الأربعاء، 21 مايو، 2008

حول دور مصر المحوري القلاوظي اللوبي في المنطقة نتحدث

الي السيد رئيس محمد حسني مبارك راعي مسيرة السلام
والي السيد وزير خارجية مصر
والي كل السادة الي في كل حتة الي قرفونا من يوم ما اتولدنا ولحاد دلوقت بخدعة دور مصر المحوري في المنطقة
أحب اقول لكم من كل قلبي
سلامين وحتة يا بتوع السلام
ولو السادة دول كلهم مش متابعين الاخبار أحب الفت نظر سيادتهم لشوية الاخبار ده
لبنان خلاص حلت ازمتها بوساطة قطرية لا يملك اي احد علي وجة الارض انه يوصفها الا بانها من افضل الوساطات الي اتعملت بين الدول العربية في التاريخ
وسوريا بدات مفاوضات مع اسرائيل بوساطة تركية النهرده
وبالرغم من اعتراضي عالمفاوضات ده بس واخدين بالكم معايا من حتة الوساطة التركية ؟
أمال فين الدور المصري المحوري وخصوصا في ملف السلام مع الكيان الصهيوني ؟
بس برده عشان منظلمش مصر مصر الحمد لله بتحاول انها تحل ازمة غزة عن طريق تبني المفاوضات بين حماس واسرائيل وبصراحة النتيجة متوقعه
عارفين ايه النتيجة ؟
النتيجة هي

وفد حماس في القاهرة يرفض الابتزاز الصهيوني

مصر فشلت وبجدارة في دورها المحوري المرة ده وذي كل مرة

لان الشروط الاسرائلية ببساطة هي

ثلاثة شروط : أن يتم وقف إطلاق النار فقط من الجانب الصهيوني مقابل وقف إطلاق الصواريخ الفلسطينية، وألا يوجد أي حديث عن فتح المعابر وتخفيف الضغط عن الشعب الفلسطيني، رغم أن هذا هو الهدف الرئيسي لحماس وباقي الفصائل، ولم يقدم الصهاينة أي تعهد بأن تكون التهدئة شاملةً ومتزامنةً ومتبادلةً.
نقطة اخيرةا
اي رئيس تحرير أي منشور حكومي من بتوع الاهرام وأخوتها هيجيب سيرة دور مصر المحوري في المنطقة أنا مش عارف ممكن يكون رد فعلي عليه هيبقي ايهبس أكيد مش هيبقي رد فعل ظريف


هناك 4 تعليقات:

وجهة نظري يقول...

كان زماااااااان. إنما دلوقتي يمكن علشان عندنا طريق المحور فيبقي دورنا محوري؟؟

بص، يمكن، وبقول يمكن، يكون في ورا الكواليس أمور إحنا مبنعرفهاش، إنما إلي واضح كده علي الوش إننا مدلوقين في الزباله، وكل القضايه بتروح في ناحيه ومصر بتروح في ناحيه تانيه، زي ضربة الجزاء كده وحارس الورمي الخيبان.

متوقع إيه من رئيس عنده 80 سنه ورئيس مجلس شعب عنده 500 سنه وكل المستشارين وأصحاب القرار عندهم تصلب شرايين وزهايمر؟

Zika يقول...

عارف المشكله بتكمن فين ( حلوه بتمن دي )
ان الريس معندهوش قناة الجزيره في القصر بتاعه
وواضح كمان ان وزير الخارجيه معندهوش
بفكر نعملهم وصله
....
اما بالنسبه لحوار حماس
مفيش فايده
ماهم كل كام يوم يروحوا يصيفوا في شرم مع النسوان الاجنبيه ويقولك بنعمل مباحثات سلام
سلام ايه اي عم
ده هم بيروحوا يقضولهم كام يوم جامدين كده مع الميه والهوا والموزه الحلوه
وسيبك انت
بوش ينبسط
ماهو الراجل لازم ينبسط يا عم
وهنيه يدلع شويه بدل الارف اللي شايفه في بلدهم اللي بقت 3/4 دكوره
وهكذا

bluestone يقول...

امال القضية الفلسطينية متدهورة من شوية
من الوساطة المصرية الملعلعة ..
وكما قال مدون من شوية
سلم لي على الريادة يا ابو حماده

كليك بانك يقول...

شكراّ على الموضوع

شارك مع اصدقائك

Share |