الأربعاء، 9 أبريل 2008

ماذا حدث للفضائيات يوم 6 ابريل ؟ نحن نجيب عن هذا التساول المهم

أجمع الجميع ان تغطية الفضائيات لاحداث المحلة ايام 6 و 7 و 8 ابريل كانت دون المستوي
ولنكن اكثر صراحة ونقول مكنتش موجوده اصلا... يعني مكنش فيه تغطية
والسوال ليه ؟
انا هحاول اجيب عن السوال ده في حدود المعلومات المتوفرة ليا
البداية يوم 6 ابريل كنت بالمحلة من الساعه الواحدة صباحا وفي الصباح اتجهت للمصنع ومنعت طبعا من الدخول
ومع تقدم ساعات الصباح بدا حضور الصحفيين والي اغلبهم كان اجانب
وبدات ادور علي الفضائيات لافاجا بالمفاجاة الكبري
لم تتواجد بالمحلة في هذا اليوم سوي كاميرتين فيط
كاميرا النيل لللاخبار والي قعدت تصور العمال الشغالين
وكاميرا البي بي سي العربية وهي القناة الجديدة
تحدثت مع مراسل البي بي سي كثيرا وابدي تعجبه من عدم وجود اي من كاميرات النوات التانية
الموضوع بجد كان عجيب
وبدات الاشتباكات
ومكنش فيه تغطية الا من البي بي سي
ورجعت للقاهره بليل وكنت متعجب جدا من الي بيحصل ده
وتوجهت بسوالي لاحد مراسلي القنوات الخليجية وهو صديق ليا وقلت له ليه محدش جه ؟
قالي انا معرفش بس مدام المنظر كده يبقي فيه تعليمات محدش يروح والتعليمات ده من الامن
قلت له طب اشمعني البي بي سي
قالي لان البي بي سي قناة جديدة ومحدش كان متوقع انها تفكر اصلا تروح فالامن نسيها من انه ينبها
قلت يمكن
المهم
تاني يوم كنت بالمحلة والضرب اشتغل وكان معايا احد الاشخاص وثيقي الصلة بقناة الجزيرة وده عمل خط اتصال بيني وبين القناة بالدوحة
وبدأت القناة تاخد مننا اخبار وتنشر
وزميلي بيقول لي ان ادارة القناة بالدوحة كل شوية بتتصل وتهزق بتوع مكتب القاهره والسبب ان اتنين صحفيين صغيرين جوه المحلة بيصوروا وبينقوا الاخبار في حين مكتب طويل عريض مبعتش ساعي حتي للمحلة
الامر تطور ومع الليل كنت صورت فيديو والقناة طلبته وطلبت كمان انها تشتريه بس بشرط اني ابعته بليل
وده كان مستحيل لمليون سبب ابسطهم اني مكنش معايا كابلات الكاميرا وان مكنش فيه نت في المحلة
وبعت الفيديو الصبح وعرفت ان الجزيرة اشترت من رويترز مادة اذاعتها عن احداث المحلة
في حين عرفت برضه ان القناة بالدوحة مضايقة جدا من مكتب القاهره وان الدنيا مقلوبة
وده الي صنع احداث اليوم الثالث
يوم 8 ابريل كان وضع مكتب القاهره هباب
وخصوصا ان الاشتباكات وقفت كمان
والطرق اتفتحت
يعني ملهموش حجة
وفي نفس الوقت لازم يسعوا الكلام
واعتقد ان ده الي اوحي لهم بفكرة مسك العصاية من النص
وبعتت الجزيرة مصور وسوند مان ( مساعد مصور ) بس
من غير مراسل ولا اي حاجه تانية
واتمسك المراسل
واتقطعت شرايطه
ومراسل البي بي سي الي كان قاعد في المحلة من 3 ايام اتمسك هو الاخر واتقطعت شرايطه
في الوقت ده كانت القناة بالدوحة بتتصرف هي ونشرت مادة اشترتها م رويترز
ونشرت فيديو كنت مصوره لحوار مع عسكري امن مركزي مصاب برصاصة مطاطي في رجله ضربها الضابط والغريب ان العسكري هو الي عمر السلاح ده اصلا
ونشروا فيديو تاني كنت مصورة لحريق شب في كشك خدمة جماهير تبع المحافظة
وحتي الاخبار الي اتنشرت علي الموقع بخصوص المحلة لو لاحظنا هنلاقي كلمة نقلا عن مصادر اعلامية او صحفية او حكومية ... الخ
يعني مفيش ولا خبر تقريبا نقلا عن مكتب او مراسل القاهره
اعتقد انه بكده يكون جزء من طلاسم لغز الفضائيات اتحل
نيجي للاهم
للناس الي غطت الحدث
وانا هقسمهم قسمين
صحفيين ومدونين
الصحفيين كان اغلبهم من الاجانب وهو ما لا اجد له تفسير مقنع
واحب اوضح هنا ان تقريبا 99 % من صور المحلة التقطتها صحفيين وليس مصورين
اما المدونين فارفع لهم القبعه
انا شوفت مدونين عاملين مكاتب اعلامية عشان المحلة
شوفت شبكات اتصال ومعلومات عن المحلة
شوفت مراسلين علي الارض ودعم لهم من القاهره وبث حي للي بيحصل لحظة بلحظة
من لاخر كانوا وكالات انباء تمشي علي الارض
الي بيحصل في المحلة سببه تحرشات الامن ده واحد
والتانية ان اهل المحلة رجالة لا يرضوا بالظلم مش ذي الناس الي اتعودنا عليهم
والثالة يا اني عمري ما شوفت حد متحمل مسولية ادبية او مسولية اعلامية لو جاز التعبير قد المدونين تجه قضية المحلة
وكنت اعرف ناس بتتصل دولي كل حبة عشان تعرف اخبار المحلة
اما بخصوص المدونين فانا شوفت مدونين جوه النار
بيضرب عليهم الغاز والمطاطي وهما بيغطوا
انا عايز اقولها بعلوا صوتي
انا شوفت في المحلة مدونين مصر الي بجد
الي نقلوا للعالم كله الي بيحصل في المحلة
واعذروني علي عدم ذكر اسماء بس لاني مش عايز اظلم حد ومش عايز انشي حد

هناك 7 تعليقات:

مهندس مصري بيحب مصر يقول...

ربنا يحميك يا أحمد

جبهة التهييس الشعبية يقول...

انا قلت المدونين عملوا كده في اهل المحلة وسابوهم؟
انا قلت كده؟ انت بتفهم الكلام ازاي يا احمد؟
امال انا مش مدونة وللا انا بياعة فجل حضرتك؟
انت بتتكلم عن البوست اللي كنت باتكلم فيه عن الناس اللي على الفيس بوك اللي عايزة تعمل اضراب يوم 4/5 وهي بتهني بعضها بالنجاح والانتصار ولا على بالهم الناس اللي اتحرقت؟
انا في البوست ده جبت سيرة المدونين؟
وهم المدونين هم اللي دعوا لاضراب عيد ميلاد الريس
وانت ما قرتش على المدونة بتاعتي وانا باتكلم عن تغطيات المدونين وان الاعلام كان متخاذل والمدونين هم اللي شالوا المسئولية؟
وللا انت شكلك ما قرتش خالص وبتسمع كلام يتقال لك وخلاص
طب كلف نفس وبص على المدونة يا احمد قبل ما تحط اسمي في حاجة ما حصلتش
امال انا كنت باخد منك الاخبار ازاي اول باول
ومتهيالي يا احمد انا كنت جزء من شبكة الاتصالات اللي غطت على عدة مستويات من المدونين برضه
وللا انت دي ما شفتهاش كمان؟
وللا انت بتبغبغ كلام بيتقال لك وخلاص؟
وللا انت بتقرا ومش بتكمل للآخر
وللا بتكمل ومش بتفهم الكلام المكتوب؟
عموما مش وقت حساب دلوقت
لما نخلص من المعمعة اللي احنا فيها

جبهة التهييس الشعبية يقول...

http://tahyyes.blogspot.com/2008/04/blog-post_6652.html
ده البوست اللي باتكلم فيه عن اللي عايزين يتعاملوا مع اضراب ستة ابريل على انه خلص ويبتدوا اضراب تاني ومتجاهلين ما حدث بالمحلة وباقول ان ستة ابريل ما خلصش لان فيه ناس مقبوض عليه والمحلة مشتعلة وان المعركة ابتدت ولسة ما خلصتش واتنقلت للمحلة وان ستة ابريل ده ما كانتش لعبة عشان نلعب لعبة تانية يوم اربعة مايو

اقراه لو عندك وقت وشوف انا شتمت المدونين وقلت الكلام اللي انت بتقوله ده فين؟

وده بوست بادياه بالجملة الاتية: اولا احب اهلل جامد جدا للمدونين اللي غطوا احداث المحلة بمصداقية

http://tahyyes.blogspot.com/2008/04/blog-post_1458.html

اقراه برضه لو عندك وقت
ولو ما عندكش وقت تقرا يا احمد يبقى على الاقل ما تفتحش ودانك لاي حد يعمل فيها زي الناس وتكرر كلام انت مش متأكد منه

الحقيقة يا احمد انا متغاظة منك جدا
لانك بتفتري وانا باكره الافترا
وبتفتري من غير بينة ومن غير دليل وبتقول على لساني كلام ما حصلش ما اعرفش انت شفته فين ولا مين اللي شخه في ودانك

والحقيقة كمان يا احمد انا مش بس اشدت بالمدونين اكتر من مرة متهيالي انا كمان ما اغمطكش حقك في التغطية عشان تغمطني انا كمان حقي وتفتري عليا بالكدب وبكلام مش حقيقي

وانا ما قصرتش كمان كمدونة ويوم ستة ابريل وسبعة ابريل نقلت كل اخبار المعتقلين والمحلة والمستشفيات على التوازي وكمان التغطيات الاعلامية المشينة اول باول

وانا ما طلبتش منك اي شكر ويا سيدي مافيش مانع من الشتيمة انا مش بيهمني الشتيمة
بس مافيش داعي للافترا
على الاقل اتقي الله يا اخي
اذا ما كانش عشان الاخلاق يبقى على الاقل عشان ربنا
واذا كنت ما قرتش المدونة لانك كنت مشغول وسمعت كلام ناس نقلته بالباطل وحسبي الله ونعم الوكيل فيهم فتبقى دي مصيبة

واذا كنت قريت وما فهمتش تبقى مصيبة اكبر

واذا كنت قريت وفهمت وتعمدت لامؤاخذة تكدب
يبقى مش عارفة اقول لك ايه؟

جبهة التهييس الشعبية يقول...

http://tahyyes.blogspot.com/2008/04/blog-post_2041.html
وده بوست لتغطية احداث المحلة وقت ما كان تليفونك فاصل شحن

وعموما انا شخصيا شاكرة جدا على جهدك ومقدراه وما انكرتوش
وده يخليني في كل الاحوال بصراحة احسن منك
على الاقل ما بابتبلاش عليك
بس فيما يخصني انا مش مسامحاك

غير معرف يقول...

وانت مصدق إن إدارة القناة كانت بتتصل وتهزق المكتب في القاهرة!!
لو كانوا عايزين حد من القاهرة يتحرك ويروح المحلة كانوا ادوهم أوامر بكده
لكن الظاهر إن أوامر الأمن كانت على العين والراس
في حاجة اسمها الأامن نبه عليهم ونسي ينبه على البي بي سي!!!!
دا حتى الجزيرة ما كلفتش نفسها تذيع الاخبار دي في أول النشرة
وكان أول حاجة بتذيعها عن زيمبابوي.. وتتجاهل مصر
وماحدش جاب سيرة السبع شهداء من العمال
أعتقد إن الجزيرة بتمشي أمورها اليومين دول

أحمد عبد الفتاح يقول...

العيزية قوي نوارة
انا والله العظيم ما قصدت ولا كلمة واحدة من الي انتي بتقوليها ده
يا زعيمة لازم تعرفي حاجه
1- مفيش حد بيقرا جبهة التهييس قدي
ده انا ببقي قاعد مع اصحابي زاقول لهم كما قالت نوارة في الجبهة
والبوست الاخير ده بالذات قراته كويسس
كل الحكاية ان اتلعبير خاني
وحطيت اسمك لسببين
1- ان موضوع تغطية الاعلام كان يهمك واثرتيه قبل كده
بصي يا نوارة
انا مكنش قصدي الي فهمتيه
وقبل ما اقول 2 و 3 و 4 انا بتاسف جدا لو كان كلامي اتفهم غلط
وهكتب بوست اوضح فيه الغلط

جبهة التهييس الشعبية يقول...

حصل خير يا احمد
انت عارف مكانتك عندي كويس

شارك مع اصدقائك

Share |