكن بعد بحث اثبتت الدلائل ان الكون بالفعل يتمدد وهنا تنازل اينشتين عن ثابته وقال لقد كان الثابت من اكبر اخطاء حياتي .

ولعل السبب وراء رؤية اينشتين للاديان هو ذلك السعي الحثيث وراء البساطة التي تاتي احيانا بنتائج سطحية للغاية ولكننا لو تتبعنا تاريخ اينشتين لوجدناه بعد ذلك أنكر ما قاله وأمن بوجود الاله لانه لم يجد تفسير لكل ما يعلم عن الكون بدون وجود الاله ، اي انه وببساطة كان وجود الاله بالنسبة لاينشتين كوجود الثابت الكوني مجرد تبسيط عندما ايقن انه مخل حذفه علي الفور .

---------------------------------------

عارف ان البوست ده ممكن يكون عند البعض مجرد سمك لبن تمر هندي بس هي ده الاحاسيس والمشاعر الي اتولدت جوايا لما قرأت خبر الرسالة التي بيعت في المزاد .

للتعليق اضغط هنا

هناك 6 تعليقات:

جبهة التهييس الشعبية يقول...

بص بقى يا احمد
بقى انا ليا قصة طويل شوية مع اينيشتاين ده تعود الى اولى ثانوي
انا كنت شاطرة قوي في الرياضيات والكيميا لدرجة اني كنت باحل معادلات الكيميا اللي عمري في حياتي ما شفتها
وتعود شطارتي في الرياضيات والكيميا مش لنباهتي لا سمح الله ولكن لانه صادفت ان مدرسين الرياضيات والكيميا بتوعي كلهم كان دمهم خفيف قوي وكنا طول الحصة بنضحك فكنت بافهم منهم وما كنتش باحتاج اذاكر
مدرسين البيووولوجي كان عندهم تخلف عقلي فكنت شاغلة نفسي في الحصة باني اتريق عليهم واضحك اللي حواليا وبما ان البيولوجي ما هياش كيميا :) سهلة يعني فكنت بانجح فيها وخلاص حتى من غير ما اسمع المدرس بيقول ايه
وطبعا ما كنتش باذاكر ده كان مبدأ في حياتي اني اللي اسمعه في الحصة مدام فهمته مافيش داعي الت واعجن فيه ولو ما فهمتوش يبقى ايه لزوم المذاكرة
:))
شوية قوانين كده يعني حاطاها لنفسي
:)
اما الفيزيا، فيعلم الله اني دخلت المدرسة وخرجت منها وانا مش فاهمة هي بتتكلم عن ايه اساسا
وده سببه ان مدرسين الفيزيا كان دمهم تقييييييييييييييييييييييل قوي
وبيتهتهوا وكانوا بيكرهوني لاسباب سيكوسيسيوثيوقراطية
ما تسألنيش يعني ايه الكلام ده عشان انا نفسي مش عارفة
وطبعا كرهت الفيزيا واللي اخترعها وكان اللي بيرفعني الكيميا والاحياء والفيزيا دي كنت باجيب فيها اصفار وحاجات كده
انا بطبعي فيه حاجتين في حياتي ينغصوا عليا عيشتي: حاجة مش فاهمة سببها وحاجة بخاف منها
والفيزيا كانت الاتنين
مرة باقلب في مكتبه ماما لقيت كتاب النسبية بتاع عمك اينشتين
هو طبعا كتاب مبسط للغوغاء والدهماء من امثالي، مش الكتاب الاصلي اللي بتوع هندسة بيجيبوا فيه مقبول
اترددت شوية وقعدت افتكر سير حسن الرخم وميسز رينيه البايخة وبعدين قلت ح اقراه يعني ح اقراه
هو يعني اينشتاين ده مش بيني ادم زينا؟ وللا معمول من قشر البتنجان؟
وقريته يا احمد
قريته
يااااااااااااا ما تتخيلش انا حبيت البني ادم ده قد ايه
في مقدمة الكتاب بتاعه قال ما معناه انا نفسي نظرية النسبية توصل لكل الناس وفي خطتي اني اعمل كتاب للاطفال
انا عملت الكتاب ده لغير المتخصصين في الفيزياء او الرياضيات ولكن لمستوى خريجي الجامعة وح اعمل لمستويات اقل
ولو اقدر اوصل العلم اللي وصلت له للطفل اللي عنده سنتين ح اعمل كده
شايف العلماء يابني
شايف؟
ورغم ان المترجم بذل مجهود خرافي عشان يتقعر ويعقد الكتاب على قد ما يقدر
الا ان اينشتاين غلبه وقدر يفهمني ويخلصني من عقدة الفيزيا على الاقل فيما يخص نظريته هو
انت عارف كان ابن رشد قال ما معناه ان العالم هو اللي يتواضع في لغته وتعاملاته وتعبيره عشان يقدر يوصل رسالة العلم لابسط الناس
والمتعالم هو اللي بيتقعر عشان يبخل بعلمه القليل على الناس
اهو اينيشتاين كده
كمان قعدت اقرا قصة حياته ولقيته دمه خفيف قوي
تصور انه كل يوم لما كان يرجع البيت يخبط على الجيران ولما يفتحوا له يقول لهم انتوا مين بتعملوا ايه في بيتي يقوموا ياخدوه من ايده ويودوه لبيته فمراته تفتح له فيقول لها انتي مين تقول له انا مراتك يقول لها انا اتجوزت؟ انا اتجوزت امتى؟ تقول له من عشرين سنة وعندنا ولدين يقول لها ولدين؟ طب شاطرين في الرياضيات؟
ههههههههههههه
مسخرة
بس انا فعلا باحبه قوي
ومبسوطة انك كتبت عنه

أحمد عبد الفتاح يقول...

علي فكرة يا نوارة انا رأيي ان ده من أحسن التعليقات الي قريتها في حياتي
ومتيقلي ده راي كل واحد هتسول له نفسه قراية التعليق
بجد تحفة ومش هقدر اعلق عليه

ذو النون المصري يقول...

طب ايه رايك بقي اني قرات التعليق اهه
و هو جيد و ضحكت علي العالم الكبير و مش متخيل انه دمه خفيف كده
انا كمان قريت خبر الرساله و جايز و اللها علم انه ميكونش عارف حاجه عن الاسلام لكن دي كبيره زياده عن اللزوم
استحاله يكون مش عارفه خالص
مش بعيد يكون عرفه و بيخبي

غير معرف يقول...

لم اكن انوي التعليق لان الامر لا احبه وهو الفزيقا وانت عارف السبب طول النهار تتكلمعنها لما زهقت وخاصة عندما تقول انها ام العلوم .اريد ان اشيد بخفه دم نواره ياسلام عندما اقرا لها ولا اجدها تلفظت باي لفط كده ولا كده باكون سعيدة بها جدا جدا واتمني ان يدوم الحال ... وربنا يكرمها ويبارك فيها

مصعب رجب يقول...

أحمد بييييييييييييه
منور مدونتك
كلامك بكل صراحة دماااااااااااااغ

ادخل على مدونتي ضروري
يوجد شيء ما يخصك

httb://kobbaya.blogspot.com

غير معرف يقول...

ياأخى ذكر ديانتين بالطبع لان الاسلام لم يكن معروفاً وقت وجود اينشاتين
لان الاسلام كان محصورا بالبلاد العربية ولم يكن القرأن قد تمت ترجمة معانيه
فلا تخمن اشياء لا وجود لها الا فى ذهن القارئ العربى

شارك مع اصدقائك

Share |