الخميس، 17 يناير، 2008

أنبوبة دليفري




اطلب رقم الهاتف الذي اعطاه لي صديق مقرب بعد ان بحثت عنه لاكثر من ثلاثة ايام فاسمع كول تون طويل وبعد ان سمعت الكول تون لمرتين رد اخيرا الطرف الاخر
انا : السلام عليكم المعلم نتعي معايا ؟
المعلم نتعي : ايوه يا باشا انا المعلم نتعي ايوتها خدمة
انا : ايوه يا معلم كنا عايزين انبوبة في الحتة الفلانية وبسرعه وحياة والدك
المعلم نتعي : من عنيا تؤمر يا باشا بس اديني العنوان بالضبط
أنا : العنوان كذا كذا كذا
المعلم نتعي : خلاص يا باشا بكره الصبح الساعه 9 بالظبط هرن عليك اعرف اني تحت العمارة ومعايا الانبوبة عالمكنة – الي هي الموتوسكل يعني –
انا : مينفعش قبل بكره الصبح يا معلم ده احنا بقالنا 3 ايام من غير انبوبة واحنا طمعانين في كرمك
المعلم نتعي : والله ما ينفع يا باشا كل الانابينب النهرده خارجة ومفيش ولا انبوبة ربنا يسهل بكره وصدقني بكره ده بس عشان وش حضرتك السمح يا دكتور – مدام قال يا دكتور يبقي عرف اني طالب –
انا : خلاص يا معلم هستناك بكره
الحوار السابق لم يكن حوار بيني وبين دليفري مومن او بيتزا هت وانما كان حوار بيني وبين المعلم نتعي وهو احد اهم الشخصيات في اسيوط الي انا قاعد فيها حاليا والسبب ببساطة اننا في الشتاء .
تفاصيل الامر ترجع الي ابعد من المكالمة ده بحبة بالتحديد بدات من 3 ايام لما خلصت انبوبة السكن الي انا فيه ولكم ان تتخيلوا 6 طلبة في الامتحانات مفيش حد فيهم فاضي يدخل الحمام حتي ، انبوبتهم خلصت وفين ؟ في اسيوط .
وللي ميعرفش اسيوط احد اهم المدن في مصر التي تعاني من ازمة الانابيب ومن الطبيعي جدا ان تري في الساعه 8 صباحا افاوج من البشر بعضهم بسيارات والبعض بموتوسكلات – الي هو المكن – والبعض بعجل والبعض بحمير والبعض بيجري والقاسم المشترك بينهم انهم كلهم يحملون انابيب ويجرون خلف عربية الانابيب ولكي تلحق بهذا افوج فعليك ايها المواطن ان ترابط امام مخزن الانابيب من الساعه 7 ونص الصبح عالاقل .
طب السوال مين مننا ممكن يعمل كده ؟ وعلي فكرة نسيت اقول لكم ان غالبا المحاولة ده بتنتهي بالفشل من اغلب الناس المشاركين في الفوج . طب ده احنا استغنينا عن العيش وبقينا ناكل كل يوم اندومي عشان منقفش في الطوابير ولو هفنا الشوق عالعيش يبقي عيش سياحي الرغيف يتراوح ثمنه من 10 قروش الي 25 قرش لكن الانبوبة نستغني عنها بايه ؟ أكيد انتم مش متصورين لسه الازمة لكن هديكم مثل بسيط سيبكم من الاكل هناكل كشري فطار وغداء وعشاء او مش هناكل اصلا بس هنشرب شاي اذاي ؟ تخيل 6 طلاب قاعدين من غير كوباية شاي واحده في ايام الامتحانات في الشتاء ده – علي فكرة درجة الحرارة الصغري بقالها 3 ايام في اسيوط 1 تحت الصفر وده بجد – متيقلي كده مدي الازمة وضح لكتير من الناس .
المهم بعد تدوير كتيييييييييييير والبحث في مختلف الحلول دلنا احد الاصدقاء علي المعلم نتعي حلال العقد وحصلت المكالمة الي فاتت بيني وبينه .
المعلم نتعي بيبع الانبوبة ب 15 جنية بالرغم من الدولة بجلالة قدرها عامله الانبوبة ب 3 جنية مدعمة يعني هو كسبان 12 جنية في الانبوبة مش مهم كتير بالنسبة لينا المهم تيجي الانبوبة .
لكن المهم ليا الناس الغلابة تجيب انبوبة اذاي ؟ ده السوال الي محيرني من كام يوم ومش لاقي ليه حل بجد ، يعني الدولة ذلة اهلنا بالدعم عالبترول ، طب فين الدعم ده لما الانبوبة ب 15 جنية ؟ ياريت حد يجاوبني عالسوال ده اما لو فيه حد هامه لسه يعرف حصل لينا ايه فالحمد لله المعلم نتعي ادانا بمبة كبيرة ومجاش بس ربنا يسر ببائع انابيب ضال الظاهر كان تايه في المنطقة اصطاده رجالتنا وجابوا منه انبوبة بعد فصال مرير ب 10 جنية بس مش لاقين مفتاح ولا جلدة نركبها بيها .... ادعو لنا .
واسمع احلي سلام مربع للبيه نظيف والبيه سامح فهمي ولنادي بترول اسيوط الي خرج الاهلي من الكاس وعايز افكر سامح بيه ان الناس الانبوبة عندها اهم من الكاس . يارب يكون فهم ده ان كان حد اصلا في الحكومة النظيفة ده بيفهم .

هناك 9 تعليقات:

مهندس مصري يقول...

أنا كنت طالب في أسيوط من 10 سنين فاتت
فكرتني بالذي مضى
:)
ربنا يكون في عونكم

محمود سعيد يقول...

ياه 15 جنيه

انا بصراحة مقابلتش المشكلة ديه متهيألى غير مرة واحدة
وانت عارف مبنغيرش الانبوبة غير مرة كل شهرين ولا حاجة

بس فاكر الأمم اللى بتتلم على عربية الانابيب لما يشموا خبر انها وصلت فى أى حتة :-)

البتول يقول...

ده كلام يا احمد كنت خد الغلاية بالكهرباء الي عندنا الاكل بطل اكل كشري فطار غدا عشاء انزل كل واجبه دافيه في اي مطعم

البتول يقول...

المطبخ منظره الارضية بتاعته قذره جدا صب عليها مية نار من البنزينه اييه العيشه دي انت من اختار ان يقيم في اسيوط تحمل

أحمد عبد الفتاح يقول...

يشمهندس
كلنا لها
واسيوط ده قدر ولازم نشوفه

أحمد عبد الفتاح يقول...

بن الاخ الجميل بن سعيد
كده البوست قلب حيث ذكريات
اسيوط ضلمة من غيرك يا نجم

أحمد عبد الفتاح يقول...

البتول
يارب ارحمني
ارضيه ايه الي بتبصي عليها ؟
ده المطبخ انتي فاكراه الصالون ؟
نصيحة لكل مدون اوعي تدي امك لينك مدونتك

فلسطينية الهوى يقول...

والله احنا مرينا بنفس الموقف


بس قعدنا اسبوع وشوية من غير انبوبة


بس دفعنا 10 بس مش 15

ربنا يعينكم عالبرد

وكويس ان السخان مش بالغاز هو كمان ده لو هو موجود اصلا

عاشقة القمر يقول...

لا اله الا الله ده انتوا حالتكوا صعبة يا عيني .. الانبوبة دليفري دي حاجة كويسه اوي .. بس فعلا اماتبقى الانبوبة ب 15 جنية الناس الغلابة تتصرف ازاي ..
وعلى فكرة يا احمد طنط عندها حق في موضوع الارضية :]

شارك مع اصدقائك

Share |