الخميس، 16 أبريل 2009

دانيال ... أنا أسف

كتبت بالامس عن المايستروا الاسرائيلي دانيال بارنبيوم ووصفته بالامس بالصهيوني ووعدتكم اليوم بمفاجأة جديدة .
أما عن المفاجأة فقد تمت والحمد لله حيث حضرت اليوم البروفة النهائية لاولكستر الشرق والغرب التي يقودها المايسترو دانيال في حفل مساء اليوم علي المسرح الكبير بدار لاوبرا والصورة الي فوق لدانيال وهو في البروفة .
نيجي بقه للاهم عن الحدث نفسه ودانيال .
انا النهرده ممكن اعتبر اليوم ده من اعظم ايامي علي الاطلاق لان الموسيقي الي سمعتها اليوم لم تكن كأي موسيقي سمعتها علي الاطلاق ، فبالرغم من ان الاولكسترا كانت تعزف السيفمونية الخامسة لبتهوفن والتي قد سمعتها قبل ذلك عشرات المرات الا انني لم اسمعها في مثل هذا الجمال أبدا .




حقا كانت الموسيقي وكانها تتنزل من السماء .
كانت حالة فريدة التي شعرت بها اليوم فانا كنت استمع للموسيقي وكانت من احلي الموسيقي التي سمعتها في حياتي داخل المسرح الكبير لدار الاوبرا المصرية الذي طالما عشقته ولم أكن ارتدي رابطة العنق - التي طالما كرهتها - وفي نفس الوقت كنت امارس عملي المفضل .. التصوير ، لقد كانت بالفعل حالة فريدة .
أما عن دانيال فانا بالتاكيد مدين له بالاعتذار ...
فالموسيقي الي سمعتها اليوم لم تكن لتصدر من انسان صهيوني أبدا ، لم تكن بالطبع لتصدر من انسان من الممكن له ان يحاصر اطفال غزة في يوم من الايام لذا وانا في الحفل قررت ان اتاكد فور خروجي من الحفل من معلوماتي عن دانيال الذي لم أكن اعرف عنه الا القليل .
ولم أكد اعود الي مكتبي وافتح بريدي الالكتروني حتي وجدت تعليق من صديقي العزيز جدا واستاذي أدهم الصفطتي يوبخني بسبب ما كتبته عن دانيال وترك لي رابط لموضوع من مجلة الاخبار اللبنانية ليعرفني من هو دانيال .
وكما توقعت لم تكن هذه الموسيقي تصدر الا من انسان عظيم .
فوجئت عندما عرفت ان دانيال قد حصل علي جنسيته الفلسطينية من حكومة حماس ( كنت اعرف ان دانيال يحمل 4 جنسيات منها الفلسطينية ) وفوجئت عندما عرفت موقفه من الحرب علي غزة وغيرها من مواقفه التي لا يمكن ان توصف الا بالشجاعة ...
ولذا فليس من العيب انا اعتذر للعبقري دانيال بعد ما عرفته عنه وبعدما سمعته منه ، وان كان لدي عتاب عليه انه لا يزال يحيا في الكيان الصهيوني .
الي هنا ينتهي كلامي ويتبقي لي شئ واحد هو طلب من قراء المدونة ان يدعوا لي لكي أتمكن من حضور حفل دانيال مساء اليوم لكي تكتمل متعتي .

طالعوا البوم صور كامل من تصويري لبروفة اليوم علي موقع اليوم السابع

هناك 17 تعليقًا:

AbdElRaHmaN Ayyash يقول...

حلو اوي :)

أدهم الصفتى يقول...

و الله يابنى انت واد نضيف و عسل
الحمدلله انى اعرف انسان محترم زيك
أصل الحياة من غير محترمين دمها يلطش يا ابو حميد
و انا كمان مبسوط انك بتحس المزيكا كده
و خصوصا المزيكا الكلاسيك
حاول تلاقي تسجيلات على النت لأوركسترا برلين ، و أوركسترا طوكيو , حاتدعيلى
و انا لما اشوفك حاديك الكتاب بتاع دانيال بارنبيوم و ادوارد سعيد
صباحه قشطه

أدهم الصفتى

أحمد عبد الفتاح يقول...

عبد الرحمن
أنت احلي

أحمد عبد الفتاح يقول...

ادهم
أشكرك علي كلامك
انا سمعت تسجيلات فعلا لاواكسترا بلالين والسيمفونية الخامسة لبتهوفين بس مكنتش في الجمال ده
دانيال كان بيزعق للموسيقين الي مش حاسين اللحن
كان بيعلمهم اذاي كلهم يبقوا توقيتهم واحد واحساساهم واحد
كانت حاجه كده متتوصفش
أما بخصوص الكتاب فانا مستنيه

محمود سعيد يقول...

إمتى الحفلة ديه :-)

محمود سعيد يقول...

إخص كانت النهاردة !

أحمد عبد الفتاح يقول...

كانت النهرده الساعه 8

أحمد عبد الفتاح يقول...

وتذاكرها خلصت من أكثر من 15 يوم فاتوا

Unknown يقول...

متشكرة يا احمد

انا ما كنتش اعرف كل الكلام ده وكنت فاكراه واخد الجنسية الاسرائيلي فعلا

ميرسي على المعلومات دي

اروح ازاي وامتى بقى؟

Unknown يقول...

اخص

كانت النهاردة؟

يعني جاي دلوقت تقول الكلام ده؟

اعمل فيك ايه بقى؟

طيب ايه؟

مش ح يعمل حفلة تانية؟

أحمد عبد الفتاح يقول...

تروحي أمتي وفين ؟
انتي أكيد بتهزري يا نوارة
غير ان الحفلة كانت حفلة واحدة بس امبارح فالحفلة اصلا تذاكرها خلصت من زماااااااااااااااان وتقريبا كل الي حضر مثقفين وشخصيات عامة ودبلوماسسين دول أجنبية
ده غي اجرائات الامن
محكلكيش
يله تتعوض المرة الجاية

Unknown يقول...

انت يا موكوس بتقول ايه؟
تقرير الجزيرة بيقول حاجة تانية خالص غير اللي انت بتقوله
وبيقولوا انه اسرائيلي

أحمد عبد الفتاح يقول...

ما هي ده المشكلة يا نوارة
كل واحد بيقول حاجه
هو ليه موقف ضد الحرب علي غزة ونا سمعته منه
وهو معاه 4 جنسيات منهم الاسرلاائلية والفلسطينية
بس الي مدية الجنسية الفلسطينية حكومة حماس
راجعي لينك الاخبار اللبنانية الي فوق في البوست ودوري عليه عالنت
كل واحد بيقول عليه حاجه
وانا مش عارف ارسي علي حل ولا علي كلام اثق فيه 100%

Lasto adri *Blue* يقول...

ثق ان الفن والموسيقى ملهومش جنسية.. وانهم بيهذبوا الروح أكتر بكتير من سجون وحروب معتقلات..
ثق ان الاختلافات السياسية والنزاعات الدولية مسميات.. يندرج تحتها إنسان لم يختار غسمه أو شكله أو لونه أو جنسيته

لم ارى دانيا.. ولست فى موقف دفاع عنه لاننى لا أعرفه.. أردت فقط الحديث عن معنى آخر للانسانية

أحمد عبد الفتاح يقول...

Lasto adri *Blue
معاكي حف وموافقك لحد بعيد
أشكرك علي اضاتك الي بجد جميلة

TAFATEFO يقول...

رغم كل اللي قلته .. مقدرش أتفهم (وإن كنت فاهم) ان مصر تدعو فنان إسرائيلي لـ (آل ايه) إمتاع الجمهور بتحفه الفنية مهما كانت

موقفه بقى فتأكد اني لا ممكن أبداً أصدق ان مصر تدعو فنان بتقول حضرتك عنه ما تقول .. فاروق حسني لا ممكن أبداً يزعل إسرائيل دلوقتي

التطبيع .. لو .. لو .. لو الملف ده لسه مفتوح للنقاش .. يبقى دعوة حضرتك واحتفالك بحضور العرض ده .. دعوة واحتفال بالتطبيع الثقافي اللي قال (الوزير الخـ** انه آل ايه) لو شاف كتاب إسرائيلي هيحرقه .. حمش طول عمره

TAFATEFO يقول...

check this

شارك مع اصدقائك

Share |