السبت، 31 مايو، 2008

وزير الداخلية يصدر قرار بالافراج عن عمال غزل المحلة



كتب احمد عبد الفتاح - لاخوان اون لاين -

أصدر منذ قليل وزير الداخلية قرار بالافراج عن عمال غزل المحلة المعتقلين بسجن برج العرب علي زمة أحداث السادس من ابريل الماضي ، حيث شمل القرار والذي حوي علي 11 اسما من المعتقلين علي زمة احداث المحلة الاخيرة علي 3 من عمال مصنع غزل المحلة وهم كريم البحيري – مراسل موقع أخوان اون لاين – وكمال الفيومي وطارق أمين .

جدير بالذكر ان العمال الثلاثة كانوا يعانون من تدهور في حالتهم الصحية بعد اضرابهم أكثر من مرة عن الطعام احتجاجا علي اعتقالهم دون محاكمة حيث تم اعتقالهم لاكثر من 50 يوما بناء علي قرار اعتقال اداري صادر من وزير الداخلية بصفتهم معتقلين سياسيين .

الجمعة، 30 مايو، 2008

Happy Birthday Che

موقع جديد للاحتفال بعيد ميلاد جيفار الثمانين أضغط علي الصورة للذهاب الي الموقع
كنت مرة قريت في الدستور في مقدمة ملف كانت عاملاه صفحة ضربة شمس في ذكري عيد ميلاد جيفارا ان العظماء غالبا ما يحتفل بيهم في ذكري وفاتهم أما جيفارا فالكل بيحتفل بيه في ذكري ميلاده والسبب بسيط ان جيفارا لسه مماتش .
كل سنة وانت طيب يا تشي

اللحظات لاخيرة قبل اعتقال كريم البحيري


قلت في بوست قبل كده اني كنت مع كريم البحيري قبل اعتقاله واني تقريبا اخر حد شافه قبل ما يختفي تماما ووعدت كل قراء المدونة اني احكي القصة ده
المفروض اني كنت ناوي احكي القصة ده من يوم 9 ابريل وهو اليوم الي اتاكدت فيه أن كريم اعتقل بس للاسف كنت كل شوية ااجال الكتابة لسبب عبيط ومش عارف ايه الي مخليني دلوقت والساعه 4 الفجر اقوم واكتب البوست ده لكن المهم اني عايز دلوقت ودلوقت بالذات احكي ليكم القصة ده
القصة بدأت أول ابريل وقتها انتشرت الدعوة لاضراب 6 ابريل بطريقة واسعه وكنت من المتحمسين ليها جدا وكان كل النشطاء وقتها ليهم سوال واحد بس هنقضي 6 ابريل أذاي ؟
انا قررت اجاواب عن السوال ده بدري واحسم الامر وبالفعل قررت اني أكون جوه الحدث ومع الناس الي دعت للاضراب مع ووسط عمال المحلة ، وكان السبب وراء قراري ده اسباب كثيركان اهمها ان طبيعة عملي كصحفي كانت تحتم عليا اني ابقي موجود جوه حدث كبير ذي ده وكمان كنت خايف اني لو كنت في اي مكان يوم لاضراب اصاب بالاحباط لاني كنت شبه متاكد ان محدش هيضرب الا عمال المحلة فقررت اني اهرب من الاحباط الي لمحلة
اجريت شوية اتصالات كان الغرض منها اتواصل مع حد جوه المحلة وكانت كل الاتصالات تصب في نهاية واحده كانت هذه النهاية هي كريم البحيري
في شغلي قالوا ليا لو هتروحح المحلة خليك مع كريم واصدقائي المدونين والصحفيين نصحوني نفس النصيحة والكل كان بيقول كريم هو راجلنا في المحلة ولكن المفاجاة الي كانت جميلة جدا ان كريم طلع زميلي في الشغل
كثير جدا من الي يعرفوا كريم البحيري ميعرفوش انه كان بيشتغل مراسل صحفي لموقع أخوان اون لاين نفس الموقع الي انا بشتغل فيه ، بالطبع كنت بسمع عن كريم في الشغل وكنت بقرا ليه مواضيع بس عمري ما قابلته
المهم اتصلت بكريم وعرفته بنفسي بس كان كلامنا في التليفونات مقتضب جدا - كريم كان بيخاف جدا من كلام التليفونات - واتفقنا اننا نتقابل اول ما اوصل المحلة وكانت الخطة اني هوصل المحلة فجر 6 ابريل لكن بعض الاصدقاء نبهوني يوم 5 ابريل ان الطرق للمحلة طبيعي جدا هتبقي مقفلوة يوم 6 ابريل وعشان كده اخدت القرار اني هسافر المحلة يوم 5 ابريل مساءا وهتصرف وابات في اي حتة
بالفعل وصلت المحلة يوم 5 ابريل الساعه 11 بليل وكان فيه ساعتها جريمة قتل علي مدخل المحلة واتصلت بكريم وبلغته اني موجود في المحلة الخبر فزعه قالي انت معادك بكره فقلت له انا في المحلة ، مفيش ثلث ساعه وكان كريم قدامي ، مكنتش اول مرة اشوف كريم كنت شوفته قبل كده في نقابة الصحفيين في موتمر القاهره بس مكناش نعرف بعض وهو برضه كان عارفني شكلا وبعد ما اتعرفنا بسرعه في الشارع وقلت له اسمي قالي انت شغال في أخوان اون لاين قلت له اه وكانت مفاجاة ليه زمايل في شغل واحد ولسه عارف دلوقت وقلت له ما انت مبتتكلمش في التليفون اعمل لك ايه .
اول حاجه سالت عليها كريم الحالة الامنية قالي ان الامن مختفي وكانت حاجة غريبة لانه فعلا مكنش فيه امن في المحلة ساعتها ولا عسكري مرور حتي بس جاله تليفون واحنا واقفين بيقول له الامن بيمر علي بيوت بعض القيادات العمالية خليك بره البيت بس كان واضح ان الكبسات ده كانت فشنك وروتنية ومكنتش بالشراسة المتوقعه ومفيش دقائق كانت عربية ملاكي صغيرة وقفت لنا فيها 3 من قيادات العمالية في غزل المحلة ركبنا معاهم مسافة صغيرة جدا .
كلام كريم كله كان حولين انه هيعتقل بكره وكان متاكد جدا من الموضوع ده يعني مثلا وقفت العربية بينا عشان يشتروا سجاير فكريم ادي للي رايح يشتري سجاير 10 جنية وقال له هات لي علبه فيسروي فقال له ما اجيب اتنين وكده كده هتتشرب قال له كريم كلها الصبح وهتاخد فملهاش لزمة وجوه السجن السجاير كتير. ولو قريتم اخر كام بوست ليه هتحسوا نفس الكلام
كريم اقترح عليا اني مباتش في بنسيون كما كنت مخطط وقال لي كل الي في البنسونيات هيتلموا - وده حصل كل الصحفيين الي كانوا في النسونيات اتلموا - المهم قلت له نبات فين ؟
فكرنا كتير ، كل ما نقعد علي قهوة متراقبة وما شاء الله كريم متصيت هناك تمام مفيش مخبر مش عارفه كل ما نقعد علي قهوة نلاقي مخبر بيسلم وبرزت ساعتها مشكلة تانية اننا لازم نكتب تقرير يتنشر الصبح علي موقع أخوان اون لاين كان معايا لاب توب بس كونك تطلع لاب توب الساعه 1 بليل علي قهوة بتقدم كوباية الشاي بنص جنية معنها انك هتتاخد هتتاخد فمكنش قدامنا غير حل واحد نقضي الليلة في سيبر .
كانت فكرة عبقرية وهي اننا نقضي الليلة في انترنت كافية هنقدر نشتغل ونتكلم في التليفونات ونعمل الي احنا عايزينه كريم كان يعرف صاحب سيبر بيفتح 24 ساعه اتوجهنا ليه وقفلنا علي نفسنا السيبر انا وكريم وصاحب السيبر وخدنا السيبر لحسابنا للصبح كل واحد فينا كان قاعد علي جهاز وسايبين الكاميرات والموبيلات والاب توب يشحنوا عشان مكناش نعرف الظروف الصبح هتبقي ايه .
كريم كان مشغول جداكانت بتجيله كل شوية مكالمة اما من احد من قيادات عمال المحلة او من قناة فضائية او مراسل جريدة او صحفي او اعلامي وافتكر انه دخل في مداخله علي الهواء مع قناه عراقية مش فاكر اسمها .
واحنا قاعدين عالنت لقينا الرفيق والصديق العزيز جدا حسام الحملاوي اون لاين فبدأنا نكلمه وياخد مننا الاخبار وحسام كان ضمن مجموعه كبيرة جدا من المدونين الي كانوا متابعين الاضراب في المحلة لحظة بلحظة بس حسام لانه في امريكا والاتصالات الدولي وكده فكان الامر ليه صعب حبتين بس ده ممنعوش من المتابعة .
كريم نزل بوست علي مدونته الي اسمها عمال مصر وانا نزلت بوست وكام موضوع علي موقع ابناء مصر وكان موعد صلاة الفجر قرب ، خرجنا من السيبر وصلينا الفجر في مسجد كبير جنب السيبر وبعد كده طلعنا علي اكبر محل فول في المحلة اسمه الجحش تقريبا وجبنا سندوتشات وعدينا علي بتاع الجرايد الي قال لنا مفيش جرايد وصلت المحلة من امبارح وخصوصا الدستور والمصري والبديل .
واحنا راجعين للسيبر لاحظنا وجود كام عربية امن مركزي وكان شئ مش ملفت قوي ، رجعنا السيبر كلنا السندوتشات وضبطنا الدنيا وجهزنا نفسنا وكانت التعليمات اننا منتحركش باي شكل من السيبر قبل ثمانية الا ربع يعني منطلعش نتمشي في الشوارع بدري عشان محدش ضامن الظروف .
كريم قرر اننا نوصل للمصنع مشي وانا وافقت طبعا لاني مكنتش شوفت المحلة وفي الطريق وصله تليفون من صحفي سويدي صديق لكريم وقال له انا وصلت المحلة يا كريم وواقف عند باب المصنع فكريم قاله احنا في الطريق لك .
لاحظنا اول ما خرجنا لللشارع ان الشارع مليان عساكر من كل صنف ونوع ومش عارفين دول ظهروا منين في كل خرم عساكروضباط اما ميدان الشون الي هو الميدان الرئيسي للمحلة فكان عبارة عن كتلة من الضباط بالطبع معرفناش نمشي لان اغلب الضباط والعساكر عارفين كريم فقلنا ناخد تاكسي ووقفنا تاكسي كريم قاله باب العمال وانطلق بينا.
وصلنا المصنع ولقينا العمال بيدخلوا المصنع عشان يلحقوا وردية 8 الصبح وللي ميعرفش كريم كان موظف في المصنع عند البوابة منعني الامن من الدخول ودخلوا كريم كريم قالي خليك هنا وانا هضبط الوضع جوه واجي اخدك انت والصحفي الاجنبي وقالي اطلع دور عليه وخليك معاه .
خرجت لقيت واحد اشقر من اول لمحة عرفت انه صاحبي الي بدور عليه عرفته بنفسي ولسه بنتكلم جه الامن حاصرنا كانوا ناس كتير لابسين مدني فكرت بسرعه نتصرف اذاي ؟
انا معيش اي كارنية صحافة ولو قلت له اخوان اون لاين هروح وراء الشمس وجت لي خطة عبقرية ، او انا كنت شايفها ساعتها عبقرية لاني مكنتش لسه اعرف قصة مرعي المترجم والطالب بكلية الطب - عرفت صديقي الاجنبي للضابط بصفته الحقيقية وانه صحفي جاي يتابع الاضراب واني انا المترجم بتاعه وبالفعل بدات اترجم بين اخونا الصحفي الي مبيعرفش عربي والضابط الي مبيعرفش اي حاجه .
سالنا الضابط معاكم تصريح فخرج صديقي جواب من الجرنان الي شغال فيه وكان علي ما افتكر جرنان الوركر بس مش الوركر المعروف وركر تاني .
المهم الضابط بص في الجواب وطبعا مفهمش ولا كلمة لانه كان بالانجليزي فقال لنا لازم تصريح من المصنع قلت له وماله ندخل نجيبه فقال لنا اوك بس لو سمحتم امشوا من قدام باب العمال وروحوا عند باب الادارة والحق يتقال انه عاملنا معامله مش رخمة قوي .
اتصلت بكريم وكانت الصاعقة لقد فشل الاضراب
كريم علي حسب ما قاله في المكالمة انه دخل المصنع لقي الامن المركزي والعساكر أكثر من العمال وانه تم منع جميع القيادات من دخول المصنع وتم حجزهم عند البوابات بواسطة عمال تابعين للامن كانوا عارفين العمال كويس جدا وعارفين مين نشط ومين مش نشط .
وبعد ما تم حجز القيادات وفوجأ العمال بكمية الامن المركزي الي جوه المصنع عرف العمال ان الاضراب فشل ودخل كل واحد علي ماكينته يشتغل .
كريم كان الي حصل معاه غير الي حصل مع القيادات العمالية ويمكن لان كريم موظف مش عامل ن الامن دخله مكتبه وحبسه وقفل عليه من بره ومن الساعه 8 الصبح ولحاد الساعه3 العصر وانا بكلم كريم وهو محبوس جوه مكتبه وبيكلمني واكنه بيتكلم من تحت السرير بصوت واطي جدا اكنه خايف حد يسمعه .
اما انا وصاحبنا السويدي كان لازم نتحرك وكنا محبطين جدا ومش عارفين نعمل ايه ، بدانا نلف في المحلة وناخد صور للامن بس كان الامن بيرخم علينا لحاد لما اتلمينا علي مجموعه من الصحفيين مصريين واجانب كانوا جايين يغطوا وبقينا مجموعه كبيرة اتحركنا كلنا ناحية المصنع تاني .
فوجئنا في المصنع بمقابلة كويسة جدا وان ادارة العلاقات العامة بتقول لنا اتفضوا نعمل لكم جولة في المصنع تشوفوا الشغل ماشي اذاي ، وساعتها بس كان هاين علينا نموت ولا اننا نشوف المنظر ده .
انا رفضت ادخل وبلغت كريم الي محبوس جوه مكتبه بالي بيحصل بره لانه مكنش عنده اي فكرة عن الي بيحصل بره وعرفت ساعتها ان الاسكندرية والعة وفيها مناوشات والاضراب هناك نجح وكان قراري اني اتحرك ناحية الاسكندرية .
بالفعل اتحركت ناحية الاسكندرية وكنت طول الوقت بتصل بكريم كان كتير مبيردش بس هو كريم الطبيعي بتاعه كده وعلي المغرب وانا في الاسكندرية عرفت ان المحلة ولعت وان الضرب اشتغل وقررت اني ارجع المحلة واتصلت بكريم وكانت مكالمة غريبة جدا وكانت اخر مكالمة بيني وبين كريم
أحمد : الو كريم أخبارك ايه
كريم : بخير يا احمد
أحمد : كريم انا عرفت الي بيحصل عندكم انا في الطريق بس مش لاقي مواصلات
كريم : يصرخ في التيليقون لالالالا اوعي تيجي انت مجنون دول بيضربوا كل الصحفيين بالنار كل الصحفيين اضربوا بالنار الا انا اوعي تيجي سلام
وانهي المكالمة
بالتاكيد المكالمة لم تخلوا من شوية تهويل ووللي ميعرفش التهويلالمشهور به كريم لكن بالطبع ولان دماغي جزمة قررت اني اروح المحلة
ومن وقتها وكل ما اتصل بتليفون كريم كان جرس ومحدش بيرد
تاني يوم كنت في المحلة برضه من بدري وكان فيه مصادمات بشعه مع الامن وساعتها كنت بتصل بكريم وكان تليفونه اتقفل وانتشر خبر انه اعتقل لكن في اليوم ده اتصل بيا صدبق قالي كريم كويس هو بس مستخبي واديت الخير في لحظات لنوارة نجم وحسام الحملاوي وكملت اليوم وسط الضرب وقنابل الغاز وانا مطمن علي كريم
يوم 8 ابريل كنت برضه في المحلة وكان تليفون كريم برضه مقفول وجالي تليفون تاني من صديق تاني قالي كريم كويس بس هو بس مستخبي قلت خير مادم هو كويس
وتقريبا نسيت الامر لحاد لما اتاكد الخبر للجميع ان كريم اعتقل يوم 6 ابريل بليل
اليوم فات 53 يوم علي اعتقال كريم البحيري ومعاه العشرات مع معتقلي احداث المحلة
السوال الي احب اساله في الاخر لحاد امتي هنفضل عايشين في الي احنا فيه ده ؟
وامتي بقه هيطلع كريم ؟
وحشتني ياكريم وحشتني جدا ، اي نعم مشفتكش الا كام ساعه من الشاعه 11 بليل يوم 5 ابريل ولحاد الساعه 8 الصبح يوم 6 ابريل بس انا حاسس اني اعرفك قوي ، وحشتني انت وكل الرجالة الي وراء القضبان الي معرفهمش اصلا بس سمعت عنهم وعرفت عنهم انهم ابطال بجد

تضامنا مع معتقلي 6ابريل

ان شاء الله ح يبقى فيه احتفال تضامني مع مساجين المحلة وح يحييه فرقة اسكندريللا يوم السبت الموافق 31 مايو 2008
الاحتفال ح يبقى في المحلة في مقر حزب الوفد عمارات الاوقاف شارع الجيش امام الادارة الصحية الساعة تمانية مساء وح يحضره رموز من قيادات الوفد والدعوة عامة وح تبقى لمة
الاحتفال غير التضامن مع المساجين ح يبقى كمان لمساندة اهالي المساجين وتكريم الضحايا ومساندتهم

حاولوا تحضروا دى أقل حاجة نقدمها للمعتقلين وذويهم
نقلا عن نوارة

الخميس، 29 مايو، 2008

مطلوب توضيح من الشبكة العربية حول موقعها

المسالة غريبة جدا
منذ بضعة ايام اصدرت الشبكة العربية بيانا اعلنت فيه عن نقل موقعها الالكتروني من الرابط http://hrinfo.net/ الي الرابط http://www.anhri.net/ وبالفعل تم ايقاف العمل بالموقع الاول وتوالي النشر علي الرابط الجديد
اليوم كنت بعمل سيرش عن حاجه تابعة لحقوق الانسان لقيت ان اول نتيجة علي محرك جوجل هي لينك الشبكة العربية القديم ولما فتحته فوجئت ان الموقع يعمل بصورة عادية
رجعت وفتحت اللينك الجديد للشبكة لافاجا انه الاخر يعمل ولكن لاحظت ان اللينك القديم لا توجد عليه تحديثات منذ فترة
الامر لا يحتاج لشلوك هولمز ليقول ان الموقع القديم قد تم عليه نوع من انواع عمليات السطو
ولكن السوال للشبكة العربية من الذي ينشر علي الموقع القديم ، ولم حدث كل هذا ؟
نرجوا توضيح لان الشبكة العربية بالنسبة للاعلامين والمدونين ليست مجرد منظمة حقوقية بل هي شئ اكبر من ذلك بكثير موقعها من اهم مواقع حقوق الانسان العربية

الأربعاء، 28 مايو، 2008

دصطور يا بتوع الدستور


اليوم كان موعدنا مع تقرير مطول علي مساحة صفحتين من صفحات جريدة الدستور حول موضوع اثير كثيرا في الايام الماضية حول مستقبل مكتب الارشاد - المكتب الذي يدير كل شؤن جماعة لاخوان المسلمين بمصر - وكان السبق لجريدة المصري اليوم بنشر خبر لم تقم عليه دليل واحد الا ما قالت انه معلومات مصادرها داخل الجماعه حول قرب الانتخابات داخل الجماعه .
تقرير اليوم والذي حمل عنوان ماذا يجري داخل جماعة الاخوان المسلمين والذي حمل اسم الزميل والاخ العزيز عبد المنعم محمود لا يحتاج لقيادي داخل الجماعه او حتي لفرد منتمي للجماعه ليجزم ان التقرير يحمل الكثير من الاخطاء التي يجب الوقوف عليها بل ان اي متابع للجماعه سيقر من الوهلة الاولي ومن مجرد قرائة منشتات التقرير ان التقرير قد اقيم اصلا علي معلومات مغلوطة .
فبالنظر الي عنوانين التقرير نجد انها جائت لتقول :
مصادر تؤكد تعيين أعضاء جدد بمكتب الإرشاد والنائب الأول ينفي
لائحة الجماعة وتاريخ تكوينها
مجلس شوري جديد يقوم الإخوان وتردد من إنتخاب مكتب إرشاد جديد

حقيقة الشوري داخل الإخوان والتخوف من قيادة الإصلاحيين

نص اللائحة الداخلية لجماعة الإخوان المسلمين
وبالوقوف علي ما جاء بالمنشتات نلاحظ ان التقرير نسب الي مصادر نعلم من داخل التقرير انها لم تذكر اسمائها - نفس ما اوردته المصري اليوم عندما اوردت خبر الانتخابات - ان الجماعه مشرفة علي انتخابات مقبلة ولكننا نجد في نفس العنوان والموضوع رد من الدكتور محمد حبيب النائب الاول للمرشد العام يقول فيه انه لا يوجد شئ من هذا ، والسوال لما لم يذكر اي من صحفيي المصري اليوم او الدستور اسماء مصادرهم او حتي كينونتهم داخل الجماعه ؟ وهل من الممكن ان يتم فرد صفحتين كاملتين لمجرد كلام مصادر فضلت عدم ذكر اسمها ؟
صحفيا يجوز للصحفي الحفاظ علي سرية مصادرة ولكن وبعد نفي حبيب هل من الممكن ان يتبقي مجال للخوض في هذا الحديث ؟
واحب هنا ان استعير تعبير استخدمه المهندس يوسف ندا في حواره الذي نشر بالامس مع جريدة المصري اليوم عندما ساله الصحفي عن وسيلة تعداد الاخوان فاجابه انه امر خاص بالاخوان ويجب احترام خصوصية الاخوان واعتقد ان هذا هو نفس الوصف الذي ينطبق علي انتخابات الاخوان فهي شئ خاص بهم ويجب احترام خصوصياتهم وحساسية موقفهم الامنية .
ملاحظة اخري لفتت نظري وانه طوال ستة مواضيع هي مواضيع الملف وردت اكثر من مرة كلمات من قبيل ويري خبراء ومحللون وخبراء في شئون الاخوان كذا وكذا وكذا ولكن التقرير لم يذكر ايضا اسما لمحلل ولا خبير واحد فيما عدا ما اورده في الموضوع الذي حمل عنوان "حقيقة الشوري داخل الإخوان والتخوف من قيادة الإصلاحيين " والذي ورد فيه اثنان ممن وصفهم الموضوع بالخبراء ولكن في باقي المواضيع لم يرد اسم واحد من الخبراء والمحللين وهو ما يضع علامات استفهام حول الغرض من عدم ذكر اسناء هولاء الخبراء والمحللين .
نقطة اخري احتلت العديد من عناوين الملف واعتقد انها النقطة التي لفتت الانظار اكثر في الملف وهي نقطة الائحة الداخلية للاخوان والتي يري قارئ الملف انها النقطة التي قام عليها الملف مع نقطة الانتخابات المرتقبة المزعومة داخل الاخوان ، حيث وصف الملف الائحة الداخلية بالسر وقال عنها بالنص " إلا أن الحصول علي هذه اللائحة ليس أمرا هينا إذ أنها غير متاحة لغالبية أعضاء الجماعة العاملين لأن مجرد طلبها أو السؤال عنها يفتح مجال الشك في " الأخ العامل " وهي رتبة يتم تصعيد الفرد الإخواني إليها بعد فترة طويلة من ارتباطه بالجماعة ومروره باختبارات مختلفة للثقة في انتمائه ومع ذلك في حيال سؤاله عن اللائحة يتم توبيخه والتشكيك في ثقته بإخوانه وقياداته بل يصل الأمر للتشكيك في طلبه لهذه اللائحة لصالح جهات أمنية " وهنا يجدر الاشارة الي عدة نقاط
1- لائحة الاخوان الداخلية هي لائحة علنية منشورة للجميع وعلي ما اتذكر ان دار التوزيع والنشر كانت تبيعها مطبوعه مع الائحة المنشأة للاخوان في كتاب وقت ان كانت الدار مفتوحة قبل القضية العسكرية الاخيرة
2- الائحة منشورة علي العديد من مواقع الانترنت مثل موقع تراث الاخوان
3- اتعجب من وصف كاتب الموضوع للائحة بالسرية ثم قوله انه وجد الائحة علي منتدي تابع للجماعه الا انها كان بها تغيير في العنوان فمن اين تاتي سرية وثيقة منشورة علي شبكة الانترنت ؟!
4- انا شخصيا كنت املك نسخة من هذه الائحة بمنزلي منذ زمن بعيد الا انني ومع تكرار نقل الكتب من المنزل مع كل تخوف من ضربة أمنية وشيكة اضعت الائحة .
اذن فالمحصلة ان الائحة منشورة ومعروفة للجميع واتكر جيدا انني وفرت نسخ منها للعديد من اصدقائي طلاب السياسة والاقتصاد الذين يجرون ابحاث حول الاخوان فمن اين يمكن القول بان الائحة سرية ؟!
اعترف بان الملف يحوي عشرات النقاط التي من الممكن ان نتحدث عنها من اليوم وحتي الاسبوع القادم الا انني اردت في ايجاز ان اوضح ان الملف الذي بني اصلا علي قائمين رئيسيين هما الانتخابات المبكرة بالجماعه وسرية الائحة الداخلية قام علي قائمين غير صحيحين وهو ما جعله ظاهر من الوهلة الاولي ضعيفا يفتقر للكثير من المصداقية
أخيرا لفت نظري تعليق احد قراء الملف من عبر مدونة انا اخوان التي نشرت الملف كاملا حيث جاء بالتعليق الذي حمل توقيع المدون الاخواني الكواكبي

ازيك يا منعمتي
المقال لحد دلوقتي ماشي بشكل لطيف بس حكاية انك تعتمد على رواية ابو العلا بخصوص سيطرة اعضاء النظام الخاص على الأمور في الجماعة هي شهادة مجروحة لعدة أسباب
1. ابو العلا لم يكن عضوا في الجماعة وقتها ولا حتى في السنوات القلائل التالية
2. هذه القصة هي اللبانة التي يلوكها ابو العلا لتبرير انفصاله العدائي عن الجماعة مع ان ابو العلا نفسه كان عضوا في الجماعة الإسلامية في هذا الوقت . . قصدي حاجة قريبة من المثل الشعبي لا تعايرني ولا اعايرك ده الهم طايلني وطايلك
عموماً شد حيلك يا منعم واتمنى اشوف لك حاجات كتير قريباً عن باقي التيارات السياسية في مصر يعني مش هاينفع تقضي حياتك بتكتب عن اللي بتسمعه من الإخوان لأن هايجي وقت هاتفقد مصادرك كصحفي ومش معقول هاتقعد في البيت؛ لازم تنوع مصادرك وخلي الموضع حرفي ومهني يعني اتخصص في الحركات السياسية او الإجتماعية - او في الجماعات الإسلامية انما مش هاينفع اخوان بس يا بن عمي
انا عارف انك هاتزعل بس حلك عندي . . كيسين مولتو على كيفك "

من الواضح انني وبعد هذا المقال ساكون مدوين لعبد المنعم بالكثير من اكياس الملتو ولكن اعذرني يا صديقي فهذه شهادة لا استطيع كتمانها

الثلاثاء، 27 مايو، 2008

وعد فأوفي ... أنه نصر الله كالعادة




يتميز عن كل الحكام العرب بانه اذا وعد أوفي
إنه بالتاكيد الزعيم حسن نصر الله

لم اسمع له اي وعد قاله في اي تصريح له الا ووفي به
قال انه سينتصر علي اسرائيل وانتصر
قال حاجات كتير وعمره ما كذب في واحده فيها
ودائما ما وعد ان القنطار سيعود للبنان
واليوم تحقق الحلم
الاخبار بتقول ان ايهود اولمرت أصدر قرار بالافراج عن القنطار وبعض الاسري اللبنانين من سجون اسرائيل

أعتذر للسيد نصر الله عن تشبيهه بالقادة العرب في بداية البوست فهو يختلف عنهم في اشياء كثير وليس فقط في صدقه
بل اعتقد ان اهم اختلاف ان نصر الله زعيم بحق اما الزعماء العرب فهم زعماء بالطوارئ

صباح الخير من المريخ


أول صورة بثها المسبار الفضائي فينيكس من علي سطح المريخ
صباح الخير يارض من علي كوكب المريخ
بس كان ليا خدمة من فينيكس وهو في المريخ
ممكن يسال لي ايه المطلوب عشان اطلب الهجرة للمريخ ؟
الصورة نقلا عن موقع ناسا

الاثنين، 26 مايو، 2008

فرصة جديدة ولمدة عامين ... شكرا يا مبارك

فرصة جديدة اتاحها النظام المباركي لكل مناضل سياسي بعد مد العمل بقانون الطوارئ لمدة عامين قادمين وحتي عام 2008
ما هو برده مش ممكن يبقي الواحد عمره 29 سنة مثلا وعاش طول عمره في ظل قانون الطواري وميتقبضش عليه ولا مرة بيه
ده حتي تبقي عيبه في حق اي مناضل
عشان كده
وعشان كده وبس
وفشقة بيك يا مرضان
النظام المباركي مد العمل بالطوارئ
ويله بقه ياشباب عايزين نلحق قانون الارهاب
ونشوف الاعتقال بالارهاب احلي ولا بالطوارئ

الأحد، 25 مايو، 2008

وهو كده يبقي القضاء مستقل أذاي ؟


سوال محيرني اليومين دول قوي
وهطير الثمن الي فاضل في نفوخي
والسبب هو متابعتي للي بيحصل في مجلس الدولة بعد وفاة المستشار نوفل
المجلس الخاص بتاع مجلس الدولة قعد وقرر انه يرشح المستشار الحسيني للمنصب
بس الريس معجبوش الكلام وكلف المستشار الملط رئيس الجهاز المركزي للمحاسبات انه يبلغ المجلس عدم رضاء الرئيس
لحاد هنا وعادي ، رئيس بيمارس مريسته وده شئ طبيعي جدا في كل الانظمة الشمولية
لكن الي مش عادي اني اعرف ان الرئيس لازم يصدق علي اسم الرئيس الجديد لمجلس الدولة بعد ما تنتخبة الجمعية العمومية للمجلس
يا حلولو
مجلس الدولة ده حسب معلوماتي المتواضعه محكمة مهمتها الفصل في القضايا الي بين الشعب والحكومة ، يعني يوم ما أحب ارفع قضية ضد الرئيس اطلع علي مجلس الدولة
يقوم الاقي ان رئيس المجلس بيعينة رئيس الجمهورية الي هو رئيس السلطة التنفيذية ؟!!!!
صباح استقلال السلطة القضائية
وياصباح فصل السلطات
ويا صباح النزاهة والشفافية
ويا صباح الي بتغني

الجمعة، 23 مايو، 2008

موقع جديد للشبكة العربية لحقوق الانسان


أضغط علي الصورة للذهاب للموقع الجديد للشبكة العربية لحقوق الانسان

ده نص بيان نشرته الشبكة العربية لحقوق الانسان اليوم وطلبت من كل الاعلاميين انهم ينشروه علي مستوي واسع
وبما ان الشبكة العربية من اهم المنظامات العاملة في مجال حرية الاعلام في مصر والدفاع عن الاعلاميين والمدونين فوجدت من الواجب نشر هذا البيان
ولكن اتمني ان تكشف الشبكة السر وراء ما حدث وان تنشر تفاصيله علي العلن

موقع جديد للشبكة العربية لمعلومات حقوق الإنسان
www.anhri.net بدلا من hrinfo.net

السبت 24 مايو 2008م.

أعلنت الشبكة العربية لمعلومات حقوق الإنسان اليوم أنه ابتداء من اليوم سوف يصبح عنوان موقعها الرسمي الجديد على شبكة الإنترنت هو " www.anhri.net" بدلا من موقعها القديم " www.hrinfo.net " أو www.hrinfo.org ، حيث لم يعد هذا الموقع القديم معبرا عنها ولا تتحمل الشبكة العربية مسئولية محتوياته ، كما تحذر من أن نشر أي مواد أو موضوعات منسوبه للشبكة العربية لمعلومات حقوق الإنسان بشكل يوحي "سواء بالشكل أو المضمون" بأنه مازال موقعها يوقع من يدير الموقع أو ينشر عليه هذه المواد تحت طائلة القانون.

و جاء تغير اسم النطاق الخاص بالشبكة العربية "الدومين" إلى اسم نطاق جديد ليأتي متوافقا مع الأحرف الأولى لاسم الشبكة العربية لمعلومات حقوق الإنسان "www.anhri.net" فضلا عن بعض المشاكل المتعلقة بالهوست "الاستضافة" وكذلك الاسم القديم .

وقال جمال عيد المدير التنفيذي للشبكة العربية لمعلومات حقوق الإنسان " نعلم أن الاعتياد على الاسم الجديد - www.anhri.net - سوف يتطلب بعض الوقت ، خاصة وقد أصبح الموقع مقصدا للآلاف من الزوار يوميا ، سواء الصحفيين أو المهتمين بحقوق الإنسان في العالم العربي عموما ، لكن الحفاظ على الاسم القديم بات صعبا ، وكذلك الخدمة السيئة للهوست والاستضافة ، ولكننا نعد المهتمين بحقوق الإنسان وزوار الموقع بتطوير واسع مع الموقع الجديد ، الذي سوف يستمر بشكله المعتاد حتى ننتهي من تطويره".

والشبكة العربية لمعلومات حقوق الإنسان تتوجه برجاء خاص للزملاء الإعلاميين بأن ينوهوا عن الموقع الجديد في وسائلهم الإعلامية ، تسهيلا لمهمتها في التعريف عن موقعها الجديد ومساعدة في الدور الذي تلعبه الشبكة العربية في مجال حقوق الإنسان عامة ، وفي مجال حرية التعبير على وجه الخصوص.

الموقع الجديد : www.anhri.net
البريد الإليكتروني : info@anhri.net

وتعيشي يا ضحكة مصر



مش عارف التحفة ده كانت فين قبل كده
اول مرة اشوفها
هي كلمات الابنودي

الخميس، 22 مايو، 2008

عز بيغني علينا ... شد الحزام علي وسطك

القصير المكير
عز محتكر الحديد طالع في الوفد يقول لازم المصرين يشدوا الحزام
سوالي لفلتة عصره واوانه
هو لسه فيه شد بعد ده ؟
سوالي التاني
الا قولي يا سي عز انت ايه نظام الشد معاك ؟
يعني شادد ولا مش شادد ؟
علي العموم انا احب اهدي الاغنة ده لبابا وماما ولكل الشادين الحزام واولهم عمو عز

وهكذا يموت العظماء ... أعني النجوم


أنها سنة الحياة
ميلاد فحياة فموت
سنة الله علي جميع خلقه حتي الاجرام السماوية
تخيل نجم يموت
تخيل نجم أكبر من شمسنا ثمانية مرات وهو يحتضر ثم ينفجر ليتحول الي مجرد ثقب أسود يختزل فيه طاقته كلها وكتلته في جزء صغير جدا
تخيل
لو مش قادر تتخيل انا عاذرك
انا قريت عن الموضوع ده لاكثر من 5 سنين عشان اقدر اتخيله
علي العموم الخبر هنا لالتقاط أول صورة لموت نجم فضائي بس الجديد ان الصورة التقطت في اللحظات الاولي للانفجار
شوفتم العظمة ؟


الأربعاء، 21 مايو، 2008

حول دور مصر المحوري القلاوظي اللوبي في المنطقة نتحدث

الي السيد رئيس محمد حسني مبارك راعي مسيرة السلام
والي السيد وزير خارجية مصر
والي كل السادة الي في كل حتة الي قرفونا من يوم ما اتولدنا ولحاد دلوقت بخدعة دور مصر المحوري في المنطقة
أحب اقول لكم من كل قلبي
سلامين وحتة يا بتوع السلام
ولو السادة دول كلهم مش متابعين الاخبار أحب الفت نظر سيادتهم لشوية الاخبار ده
لبنان خلاص حلت ازمتها بوساطة قطرية لا يملك اي احد علي وجة الارض انه يوصفها الا بانها من افضل الوساطات الي اتعملت بين الدول العربية في التاريخ
وسوريا بدات مفاوضات مع اسرائيل بوساطة تركية النهرده
وبالرغم من اعتراضي عالمفاوضات ده بس واخدين بالكم معايا من حتة الوساطة التركية ؟
أمال فين الدور المصري المحوري وخصوصا في ملف السلام مع الكيان الصهيوني ؟
بس برده عشان منظلمش مصر مصر الحمد لله بتحاول انها تحل ازمة غزة عن طريق تبني المفاوضات بين حماس واسرائيل وبصراحة النتيجة متوقعه
عارفين ايه النتيجة ؟
النتيجة هي

وفد حماس في القاهرة يرفض الابتزاز الصهيوني

مصر فشلت وبجدارة في دورها المحوري المرة ده وذي كل مرة

لان الشروط الاسرائلية ببساطة هي

ثلاثة شروط : أن يتم وقف إطلاق النار فقط من الجانب الصهيوني مقابل وقف إطلاق الصواريخ الفلسطينية، وألا يوجد أي حديث عن فتح المعابر وتخفيف الضغط عن الشعب الفلسطيني، رغم أن هذا هو الهدف الرئيسي لحماس وباقي الفصائل، ولم يقدم الصهاينة أي تعهد بأن تكون التهدئة شاملةً ومتزامنةً ومتبادلةً.
نقطة اخيرةا
اي رئيس تحرير أي منشور حكومي من بتوع الاهرام وأخوتها هيجيب سيرة دور مصر المحوري في المنطقة أنا مش عارف ممكن يكون رد فعلي عليه هيبقي ايهبس أكيد مش هيبقي رد فعل ظريف


الثلاثاء، 20 مايو، 2008

بزمتكم ده ورقة أمتحان ؟



حاجه بجد تجيب الضغط

حد يصدق ان قصاصة الورق الي صورتها فوق ده هي ورقة الامتحان بتاع طلبة في كلية محترمة لا وايه سنة رابعة يعني بكارليوس ؟

اتفرجوا وملوا عينكم من الورقة

ده ورقة الامتحان الي هي امتحان التيرم التاني للفرقة الرابعة من كلية ما في جامعة الازهر في مادة القران الكريم

حد بقه يسالني هي ليه مكتوبة بخط الايد هو الكمبيوتر موصلش الجامعه ؟

هرد عليه واقول والله الجامعة جايبة في مكتب كل دكتور كمبيوتر وبرنتر بس تقول ايه بقه

حد تاني يسالني هي ايه السنة الرابعة الي مكتوبة فوق ده ؟

هقول له أكيد كان قصده الفرقة الرابعة بس واضح ان الي كتب الامتحان مكنش فاضي وكان مستعجل حبتين

حد يسال هو فين زمن لامتحان ؟ مش مكتوب عالورقة

هقول له عادي هي جت علي ده انت مش واخد بالك من الشخبطة الي في الورقة واللخبطة ولكلام الي ماشي بمزاجة والجمل الي بادئه من نص السطر ومن اخره وارقام الاسئلة الي مش باينه والسوال رقم 5 الي مكتوب 2

عادي يعني

واحنا اصلا تاعبين اعصابنا ليه

هي جت علي ورقة أمتحان ؟

الجمعة، 16 مايو، 2008

خواطر حول رسالة اينشتين عن الاديان


كنت اود ان أسمي هذه التدوينة " عندما أخطا الاستاذ ولكن بعد ان قرأت الرسالة موضوع التدوينة جيدا قررت ان اغير العنوان الي خواطر حول رسالة اينشتين عن الاديان .

تفاصيل الموضوع تعود الي أمس الخميس وتحديدا في مدينة لندن حيث بيعت رسالة كتبها العالم الفذ أينشتين - وأستاذي الاقرب الي قلبي - بمبلغ تجاوز 340 ألف دولار بعد ان كان متوقع لها ان تباع بمبلغ 128 الف دولار فقط .

رسالة اينشتين كان يتحدث فيها عن رايه في الاديان ووصفها بانها خرافات طفولية وتكلم اينشتين في رسالته حول دينين فقط هما اليهودية والمسيحية .

وقال اينشتين عن اليهودية بالنسبة لي الدين اليهودي شأنه شأن الاديان الاخرى ليس سوى تجسيد لخرافات طفولية جدا، والشعب اليهودي الذي، بسعادة، انتمي اليه، والذي تكونت من خلاله شخصيتي بعمق، لا يختلف بالنسبة لي عن الاديان الاخرى".

وقال آينشتاين: "بالنسبة لتجربتي لا اعتقد ان اليهود احسن حالا من باقي المجتمعات الانسانية، رغم انهم محميون من اسوأ السرطانات بسبب عدم امتلاكهم السلطة والقوة، وانا لا ارى شيئا "مختارا" فيهم".

والي هنا ينتهي الجزء الاول من تدوينتي التي كانت مجرد هدية لبني صهيون في عيد قيام كيانهم المزعوم

نيجي للجزء الثاني وهو عن استاذي اينشتين

ثبت تاريخيا ان اينشتين عاش فترة من حياته وهو ملحد وغير مومن باي من الاديان ثم عاد بعد ذلك ليلتزم الي حد ما بدينه الاصلي وهو اليهودية ولكن ما لفت نظري ان اينشتين لم يرد اي ذكر للدين الاسلامي في رسالته وهذا ما يدل علي جهل اينشتين بالاسلام او ربما جلهه بوجود الاسلام اصلا وهو الشئ الذي اثار تعجبي هل كان اعلم اهل الارض بالطبيعة جاهل بالاسلام ؟

سوال محير وخاصة ان عرفنا ان أحد مساعدي أينشتين هو الدكتور مصطفي مشرفة العالم المصري والمسلم ، هل لم يسمع اينشتين شئ من مشرفه عن الاسلام ؟ ام هل سمع ولكنه تجاهله في رسالته ؟

اي كانت الاجابة فاعتقد ان عدم ورود ذكر الاسلام في رسالة اينشتين هو لغز يحتاج الي تفسير .

السوال التالي لما انكر أينشتين الاديان اصلا ؟

لو عرفنا شخصية اينشتين جيدا لوجدنا انه رجل بسيطا للغاية وكان يبحث عن ابسط الحلول لاكبر المشاكل وحتي اشهر معادلاته التي وضعها لم تتجاوز 3 حروف وهو بالتالي عكس ماكس بلانك واضع نظرية الكم والذي كان يضع حلول معقدة للغاية ولكنها في نفس الوقت عبقرية ولعل هذا السبب الرئيسي وراء شهرة اينشتين مقارنه ببلانك بالرغم من ان اساس نسبية اينشتين يعود لكم بلانك .

ومن هذا المنطلق مثلا وضع اينشتين ما سمي بثابت التمد الكوني لكي يقول في احدي معادلاته ان الكون لا يتمدد مع ان المعادلة اظهرت ان الكون يتمدد ولكن بعد بحث اثبتت الدلائل ان الكون بالفعل يتمدد وهنا تنازل اينشتين عن ثابته وقال لقد كان الثابت من اكبر اخطاء حياتي .

ولعل السبب وراء رؤية اينشتين للاديان هو ذلك السعي الحثيث وراء البساطة التي تاتي احيانا بنتائج سطحية للغاية ولكننا لو تتبعنا تاريخ اينشتين لوجدناه بعد ذلك أنكر ما قاله وأمن بوجود الاله لانه لم يجد تفسير لكل ما يعلم عن الكون بدون وجود الاله ، اي انه وببساطة كان وجود الاله بالنسبة لاينشتين كوجود الثابت الكوني مجرد تبسيط عندما ايقن انه مخل حذفه علي الفور .

---------------------------------------

عارف ان البوست ده ممكن يكون عند البعض مجرد سمك لبن تمر هندي بس هي ده الاحاسيس والمشاعر الي اتولدت جوايا لما قرأت خبر الرسالة التي بيعت في المزاد .

للتعليق اضغط هنا

الخميس، 15 مايو، 2008

سنعود ... خبرتني البندقية



انا مش عامل حداد النهرده


النهرده هو ذكري النكبة
العالم كله منقسم لقسمين
قسم بيحتفل بالذكري الستين لقيام الكيان الصهيوني
وقسم عامل حداد وعمال يندب حظه والخونة والعملاء ........الخ
انا بقه لا مع دول ولا دول
انا شايف ان النهرده مش يوم للحزن علي الي ضاع
النهرده يوم للغضب .. لثورة ...لطلب الثائر
النهرده مش يوم عشان نلبس اسود
النهرده يوم لازم نلبس فيه الاكفان
النهرده لازم نفتكر كل الي حصل من 60 سنة وعلي مدار 60 سنة بس عشان عزيمتنا لاسترداد ثارنا لا تقل
النهرده يوم مناسب جدا عشان نسمع قصيدة أمل دنقل لا تصالح
أخيرا أحب اشكر الجزيرة قوي لانها عامله شغل محصلش والي ممكن اوصفه بانه توثيق حقيقي وقوي جدا للقضية الفلسطينية
و علي رأي بتوع الجزيرة " حقا يابي النسيان "

الأربعاء، 14 مايو، 2008

الفيس بوك موقع للشواذ ... انها الهداية الدينبة علي طريقة " المساء "

يقدمها :
محمد عمر
لم يتوقع أحد أن يتحول موقع "الفيس بوك" الشهير علي شبكة الانترنت والذي أنشئ أساسا لتبادل الأحاديث والآراء والضحك والفجور والتعارف وغير ذلك إلي أزمة تهدد مجتمعاتنا العربية نظراً لما يبثه من أفكار هدامة وعادات دخيلة علي مجتمعنا وديننا.
موقع "الفيس بوك" يدعو للانحراف بين الشباب بصفة عامة وأبنائنا بصفة خاصة فقد قرأنا مؤخرا عن فكرة تمت عن طريق الموقع تدعو لإنشاء رابطة للشواذ في مصر تضم حاليا 600 شاب أطلقوا عليها "الأحباء" ويتخذ أعضاؤها من مقهي بوسط البلد مقرا مؤقتا لرابطتهم التي تجمع "أحباء الشيطان".. وقد قدر رئيس الرابطة ويدعي "سامح" والذي يعمل محاسبا في شركة استثمارية عدد الشواذ في مصر ب 100 ألف شخص من مختلف الأعمار والفئات المهنية مؤكداً أنهم سيضغطون علي الدولة حتي تعترف بهم ويمارسوا اللواط بحرية.
الموقع المشهور يضم 42 مليون شخص علي مستوي العالم وتبني فكرته علي إقامة عالم خيالي يعبر فيه الشباب عن كل مايجول بخاطرهم في شتي مناحي الحياة من معلومات وأخبار وكذب وعنصرية وجنس وأمور شخصية وغير ذلك من الأمور التي تتنافي مع قيمنا ومبادئنا مما دفع بعض الدول العربية منها سوريا إلي حجب الموقع لتسببه في العديد من المشكلات الأسرية والاجتماعية ودعوته للإضرابات والمظاهرات والشذوذ عن طريق العلاقات المثلية للرجال والنساء وكل ما يخطر علي البال.
"الهداية الدينية" تدق ناقوس الخطر وتحذر من انتشار هذه المواقع الهدامة وتأثيرها علي المجتمع وناقشت تأثير هذا الموقع علي شبابنا وكيف نتصدي له ونحمي أبناءنا من الثقافة الوافدة التي تدمر حياتهم.
تقول د .أمنة نصير الأستاذ بجامعة الأزهر: نحن أمة نعرف كيف نستهلك وكيف نفرح بكل جديد ونمارسه دون ضوابط أخلاقية ودون تهيئة نفسية واجتماعية من قبل الأسرة.. بل كثير من الأسر لاتهئ ولا تربي أولادها علي الضوابط الأخلاقية لاستخدام مثل هذه الأجهزة لأسباب أولا: نحن لم نصنع هذه الأجهزة وبالتالي أتت علينا جاهزة ومفاجئة ولذلك تواري التهيئة الاجتماعية والانسانية للتعامل الاخلاقي مع استخدام هذه الأجهزة في كل ماهو نافع وصنعت من أجله.
ثانيا: إن أجهزتنا التربوية لم تضع في حسابها ولا في مناهجها كيف تربي الأطفال من المرحلة الابتدائية علي الضوابط الاخلاقية وقيمة هذه المنافذ الرائعة علي الوجه المعرفي.. كما أننا للأسف.
لم نرب أولادنا التربية السليمة في البيت ولا في المدرسة.
ثالثا: الإعلام بصوره المختلفة لم يضع في حسبانه هذه المسئولية كدروس وتوجيهات وأدوات معرفة حتي نهيئ هذا الجيل لضوابط استخدام هذه الأجهزة مزاياها وعيوبها.. ومن هنا لا نستغرب أن نري هذا الهوس الشبابي حول "الفيس بوك" أو "الشاتنج" وخلافه ونحن يوميا في شأن جديد.
هذه رسالة أذكر بها والكلام علي لسان د. آمنة هذه الأجهزة المعنية بتشكيل وتكوين جيل يعرف حسن التعامل مع هذه الأجهزة المصرفية.. فهي بحق أجهزة رائعة ومن نعم العلم في هذه المرحلة ولكننا أسأنا التطبيق وهذا هو بيت القصيد.
أكدت د. آمنة أن موقع "الفيس بوك" يكشف عن عنصرية في مواجهة الآخر والدليل أن القضايا اليهودية والاستنصارية تلقي اقبالا شديدا مثل تجميع أكبر عدد ممكن لإجبار إدارة "الفيس بوك" علي إلغاء مجموعة مناهضة للإسلام أو مجموعات الدفاع عن الرسول صلي الله عليه وسلم أو الدين الاسلامي في مواجهة الهجوم عليه وهو الأمر الدي يكشف عن هذه العنصرية.
حب استطلاع
تقول د. سامية خضر أستاذ علم الاجتماع بجامعة عين شمس للأسف نحن في مصر ننتظر حتي تتفاقم الأمور..فهذا الموقع قديم جداً وشباب هذه الأيام يدخلون عليه كحب استطلاع ونتغاضي أو نتجنب بمعني أصح هذه الأمور ونتناسي أن أبناءنا سوف يكونون أجيال المستقبل وأنهم أول من سيدفع ثمن هذه الجرائم.
أشارت إلي أن هذا الموقع ينقل عادات دخيلة علي مجتمعنا.. وينقل رسائل غريبة علي عقولنا فكل المنتمين لاتجاه معين يتقوقعون علي ذاتهم متحصنين بوجهة نظرهم في مواجهة الآخر الذي يفعل الشئ ذاته مما قد يؤدي إلي تجسيد حالة من عدم تقبل الآخر والانحراف بحالات الاختلاف التي لا يمكن محوها إلي مواجهات وصراعات تنافس صراعات الواقع.. يبدو ذلك جليا في صراعات الأديان والفرق الرياضية والاتجاهات الفكرية.
قالت سامية للأسف لم يعد هناك عالم مؤثر في البلد مثل زمان يستمع إليه الناس ويعملون بكلامه ونصائحه وهذا أخطر شئ يمكن أن يؤثر علينا نحن المسلمين خاصة أجيال الشباب القادمة.
تطالب بتكوين جبهة من العلماء والشباب لتوضيح الأفكار الدخيلة علي مجتمعنا والتصدي لخطورتها وتتساءل أين دور هيئة الاستعلامات من هذه المواقع ولماذا لم تخرج برامج تحذر من خطورتها وأين دور الاسرة والاعلام والمدارس من هذه الظواهر الغريبة علي مجتمعنا وبالتالي فإنني أري أن ما يحدث مسئولية مشتركة يجب ان يتكاتف الجميع للحد من خطورتها علي أبنائنا.
جرائم الإنترنت
تقول د. فوزية عبدالستار أستاذ القانون الجنائي بجامعة القاهرة إن جميع المواقع علي الإنترنت عبارة عن شبكات دولية عابرة للقارات والسيطرة عليها تكاد تكون مستحيلة ولا أتصور أن هناك امكانية لمقاومة هذه المواقع إلا إذا كانت هناك جريمة تقع من خلالها ففي هذه الحالة تعتبر جريمة من جرائم الانترنت.
أضافت أن هذه الجرائم لا تكفي لمواجهتها نصوص قانون العقوبات المصري فهذه النصوص قد تواجه بعض هذه الجرائم لكنها تعجز عن مقاومتها كلها ومن هنا تبرز أهمية وضع تشريع خاص بجرائم الانترنت يتفق من حيث مضمونه والاجراءات التي ينص عليها مع طبيعة هذه الجرائم ومدي انتشارها وهذا قانون لابد من وضعه في مصر خاصة أن هناك دولا أجنبية وضعت تشريعات خاصة بهذه الجرائم.
أما بالنسبة لجرائم الشواد تؤكد د. فوزية أن هذا القانون إذا تم إصداره والعمل به سوف يحاكم هؤلاء الشباب لأن الاسلام يرفض ويحرم مثل هذه الأعمال المشينة التي لايرضي عنها الدين ولا الأخلاق الاسلامية التي تدعو للعفة والطهارة وينبذ الاعمال غير الاخلاقية التي تدعو للممارسات الفاضحة والانفلات في الآداب العامة وتقدم دعوة للفجور والدليل جلوس هؤلاء الشباب علي مقهي وسط البلد كمكان للتجمع لعرض أفكارهم الساقطة والأدهي والأمر أنهم يطالبون بانشاء رابطة لهم ويسعون للضغط علي الدولة للاعتراف بحقهم في ممارسة اللواط بل وبتشكيل حزب لهم وهذه الأفكار الدنيئة خرجت عن طريق موقع "الفيس بوك".. أشارت إلي أن هذه الأفكار ولدت في الغرب وكلنا نسمع عن مظاهرات الشواذ في أمريكا وبعض الدول الأوروبية ورغم أن هذا قد يكون مقبولا عندهم إلا أنه مرفوض عندنا لاننا كمسلمين لنا عاداتنا وتقاليدنا وقيمنا الدينية الراسخة بداخلنا.

الثلاثاء، 13 مايو، 2008

أضحك مع أمن الدولة والطيارة الي بدون طيار

دكتور الفرماوي استاذ علوم التفسير بجامعة الازهر اتهمته اجهزة امن الدولة بتصنيع طيارة بدون طيار بالتعاون مع حماس
أمنعوا الضحك ... هي التهمة كده
ده غير تهمة التجسس لصالح منظمة اجنبية الي هي برده حماس
ما قلنا امنعوا الضحك
لو طالبه معاكم ضحك اسيبكم مع رسوم الكاركتير ده من ابداع فنان موقع أخوان اون لاينعصام الشرقاوي



وكم من مصر من مضحكات .... ولكن ضحك كالبكا

الاثنين، 12 مايو، 2008

أشمعني البحيري مخرجش ؟!


جبهة الدفاع عن متظاهري مصر اعلنت اليوم ان تم الافارج عن كل الناس المعتقلين علي خلفية أحداث المحلة ما عدا كريم البحيري ووكمال الفيومى ، وطارق أمين.
السوال
اشمعني كريم البحيري لم يتم الافراج عنه ؟
كريم علي فكرة وصله من كام يوم في سجنة في برج العرب جواب فصله من شغله بمصنع غزل المحلة
انا اقول لكم اشمعني كريم
لان كريم بصراحة كان هو صوت المحلة الي بجد
كان الوحيد الي بينقل الي بيحصل بالمدينة ده
كان شوكة في ظهر نظام ظالم
كريم كان بيدون وبينقل اخبار المحلة لكل مصر لا لكل العالم كمان
كان من الاخر مجرسهم
وطبعا بسبب كل ده لازم يفضل معتقل
انا معرفش الفيومي وطارق امين المعتقلين معاه وعشان كده مش عارف اتكلم عنهم
بس اعرف كريم كويس
في البوست الجاي كتب لكم قصة أخر 12 ساعه قضاهم كريم حر
لان الي ميرفهوش كتير من الناس اني كنت معاه من يوم 5 ابريل مسءا ولحاد يوم 6 ابريل الصبح ولغاية قبل ما يعتقل بحوالي 3 ساعات
وحشتني يا كريم
ووحشت كل المدونين

الأحد، 11 مايو، 2008

يا جماعه محدش معاه مكتب محافظ زيادة ؟

يا عيني ... والله صعب عليا
الدكتور القويضي محافظ حلوان الجديد بقاله كام يوم عمال يلف مش لاقي ليه مقر محافظة بقعد فيه
يعني محافظ من غير مكتب
او بالاصح محافظ من غير محافظة
يعني محافظ من منازلهم
والي زاد وغطي ان جامعه حلوان رفضت استضافة سي المحافظ الجديد
رغم انه كان ناوي يدفع ايجار محترم للمكتب الي هياخده
والله بلد حالها يهلك من الضحك
محافظ بدون محافظة
ومحافظة هي اصلا مش محافظة لان كل حاجه فيها لسه تابعه للقاهرة
ولسه لغاية دلوقت كل العربيات الي في شارعنا ملاكي القاهرة مش حلوان
بالله عليكم الي فاهم حاجه يبقي يفهمني لاحسن انا الظاهر بقه فهمي تقيل قوي اليومين دول
بس لغاية لما عم القويضي يلاقي مقر انا بقترح عليه انه يروح يقعد عالدكة قدام كشك ابو رجيلة بتاع المكرونة وعلي الاقل يبقي في نص ميدان المحطة الميدان الرئيسي في حوان والي هو غالبا عاصمة العاصمة
وانا متاكد ان المعلم ابو رجيلة راجل مجدي وهيطلع اجدع من جامعه حلوان وهيديه الدكة ببلاش ومش بعيد ينزل له كل يوم طلبين مكرونة ورد زيادة ببلاش
او لو مش عاجبه الاقتراح ده فانا بقترح ان يروح بكرامته ياجر له شقة ايجار جديد في حلوان تعمل لها 500 جنية في الشهر يعملها مكتب للمحافظ
والله تبقي جامدة موت
شقة دور رابع في عمارة في شارع رايل عليها يافطة كبيرة مكتوب عليها ديوان عام محافظة حلوان
وعاشت حلوان حرة مستقلة

السبت، 10 مايو، 2008

عاجل أمن الدولة يطارد أكرم الإيراني الآن ويحطف والده

ده نص ميل وصل دلوقت من الششتاوي

في اتصال هاتفي مع اكرم الإيراني أفاد بأن مباحث امن الدولة تطارده الآن وتريد القبض عليه ، وقامت بإختطاف والده والإعتداء عليه واحتجاز امه واخوته والضغط عليه من اجل تسليم نفسه وهو الآن في الشارع هو وزوجته ، وامن الدولة ينتظره امام بيته وبيت والده
الساعة الآن 11 ونص مساء السبت

مفااااااااااجاة ... شركة غاز صهيونية أربحاها تتضاعف 128 مرة بسبب الغاز المصري

النهرده كنت بقلب عالنت
وفجاة وقعت في موقع شركة غاز اسرائلية اسمها امبال
الفضول دفعني اني ادور أكثر ولما دورت لقيت بلاوي
بصوا يا جماعه
الشركة ده حسب كلامها عالموقع هي أحد الشركات المالكة لخط الغاز المصري الاسرائيلي
وقالت الشركة ان ارباحها عن الربع الاول من العام - الي هو من يناير لمارس 2008 - وصلت ل 128.8 مليون دولار
في الوقت نفسه كانت ارباحهم في نفس الفترة من السنة الي فاتت 1.1 مليون دولار
يعني الارباح تضاعفت 128 مرة
المدير التنفيذي عالموقع بيقول ان السبب وراء ارتفاع الارباح هو بدء ضخ الغاز في الخط الجديد وقال ان الخط هينقل 7 بليون متر مكعب من الغاز المصري لاسرائيل في السنة
من ساعة ما قرأت الكلام وانا مصعوق بس المصيبة جاية وراء
انا لقيت ان امبال ده فرع لشركة أكبر اسمها ميرهاف وده شركة ملتي ناشيونال ليها فرع رئيسي في اسرائيل
انا لسه عايم في موقع شركة ميرهاف وبدور علي معلومات جواه
ده لينك موقع أمبال وده البيان الي قالت فيه عن ارباحها
اسيبكم تندهشوا حبة لغاية لما اخلص تدوير واتحفكم بمفاجاة جديدة

وحشاني يا غزة


نفسي تتوق للقاء ولكن ............
أحساس بشع ان يبقي المعبر مفتوح وانا قاعد في القاهرة
سلامي اليكي يا غزة
سلامي اليكي يا أرض الاحبة

أسرتي الفلسطينية

الجمعة، 9 مايو، 2008

جمعية ضحايا الفيس بوك

أحمد ماهر
شاب معرفهوش ولا عمري شوفته
بس الي اعرفه انه من نشطاء جروب 6 ابريل ومن أحد موسسيه
أحمد اتخطف واضرب وكان كل هدف الي خطفوه باس ورد اكونت الفيس بوك
هاه يا شباب ؟ هنعمل ايه ؟
حده عنده اقتراحات ؟
انا بقول اننا ممكن نعل جمعية اسمها جمعية ضحايا الفيس بوك

واه نقدر نعدد علي حالنا وعلي الي وصلنا له مع بعض
بدل ما كل واحد فينا قاعد يعدد علي مدونته وعلي اكونته عالفيس بوك
حمد لله عالسلامه يا أحمد ويارب يكون الي حصل لك ده سبب ان الناس تتحرك
رغم اني اشك ان بقه فيه حاجه ممكن تحرك جبل التلج الي احنا عايشين فيه ده ( واخده بالك يا نوارة مقلتش كورة ثلج اهه)

الأربعاء، 7 مايو، 2008

الثلاثاء، 6 مايو، 2008

ده الحل الي عندي الي عنده حل تاني يتفضل


بصوا بقه
انا خلاص تعبت أمبارح طول الليل مجاليش نوم
حاسس بكوكتيل مهانة وقرف ونفسي غامة عليا
حاسس ان بطرد من البلد ده بقلة أدب
أحاسيس بشعه كانت في راسي طول الليل ومش عارف اعمل ايه
بس انا بقه شايف اننا لازم نعمل حاجه ولازم نتحرك
ايه نوع التحرك ؟
لازم يبقي تحرك عفوي قوي ولازم الناس تشارك
الناس لو لقت دلوقت كلب بيتظاهر هتشاركه لانها هي كمان خلاص علي اخرها
انا لغاية دلوقت مش عارف ابلور الي في دماغي في صورة تحرك علي الارض
بس انا في دماغي حاجات ومش هستريح الا لما اعملها
الواضح اني بقيت بخترف عالمدونة
بس ده متوقع في ظل الظروف الي احنا فيها
وعلي راي عمنا الشيخ امام
كلمتين يا مصر يمكن هما أخر كلمتين .... حد ضامن يمشي أمن أو مامن يمشي فين ؟

حد فاهم ايه الي بيحصل الليلة في مصر ؟

انا مش قادر افهم
البلد بتغلي
الناس ماشية تسب للريس في الشارع وبتشتمه شتائم قبيحة
البلد زحمة جدا الليلة
ومفيش محطة بنزين شغالة كله قافل بعد القرار الجديد
والي فاتح منها زحمة جدااااا و بيتخانق فيه الناس مع صاحب البنزينة والعمال فيها
المترو زحمة بطريقة بشعه وشنيعة الساعه 1 بليل
مفيش عربية رايحة اي حتة
كل المواصلات تقريبا مفيش
موقف عبد المنعم رياض فيه بتاع 20 عربية
ورغم كده الشارع زحمة
سواق وصف ليا اليوم النهرده انه اليوم الاسواء في حياته وفي حياة اي سائق لانه ببساطة غلي اهم حاجتين عند السواق
السجاير والبنزين وكله هيطلع عالزبون اوب 30%
حد فاهم ايه الي بيحصل ؟
هي البلد ده رايحة فين ؟
النهرده لاول مرة يتسرب ليا احساس ان افضل حل انهم يعتقلوني لاني بجد تعبت
وبجد اعصابي مبقتش مستحملة
الي عنده حل تاني يتفضل بيه

الأحد، 4 مايو، 2008

اخبار الاضراب عالسريع


1- المحلة مدينة اشباح ومفيش حد فيها والامن محاصرها واعتقل من امبارح أكثر من 200 واحد وقطع وصلات الدش ومنع طقم الجزيرة من الوصول ليها .
2- مظاهرات في مناطق متفرقة في القاهرة علي راسها نقابة المحامين .
3- في اسيوط حيث انا موجود نظم طلاب حركة كفاية وقفة ومعرض للصور داخل الجامعة .
باقي الاخبار ممكن تتابوعها علي ابناء مصر وأخوان اون لاين ومن علي الاكونت بتاعي من التويتر


صورة من وقفة طلاب حركة كفاية باسيوط لاقي الصور اضغط هنا

في عيد ميلادك أحب ادعيلك وأقول



يارب يا تاخده يا تهديه
*الصورة الاولي من تصويري

السبت، 3 مايو، 2008

رجعوا التلامذة يا عم حمزة للجد تاني


يا مصر انتي الي باقية وانتي .......
أنتي ....
أنتي ....
أنتي حاجه حلوة قوي
بجد حلوة قوي

اعتقالات 4 مايو شغاله علي ودنه

أخبار الاعتقالات من كل مكان
مركز هشام مبارك كاتب عي موقعه ان نشط من حلوان اتحبس 4 ايام بتهمة تعليق ملصقات للدعوة ل4 مايو
النشط هو أسلام عبد الفتاح 17 سنة
فيه معتقل تاني في دمنهور هو علاء فخرى الخيام اخصائى بصريات بتهمة توزيع منشور للدعوة للاضراب
وفيه اعتقالات عشوائية في مدينة المحلة
ولاخبر الجديد من عند نورة يونس ان فيه اعتقالات دلوقت في الاردن

النظم العربية المهلبية مفزوعة لان الناس بكرة هتقعد في بيتها
امال لو قلنا مظاهرة هيعملوا ايه ؟


تابعوا اخبار المعتقلين اول باول علي موقع هشام مبارك هنا

عاجل : الاهرام يمارس مضايقات ضد الدستور ويرفض طباعة عدد الغد حتي الان

تحديث
العدد يوزع بالفعل الان
كفارة
محدش بقه يشتري العدد :)
-------------------------------------------
تحديث

العدد دخل المطبعة بالفعل
والجريدة استلمت الاعداد الخاصة يها
بس حتي الان لم يري عند بياع جرائد واحد وفيه قلق تجاه التوزيع
هنتابعكم بالجديد
--------------------------------------------
اتصل بي صحفي من الدستور الان
الاهرام بتمارس مضايقات من كام يوم ضد الدستور
بس النهرده الموضوع وسع
والاهرام رافضة تطبع الدستور لحاد دلوقت
معني كده ان مفيش عدد بكرة
عدد بكرة عدد خاص عشان 4 مايو
وفيه الجزء التاني من مقال اسراء عبد الفتاح
لو فيه جديد هبلغكم

أعلان الاضراب من ابداع طلاب الاخوان



المصري اليوم تكتب عن مدوني الاخوان من جديد

من جديد المصري اليوم يكتب عن مدوني الاخوان
مش لاقي تعليق اقوله غير ربنا يهدي
بس الغريب ان الصحفي الالمعي يسيب المادة الي كانت معاه كويسة نوعا ما ويبدأ بتعليق من علي مدونتي
يعني ساب مواضيع كاملة المفروض انها بتتكلم في موضوعه ويبتدي بتعليق علي مدونتي من مدون صديق
مش غريبة حبة الموضوع ده ؟
بالرغم من ان مدونتي مثلا من اقل المدونات الي ممكن تلاقي عليها تعليقات بسبب عيب فني في تصميم المدونة
بس تقول ايه بقه ... الظاهر هو بيتفائل يبتدي بيالالاللي ، ما هي احد اسباب ان المصري اليوم لسه مطردوش
لاحظ معايا ان الصحفي ده لا يكتب الا كل شهر موضوع عن مدوني الاخوان
ثم بقه بالنظر لموضوع المقال نفسه وتوقيت نشره قبل الاضراب بساعات لازم ينقل ليك قناعه ان الموضوع فيه ان
ده فيه اخوات ان كلها كمان

المراجعة النهائية قبل 4 مايو


بكره 4 مايو
يعني بكره العيد
بكره مش عيد واحد بكره اكثر من عيد
بكره مثلا عيد ميلاد ريسنا المجدع عمو حسني مبارك الي هيتم 80 سنة والاهي يارب ما يتم 80 ويوم
بكره برده عيد ميلاد البشمهندس خيرت الشاطر - مش عارف هو ملقاش يوم غيره يعني ؟ - ربنا يارب يديله الصحة ويخرجه بالسلامة
بكره برضه عيد ميلاد واحد صاحبي اسمه احمد الزمر ابوه معتقل لانه من قيادات الاخوان ورغم انه خد افراج من المحكمة من يومين الا انه لغاية دلوقت مش عارف ابوه فين اصلا
وبكره علي المستوي الشخصي هو يوم عيد منيل بستين نيلة مش هقدر اقول عليه هنا
انه 4 مايو ... اليوم المشهود
ويالالاللي تسعدهاان تقدم لكم مراجعة ليلة الامتحان ... اقصد الاضراب عشان تعرف تقطع هدم مصر علي راي جريدة الاهرام العرة - مش الغراء يا نوارة -
نبتدي من مطالبنا في الاضراب وبالرغم من ان العنوان ده بالنسبة ليا غريب لاني شايف ان كل حاجه في البلد غلط وان الحل الوحيد ان البلد ده تتفور ويجي نظام جديد وتحصل حاجات كتير وان المسكنات مبقتش تنفع الا انني التزاما بالصف قررت اوافق علي مطالب الرفاق والتي تتمثل في الحاجات الموجودة في البنر ده


ده بالنسبة للمطالب نيجي للي بعده المشاركة
المشاركة اسهل ما يمكن كل الي عليك تقعد في البيت ... تانتخ ... تعمل حلة فيشار كبيرة وتقعد قدام التلفزيون تتفرج علي ميولدي افلام او اي قناة افلام تانية ، بلاش نشرات الاخبار والقرف ده أعتبر اليوم ده اجازة من الهم وصدقني متعتك هتضرب في 10 لما تحس انك بتوجع النظام ده وبتديله علي قفاه بمجرد انك قاعد في بيتكم وبس ، احساس رائع مش كده ؟
ياريت بلاش تستلم للتهديات الي هتجيلك يوم الاضارب الصبح من قبيل ان مديرك يتصل بيك يقول لك انزل ولا الا عليا الطلبات بقية الشهر انك هيتخصم منك شهرين وربع ، محدش يقدر يعمل لك حاجه انت مضرب وده حق يكفله ليك الدستور والقانون ومواثيق حقوق الانسان ، الله يرحمه نجيب الهلالي لما اترافع عن عمال السكة الحديد في قضية الاضارب الشهيرة وخد لهم كلهم برائة واثبت بالدليل القاطع ان الاضراب حق ... الاهرام واخده بالها من كلامي؟ بنقطع اهه الله ينور
محدش ياخد مرضي في اليوم ده احنامش تعانين ولا ياخد اجازة احنا مش بنصيف
احنا مضربين مضربييييييييييييييييييييييين
ويعفي من ذلك الاطباء والطلبة الي وراهم امتحانات
الدعوة الديدة الي وصلت من يومين والي انا شايفها دعوه عبقرية هي الدعوة للصلاة من اجل مصر يوم الاضراب
الدعوه تتلخص في الاتي انك لو مسلم تصلي الظهر والعصر في احد الاماكن ده
أماكن الصلاة للمسلمين:

الجامع الأزهر
مسجد السيدة زينب
مسجد عمرو بن العاص- مصر القديمة
مسجد عمر مكرم - ميدان التحرير
مسجد الفتح - رمسيس
مسجد مصطفى محمود – المهندسين
مسجد رابعة العدوية- مدينة نصر
مسجد الاستقامة - ميدان الجيزة
مسجد النور - العباسية
مسجد الحصري – 6 أكتوبر

فى اسكندرية:
مسجد القائد ابراهيم
مسجد ابو العباس
مسجد البيطاش

لو مسيحي تحضر قداس الاحد في الاماكن دي

أماكن الصلاة للمسيحيين:

الكاتدرائية المرقسية – العباسية
كنيسة السيدة العذراء- الزيتون
الكنيسة المعلقة – مصر القديمة
كنيسة مارجرجس – مصر الجديدة
كنيسة القديس سمعان الخراز – المقطم
كنيسة الأقباط الكاثوليك – مصر الجديدة
كنيسة قصر الدوبارة – ميدان التحرير
خلينا يكون شغارنا ودعوتنا في صلاتنا كلنا الله ارفع مقتك وغضبك عنا - مش عارف مدي مطابقة الدعوة لدين المسيحي بس اي حاجه بنفس المعني -
ياريت يا جماعه نخلي بالنا من نفسنا كويس يومها لان النظام عنده حالة غليان من ساعه 6 ابريل
المدونين ربنا معاهم .. علينا دور كبير قوي وذي ما اثبتنا اننا الوحيدين الي كنا بننقل الحقيقة من جوه المحلة في الاضارب الاول هنثبت برده اننا الي هننقل الحقيقة يوم 4 مايو
وده كله عشان ثبت ان عصابات الفيس بوك الي كانوا لا يتجاوزن 3 الالاف في اول التحقيق وبضعة مئات في نصة وقلة مندسة في اخره هما نبض مصر الي بجد
وان شوية كدابين الزفة بتوع الثلاثين في المية ما هم الا من فصيلة نادرة موطنها الاصلي قصور الحكام وتتعذي علي لحوم الشعب الغلبان
بمناسبة الثلاثين في المئة النهرده ركبت الميكروباص لقيت الاجرة زيادة 10 قروش بدل 150 قرش بقت 160 قرش مع اني مش موظف حكومة ومخدتش علاوة - واخدين بالكم يا بتوع فرحة الناس بالعلاوة ؟ -
من الاخر مم غير وجع دماغ
انا مضرب بكره عشان مصر
عشان كريم البحيري صاحبي الي اتخطف وهو معايا في المحلة ومشفتهوش من يومها
عشان ابو احمد الزمر صاحبي الي بقاله 3 ايام محدش عارف مكانه رغم انه خد افارج
عشان كل عمال المحلة ومعتقلي 6 ابريل الي واخدين احكام برائة ومعتقلين من غير سبب
عشان معتقلي الاخوان الي واخدين احكام برائة ويتم تحويلهم علي وادي النطرون
عشان نفسي اعيش عيشة محترمة تليق ببني ادم
عشان النشرة الامنية الي اسمها الاهرام والي بيطبعوها من فلوسي وفلوس الشعب انا مضرب عشان سي حزين الي كتب التحقيق يشوف احنا بضعة مئات ولا احنا 70 مليون
أخيرا اوعد كل الناس الي لسه بتدخل علي يالالاللي بتغطية جديدة جدا من مكان جديد خالص من مصر يوم 4 مايو والهدف ان مصر كلها تبقي معانا يوم 4 مايو مش وسط البلد بس ولا القاهرة بس لا مصر كلهاااااااااااااااا
قبل ما انسي انا مش هوجه شكر لقيادات الاخوان ذي ما عمل اصحابي علي كثير من المدونات لان الي عملوه ه واجب الاخوان تجاه هذا الوطن ومش منة ولا منحة منهم للوطن ده

ملاحظة : التحقيق الي جبت سيرته اكثر من مرة هو تحقيق الاهرام عن الفيس بوك والي اتنشر في عدد الجمعة
ممكن تقراه من علي موقع الجريدة بس انا افضل تقراه من عند نوارة باالاضافات التهييسية

شارك مع اصدقائك

Share |