;ل سنة ويالالاللي طيبة

صورة لمدونتي الاولي علي مكتوب وقد ظهرعليها اعلان الانتقال لمدونة بلوج اسبوت

النهرده 21\12 وده عيد مدونتي وبنوتي الصغيرة يالالاللي
من سنة بالضبط كان بدايتها علي موقع مكتوب واتنقلت بعد كده ب 3 شهور الي بلوج اسبوت
سنة عيشتها مع يالالاللي كانت من اغرب سنين عمري واكثرها ثراءا
سنة بخيرها وشرها وحلوها ومرها كانت دائما يالالاللي هي لسان حالي واحيانا ملجائي الوحيد من تقلبات الايام والزمن
من 365 يوم بالضبط قررت ادون
قررت ليه ؟
مش عارف الي عارفه انه كان يوم عيد الاضحي الي فات ويوم اعدام صدام حسين وكانت اول تدوينة ليا تسجيل فيديو لاعدام صدام ثم توالت التدوينات
ايه الي خلاني اسيب عيلتي اول يوم العيد واقعد اتعك في المدونة ده ؟
مش عارف بس حسيت انه لازم ادون دلوقت وانه ان الاوان للمارد ان يتحرر واني اتكلم
اتكلمت واتكلمت واتكلمت لغاية لما بقت شغلتي هي الكلام - الي بيسموها الصحافة -
النهرده عيد ميلاد بنوتي الصغيرة لسه فاكر كويس اليوم الي بلوج اسبوت عملت مدونتي سبام وقعدت 3 ايام مش عارف ادون
كنت هتجنن
حاسس ان بنتي عيانه واني لازم اتصرف
لغاية لما الاسبام اتفك ورجعت يالالاللي الي طبيعتها
كنت حاسس اني في يالالاللي ذي فنان المسرح الي بيمثل قدام جمهور كبيييييييير ولازم يقدم لهم احسن حاجه عنده
وكنت بحس وانا جوه الداش بورد بتاعتها اني جوه الكواليس بضبط الاضائة والملابس وكل حاجه
وبعمل بروفات كمان
سنة فاتت كتبت فيها 204 بوست في كل حاجه من اول الدين والسياسة والفن والتهييس ولغاية الكلام الي ملوش معني
المهم اني كنت بكتب وكل ما اكتب بحس اني طلعت خطوه لقدام
كل تعليق جالي عالمدونة كان ليه عندي اهمية خاصة سواء كان شتيمة ولا مدح المهم انه راي بني ادم وده اكيد اتعمت منه شئ
مش هقول لاكتر من 32 الف زائر شكرا وبس
لا انا هحاول اترجم الشكر ده لشئ عملي
الاسبوع ده هخصصه لنشر احلي التدوينات الي نشرتها قبل كده واعيد اكتشافها وعايزكم تعيدوا اكتشافها معايا لاني بحس ان التدوينات ده مهمه جداااااااااااااا
كل سنة وانتي طيبة يالالاللي
كل سنة وبنتوتي بالف صحة وسلامة وخير
كل سنة وهي احل مدونة في احلي بلد
مصر
علي الهامش
سوال ونفسي الاقي ليه حل
لما جيت اكتب التدوينة ده فتحت مدونتي القديمة علي مكتوب عشان اجيب منها لينكات وصور وكنت مفتحتهاش من زمان جدا
صعقت بحاجه ان عداد الزوار هناك بيقول انه دخل 29 الف المدونة وانا كنت سايبها 10 الالاف بس بالرغم من اني منزلتش فيها اي حاجه من مارس الي فات
لو حد ليه جواب عاللغز ده ياريت يجاوبني