الأحد، 25 مايو، 2008

وهو كده يبقي القضاء مستقل أذاي ؟


سوال محيرني اليومين دول قوي
وهطير الثمن الي فاضل في نفوخي
والسبب هو متابعتي للي بيحصل في مجلس الدولة بعد وفاة المستشار نوفل
المجلس الخاص بتاع مجلس الدولة قعد وقرر انه يرشح المستشار الحسيني للمنصب
بس الريس معجبوش الكلام وكلف المستشار الملط رئيس الجهاز المركزي للمحاسبات انه يبلغ المجلس عدم رضاء الرئيس
لحاد هنا وعادي ، رئيس بيمارس مريسته وده شئ طبيعي جدا في كل الانظمة الشمولية
لكن الي مش عادي اني اعرف ان الرئيس لازم يصدق علي اسم الرئيس الجديد لمجلس الدولة بعد ما تنتخبة الجمعية العمومية للمجلس
يا حلولو
مجلس الدولة ده حسب معلوماتي المتواضعه محكمة مهمتها الفصل في القضايا الي بين الشعب والحكومة ، يعني يوم ما أحب ارفع قضية ضد الرئيس اطلع علي مجلس الدولة
يقوم الاقي ان رئيس المجلس بيعينة رئيس الجمهورية الي هو رئيس السلطة التنفيذية ؟!!!!
صباح استقلال السلطة القضائية
وياصباح فصل السلطات
ويا صباح النزاهة والشفافية
ويا صباح الي بتغني

هناك 7 تعليقات:

وجهة نظري يقول...

يعني لو كان إلي بيعينه مجلس الشعب والا حتي أي مجلس في مصر كانت فرقت؟؟ ما الإيد طايله وكاسره العين في كل حاجه. عندنا إيه والنبي مستقل في مصر؟ حتي سيد قراره، "قراره" دي عايده علي رئيس الجمهوريه!!!

طب بص والنبي.... قانون الإرهاب ومد حالة الطوارىء.... مجلس الشعب مستني قرار رئيس الجمهوريه... مش العكس.

سلملي علي الإستقلال.

تحياتي ليك.

عبقرينو يقول...

سلملى على البالالة ياحبيبى

سبهللة عالاخر يقول...

هم مش بيقولوا مصر بلد العجائب
اهو اللى انت بتقوله دة احدى عجائب مصر اللى بتنفرد بيها

سبهللة عالاخر يقول...

معلش عندى سؤال بعيد عن الموضوع
انا لسه جديدة فى التدوين وعايزة اعرف ازاى اخلى حد تانى يكتب معايا فى نفس المدونة بتاعتى بس بإسمه وتوقيعه
هل لازم يكون عنده مدونة ولا مش لازم؟؟
لأن ليا صديقة عايزة تكتب معايا بس بتوقيعها وهى مالهاش مدونة
افيدونا افادكم الله

أحمد عبد الفتاح يقول...

معلش يا شباب نرد علي سبهلله الاول
بصي موضوع سهل قوي
كل الي عليكي تعمليه تدخلي قائمة Settings في Dashboard المدونة وادخلي علي Permissions وهناك ابعتي انفيت لصاحبتك علي ميلها حتي لو مش عندها مدونة او حساب في جوجل
الدعوة لاي ميل ممكنة
وسيبي البلوجر يتولي الباقي هو بيبعت ليا رسالة فيها لينك بتدخل من عليها وتعمل حساب

أحمد عبد الفتاح يقول...

وجهة نظري
منور
موافقك في كل كلم قلتها
وهسلم لك علي استقلال

أحمد عبد الفتاح يقول...

عبقرينو
هو حد قالكم اني شغال عندكم ؟
واحد يقول لي سلملي علي الاستقلال وواحد اسلم له علي البلالة
هو كل ده ببلاش ؟

شارك مع اصدقائك

Share |