الثلاثاء، 18 ديسمبر، 2007

اخيرا خبر حلو وهقدر اقول لكم كل سنة وانتم طيبين


كنت منتظر اي خبر يبدد شوة من كئابة يوين العيد المعهودين عندي والحمد لله الخبر جه ومن حيث لم اكن اتوقع
الخبر جالي من ناسا ومعاه احلي هدية
والهدية عبارة عن صورة


الصورة ده يا جماعه صوراة نادرة ترصد وقوع إحدى المجرات الفضائية تحت تأثير ثقب أسود كان قريباً منها، داخل مجرة أخرى معروفة باسم "نجم الموت."

وأظهرت الصور النادرة التي التقطت للحدث الذي وقع على بعد 8.2 ترليون ميل من كوكب الأرض الثقب الأسود وهو يوجه فيض هائل من الذرات المشعة نحو مجرة صغيرة، تعادل عُشر حجم "نجم الموت" أثناء مرورها بالقرب منه. وده تقريبا اترجمة حرفية للوصف الي كتبته ناسا تحت الصورة

أهمية الصورة ده لناس كتير انها تقريبا اول اثبات ملموس علي ظاهرة الثقوب السوداء والي هي محل دراسة من علماء الفيزياء في كل مكان في الارض ويمكن سبب فرحي الشديد بالصورة الي اغلبكم اكيد مش لاقي ليه معني اني مغرم بظاهرة الثقوب السوداء مش لانها بس جزء من دراستي ولكن لاني شغوف جدا ببعض الظواهر المغناطسية الغريبة الي علي راسها الثقوب السوداء

شكرا لناسا علي احلي هدية الواحد ممكن يتلقاا في العيد وعلي الخبر الي ممكن يفك من كئابة العيد شوية

وكل سنة وانتم طيبين

هناك 6 تعليقات:

شـــــهــــروزة يقول...

صورة تحفةةةةةةةةةة

أكدت حقيقة حاول الكثيرين انكارها
وبالتالى فتحت الباب لاحتمالية حدوث نفس الحدث لمجرتنا

ففى الظواهر الطبيعية ليس هناك مستحيل

الله ينور يا عم الحاج

عيد سعيد ومبسوط كمان

جبهة التهييس الشعبية يقول...

ههههههههههههههههههههههههه
والنبي انت مسخرة
اشمعنى الثقوب السودا يعني
؟؟؟؟؟؟؟؟؟

أحمد عبد الفتاح يقول...

بسم الله ما شاء الله
الزعيمتين شهروزة ونزارة عندنا وكمان ليلة العيد
ده احنا لازم ندبح فرخة علي الزيارة ده
شهروزة تعليقك يدل علي اطلاع واسع بالفيزياء ومش بعيد كمان تطلعي عارفه ستيفن هوكنز والنسبية واينشتين والكم
اما الزعيمة الفامجوجية فاحب اقول لها ان الثقوب السواء لغز كبير لو حلينها هنحل حاجات كتير مش فاهمينها في حياتنا ولو ليكي في الكتب العلمية هديكي كتاب تحفة عنها لستيفن هوكنز

جبهة التهييس الشعبية يقول...

والله انا كنت خايبة في الفيزيا قوي ماقولكش مع اني كنت شاطرة في الرياضيات مش فاهمة ازاي المفروض اللي شاطر في الرياضيات يبقى شاطر في الفيزيا بس انت عارف انا دايما خارج القاعدة

انا قريت كتاب النسبية بتاع اينشتين وفهمته واستغربت اني فهمته المفروض ما افهموش احسن اكون فهمته غلط وللا حاجة
:)
هات لي الكتاب اللي بتقول عليه
ح تجيبه امتى؟

جبهة التهييس الشعبية يقول...

برضه مش فاهمة ايه اللي مفرحك قوي بالبلاك هول دي انا دورت عليها في الانترنت وفيه مجلة علمية انترنتيه باتابعهاكل يوم جابت كلام عن الحدث ده

http://www.livescience.com/space/scienceastronomy/071217-death-star-galaxy.html
ودورت على البلاك هول لقيتها انها عبارة عن جثة نجم كبير وحاجة مش كويسة دي حاجة تخوف ولو حصلت في المجرة بتاعتنا تبقى مصيبة
http://www.space.com/blackholes/

تبقى النهاية
ايه اللي مفرحك قوي انهم شافوها
انا لما دورت عليها ما لقتش حد بينكرها بس لقيتهم بيقولوا انهم ما شافوهاش لكن شافوا اثرها على الفضاء واينشتاين حط على اساسها نظريات
واهي طلعت صح واخدوا صورة طيب ايه اللي مفرحك برضه مش شايفة حاجة تفرح

دي الحاجة المفروض ان المجال بتاعها غامض واي حاجة بتعدي من جنبه مش بتعدي وبتسبب انفجارات للكواكب انت فرحان ليه
وفرحانين ليه انها ممكن تحصل في المجرة بتاعتنا
انت عايز تموت يعني؟ ماشي انا عايزة اموت برضه بس باحترامي

أحمد عبد الفتاح يقول...

الزعيمة نوارة
دخلتي دماغي ببحثك وتدويرك بس اسمحي لي ابين لك شوية نقط لان الموضوع مهم بجد
اولا احنا مش بنشوف اي حاجه تقريبا بتحصل في الفضاء احنا بنشوف اثرها وهديكي مثل احنا مش بنشوف الشمس كل يوم الصبح احنا بنشوف ضوئها الي جاي لينا في كام ساعة ضوئية يعني مش ده مكان الشمس الحقيقي لحظة روئيتها
وعلي هذا المنوال قيسي كل حاجه بنرصدها في الفضاء
انا قلت في بوستي ان بينا وبين المجرة ده كام مليون سنة ضوئية يعني احنا شوفنا صورة حاجه حصلت اصلا من زمن يعتبر بعيد بمقايسنا
نيجي للاهم سبب اهمية الحدث
سبب اهميته اننا صورنا مش رصدنا
احنا رصدنا كثير قبل كد بس اول مرة نصور
واما نسب حدوثه لمجرتنا فده لا يتجاوز 1 علي مليون او مئة مليون كمان وده مش كلامي ده كلام استيفن هوكنز في تعليقه علي الحدث ومستني مقال ليه هيتنشر غالبا في سينتفك اميركان حولين الموضوع
تعالي بقه للجانب الا علمي
تخيلي معايا مجره اختقت
مجرة مش كوكب ولا مجموعه شمسية ولا شوية كواكب ولا الكلام الفارغ ده
مجرة كاملة ومش ادمرت اختفت
راحت في الا مكان ولا زمان - ده الوصف الصحيح للثقب الاسود لا مكان لا زمان - المجرة راحت للعدم
تخيلي بقه
طب يا تري كان فيه كوكب عليه حياة عاقلة ؟
وكان شكلها ايه ؟
وحصل لها ايه ؟
طب ياتري كان عندهم ديكتاوريات ذينا ؟ وضرائب عقارية وقضاة ؟
يوووووووه دخلنا في القرف والسياسة
بس صدقيني الموضع مشوق جدا
عالعموم انا مستني ارجع كليتي بعد العيد وهقعد مع استاذتي وهناقش الموضوع معاهم اعمق وهتحفكم برايهم وتفسيراتهم اكثر
وارجع واقول لك معجب جدا باهتمامك

شارك مع اصدقائك

Share |