الأحد، 30 مارس 2008

عالمحلة رايحين ... مضربين بالملايين - دعوتين للنشطاء


طبعا انا مش هدعي لأضراب 6 ابريل لان كل العالم بيدعوا ليه
بس انا دعوتي مختلفة حبة صغيرة
انا بدعو كل النشاطاء للتوجه يوم 6 أبريل الي المحلة الكبري ونحضر اضراب 6 ابريل مع الابطال الحقيقيين مع عمال المحلة
انا متاكد ان في القاهرة هصاب بالاحباط لاني مهما كبر عدد المضربين لن يظهروا وسط غير المضربين ده جانب
الجانب الاخر في المحلة هيبقي زخم الاضراب اكبر
في المحلة هنقرع من جديد طبول الاضراب ... طبول الثورة ... طبول التغيير
انا عن نفسي هتوجه للمحلة بنية رئيسية هي المشاركة ونية فرعية التغطية الاعلامية
دعوتي التانية للنشطاء هي تعالوا مرة نبقي نشطاء بجد
سيبكم من البانرات
البانرت مبتعملش اضرابات
البانرات لا تحدث التغير
البانرات مجرد رسوم علي الانترنت يشاهدها العشرات او المئات
لكن شعب مصر ملايين
ربعهم امي اصلا
واكتر من نصهم لا يعرف الانترنت
بدعوا النشطاء للدعوه بجد للاضراب
اطبعوا البانرات علي الورق
اعملوا منشورات
تعالوا نرجع لعصر منشورات الشيوعين والاخوان
تعالوا ننزل نقعد علي قهاوي غير قهاوي وسط البلد ونفهم الناس يعني ايه اضراب
يعني ايه احنا رافضين الوضع الحالي
تعالوا نفهمه اننا لو اضربنا الاسعار هتنزل وهتتوفر فرص العمل
لو اضربنا بلدنا هتبقي احسن كتير
لو اضربنا هنلاقي العيش والحديد
مش بعيد لو اضربنا نحس اننا بني ادمين بجد
تعالوا نجرب يرجع الشيوعين واليسار لاساليب دعوتهم القديمة بالمنشورات والكلام عالقهاوي والمصانع
والاخوان يعملوا قوافل دعوية
الكل ليه نية واحدة
نضرب يوم 6 ابريل
التاريخ يثبت ان عمر ما الشعب ده ثار ولا عمره اتحرك
دايما ساكن
بس انا عندي امل قبل ما اموت اشوفه مرة اتحرك
مرة ثار
مرة قال لا
و 6 ابريل خطوة للحلم الكبير ده
اخيرا احب اقول للجميع تعالوا مرة نختار نبقي بني ادمين




هناك تعليق واحد:

البتول يقول...

حدثتك كثيرا انك لاتري الصورة كاملة انت تري جزاء منها فقط شوية صبر ياربي انا شخصيا سلشارك في العصيان المدني بشكل فردي واخزك ايضا ابشر

شارك مع اصدقائك

Share |