الأحد، 27 أبريل، 2008

لماذا انا مضرب يوم 4 مايو ؟


اسف عالتاخير
بس كان لازم اخد وقتي في التفكير
قبل كده كان اي عمل احتجاجي كنت راشق فيه من غير تفكير - للي مبيفهموش عربي راشق يعني مشارك فيه من غير تفكير -
لكن بالنسبة ل 4 مايو الامر مختلف ولاسباب كثير
يمكن احدها اني شهدت ايام 6 و 7 و 8 ابريل في المحلة الكبري وشوفت الجحيم هناك واتاخد صاحبي الي كان معايا طول ليلة 5 ابريل والي اتاخد عصر 6 ابريل كريم البحيري ، وده مش معناه اني خايف من عمل احتجاجي جاي ولكن معناه اننا لازم نفكر قبل العمل الجاي عشان الغلابة الي ممكن يجيوا في الرجلين
يمكن فكرت شويتين في الموضوع لاني عندي اعتراض عاليوم نفسه لانه يوافق عيد ميلاد مبارك وانا مش حابب اننا ندخل السياسة في المسائل الشخصية وبنفس المبدا رفضت الفرح الموازي الي اتعمل لجمال وخديجة في يوم 4 مايو برده من سنة تقريبا .

بس وبالرغم من كل ده وبالرغم ومن اني قلت اننا لازم ندرس اضارب 6 ابريل كويس والي نتج عنه وبالرغم من كل ده انا قررت خلاص
انا مضرب يوم 4 مايو والي يحصل يحصل
ما هو ضربوا الاعور علي عينه قال خربانه خربانة
بس لو اضربنا فيه امل واحد في المئة مليون انها متبقاش خربانة
كل ما اقرا كتاب مدافع ايات الله لهيكل واقرا اذاي ان الثورة الايرانية كانت مجرد اضراب كبير حبتين وعشوائي شال الشاه اقول والله فيه امل والايرانين مش احسن مننا - طبعا مش قصدي اننا نقلبها ثورة اسلامية -
ما هو مفيش حل تاني
انا مضرب والي يحصل يحصل
انا مضرب لان من حقي اعيش كبني ادم
من حقي اشتغل واحب واتجوز ويبقي ليا بيت واسرة
من حقي امشي في الشارع مش خايف
من حقي ادخل الكلية من غير ما اقعد ابص علي ضابط الحرس قاعد عالبوابة ولا لا ذي الحرمية
من حقي اربي دقني واحلقها وقت ما احب من غير ما حد يسالني دقنك طويلة ليه
من حقي حاجات كتير قوي هي حقوق اي بني ادم ربنا خلقه بس الحقيقة اني مش طايل من حقوقي اي حاجه
وبالنسبة لموضوع اليوم الي مش عاجبني
الحمد لله لقيت حل للموضوع ده لاني لقيت يوم 4 مايو يوافق يوم المرور العالمي فانا هعتبر نفسي مضرب بمناسبة اليوم ده ، او لانه تقريبا بيوافق عيد ميلاد امي ومتيقلي ده سبب مناسب جدا للاضراب
وبهذه المناسبة العظيمة بوعدكم بتغطية جديدة ومتميزة من مكان جديد خالص من مصر
طبعا مش المحلة ولا القاهرة ولا الاسكندرية لان كل ده اماكن غطيت فيها اضراب 6 ابريل
التغطية المرة ده هتبقي مختلفة خالص ان شاء الله وهدفها اننا نوصل اكثر لراجل الشارع العادي الي مش بيستخدم الفيس بوك ولا البلوجر ولا يعرف النت ده ايه اصلا
والجديد برضه عندنا اني اخيرا اتصالحت مع خدمة التويتر وبقت بحبها
ممكن تتابعوا كل الاخبار الجديدة من علي لينك التويتر بتاعي http://twitter.com/ahmedikhwan
وممكن كمان تستقبلوا الاخبار علي موبيلكم ببلاش
شكر اخير احب اوجه للاخوان المسلمين وكل احزاب المعارضة
شكر طالع من القلب لانهم رفضوا للمرة التانية المشاركة في الاضراب
لان الاضراب ده مش بتاع حزب ولا حركة
الاضراب ده بتاع شعب مصر
بتاع الناس العادية
مش بتاع الصفوة ولا المنظرين
بتاع الناس الشعبية الي بتتكلم الكلام الشعبي اللذيذ - علي راي سعيد صالح في العيال كبرت -
اخيرا احب اختم بمقولتين
الاولي لمقولة نسبت للرسول تارة ولابي ذر الغفاري تارة تقول " عجبت لمن لا يجد قوت يومه ثم لا يخرج شاهرا سيفه "
اما المقوله التانية لجيفارا
قال فيها
الثورة قوية كالفولاذ... حمراء كالجمر ... باقية كالسنديان... عميقة كحبنا الوحشي للوطن
مش قلت لكم قبل كده ... مصر خلاص لبست ثوب الثورة

هناك 5 تعليقات:

جبهة التهييس الشعبية يقول...

طيب يا احمد الكلام ده مهم قوي
عايزين نفعل بقى
يعني زي ما انت قلت الحكاية شكلها ان فيه ناس واخداها تهريج
والكلام اللي بتقوله مهم
وعايزين نعمل كمان تضامن مع المسجونين
نعمل ايه بقى
قول كده وانا اقول
على راي يونس شلبي
ده بمناسبة العيال كبرت

مينا زكري يقول...

هو فعلا الرسول قال " عجبت لمن لا يجد قوت يومه ثم لا يخرج شاهرا سيفه "؟
يعني الحديث صحيح ومضمونة صحته؟
أصل لو صحيح دا يبقى عسل جدا... دا بيضرب في مقتل فتاوي فقهاء السلطان بتوع تحريم الإضراب والتظاهر والخروج على الحاكم

أنا شخصيا هعمل تدوينة عن الحديث ده

سلم لي على جوزك يا اسماعيل بيه
دا بمناسبة العيال كبرت برضو

أحمد عبد الفتاح يقول...

الزعيمة
منورة
انا اقترحت عنك عالبلوج فكرة وقفة قدام دار القضاء يوم 4 مايو
عندي شوية تفاصيل للموضوع هبقي اقولها ليكي بعد ين بقه
ولعلمك يا نوار ة مفيش قطة خمسية القطة يا بلدي يا سيامي
وده برده بمناسبة العيال كبرت

أحمد عبد الفتاح يقول...

مينا
بص يا ريس
انا عملت سيرش سريع علاحديث قبل ما اكتب البوست لقيته حديث منسوب للرسول بس موصلتش لسنده - الي هو درجة صحته -وبعد تعليقك عملت سيرش تاني ووصلت ل 3 اراء
1- انه حديث عن الرسول رواه ابو ذر الغفاري رضي الله عنه بس موصلتش برده لسنده
2- انه مقولة قالها ابو ذر
3 انه مقولة للامام علي
وعلي كلا انا بعت لصديق متخصص في مصطلح الحديث يجيب لي سند الحديث ومدي صحة نسبه للرسول من عدمه
وعلي كلا انا بحب المقولة او الحديث ده

اما بخصوص العيال كبرت فالبتاكيد تظل كلمة كذكرتتتين ذذكرتتنن كنترننذ
هما اتنين انت هتقرفنا ليه
أحلي حتة في المسرحية كلها

غير معرف يقول...
أزال أحد مشرفي المدونة هذا التعليق.

شارك مع اصدقائك

Share |