الأحد، 5 أبريل، 2009

تصبحي علي خير يا مصر



أذيك يا مصر ؟
عامله ايه ؟
يارب تكوني بخير رغم أني اشك في الموضوع ده
بيقولوا يا مصر أن ولادك الصبح مضربين ، وفيه ناس تانية بيقولوا ولادك هيخرجوا في مظاهرات وفيه ناس ثالثة بيقولوا ان بكره يوم ذي اي يوم ، ألا انتي ايه رايك في الي بيتقال ده يا مصر ؟
يعني الكلام حقيقي يا مصر ولا فشر ؟
سوال صعب مش كده ؟
تخيلي ملقتش الاجابة عند حد
النهرده يا مصر كنت بشتغل وسط الناس
كنت بلف عالناس في الشارع واسالهم عن احوالهم عشان احطه في موضوع صحفي
الناس كانت تعبانة قوي يا مصر


واحد كان قاعد لوحدة في جنية علي كرسي مكسر قربت منه كانت هدومه مبهدله وقالع جزمته وعيونيه بتدمع
لما سلمت عليه اتخض
سالته عن حاله حكالي بلاوي
حكالي انه موظف حكومة ومش لاقي ياكل
قاعد بيحلم بعلاوة جاية له بس خايف من الاسعار
وواحد تاني حكالي ان اذي حلم حياته يسيب البلد ده ويروح اي حتة تانية
تخيلي
قالي انه سمع من اصحابه ان بلاد في افريقيا كتير احلي منك يا مصر
هو قالي انا عايز اروح اي حتة وخلاص اتعامل فيها أكني بني ادم
خلصت شغلي النهرده يا مصر وانا مضايق قوي
وانا محبط
رجعت لمكتبي قلبت في الاخبار كانت بتتكلم عن فرج قريب وان فيه ناس هتتظاهر وناس هتضرب وناس بتعمل تحالفات وناس بتعمل ائتلافات وناس بتتكلم عن التغيير وناس بتنظر علي صفح الجرايد وناس وناس وناس .... بس محدش من الناس دول قالي ارد علي الي قابلتهم في الشارع بايه ؟
ارد بايه علي الموظف الي كان بيعيط ولا الراجل الي عايز يسافر ؟
اقول لهم اضربوا بكره ؟
اتكسفت بصراحة
كانوا هيشوفني كائن فضائي نازل من المريخ وراكن مكوك الفضاء بتاعه علي ناصية البطل أحمد عبد العزيز ونازل اهزر معاهم
طب اقول لهم ايه ؟
والله ما عارف
بعد كل ده معنديش ليكي الا كلمتين يا مصر
الاولي اني وبالرغم من اني مش متفائل من بكره بس هحاول اعمل الي عليا
هحاول أكون هناك يمكن أو لعل وعسي ... أو عالاقل الاقي حاجه اقولها لربنا يوم القيامة لما يسالني عملت ايه عشان الغبانة الي اسمها مصر ده
أما الحاجة التانية فهي
تصبحي علي خير يا مصر

ليست هناك تعليقات:

شارك مع اصدقائك

Share |