الجمعة، 23 يناير، 2009

الي هينزل معرض الكتاب ذنبه علي جنبه


الشرطة السرية في كل مكان في المعرض - سرية سرية يعني -

سيارات الامن المركزي تحاصر المسجد

مبدأيا البوست ده لكل النشطاء وبتوع المظاهرات والعالم المشوبه الي أمن الدولة بيدور عليهم
باختصار يا شباب محدش يفكر فيكم أنه يهوب من ناحية معرض الكتاب لانه ببساطة اشك أنه يرجع
النهرده كنت بمعرض الكتاب الي ظهر ليا وللوهلة الاولي أنه تحول الي ميدان التحرير قبل 5 دقائق من مظاهرة مليونية أعلنت عنها كل القوي الوطنية الموجودة علي كوكب الارض
المعرض كله عبارة عن أمن
عالبوابة التفتيش ذاتي ولو معاك ورق في شنطتك العسكري هيقراه ورقة ورقة علي أقل من مهلة حتي لو الورق مكتوب بالصيني
لو معاك كاميرا هيسالك انت جايبها ليه ولازم تديله سبب مقنع جدا لا يقل عن انك مثلا داخل تاخد صورة تزكارية مع السيد الرئيس مثلا
بعد الباب هتلاحظ ان فيه 394750347807 يافطة كلهم بيقولوا ان بريطانيا هي ضيف الشرف وده المعلومة المعروفة جدا اما المعلومة الجديدة فهي أن المعرض يوم الجمعة بيفتح الساعة 2 تفتكر ليه ؟
طبعا السبب معروف لكن ولان رئيسي في الشغل قال ليا مش هنزل الخبر الا لما يبقي فيه في اوله" صرح مصدر أمني " فانا روحت سالت ضابط أمور برتبة عقيد هو ليه المعرض يوم الجمعة هيفتح الساعه 2 ؟
قام وطي علي ودني وقال لي عشان المظاهراااااااااااااااااااااات ( بنفس طريقة الدكتور في فيلم عبود علي الحدود وهو بيقول عبوووووووووود ) وكمل وقال عشان العيال بتوع مظاهرات غزة ميعمولش مظاهرات بعد الصلاة .
بالانتقال من موضوع يوم الجمعة ده وباتجاهنا ناحية المسجد نلاحظ ظاهرة غريبة
المنطقة المحيطة بالمسجد شبه مغلقة ورتب كتير تبدا من اللواء اسماعيل الشاعر- مدير أمن القاهرة - ولا تنتهي تقريبا تجلس بجوار المسجد وايشي أمن دولة وأمن مركزي وأمن عام وأمن صناعي وكل أنواع الامن الي معروفة في التاريخ وده بيوفر ميزة مهمة جدا وهي أنك لو كنت مرة فكرت تمشي من جنب مظاهرة فاكيد حد من الضباط ده شافك في يوم من الايام وأكيد برضه هيفتكرك .
جنب الضباط والمسجد هتلاحظ وجود 7 عربيات أمن مركزي ومدرعتين محاصرين المسجد ومع اوقات الصلاة بتنشر حولين المسجد - الي المصلين بيخافوا يقربوا منه - فرق مكافحة شغب وفرق كاراتية وامن في لباس مدني شايلين عصيان موشو .
باختصار شديد معرض الكتاب أصبح نموذج كبير حبتين لميادين مصر قبل المظاهرات وانا قلت بس احذر عشان محدش يرجع يقول محدش قالي ، وخلوا بالكم من نفسكم .

أهم حاجة أن الامن مستتب في المعرض
كل أنواع الامن في المعرض ... حتي الامن البريطاني

هناك 3 تعليقات:

MoAaz SheHaB يقول...

يعم وليه السحله دي ..انا بنزل المعادي الكتب خان اشتري اللى انا عايزة ..واللى مش بلاقيه بقوله يجيبهولى ..معرض الكتاب ده الله يرحمه من زمان ..انا فاكر كنا بنروح عشان نجيب القلم الرصاص الطويل اوي ده والقلم الرصاص اللى بيتنى وكل انواع الاقلام الرصاص اللى شاحه فى السوق ..وبما انى بطلت استخدم رصاص ومسكت قلم سنون فمش هنزل معرض الكتاب ..وشخرم

Shimaa Esmail يقول...

السيد الأستاذ/ أحمد عبد الفتاح
صاحب مدونة / يالالاللي
اعتذر عن الخروج من موضوع التدوينة لقد أرسلت لك الجزء الثالث من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

ألِف يقول...

لا لا..الصورة الأخيرة دي جامدة جدا..أرجوك انشرها بحجم أكبر و ميز أعلى في مكان آخر.

بوليس إنجليزي ماسك كلاب ملونة بعجل! و سيدة منقبة ذراعها باين!

لولا أن في الخلفية تلفون ميناتل ما كنتش صدقت أن الصورة دي في مصر!!

شارك مع اصدقائك

Share |