الأحد، 17 يونيو، 2007

يا تاخدوها موتورجل ... يا الحمير هي الحل


عشان محدش يتهمني بالبلبلة بالرغم من اني كبرت عالحاجات ده من زمان .
وهسالكم سوال عايز كل واحد يجاوب عليه عشان تتاكدوا من مدي صحة مصدري الي بنيت عليه الموضوع ده
السوال هو ايهما تصدق اكثر حينما يتحدث عن الاقتصاد المصري رئيس الوزراء أو احد وزرائه أم السفير الامريكي والسفارة الامريكية بالقاهره ؟
والله السوال جامد وينفع يجي لسنة 4 اقتصاد كلية سياسة واقتصاد ... والاجابة طبعا معروفة وهي ان السفير الامريكي هو المتحكم اصلا في اقتصاد مصر هو والبنك الدولي الي هو تبع امريكا برضه .
طيب السفير الامريكي كتر خيره ونجح له ابنه يارب في الثانوية ويخلية يارب يعرف يحل في التفاضل والفيزياء صرح تصريح مهم جدا نشرته المصري اليوم من كام يوم ومحدش خد باله منه وهو باختصار إن الاتجاه لتقليل دعم الطاقة «البترولي» سيكون له تأثير إيجابي علي الاقتصاد المصري، مؤكدا أن الدعم الموجه للمنتجات البترولية يستفيد منه الأغنياء والمستثمرون. التصريح جه جزء من تقرير السفارة عن حالة الاقتصاد المصري وده احد اهم التقارير التي تصدر سنويا عن الاقتصاد المصري وبالمفتشر كده عمره ما خيب . وعلي فكرة كتير من الوزراء المصريين لمحوا للموضوع ده في اكتر من مناسبة بس محدش كان بيدق علي تخاريفهم .
وممكن تطالع الخبر من هنا
طيب ده الخبر ... ايه بقه المستفاد منه ؟
معناه ان الحكومة هنرفع الدعم عن المنتجات البترولية وده معناه ان المنتجات البترولية هيبقي سعرها في مصر ذيه ذي سعرها في بلد تاني وعلي فكره السعر العالمي هو ا يورو للتر البنزين يعني 7.5 جنية واشرب يا معلم .
ولو حسبناها بطريقة اسهل التجربة بتقول ان البنزين لما غلي 10% ذادت المواصلات بنسبة من 20% الي 25 % قول يا سيدي 10% وخليها علينا .
طيب لما يذيد البنزين 700% هتذيد المواصلات قد ايه؟ عالاقل طبعا 700% هي كمان يعني الميكروباص ابو 50 قرش هيبقي بـ 3.5 جنية . ولا عزاء للفقراء .
طب سيبك من عامة الشعب الغلابة الي ملوا البلد وخلينا في ولاد الناس - مبحبش اللفظ ده بس ما علينا - الي بيركبوا عربيات الي يا عيني الواحد بدل ما كان بيملا صفيحة ب 50 جنية هتبقي الصفيحة بـ 350 جنية بس يابلاش .
من الاخر كده محدش هيركب عربيات طب الحل فين يا ابو حميد ؟
بصفتي عقلية اقتصادية لولبية مهلبية لقيت الحل والي هينقسم لقسمن القسم الاول للعالم الرياضينن ذيي وهو المشي وده سهل خالص مش محتاج شرح .
الجزء التاني وهو الاهم العودة للدواب يعني الحمير والحصنة والجمال وده موضوع سهل برده وموفر جدا لان ربطة البرسيم عاملة 50 قرش بس وتخلي الحمار يمشي مسافة بيعملها 3 لتر بنزين .
ومننساش برده ان الدواب هتنفع جميع الفئات
يعني الحمير للعالم الغلابة بتوع 128 فيم مضي والفيات ومشتقاتها
والي كانوا بيركبوا فئة الكوري والياباني والمستورد ممكن يستخدموا الحصنة وكل واحد علي قد فلوسه اما بقه بتوع المرسيدس والبي ام فعليهم وعلي الجمال والكارتات والهودج بقه وصباح الفخامة .

حمار في الباركينج " الصورة في القاهرة بعد كام عام كده
"
وساعتها مش هنحتاج لا رخص ولا نتعلم السواقة ولا قرف من ده كمان انا بدعوا الحكومة تدعم الموضوع بزراعة مساحات خضراء تاكل فيها البهايم وتحش بدل دعم البنزين والقرف ده ونعمل محطات تمويل برسيم عالطريق وعربخنات عشان الحمير تريح .
ياااااااااه هتبقي الدنيا حلوه قوي ويمكن الموضوع يطور وكل واحد فينا يجيب سيف ويلبس جليبة ويمشي في الشارع يقول ثكلتك امك يا ابن ابي قحافة اصبائت عن دين ابائنا والات والمعزة لاجعلنك عبرة لبني قهوة البورصة وسوق الحميدية

هناك 11 تعليقًا:

zenzana يقول...

لا يا خويا انا بصدق كلام السفير هههههههههههههه الاسرائيلي اكتر لانه متابعنا كويس

طب وركاب التوك توك زيي يعملوا ايه؟ اذا كان ركاب الفيات هيستعملوا الحمير

بتفكرني بمجموعة من اصدقاء اوروبيين مندهشين لحد دلوقتي انى مستعملتش جمل وفي بداية معرفتي كانوا مصرين ان اكيد في بيتنا محتفظة بجمل اضطريت اقنعهم اني عندي جملين منهم واحد تحت السرير بخرج به بالليل لما احب ازوغ من بيتنا في وقت متأخر
وان الجمل التاني راكناه في الجراج احتياطي لو الاول عطل اقصد مرض

مسـتنـية الفـرج يقول...

مبلاش حكاية الحمار هو الحل
في الايام دى بالذات

أحمد عبد الفتاح يقول...

زنزانة
طب انتي مشكلتك سهله ما بالك انا كان ليا صديقة من امريكا قعدت اول ما عرفتها سالتها تعرفي ايه عن مصر قالت لي صحراء وحصنة وشوية جمال
فانا قلت لها اه انا قاعد فوق الجمل بالاب توب وداخل نت وير ليس

أحمد عبد الفتاح يقول...

الاخت الي مستنية
الي علي راسه بطحة هو حر يحسس عليها ذي ما هو عايز
صدقيني احنا داخلين علي زمن الحمار فيه هو الحل

مقاومة يقول...

عم الحااااج ... ايه يابني الكلام اللي انت بتقوله دة ، الاتوبيس هايبقى بـ 3.5 جنيه ، يعني ايه ، انا بركب ابو نص جنيه و كمل مشي ، لما تغلى المواصلات هاعمل ايه .. بالفعل العجلة هي الحل ، بلاش الحمار شكله مش عاطفي خاااالص ، و الجمل غالي و بعدين معندوش تفاهم بيفرم اللي بيضايقه علشان قوة احتماله كبيييييييرة جدا بس لا اعتقد انها اكبر من قوة احتمال الشعب المصري

البتول يقول...

ونسيت تقول نعمل جمعية حقوق الحميرلا ياعم انا ركب بقرة علشاناللبن بالمرةفعلا المار شكله مش عاطفي

البتول يقول...

انت عايز الدنيا تولع واسعار الدواب ترتفع واللحمه الجملي كمان عايز تثير بلبلة في البلد

fnan_geology يقول...

انت بتقول فيها


مهو لما هيبقى فى هودج وكده وسيوف
ودلوقتى فى جنيهات الى هيه فضه ونص جنيه فضه

يعنى
هتبقى بدل الفلوس ورق هيبقى عملات معدنيه
ونشيلهم فى سره

ونتعامل بسره الدننانير
وتبقى ليله

الرجوع للطبيعه اجمل شىء

وسلااااااااام

علاء يقول...

و الله انتا دمك شربات
انا فطسان على نفسي من الضحك
اسلوبك جامد جدا

و الله هم يبكي و هم يفطس م الضحك
انا برده باقترح البدء في تربية الجمل ابو سنامين لان ده بيبقى تلاتة راكب

و في برده الفيلة
حاجة فخمة جدا بس طبعا مكلفة
:)

اه يا دماغى يقول...

كدت حنعمل بمبرز لكل الحمير
وطبعا مقاسا كل حمار غير الجمل ولا الحصان
ودا عشان نظافة الشوارع
ودكتور فى كل باركنج عشان الحمار لو تعب
لو الحمير اجتمعت ونهأت مع بعض وعملوا دوشة حنعمل ايه
لكن لما بتركن العربية يا عينى بتفضل ساكته

شروق الشمس يقول...

السلام عليكم ورحمة الله وبركاته..

أنا من رأيي البسكلتة أفضل وفي نفس الوقت رياضة..

مش بعيد يغلوها.. كل واحد يلحق له واحدة قبل ما يغلوها..

ده لو قلبوها حمير الشوارع هتبقى مستنقع أكتر من كدة؟؟..
ربنا يرحمنا في الأيام الجميييييييلة دي

شارك مع اصدقائك

Share |