الجمعة، 7 سبتمبر 2007

حول حفل أفطار الأخوان


ياتي ميعاده في شهر رمضان من كل عام ، انه حفل الافطار الذي تنظمه جماعه الاخوان المسلمين والذي تدعوا اليه صفوة المجتمع السياسي المصري وتحرص دائما الجماعه ان يكون هناك تمثيلا لكل الوان الطيف السياسي المصري والاقباط ، أما ثاني الامور والتي تحرص عليها الجماعه ومنذ سنوات فهي اقامة الحفل باحد افخم فنادق القاهرة .
ولكن ياتي التساول الهام والحيوي جدا ... كم يتكلف اقامة مثل هذا الحفل في مثل هذه الفنادق ؟
ربما يستعصي الاجابة عليه بعلمي المحدود عن الحفل ولكن من الموكد انه يتكلف الالاف والتي قد تصل الي الي ارقام تكون من 7 ارقام وهو ما يثير التساول الاهم ولم كل ذه التكلفة ؟
ما اثار كل هذه التساولات بنفسي هو سوال برلماني فضل محسن راضي عضو مجلس الشعب عن الاخوان استقبال رمضان به حول موائد الافطار التي تقيمها الموسسات والوزارت والمصالح الحكومية والتي تكون في فنادق خمس نجوم - غالبا لا تصل لفخامة سيتي استارز الذي يقيم به الاخوان افطارهم - وطالب راضي في سواله الحكومة منع هذه الافطارات وتحويل اموالها الي مشاريع تنموية عاجلة .
الي هنا واتفق حرفيا مع النائب الاخواني ويذكرني خطابه هذا بما سمعنا عنه قبل 3 سنوات وسميت خطة ترشيد الاتفاق الحكومي فلو عرفنا الرقم الذي يصرف من قبل الموسسات الحكوميية وحدها علي الاجندات ونتائج العام الجديد سنصاب بصدمه كبيرة . ولكن السوال الاهم اليس من الاولي ان نبدأ بانفسنا ؟
علمني الاخوان في ايام العدوان علي فلسطين والعراق وكوسوفا من قبل والشيشان وافغانستان ان اصوم انا واهل بيتي يوم ونفطر في هذا اليوم علي الفول والطعمية ونوجه ما كان سيتكلفه طعام اليوم الي دعم اخواننا في هذه البلاد المنكوبة وغالبا ما كان يتم عمل مثل هذا علي مستويات كبيرة كالمحافظة او الحي ويتم جمع المبالغ والتبرع بها وتوسعت هذه الفكرة لتخرج من نطاق الاخوان وتنطلق الي طافة طوائف الشعب وهذه الفكرة تحقق أكثر من هدف فهي في الاصل توفر الدعم المادي لهولاء المحتاجين له ولا تكلف رب الاسرة مصاريف اضافية بل هو يتبرع بمصروف بيته في هذا اليوم كما انها تجعلنا اكثر شعورا باخواننا في هذه الاماكن .
والسوال الجديد الذي يطرح نفسه
لم لا يكون الاخوان اول من ينفذ اقتراح صالح علي نفسه ؟
لم لا يكون الاخوان من المطبقين لفكرة الافطار علي الفول ؟
أعلم جيدا ان افطار الاخوان يحقق من المكاسب الكثير والكثير واعلم جيدا ان الجماعه تنظره من العام للعام وتعد له جيدا وعلي اعلي مستوي ممكن ولذا فانا لا اقترح الغاء الافطار بل كل ما اقترحه هو جعل الافطار علي اشياء بسيطة في مكان بسيط فما المانع من ذلك ؟
وما المانع من ان توجه هذه النقود التي كان سيتكلفها الحفل الي اي مشروع تنموي داخل مصر ؟
أعلم ان الاخوان غير مقصرين في التبرعات والعمل الخيري ولكن ما المانع من الزياده ؟
وماذا سيحدث ان افطر صفوة المجتمع في هذا اليوم علي الفول ؟
فلا هم سيموتون من الجوع ... ولاهم ممن ينتظرون رمضان ليذوقون اللحم علي موائد الرحمن او بالاصح موائد الاخوان ؟
أعتقد ان صورة الاخوان بعمل مثل هذا ستصبح اكثر قربا من الشعب فلم تكن دعوه الاخوان يوما من الايام دعوه بعيدة عن الشارع نخبوية ولم تكن يوما نضال قاعات الموتمرات او قاعات الفنادق .
هذه التدوينة والتي يبدوا موضوعها غريبا بعض الشئ هي دعوه ليس للاخوان فقط وانما لكل مصري ان يفكر مليا في اموال طائلة تصرف علي اشياء ليس لها اي قيمة وهي مجرد ( منظرة فارغه ) اوقن انها لو صرفت في مصارفها الصحيحة ستعدل من وضع بلادنا كثيرا
واخيرا احب ان استشهد بمقوله للفنان عادل امام في مسرحية الواد سيد الشغال عندما سال خاله خادم القصر مين هياكل كل اللحمة الي في التلاجة ه ؟ قاله اهل البيت بيعمولوا عزومات كتير فظن سيد الشغال انهم يعزمون فقراء فقال له لا بل يعزمون عليه القوم فرد عليه قائلا
يعني ناس عندهم لحمة يعزموا ناس عندهم لحمة عشان ياكلوا لحمة !!!

هناك 39 تعليقًا:

شيماء ابوزيد يقول...

بجد الموضوع حلو جداااااااا
وارجو ان يتفهم الجميع الامر ويتذكروا حديث الرسول صلى الله عليه وسلم

فيما معناه طوبى لمن اهدى الى عيوبى

غير معرف يقول...

والنبي انت زي العسل
فكرتي والله بموضوع الفول الي كنا بنعملة دا
بس ياخوفي حفل الافطار يسمعو كلامك ويعملوه علي فول زي مابتقول
تاني يوم اسامة سرايا وواعوانة
هيقولك ااااادي ياعم..قابل عنك... شفتو الاخوان هيعملو فيكو اية لما يمسكو الحكم
هتكلو فول اجباري ويبعتو باقي
الموازنة الحكومية لفلسطين والعراف وافغانستان
ونتعلم من دا اية
دائما وأبداً
لازم لازم
نبص علي اليمين وعلي الشمال
قبل ما نعدي الشارع
ههههههههههههه

محمود سعيد يقول...

لأ يا عم الأمور

وسعت منك قوى لما قولت مبلغ من 7 أرقام

ده كفاية 7 ألاف جنيه

وبصراحة أنا مش عارف إيه هو وجه الإعتراض

هل أنت شايف أن سيتى ستارز إسراف
ولا شايف أنه فى أعمال تانية أولى
ولا إيه بالضبط

أقولك أنا ،
لما بنقول نفطر على فول ونطلع فطار النهاردة لله

ده فى حالة واحدة مرتبه 500 جنيه
بيصرف 300 على الأكل
يعنى
اليوم ب 10 جنيه
بنقوله جيب فول بجنيه
وطلع 9

ده واحد على قد حاله وبنقول له يؤثر على نفسه ويتغدى يوم فول
ويطلع مصروف اليوم لله


لكن لو واحد بيصرف على أكله فى الشهر 6000 جنيه
و بإمكانه يطلع 1000 جنيه لله
إيه اللى يخليه ياكل فول

العبرة مش بأكل الفول
أو الكافيار

العبرة إن الغير قادر يؤثر على نفسه
وياكل النهاردة فول معلش
بس بكده هيقدر يلاقى مبلغ يطلعه

ورب درهم سبق ألف درهم (وأنت عارف مش لازم أشرح بقى)

لو حضرتك شايف إن سيتى ستارز إسراف
فأقدر أقول لحضرتك إن من الكرم أنه لما يجيلك الضيف تأكل أحسن من أكلك
وتؤثر عليه بأكلك كمان
لأ وكمان ممكن تدبح له (الحصان أو الفرخة أو الخروف الوحيد اللى عندك)
وممكن تدبح له عيل من عيالك :-)

ولما تكون قادر أنك تكرم ناس من مستويات مختلفة
تكرهم بأعلى من مستواهم
ومن مستواك
شوف بقى مستواك ومستواهم يجيب سيتى ستارز ولا لأ
ثم مش عارف إزاى تقول رقم من 7 أرقام
والضيوف حوالى 100 ولا 200 نفر

النفر بياكل ب 1000 جنيه

أنت عبيط

لو قلت أن فى سيتى ستارز الوجبة ب 100 جنيه
والضيوف 100
يبقى الحفلة كلها متكلفة
10 ألاف جنيه

أما لو شايف إن إنفاقها فى حالة تانية أولى

فده مش حضرتك اللى تحدده
صاحب الشأن اللى يحدده ويعرف الأولى

وكمان يبدو أنك متخيل أنه مفيش حاجات تانية بيتصرف عليها أكثر


أنا مش موافق لا على كلامك
ولا على كلام أ.محسن راضى
(بفرض صحته)

غير معرف يقول...

فيه ايه يا احمد عضو مجلس الشعب يتحدث عن حكومه مسئوله عن شعب تقيم ولائم متعدده وليس حفله واحده وليس عن افراد بيعزموا مجموعه من الناس هوه احنا في بيتنا عمرنا عزمنا حد علي الافطار وكان فول ثم اني ان شاء الله ساطبق الفكره ولكن عليك من باب الاقتصاد وانت اللي جبته لنفسك

غير معرف يقول...

متفق مع شيماء على انه موضوع حلو بالنسبة لألأحمد يعنى بدأ يكتب حاجات ممكن تكون حلوة ..أما ان يتفهم الجميع فمن له دعوة عنده من الفهم الصحيح لأن يثق فى جماعته وتصرفاتها والباب مفتوح للنصحية السديدة على بصيرة دون تجريح أو تسفييف وأعتقد حضرتك لاتعرفى حجم الانفاق كما أدعى أحمد والعملية الأستاذ محود حسبها لكم ومش كتير على جماعة عريقة زى الإخوان تصرف على انشطتها بما ينبغى وأنت ياأحمد وشيماء وكلكم عارفين أموال الإخوان من جيوب الإخوان

وببساطة لو اتعزمنا عند أى واحد فيكم مش عارف هيكون الأكل أخباره ايه ولماأفراد الإخوان بيأكلوا الفول على
افطارهم من باب تربية النفس والتحمل
علشان اللى زيك ياأحمد يتربى تربية على التقشف مش علشان التقطير والعقاب

وبعدين عيب عليك ياأحمد بعد كل ده ولسه يتتكلم بنفس طريقتك القديمة المفروض الزمن واحتكاكك وتطويرك لنفسك يخلي كتاباتك تكون على نفس مستوى الناس اللى بتتعامل معاهم

غير معرف يقول...

أثير الموضوع ده من فترة في العاشرة مساء وأذكر إني كنت مهتمة أوي بمعرفة ما سيؤل إليه الحوار والنقاش إلا أن النوم غلبني وصحيت معرفتش حاجة،، لكن اللي متأكدة منه انك بصيت يا أحمد ع الموضوع من زاوية مثيرة للجدل.. تعالى نبص هما ليه متمسكين بالإفطار ده بالشكل ده مع إنهم المفروض واخدين بالهم من اللي انت بتتكلم عليه ده!! بص يا أحمد ع اللي ورا الإفطار لان انا متأكدة انه مش بالبشاعة اللي انت مصورها دي.. فاااااااااكر يا أحمد افطار الصحفيين؟ تقدر تقولي كلف أد إيه؟ وافرض التكلفة كانت عالية تفتكر كان مهم ان احنا نعمله؟ طب هنعمله تاني السنة دي حتى لو تكلفته عالية؟
أحمد... انت كويس، كتاباتك وأسلوبك الصحفي الجريء وعدستك وأفكارك.. لكن فيك حتة كده عايزة محتاجة قرصة من بتوع خالتو بسمة

أحمد عبد الفتاح يقول...

شيماء
شرفتني زيارتك الي كنت مفتقها من فترة
اما موضوع التفهم ده فاعتقد ان الاخوان خير من نادي بالنقد الذاتي واكيد هيتفهموا

أحمد عبد الفتاح يقول...

عن غير معروف
لو فكرنا في كل خطوة هنعملها ايه رد سريا عليها يبقي نروح نموت احسن لاننا لو تظاهرنا هيقول عينا همج ولو قعدنا في بيوتنا هيقول خايفين ومهزموين
من الاخر شوف فين الصح واعلمه
وسيبك من سرايا واحمد موسي

أحمد عبد الفتاح يقول...

محمود سعيد
ابن اخ العزيز والي كنت مفتقد تعليقاته وزياراته من زمان
لغتك اتغيرت في التعليقات
بس عالعموم
بعض الحقائق
7000 ج دول ياجروا قاعه افراح في مركز شباب مش دورين بالاكل والمطاعم في سيتي استارز
2- افطار الاخوان لا يدعي له 100 واحد لا ده بيدعي له المئات والدليل انه السنة الي فاتت اتعمل في دورين كاملين غير قاعات اضافية للانتظار
اما بقه موضوع الكرم فعمر الكرم مكان بالغالي
الكرم ممكن يبقي بابتسامة حلوه بس
بص يا محمود
اناالي بقوله انه احترام لوضع البلد دلوقت واحتراما لملايين الناس الي مش لاقيه تاكل واحتراما لمبدأنا لازم نعمل كده
فهمني بالله عليك
ايه لزمة انهم ياكلوا كل ده
وهل هما هيموتوا من الجوع ؟
وهل اهداف الحفل لا تححق الا بالفخامة ده ؟
طب خد المثال ده
اتعمل الحفلة الي فاتت هدايا تذكارية بمناسبة موئيةالبنا اتوزعت في الحفل عبارة عن ميدالية بلور محفور عليها صورة البنا اتكلفت الواحده 150 جنية
وده من الشركة الي عملت الهدايا ده
فهمني ايه لزمتها ؟
محمود
ارجع واقولك
اسلوبك في الحوار اتغير
خلي بالك

أحمد عبد الفتاح يقول...

البتول
والاخوان مسولين عن شعب برده
88 نائب دول نواب الشعب
فلوس الاخوان في الاول والاخر فلوسشعب
وبرده في الاول والاخر الاخوان هما ايه غير جزء من الشعب ظ
اما بقه بخصوص البيت شايفاني يعني مقطع السفر عشان تهدديني ؟

أحمد عبد الفتاح يقول...

استاذ ايه اس دي الي هو مش اشرف درويش يعني
ده رايي وعمر ما شغلي هيغير قناعاتي
طبعا انت فهمتني

أحمد عبد الفتاح يقول...

مها
وحشتني زياراتك وتعليقاتك
بصي يا استاذه بشاعه ايه الي بتتكلمي عنها ؟
انا بقول يا جماعه في عالم اولي بالفلوس
ومدا تانتي جبتي سيرة افطار الصحفيين ده افطار اول عن اخر اتكلف الفين جنية ومكاسبه كانت رائعه
وانا بقول ناخد المكاسب بس نققل المصاريف لصالخح الشعب لمطحون ده
يا جماعه الصحفيين والساسة لو بجد وطنينن هيهتموا بالافطار لو خرج بالفكرة الي بقولها ده اكتر من الافطار الغالي ابو فلوس كتير
يارب يكون كلامي وصل
اما بقه عن موضوع القرصة فاحب اعرفك ولا خلية نحل تعرف تهز شعرة فيا

غير معرف يقول...

مفيش حد بيطلع السلم مرة واحدة وأنت عايز تبقى بطل بسرعة وتتلذذ بنقدك على الفاضى والمليان اشغل دماغك بماينفعك ياريت تلاقى نفسك بدل التسلق

غير معرف يقول...

الأستاذ أحمد أنت ليه بتتكلم بالأسلوب ده أنت نسيت ياعم أحمد وقناعات ايه اللى بتتكلم عليها وبعدين مين اللى قال لحضرتك افطار الاعلاميين اتكلف كام مش صحيح خالص ...
وبعدين الإخوان يصرفوا أو مايصرفوش فلوس الإخوان أنت عارف منين ومن جيوب مين فاللى بيعطينا يمنعنا وبعدين مش لازم ياأحمد المرشد يقول لسيادتك التكلفة كام واللى الهدف اللى ورا الحفل المفروض أنت عارف فيه مستويات للكلام وبعدين مش المبالغ اللى بتتكلم عليها خالص

وبعدين لما تيجى ياأستاذ أحمد تتكلم على ناس ليهم فضل عليك يبقى الكلام أحسن من كده وفيه نوع من الاحترام مش الكلام اللى يتكتبه ...

وبعدين فين ياعم أحمد مواضعيك حولين فلوس الإخوان اللى نهبتها الحكومة واتكلم عليها الدنيا كلها فين ممتلكات الإخوان قبل الثورة واتخدت من الإخوان فين كلامك عن أداء نواب الإخوان والتكتيم عليهم وأنت كنت واحد من أعضاء لجنة إعلام أحدهم .

فين قلمك الحلو ولا قلمك حامى على الناس اللى بيحبوك وكانوا واقفين جنبك وأعتقد ليهم فضل ومعزة عندك

وبعدين عايز أعرف المفروض الإخوان يوقفوا جنب الشعب بفلوس الإفطارإزاى ؟!
ياراجل عيب عليك علمته وعلى رأى المثل علمته الرماية فلما اشتد ساعده رمانى ....

صاحب البوابــة يقول...

كلامك اكثر من رائع يا أحمد

انا معك في كل حرف

-----------

وكل عام وانت بخير يا عزيزي

صاحب البوابــة يقول...

للمرة الأولى أجد نفسي غير قادر على تخيل مدى منطق البعض

!!!!

دائماً كنت ألتمس العذر لمحاوري

لكن هذه المرة

بالفعل لم استطع تخيل منطق الجانب الآخر

عفواً يا أحمد

دعني أنا أرد على تلك السفسطة

اولاً : ردي على الاخ محمود سعيد

أنه إختصاراً للأمر

فإن كل قرار يحسب بمحصلة مميزاته ومجموع عيوبه

فإن كان الأمر به من المميزات أكثر من العيوب فيظل إقرار الأمر نافذاً أما إن كانت عيوبه أكثر وجب التراجع عنه ,

إذن يا عزيزي أرجوك ان توضح لي ما هي مميزات ذلك الحفل الذي يتكلف مئات الآلاف في وقت يكاد يكون معظم الشعب فيه غير قادر على تناول وجبة واحدة ؟؟؟

أليس ذلك من الاسراف الشديد ؟؟؟

أليس ذلك ضد مبدأ التكافل ؟؟؟

----------

ثانيا: الاخ غير معرف

أعتقد أن أحمد المفروض ألا يرد عليك أبداً

اسلوبك غريب للغاية

وإشاراتك وتلميحاتك لأحمد سوقية جداً

اعيد عليك طرح نفس السؤال السابق

أرجوك ان توضح لي ما هي مميزات ذلك الحفل الذي يتكلف مئات الآلاف في وقت يكاد يكون معظم أفراد الشعب فيه غير قادر على تناول وجبة واحدة ؟؟؟

انتظر إجاباتك

غير معرف يقول...

صاحب البوابة كنت عايز أعرف سنك وتاريخك السياسى علشان أعرف أنت مين علشان تتكلم على الإخوان ...وتفتكر سيادتك أنا مطلوب منى أقول لحضرتك أهداف الإخوان من الإفطار ...

الإخوان عارفين يخدموا الشعب الفقير إزاى والشعارات اللى حضرتك تنادى بيهاشعارات جوفاء فينك أيام الزلزال ومين اللى وقف مع الشعب علشان كده الشعب عارف مين اللى واقف معاه ومواقف الإخوان من زمان من قبل ماحضرتك تيجى تنور الدنيا معروفة ...بس ياريت تقولى حضرتك عملت ايه للشعب المطحون والغلبان ووقفت جنبه ازاى وبعدين وتاريخك النضالى ايه ...

ياريت يعمنا تشغل بالك حاجات حلوة بدل الدفاع عن أحمد وأنت قاعد قوم اعمل حاجه وقول أنا هو عملت حاجه للشعب المطحون .
وأظنك عارف ميين اللى بيدفع الفاتورة الوقت من السجن والاعتقال ونهب الاموال وخلافه ..
شكرا قوى على سعة صدرك وأتمنى أن أقرأ لك كتابات مفيدة لقضايا الأمة بدلاً من الكلام مع أناس أقل مايمكن وصفهم أن لهم تاريخ يشرفهم .

Unknown يقول...

أحمد بيه أنتظر رؤيتك فى أقرب وقت لو وقت سيادتك يسمح ...من زمان لم أراك وحسيت بعد قرأتى لهذذذاالموضع بتقصيرى نحوك ...فأرجو أن تسامحنى وتدعو لى ومنتظرك فى أقرب وقت قبل رمضان....أشرف

غير معرف يقول...

الأستاذ .. أحمد ...تحياتي لك ولمدونتك الراقية .... بالنسبة لموضوع إفطار الإخوان أري أنه ضروره ...خصوصاً أنه جسر للتواصل مع التيارات الأخري في المجتمع وليثبت للنظام المصري الذي يستأسد عليهم أن الضربات التي لا تكسر الظهر ...تقويه .... أما بالنسبة لسيتي ستارز ... فأختياره يتم لأنه المكان الوحيد الذي فيه إدره قويه يصعب التأثير عليها من قبل الأمن .... أتفق معك ..في الإسراف الغير مبرر للهديه كان في غير محله .... بالنسبه لمحمود سعيد لم يعجبني رده والألفاظ التي أستخدمها ... والعدد كان العام الماضي 1000 مدعوا .... مع تحياتي

غير معرف يقول...

محمود ابن اخ هذا ليس عهدي بك وردك لم ين ابدا بهذه الطريقة انا اري انك كاحمدابن لي وهذا يعطينيهذ الحق ان الخاف لايفسد للود قضيه اما الاخغير معرف هنقول ايه ربنا يهدي( ردا علي مقولة لهم فضل عليك الفضل لله يا استاذ )ثم ان اسلوب احمد لم يتجاور الادب والاحترام وحكم من شئت اما الاخ صاحب قلب كبير لماذا تمن علي صاحب البوابه يكفي الاخوان شرف وجودك انت بينهم وربنا يسهل للجميع

أحمد عبد الفتاح يقول...

زوراي الاعزاء
اولا انا اسف عن عدم ظهوري في الحوار بالامس لانشغالي بقضية فلوس الاخوان الي اتاخدت والي البعض اتكلم عنها
وشاكر جدا لتعليقاتكم الي اثرت الحوار للغاية

أحمد عبد الفتاح يقول...

الاخ غير معرف
يكفيني رد الزوار عليك
لكن احب اوضح
لم ولن انكر يوما فضل الاخوان علي وما قلته من باب الاعتارف بالفضل
ده لو ضرتك فاهم يعني ايه فضل اصلا

أحمد عبد الفتاح يقول...

صاحب البوابة الي زعلان منه عشان مبيسالش
صباحك شاي بالنعناع
سعيد بردك جدا ويكفيني شرف زيارتك لمدونتي
ومدام سالت السوال محمود سعيد فهسيبه هو الي يرد

أحمد عبد الفتاح يقول...

الاخ الذي يدعي انه قلب كبير
المايدات هنا مرفوضة
انت متعرفش مين هو صاحب البوابة مين هو وبيعمل ايه للبلد ده
عشان كده برجع واقول عمر ما الاخوان زايدوا علي حد في الوطنية والانتماء
ده لو حضرتك فاهم حاجه اصلا عنهم

أحمد عبد الفتاح يقول...

أ\ اشرف
واضح ان رقمي ضاع منك
عالموم انا هتصل بحضرتك
بس جديدة المواعيد الي بتتاخد عالمدونات ده

أحمد عبد الفتاح يقول...

الاخ والاستاذ هيثم ابو خليل وابو احلي مدونة في بر مكتوب كله
زيارتك شرف ليا ولمدونتي وسعيد بها جدا
انا لم انكر ضرورة اقامة الافطار بس قلت ليه البذخ ؟
انااتكلمت عن الهدايا ومتكلمتش مثلا عن الاطباق التي رسم عليها شعار الجماعه ولم اتكل عن الصور العملاقة التي طبعت وعلقت بالقاعات ولم نتحدث عن اشياء كثيرة جدا بخصوص ذا الحفل
اما بخصوص العدد فمعلوماتي بتقول 2000 وعلاعموم مش هنفاصل

أحمد عبد الفتاح يقول...

البتول
شكرا عالرد الجميل ده

غير معرف يقول...

اللى اتعود على اللحمة مستحيل ياكل فول تانى
وبعدين لو خبر الفول ده اتسرب محدش هيفطر مع الاخوان فانا بقترح يبدلوا الفول بمؤمن مثلا وهو برضه ارخص من باقى الحاجات

غير معرف يقول...

نظرة محايدة ممن وسط الأحداث
النظرة دى
نحتاجها فى كل كبيرة وصغيرة داخل كل التيارات والقوى السياسية اوالحزبية
وكلالمصالح والقنوات التى تهوى المنظرة والتبذير عالفاضى والمليان


رمضان كريم
وكل سنة وانت طيب وبخير والعائلة الكريمة

غير معرف يقول...

معلش فى التعليق مرة تانية


لكن معناه اية أن صاحب البوست مجبر أنه يطبق على نفسه مبدأ اطعم الفم تستحى العين؟؟؟؟؟؟؟؟؟

طالما بنطالب بشفافية فى كل حاجة وعن كل حاجة
يبقا الأخوان ليسوا استثناء ولا ملايكة بأجنحة نازلة من السما

وبما أنى واحد منهم وأحب لهم الأفضل أو أتمنى الصورة الأمثل لمن أنتمى اليهم
يبقا لازم اشاور بصوباعى واضغط وأدوس أوى على نقطة الألم والفساد اللى موجودة وشايفها

والا بقا لو حد من السادة المجهولين شايف انها مثالية ولا تحتمل النقد اوالاشارة
وانها بتلعب دور كامل الأوصاف ونخبى أعيننا عن نقاط الضعف

يبقا أبشرك ان كل المصلحين فيها

حيتحولوا بقدرة قادر الى حزب وطنى جديد
وعزوشاذلى وصفوت شريف وفاروق حسنى وعادلى جديد

غير معرف يقول...

البتول ..الفضل ليس المن والعطاء بالمال لإنما الفضل كله لله أولاً والفضل إن ربنا أركمنا وعرفنا الصح وكمان الفضل إن ربنا يرزقنا صحبة صالحة تعييننا على الخير وليس غير ذلك

أما غير ذلك فليس لى دخل فى الفهم الخاطء ثم أنى لاأمن على أحد وفعلاً شرفل نا أن ننتمى للإخوان إن كانوا يعتبروننا منهم

ثم هل تووافقين على أسلوب أحمد فى الكلام والموضوع برمته متروك للإخوان وهم حضرتك عارفه مش عيال صغيرة لسه بيشتغلوا فى السياسة وبعدين مش عايزين الحمية تأخذنا لبعيد وننسى الحق فين المفروض أنى دعوتنا ليها حق علينا والمفروض نوضح للدنيا كلها حمالها مش منتظرين أحمد يشكك فىالوقت اللى الدنيا كلها بتضرب فى الإخوان ....أرجو أن أكون قد أوضحجت

غير معرف يقول...

ياعم أحمد والله رقمك عندى ولكن طلبتك ووقتك محيرنى فعايز حضرتك تشوف المناسب ايه وبعدين أخوك الكبير وعايز يدلع عليك شوية...وأن بتعلم من ك كل جديد ..أشرف

غير معرف يقول...

البتول كلامك فيه نعرة قومية وعصبية لما نناقش موضوع يبقى لازم نتحمل كل الآراء وبعدين الكلام اللى بيقوله صاحب المدونة فيه شبهات لمن يقرأ كلامه وبعدين لما يتناقش موضوع زى ده ايه اللى هيهم القارىء من وراه وهيسفتاد ايه ....والشرف الحقيقى مش زى ماقلت فى كلامك أنى أكون مع الإخوان الشرف الحقيقى أن ربنا يدخلنا الجنة الإخوان ليس شارة وىجواز مرور ...ولو تعرفى الإخوان كويس ومن قرب هتعرفى معنى الكلام اللى بتقوليه فين الغيرة على الدعوةوعلى الناس اللى بتتبهدل وبعدين ييجى واحد زى صاحب المدونة لسه ابن امبارح ويتكلم على جماعة زى الإخوان ..هم الإخوان خلصوا من الحكومة وكتابها لما يطلع ليهم واحد زى صاحب هذهالمدونة .

غير معرف يقول...

كما عهدنا كل كلامك فى مدونتك بتحب تثير المشاكل وتدور على الحاجة اللى فيه اختلاف ياريت تجمع الناس فىالوقت ده أحسن من تفرقتهم

فلسطينية الهوى يقول...

اممممممم

دائما وأبدا في أي موضوع يطرح عن الاخوان

لازم تقوم خناقة واتهام بعدم الانتماء

والتفرقة في وقت نحتاج فيه للتجمع

أنا عندي سؤال :

ايه المانع أني أكون متضامنة معاهم وواقفة في صفهم وبتكلم عن الظلم الواقع عليهم

بس في نفس الوقت أقول عالاخطاء

الصحابة في غزوة أحد لما حصل هزيمة وشهداء كتير سقطوا

مرجعوش قالوا مش هنتكلم اصل في مصيبة أليمة دلوقتي

اتعلموا اخطائهم وتداركوها

عشان ينتصروا

لاشك ان الاخوان في ابتلاء كبير حاليا

بس مش شايفه مانع ان الابتلاء يدفعنا للاصلاح والنقد الذاتي


أنا عندي سؤال :

هل الشخص اللي مرتبه على اده وبيقتطع منه نسبة للجماعه

هيكون سعيد وهو شايف البذخ اللي في الافطار

كاسات واطباق واعلام وهدايا كلها تحمل الشعار

وكلها صنعت خصيصا

استفدنا منها ايه لما اتوزعت على علية القوم والمثقفين اللي يقدروا يوصلوا لها؟؟


عموما القضية طويله ولي عودة مرة اخرى للتعليق

غير معرف يقول...
أزال أحد مشرفي المدونة هذا التعليق.
غير معرف يقول...
أزال أحد مشرفي المدونة هذا التعليق.
غير معرف يقول...
أزال أحد مشرفي المدونة هذا التعليق.
غير معرف يقول...

يا عالم يا فقرية اهو الافطار اتلغي بسبب النق بتاعكم
والاخ احمد اللي بيقول عدده كان بيبقي 2000 انت شكلك عمرك ما حضرت الافطار
وعلي العموم انت غلبان قوي واحسن لك
ما تكتبش في الحاجات دي تاني
عشان كبيرة عليك
وصعب انك تفهمها
وابقي خد 2 ساندوتش حبشتكنات
من بتاع الفول اللي جنبكم

شارك مع اصدقائك

Share |