الأحد، 22 أبريل 2007

أأمر واتمنظر ... أنقعص وأتأنعر


عارف ان العنوان صعب بس صدقوني انا مليش اي ايد فيه , العنوان ده نقلا عن الفنان الجميل محمد هنيدي في مسرحية عفرتو ووفقا لكلام هنيدي فان العفاريت اليومين دول بيقولوا الجملة ده لما يطلعوا للبني ادمين قبل ما ينفذوا طلابتهم .
مش هخبي عليكم الفترة الي فاتت كان بيلح عليا سوال مهم جدا ، بل بالعكس هو من اهم الاسئلة الي لازم بجاوب عليها البني ادم والسوال هو :
لو طلع لك عفريت هتطلب ايه ؟؟؟
متتصوروش السوال ده صعب قد ايه ولو مش مصدقين سيبوا البوست دلوقت واقعدوا فكروا في حل السوال ده وهتعرفوا قد ايه انه صعب .
أنا به قضيت وقت طوبل افكر في الحل وناوي اقول لكم انا وصلت لايه .
أول اجابة طبعا هتيجي في دماغي ان نفسي طبعا في عربية بي ام دبليو سبور أحدث موديل ونفسي في لاب توب وكاميرا اخت بتاعه عمر عبد الله مصور المصري اليوم وموبيل أن 54184864 وخط موبيل من بتوع الجيل الثالث .
وعلي علي الصعيد الثدوينيي هيبقي نفسي ان مدونتي تعمل 41545428842861 زائر وان احمد زكي والحاج جرجس يرجعوا للتدوين وان الاستاذه سارة تعبر مدونتها وتمن علينا ببوست وان الاخت زنزانه تفكها علينا شوبة في البوستات .
أكيد نفسي في حاجات كتير قوي بس اكيد العفريت مش هيحقق كل ده وهو بالكتير هيحقق 3 طلبات , فانا من هذا المنطلق لازم اختار اهم 3 امنيات بس يا تري ايه هما ؟
السوال صعب قوي بس انا عصرت دماغي ووجدت أهم 3 حاجات فعلا .
أكيد اول حاجه اني ابقي غني قد خمشخاخر مليار دولار ودول متيقلي مش صعبين علي عفريت وبالفلوس أكيد هعرف احقق حاجات كتير , بس يا خوفي من الي ممكن يحصل لان اخرتي ممكن تبقي ذي اخرة خيرت الشاطر والمحالين للمحاكم العسكرية اياهم , وهيقولوا عليا بغسل اموال وبمول الارهاب ، يعني الفلوس ممكن توديني في داهية .
طيب نسيبنا من الطلب ده
مدام معيش فلوس تبقي سلطة وده بقه مشكلة يا تري اخد السلطة فين في الحكومة ؟وده طبعا مشكلة لاني لو مبقتش هليب ونصاب هتشال تاني يوم .
وطبعا مفيش سلطة في المعارضة
يبقي بلاها السلطة
الطلب الثالث اني اتجوز واحده بحبها وبتحبني ونعيش حياه سعيده وده متيقلي طلب سهل قوي , بس بعد التفكير لقيت الامنية ده برضه اخرتها مش تمام لان بعض قانون الارهاب اياه ايه فايده اني اتجوز واحده بحبها او حتي بكرهها مدام فيه مخبر هيبقي نايم معانا ؟ ايه فايده اني اتجوز واعمل بيت مدام ممكن اي حد في اي وقت يدخل عليا بيتي ؟
يبقي برده الامنية ده مش هي الاهم
يعني الثلاث طلبات طلعوا فشنك
بصراحة انا قعدت افكر وافكر وافكر اطلب ايه من العفريت
وصدقوني ملقتش الا طلب واحد لو اتحقق ممكن ابقي غني وانا مرتاح وممكن اطلع للسلطة وممكن اتجوز ، الطلب ده لو اتحقق هيخرج كل الناس الي بحبهم من السجون وهشوف منعم تاني .
الطلب والي اكيد الكل عرف ايه هو ان البيه العفريت يخلصنا من مبارك وابنه ونظام الهبيشه بتوعه , وأكيد بعد الطلب ده ملبش اي طلبات تاني وحلال عليه الطلبين التانيين .
والسوال هو العفريت هيرد عليا يقولي ايه لما اقول له علي طلبي ده ؟أكيد هيقولي انه مش هيعرف يعمل حاجه مع الشياطيين من بني جلدته امثال مبارك وابنه .
يبقي حتي العفاريت مش هيحلوها أمال مين الي ممكن يحلها ؟
هو ده السوال

هناك 8 تعليقات:

مقاومة يقول...

ربك يابني انت ناسي ان ربنا كبير و قادر يا ما يلبيها مبارك و ينتحر و ابنه بقى يشرد نفسه ، مش عارفة ازاي .. ما علينا!
اما بقى على انك تتجوز يابني ليه بتعمل في نفسك كدة ، سيبك من الهم انت هتجري وراه ليه يعني عايزة افهم بس يلا ادام انت عايز تتجوز ربك يرزك بواحدة تحبها ب فعلا كانون الارهاب هيطبق عليك و عليها ، حرام بى تظلم حد معاك يا كئيب . ههههههههههه
عامة انا لبيت أمنيتك و عملت بوست و الباقي بقى ربنا يكرمهم و يعملولك اللي انت عايزه

مُرَاقِبْ مِصْرِي يقول...

أعتقد إن حضرتك بتفترض أساسا إن العفريت دا يكون مستقل عشان يقدر يحقق لك الأمنية دي (طبعا مستقل أضمن من إنه يكون معارضة وانت أدرى بحال عفاريت المعارضة) ولكن المشكلة تبقى أنه إيش ضمنك إنه لو مستقل يفضل مستقل ويحقق لك أمنيتك؟ قبل ما يحققها يا أستاذ أحمد هيكونوا بتوع الوطني ظبَّطوه وانضم لصفوفهم... أنا رأيي إن الحل مش في العفريت... الحل في رأيي إنك تحتسب

غير معرف يقول...
أزال أحد مشرفي المدونة هذا التعليق.
None يقول...

الحركة الشبابيه لمناهضه الإعتقال – مش هنتاخد


ادخل عندى ضرورى جدا
وسلاااااام

zenzana يقول...

لا يا سي تاح

العفريت هيقولك العين متعلاش عن الحاجب

من وحي صورة الاخ مراقب

قلمي الحر يقول...

السلام عليكم,تعرف والله موضوع العفريت ده جامد جدا ..انا قعدت أفكر لو طلع هاقول له ايه ..بسس عموما أعتقد أنه صعب تطلب منه أن يخلصك من العائلة المباركية , لانه هيقولك أنا عندي اتحرق أموت موتة ربنا يعني أحسن ما أموت على ايديهم ..تصور حتي العفريت..ههههههه
اعتقد العفريت ممكن يلبي طلبك وطلبنا في حالة واحدة بس , لو الشعب المصري الجميل المسالم اللي دائما جايب لي نقطة قرر أن يساعد العفريت من الجن في القضاء علي مبارك والا يجلس يندب حظه ومستني العفاريت تخلصه
اما بالنسبة لزواجك وماله يابني هي شكلها هتطلع عروسة منضالة هي ايضا وبكده تضمن أنكم هتكوني مع بعض دايما جوه البيت وفي المعتقل وفقا لقانون الارهاب أصلهم دلوقتي بيقبضوا على الواحد وأهل بيته عشان يونسوه زي ما كانوا بيقتلوا أهل بيت الملك الفرعوني لما يموت عشان يونسوه..الدولة هتقلد الفراعنة في الموضوع ده....ههههه

غير معرف يقول...

انا عايزة اتنقل من شغلي لشعل جديد وعايزة موبايل تاني وعايزة اتجوز واعمل فرح ما حصلش وعايزة اشتري لبس جديد وعايزة شنط وجزم ونبيض شقتنا ونروح مرسى مطوح مع صحابي واعمل المشروع اللي في دماغي وعايزة...... طب العقريت طيب فاضي ولا وراه حاجة؟؟؟ انا فاضية المهم هو يخلص اللي انتو عايزينه وانا قاعدةاهوه مستنياه عقبال ما يخلصلكو أكون خلصت اللستة بتاعتي

Laboudy100 يقول...

لو مكانك يا مولانا
متهيألي عشان أخلص من الحيرة دي
أطلب منه أنه أن يدخل المصباح السحري تاني وما يورنيش وجهه تاني
عشان مش ناقصة خانقة
كفاية علينا عيلة العفاريت اللي قاعدنا على نفسنا طول ما فيها قلب ينبض
يا رب خليه ينبض بسرعة قوية جدا

شارك مع اصدقائك

Share |