الجمعة، 29 يونيو، 2007

تفانيني

جربت مرة تمسك القلم وتشخبط ؟
انا جربت
وكانت ده النتيجة
ايه رايكم ؟
علي فكرة
رسمت الصور ده ليلة اكتحان كان رخم قوي سيبت المزاكرة وقعدت ارسم
مش فكرة برده ؟






الأحد، 24 يونيو، 2007

المكفرة

دائما كنت أومن أنه لا يجوز لانسان مهما كان أن يكفر أنسان أخر ،ودائما ما كنت اومن ان للتكفير انواع كثيرة منها التكفير الفكري واخطرها بالطبع التكفير الديني والذي اعتقد انه يجب ان يكون ذو شروط صارمة جدا كان ياتي الشخص بافعال الكفر البواح علانية وان من يكفره هم وجموعه من اهل العلم - العلماء بجد مش بتوع البول - وهذه الشروط بخصوص التكفير الديني اما التكفير الفكري او السياسي فانا أعتقد انه لايملك انسان تكفير انسان في هذه النواحي مهما اوتي من علم .
وبالنسبة لواحد ذيي مؤمن بالكلام الجامد المكتوب بالنحوي فوق ده أكيد هيبقي أشد حاجه علي نفسه انه يشوف حد بيكفر حد وهو اصلا ملوش أنه يطلق الحكم ده .
الموضوع ببساطة اني اتخنقت ... قربت اطرشق ... بقيت حاسس اني عايش في مكفرة كبيرة ... علي الرغم من اندثار جماعه التكفير والهجرة والجامعات التكفيرية الاخري بس للاسف ثقافة التكفير لا زالت تتغلل فينا لابعد الحدود وهديكم امثلة .
-1-
حكمت عليا الاقدار السكن هذه السنة مع مجموعه من الطلبة من خيرة المكفرين في بلدنا المنكوب مصر فهوايتهم الاولي هي تكفير خلق الله .
أحد هولاء المكفرين الاشاوس كان ينتمي لنفس تياري الفكري - للاسف - وهو الاخوان المسلمين وكنت مومن اشد الايمان انه يسئ الي الاخوان اكبر اسائة من الممكن ان يوجهها عضو بمجموعه ما الي مجموعنه .
فاخينا اياه كان اسهل ما لديه ان يكفر اي احد مخالف له في المبدا او الفكر وخصوصا الفكر السياسي فاستاذنا هذا اسهل ما لديه تكفير حزب التجمع واعضائه ورئيسه وهم بالنسبة له زناديق والسبب بسيط انهم يكرهون الاخوان وبهذه الطريقة التكفيرية الجديدة اخذ يكفر كل من يتعارض معه في الفكر فبالنسبة له الليبرالين كفرة - ما شاء الله سابق زمنه وهتفهموا الجمله ده كمان كام سطر - واليساريين كفرة والشيوعيين كفرة وفي احدي المرات اتهمني انا بالكفر لانني ادافع عن هولاء الكفار - من وجهة نظره - ولانني اعتمد علي نظرية تقةل ان الاصلاح لا ياتي الي بتظافر كل هذه التيارات معا ولن ياتي بفصيل وحده حتي لو كان هذا الفصيل هو الفصيل الاكبر علي الساحه - الاخوان المسلمين .
-2-
اما ثاني المكفرين فكان شيخ الاسلام وحجته الشيخ الطالب في السنة الثانية لكلية الصيدلة للعام الثاني علي التوالي أحمد والذي لقب نفسه بابو عبد الرحمن الاثري - هو فعلا اثري وقديم جدا - .
عم احمد الاثري طول النهار سايب مزاكرته وعمال يسمع في خطب ويقرا في كتب الحديث وغالبا ما كان يقول اني اطلب العلم وكان كل العلم بالنسبة له هو هذا العلم اما الصيدلة التي كان يدرسها فهو لا يعدها من العلوم .
أحمد كان يمارس في اوقات فراغه الكثيرة هواية التكفير واول من كفره بالطبع هوالشيخ يوسف القرضاوري - اه والله يوسف القرضاوي كبير هيئة علماء المسبلمين - وتوالي التكفير والذي طال اناس كثيرا منهم انا شخصيا للاني ارتدي الجينز ولا اقصر الثوب والي زاد وغطي اني في احد الايام حلقت ذقني - يعني الكفر بواح اهه مفهوش كلام - .
احمد في اخر واشهر فتواه التكفيريه كفر الحلاقيين لانهم يحلقون اللحي سوء بالموس او بالمكنة او حتي بالفتلة ولا تعليق .
-3-
في احد المرات كنت اجلس مع مجموعه من الطلاب بكلية الطب ذوي اللحي الطويلة والجلاليب القصيرة وكنا نتحدث حول الفتنة بين علي كرم الله وجهه ومعاوية رضي الله عنه فقلت لا استطيع ان اميل لفريق علي الاخر لان هذا هو راي اغلب العلماء ولانه ياجج الفتة التي نحن في غني عنها ولكني اعقبت ذلك بقولي ولكني ارد علي معاوية توريث الحكم فهو سن سنة سيئة وانا شخصيا لا استطيع ان اغفر له هذا .
ويا مومنين انا لم اكمل جملتي حتي ثار من حولي وهاجوا وماجوا واحدهم طلب مني الاغتسال ونطق الشهادتين واحمرت وجههم واعقبوني بتعليقات ساخطة وغاضبة ثم انصرفوا .
ولا تغليق - برده -
-4-
اخر الفتواي التكفيرية اللوزعية هي فتوي الشيخ صالح الفوزان عضو هيئة كبار العلماء، عضو اللجنة الدائمة للبحوث العلمية والإفتاء بالسعوديةبتكفير مين بقه ... بتكفير الليبرالين - مش قلت لكم صاحبي المتأخون كان سابق سنة وجيلة وعصره ده سبق الشيخ في فتواه ب 5 شهور عالاقل - والفتوي ممكن تطالعها من هنا أو تقرا الخبر في المصري اليوم من هنا
فتوي الفوزان واحده من فتواه الكثيرة التكفيرية فلو دخلت علي موقعه الرسمي وكتبت بالبحث كلمة كافر ستجد اكثر من 21 الف نتيجة بحث ليست بالطبع كلها فتاوي تكفيرية فبعضها اسئلة من القراء ولكن هذا العدد الضخم ينبانا بان هناك حالة تكفيرية كبيرة في المجتمع فحتي القراء اغلب اسئلتهم عن التكفير هل من فعل كذا هو كافر ... هل من قال كذا هو كافر ...الخ .
المصيبة الاكبر في هذه الفتوي ليست في فحواها فهي ليست جديدة وقبله من فتي بمثلها لكن المصيبة الاكبر في من افتي بها ، فالشيخ صالح الفوزان هو احد اهم الشيوخ السلفية في السعودية وهو ما يجعله من اهم شيوخ مصر الذي ينقاد خلفه سواد كبير من شباب السلفية في مصر والعالم واتذكر جيدا بعض اصدقائي الذين كانوا يتلهفون علي كل فتوي للشيخ حتي لو كانت بامور لا تتعلق بهم ولكن فتاوي الشيخ بالنسبة لهم مقدسة .
والمصيبة الاسود انك لو قرات حيثيات الفتوي ستجد جهل لا يغتفر للشيخ بالليبراليين فالواضح ان الشيخ لعالم لم يعرف يوما من هم الليبرالين ولا ما هي افكارهم فهو يكفر عمياني .
قال لي احد اصحابي ذات مرة خلي بالك يا احمد لحوم العلماء مُرة وانا متاكد من انه لو قرا هذه التدوينه سيكون يومي اسود بس السوال هو هل لحوم العلماء مرة ولحوم ملايين الليبراليين في العالم مسكرة ؟
ففضيلة الشيخ لم يغتبهم ولكنه فعل الافظع لقد كفرهم وبكل سهولة .
اتذكر هنا وفي هذا السياق اكبر حملة تكفيرية في القرن العشرين بع حمل الحقبة الناصرية بتكفر الشيوعين وهي حملة السلفيين والوهابيين بتكفير الشيعىة والتي لم نجني منها الا المذيد من الفرقة والتشتت .
وأذكر ايضا ان ديننا الاسلامي امرنا بالحكم بالظواهر لان البواطن هي امر لا يعلمه الا الله فاعتقد ان الشيخ الفوزان لم يدخل الي بواطن الليبراليين وان شيوخ السلفية المكفرين لم يدخلوا اليي بواطن الشيعة والذين كانوا دائما يتهمونهم بالتقية بالرغم من ان التقية لا أحمد يعلمها الا اذا اطلع علي الباطن وهو مستحيل طبعا .


لحاد هنا وكفاية تكفير ومش عايز احكي كل ال عندي لاني تعبت جدا ولازم انزل دلوقت اروح الشغل بس احب اسال شوية اسئلة :
علي اي اساس حد بيكفر حد في الزمن ده ؟
ما هي مصلحتنا في تكفير بعضنا بعض ؟
الي اين سيصل مسلسل التكفير بنا ؟
وسوال للشيخ الفوزان :
هل يجوز الافراج عن ايمن نور بعد هذه الفتوي ؟
وهل يجوز الانضمام لحزبي الوفد والغد بعد هذه الفتوي ؟
وهل يجوز ارتداء اللون البرتقالي شعار الغد بعد هذه الفتوي ؟
وهل يعتبر مقر حزب الغد بالدور الثاني فوق جروبي بوسط البلد ارض للكفار بعد هذه الفتوي ؟


والسوال الاخير للشيخ أحمد الاثري
الا يا شيخ احمد هل تنفع التوبة لي بعد حلاقة ذقني ؟الرجاء الاجابة

الجمعة، 22 يونيو، 2007

لحظة من فضلك دليل ستيفن فرانكلين عن المدونات والانترنت صدر

الخبر ده بجد يا جماعه مهم جدا ولسه واصلني امبارح من شبكة أفيكس - بعد طول انتظار - والخبر هو ان الصحفي الامريكي استيفن فرانكلين اصدر تقريره عن المدونات والانترنت والي سماه عشر خطوات نحو الصحافة الشعبية على الإنترنت "دليل مختصر للمدونين و الصحفيين الإلكترونيين" .
يمكن انا كان ليا الشرف اني اقابل استيفن في مصر الكلام ده كان من اكتر من شهر في ندوة نظمتها أحد منظمات حقوق الانسان عن قضية كريم عامر وبعد مداخلتي لقيت واحد شكله اجنبي بيتكلم عربي مدغدغ بيتعرف عليا كان هو استيفن فرانكلين والي نشاء بعد كده بينا معرفة .
أستيفن أعد التقرير ده في مصر وتحديدا في الجامعه الامريكية والتقرير جدير جدا ان الواحد يزاكره مش يقراه بس لان فيه كلام مهم جدا .
والف شكر لعمنا استيفن عالمجهود الي في النقرير التقرير ممكن تطالعه من هنا
او من الرابط
http://www.openarab.net/faq/2007/icfj.shtml
ويمكن مراسلة استيفن فرانكلين معد التقريرعلي الميل
Istifan66@sbcglobal.net


الاثنين، 18 يونيو، 2007

أتفرج يا سلام علي اللواء احمد ذكي بدر رئيس جامعه عين شمس الجديد

الخبر انا اول ما سمعته قلت يا نهار اسود ومنيل بستين نيلة
واول لما قلته لحاد من اصحابي قال يادي المصيبة
وحد ثالث قال انا لله ونا اليه راجعون
من الاخر يا جماعه الخبر صدمه
الخبر هو تعيين الدكتور برتية لواء احمد ذكي بدر رئيس لجامعه عين شمس والخبر ذي ما ورد بالمصري اليوم فيه قرار بتعيين روساء خمس روساء جامعات منهم بدر . لو طالبة معاك تشوف الخبر اضغط هنا وخلي بالك من الضغط انا مش مسول .
الي ميعرفش أحمد ذكي بدر فهو ابن اوسخ وزير داخلية عرفته مصر والي هيقولي طب انت هتظلم الراجل عشان ابوه مش هرد عليه عشان انا مودب وهطلب منه يتفرج عالفيديو الجميل ده بس
الفديو ده اتاخد لسيادة اللواء الدكتور يوم 22/11/2006 يوم ما اضرب الطلاب علي ايد البطلجية في الجامعه والفيديو بيظهر الباشا وهو بيزعق للطلاب وبيكدب وبيقول محدش اتشطب من الاتحاد - أكيد كان بيهزر - وبعد كده بيقطع للطلاب لوحهم وورقهم وبيساعده سيادة اللواء محمود رئيس مباحث العاصمة - قائد البلطجية في اليوم ده - والي ادعي وسيادة اللواء الدكتور احمد ذكي بدر واقف ومبارك هذا الادعاء انه عضو هيئة تدريس .
اسيبكم مع الفيديو واحب اقول لطلاب عين شمس لكم الله يا شباب انا لو منكم مش طالبة تعليم اصلا مدام فيها ذكي بدر

الأحد، 17 يونيو، 2007

يا تاخدوها موتورجل ... يا الحمير هي الحل


عشان محدش يتهمني بالبلبلة بالرغم من اني كبرت عالحاجات ده من زمان .
وهسالكم سوال عايز كل واحد يجاوب عليه عشان تتاكدوا من مدي صحة مصدري الي بنيت عليه الموضوع ده
السوال هو ايهما تصدق اكثر حينما يتحدث عن الاقتصاد المصري رئيس الوزراء أو احد وزرائه أم السفير الامريكي والسفارة الامريكية بالقاهره ؟
والله السوال جامد وينفع يجي لسنة 4 اقتصاد كلية سياسة واقتصاد ... والاجابة طبعا معروفة وهي ان السفير الامريكي هو المتحكم اصلا في اقتصاد مصر هو والبنك الدولي الي هو تبع امريكا برضه .
طيب السفير الامريكي كتر خيره ونجح له ابنه يارب في الثانوية ويخلية يارب يعرف يحل في التفاضل والفيزياء صرح تصريح مهم جدا نشرته المصري اليوم من كام يوم ومحدش خد باله منه وهو باختصار إن الاتجاه لتقليل دعم الطاقة «البترولي» سيكون له تأثير إيجابي علي الاقتصاد المصري، مؤكدا أن الدعم الموجه للمنتجات البترولية يستفيد منه الأغنياء والمستثمرون. التصريح جه جزء من تقرير السفارة عن حالة الاقتصاد المصري وده احد اهم التقارير التي تصدر سنويا عن الاقتصاد المصري وبالمفتشر كده عمره ما خيب . وعلي فكرة كتير من الوزراء المصريين لمحوا للموضوع ده في اكتر من مناسبة بس محدش كان بيدق علي تخاريفهم .
وممكن تطالع الخبر من هنا
طيب ده الخبر ... ايه بقه المستفاد منه ؟
معناه ان الحكومة هنرفع الدعم عن المنتجات البترولية وده معناه ان المنتجات البترولية هيبقي سعرها في مصر ذيه ذي سعرها في بلد تاني وعلي فكره السعر العالمي هو ا يورو للتر البنزين يعني 7.5 جنية واشرب يا معلم .
ولو حسبناها بطريقة اسهل التجربة بتقول ان البنزين لما غلي 10% ذادت المواصلات بنسبة من 20% الي 25 % قول يا سيدي 10% وخليها علينا .
طيب لما يذيد البنزين 700% هتذيد المواصلات قد ايه؟ عالاقل طبعا 700% هي كمان يعني الميكروباص ابو 50 قرش هيبقي بـ 3.5 جنية . ولا عزاء للفقراء .
طب سيبك من عامة الشعب الغلابة الي ملوا البلد وخلينا في ولاد الناس - مبحبش اللفظ ده بس ما علينا - الي بيركبوا عربيات الي يا عيني الواحد بدل ما كان بيملا صفيحة ب 50 جنية هتبقي الصفيحة بـ 350 جنية بس يابلاش .
من الاخر كده محدش هيركب عربيات طب الحل فين يا ابو حميد ؟
بصفتي عقلية اقتصادية لولبية مهلبية لقيت الحل والي هينقسم لقسمن القسم الاول للعالم الرياضينن ذيي وهو المشي وده سهل خالص مش محتاج شرح .
الجزء التاني وهو الاهم العودة للدواب يعني الحمير والحصنة والجمال وده موضوع سهل برده وموفر جدا لان ربطة البرسيم عاملة 50 قرش بس وتخلي الحمار يمشي مسافة بيعملها 3 لتر بنزين .
ومننساش برده ان الدواب هتنفع جميع الفئات
يعني الحمير للعالم الغلابة بتوع 128 فيم مضي والفيات ومشتقاتها
والي كانوا بيركبوا فئة الكوري والياباني والمستورد ممكن يستخدموا الحصنة وكل واحد علي قد فلوسه اما بقه بتوع المرسيدس والبي ام فعليهم وعلي الجمال والكارتات والهودج بقه وصباح الفخامة .

حمار في الباركينج " الصورة في القاهرة بعد كام عام كده
"
وساعتها مش هنحتاج لا رخص ولا نتعلم السواقة ولا قرف من ده كمان انا بدعوا الحكومة تدعم الموضوع بزراعة مساحات خضراء تاكل فيها البهايم وتحش بدل دعم البنزين والقرف ده ونعمل محطات تمويل برسيم عالطريق وعربخنات عشان الحمير تريح .
ياااااااااه هتبقي الدنيا حلوه قوي ويمكن الموضوع يطور وكل واحد فينا يجيب سيف ويلبس جليبة ويمشي في الشارع يقول ثكلتك امك يا ابن ابي قحافة اصبائت عن دين ابائنا والات والمعزة لاجعلنك عبرة لبني قهوة البورصة وسوق الحميدية

الخميس، 14 يونيو، 2007

مه النهرده مش يوم سياسة


كنت المفروض هكتب النهرده عن فلسطين
او عن خروج عمر شرقاوي
وكنت المفروض هكتب عن حفل تخرج دفعه 4 اعلام الي دعوني ليها وعن فريق عمل كتب خانه الي كسر الدنيا وحسسني ان بكره جميل قوي
والمفرو ض اكتب عن كادر المعلمين الي امي بتنام تحلم بيه
والمفروض اكتب عن لقائي باتنين من مزوري ( مراقبي ) انتخبات الشوري قبل الانتخبات بيوم والحوار الي دار بيني وبينهم
وحاجات تانية كتير
بس النهرده وفي اخر لحظه اكتشفت حاجه مهمه جدا
النهرده اليوم العالمي للتبرع بالدم ... يعني مش يوم سياسة خالص
طبعا مش هقولك اتبرع بنقطة دم والكلام ده ... انا قررت النهرده احكي لكم عن تفاصيل قصة مهمه جدا تجسد فصل مهم من فصول حياتي
قررت احكي لكم قصة
حياة

القصة بدات بمبادرة مني ومن واحد بحبه جدا وبيشاركني تقريبا كل حياتي لما لقينا صديق لينا مشترك كان مصاب بسرطان الدم ( لوكيميا ) وكان معرض للموت ان لم ينقل له صفائح كل يومين تقريبا . وبحثنا عن حد يتبرع وكان الامر صعب في البداية وقررنا بعدها نكون مجموعه هي مجموعه حياة للتبرع بالصفائح .
تفاصيل المجموعه وشغلها ممكن تعرفوه احسن من البرشور الي كنا طابعينه والي كان فيه الاتي
ملاحظة الكلام وارد هنا بنفس الصياغه الي كتبنا بيها البرشور من سنتين وهنلاحظ بعد العبارات الدينية الاسلامية بس انا دلوقت بوجهه الدعوه ده باعتبارها دعوه انسانية وليست اسلامية وكون اني عرضت البرشور بنفس صياغه زمان ده لاني بعتز بيه وليه عندي زكريات كتير حلوه

مجموعة حياة

مشروع أقامه قاعدة متبرعين منتظمين بمكونات الدم لمعهد الأورام القومي


من هنا كانت البداية

بدأت قصتنا عندما قام البعض مننا بزيارة معهد الأورام القومي بفم الخليج ذلك الصرح الطبي الشامخ الذي يعالج كل يوم الآلاف من أبناء هذا الوطن من أشد الأمراض فتكا وخطورة .

وكانت زيارتنا الأولي بغرض التبرع بالصفائح لأحد الأصدقاء المصابين والذي كان في هذا الوقت بالمعهد وكان يعاني من نزف شديد من مختلف أنحاء جسده مما كان يهدد حياه بالخطر وتصورنا للوهلة الأولي أن صديقنا هذا حاله نادرة الحدوث ولكن عند قيامنا بجولة بالمعهد فوجئنا بالكثير من الحالات التي تعاني نفس المشكلة وتعاني من عدم توافر الصفائح أو البلازما ببنك الدم بالمعهد وكانت هذه بمثابة الصدمة لنا وقابلنا بعض المسولين بالمعهد والذين شرحوا لنا أن المعهد لم يعد يعاني من نقص المتبرعين بالدم كما كان بالماضي وذلك بسبب إنشاء قاعدة من المتبرعين بالدم ولكنه يعاني من نقص المتبرعين بمكونات الدم ( الصفائح والبلازما ) وهنا اكتملت الفكرة في عقولنا وهي إنشاء مجموعات تبرع منتظم بمكونات الدم لصالح مرضي السرطان وتتلخص فكرتنا في تقسيم المتبرعين مجموعات كل مجموعه مكونه من 120 متبرع يشرف عليها 14 منظم بواقع 2 منظمين عن كل يوم من ايام الأسبوع ويختار كل متبرع الموعد الذي يناسبه للتبرع في أي وقت شاء علي ان يكون تبرعه منتظم شهريا ( مره كل شهر ) .

وبفضل الله بدأنا حملتنا لتكوين أولي هذه المجموعات راجين من الله أن يجعل هذا العمل المتواضع في ميزان حسنتنا يوم القيامة وان يجمعنا وإياكم بجنته فهو علي كل شئ قدير .

ما هو الدم ؟

الدم هو سر من أسرار حياتنا واحد نعم الله عز وجل لنا ويتكون الدم من :-

1- البلازما :- سائل اصفر شفاف يحمل الخلايا الدموية وعوامل التجلط ويحمل الغذاء لجميع أجزاء الجسم .

2- كرات الدم الحمراء :- تحمل الأوكسجين من الرئة لجميع أجزاء الجسم .

3- كرات الدم البيضاء :- تحمي الجسم من خطر الجراثيم بوظيفتها المناعية .

4- الصفائح الدموية :- منع النزيف من الاوعيه والتحكم بالتجلط .

ويحتاج مرضي السرطان الصفائح الدموية باستمرار نتيجة نقص عددها بسبب المرض أو العلاج الكيميائي أو الإشعاعي وهو ما يعرض حياة المريض للخطر سواء بالنزيف الخارجي أو الداخلي أو نزيف المخ .

تتراوح عدد الصفائح في الجسم العادي من (150000-400000مم3 )وعندما تقل عن (20000مم3) يكون خطر النزيف وهو ما يعرض حياة المريض للخطر .

كيف نحصل علي الصفائح ؟

هناك طريقتان :-

1- بفصل الصفائح عن الدم من اكياس الدم التي يتبرع بها المتبرعين وهو ما يعطي وحده صفائح لكل كيس دم .

2- استخدام جهاز فصل الصفائح :- يوصل الجهاز بوريد الذراع للمتبرع ويتم تشغيل الجهاز والذي يستغرق خلالها 90 دقيقه يقوم بفصل 18% من الصفائح التي بجسم المتبرع وهذه النسبة أمنه

ويتم إعادة باقي مكونات الدم للمتبرع مره أخري وتكون حصيلة هذه العملية من 6 إلي 8 وحدات .

وخلال 8 ايام يقوم الجسم باستعادة الصفائح التي فقدت في عمليه التبرع وتعمل هذه العملية علي تنشيط النخاع العظمي .

الجهاز المستخدم هو جهاز امن لدرجه 100% حيث لا يلامس الدم أي من أجزاء الجهاز ولكن يسير الدم في مسار مغلق عبر أنابيب وأجهزه تستخدم مره واحده لكل متبرع فقط وتكلفه هذه الأجهزة المستهلكة 1200جنيه تقريبا مما يكفل اعلي درجات الآمان للمتبرع .

ويبقي السوال :-

أي الطريقتين أفضل للتبرع بالصفائح ؟

بالطبع الطريقة الثانية لان المريض يأخذ الصفائح من متبرع واحد فقط مما يقلل احتمال تكوين جسم المريض لأجسام مضادة .

روحانيات

من المعروف أن المؤمنون تجار نوايا فالمؤمن ينوي أكثر من نية للعمل الواحد ليجزيه الله ان شاء ثواب كل هذه النوايا حيث قال الرسول r" أنما الأعمال بالنيات .." ومن هذا المنطلق حاولنا إيجاز بعض النوايا التي من الممكن أن تنويها عند قيامك بالتبرع بالدم :-

1- تفريج كربه من كرب الدنيا عن مسلم .

2- إدخال السرور عي قلب مسلم (المريض وأهله)

3- الصدقة الجارية .

4- عيادة المريض .

5- سن سنه حسنه بين الناس .

6- خدمه للإسلام والمسلمين بمساعدتك لأحد المسلمين ليكون فردا صحيحا نافع للمجتمع .

7- التعرف علي إخوانك .

8- زكاه عن صحتك .

9- إنقاذ لأطفال المسلمين .

10- الجهاد في سبيل الله .

وغير ذلك الكثير والكثير من النوايا التي من الممكن أن تنويها عند قيامك بهذا العمل الجليل .

هدفنا :-

أن نرسم البسمة علي شفاه لم تذق طعم الفرحة

لغة الأرقام

* يحتاج مرضي السرطان للعشرات من وحدات البلازما والصفائح يوميا .

* تستطيع مجموعة متطوعين واحده أن توفر من 720الي960 وحدة صفائح شهريا .

* تباع 12 وحدة صفائح بمبلغ 1000جنيه تقريبا.

* أي ان المجموعة الواحدة توفر مبلغ 60000الي80000جنيه شهريا .

* يفصل جهاز فصل الصفائح 18%من الصفائح من جسدك وتعوض خلال 8 ايام علي الأكثر .

**********

وبعد كل هذا أخي الحبيب

ما رأيك في 90 دقيقه كل شهر في طاعة الله

ما رأيك ان تنفس عن مسلم كربه من كرب الدنيا لينفس الله عنك كربه من كرب الاخره

ما رأيك في إنقاذ حياة إنسان مريض لا أمل له بعد الله إلا فيك

ما رأيك في خير الدنيا والآخرة معا

هيا شمر عن ساعديك

انضم لشباب حياة

كن احد المتبرعين المنتظمين بالصفائح

ولا تدع هذا الخير كله ليفوتك

للانضمام راسلنا علي



ولا تنس ان الدال علي الخير كفاعله

وجزاكم الله خيرا

-----------------------------------------------------

بالضبط الي حكيته فوق ده هو كان حلمنا وهي كانت رسالتنا

يمكن بسبب انشغالنا مبقناش متابعين حياة كما يجب بس الحمد لله حتي الان يوجد من يحمل هذه الرسالة وهم كثير ولله الحمد ومنهم اخويا الصغير ياسر

انا بدعو كل واحد حابب يعمل خير يساعد علي نشر الفكرة والي يحب يتبرع ممكن يراسلني علي ميلي

ahmedikhwan@gmail.com

وانا هوصله لحاد ممكن يتابعه في قضية التبرع ده

وجزاكم الله خيرا



بالمناسبة يا جماعه ... هو ده صاحبي كريم

وبالمناسبة برضه الشهر ده هو الذكري السنوية الاولي له

الله يرحمه ... بجد وحشني

أدعوله ربنا يتغمده برحمته

ولو حبيت تعرف كريم اكتر دوس هنا

الاثنين، 11 يونيو، 2007

حريتي يعني حرية كل مصري وكل مصر يعني حرية شرقاوي


لو دست هنا هيجيلك صوت جميل ورخيم بيقول لك " نعم ان اول غيث ندوي ساروي به قاحلات المدي واجعل منه سهول الشتاء لاغرق فيها غصون العدا "
لو دست هنا هيظهر لك مدونة هتتوقف عندها كثير وهتشوف عاليمين صورة لشاب في العشرينات من عمره تحت صورته اتكتب ان اسمه عمر شرقاوي
لو دست هنا هتدخل عالم خاص هو عالم عمر شرقاوي الي مسميه مواقف من حياتي
مين شرقاوي ؟
هو الي في الصورة ده طبعا
بصراحه معرفشوش شخصيا
كل الي اعرفه انه مدون من مدونته يظهر شاب بيحب بلده قوي أكتر من اي حاجه تانية
من مدونته هتعرف انك قدام شاب مستعد يضحي بحياته عشان بلده وهدفه
طب السوال وهو فين شرقاوي يسمع البقين الجامدين دول فيه ؟
الاجابة ببساطة شرقاوي في المكان بتاع الناس الجامدين
شرقاوي في السجن
طب السوال برده هو في السجن ليه ؟
طبعا مش هرد عالسوال ده عشان أنا مودب
شرقاوي .... أكيد يا شرقاوي اول الغيث ندي
وانت ليك الشرف انك تبقي جزء من اول الندي الي جاي في اول الغيث
شرقاوي ... من حقك تفرح لانك دلوقت بتجاهد عشان هدفك
ومن حقنا نفكر نساعدك اذاي
علي العموم متقلقش ياواد وراك رجاله ومدونين مخربشين ومخلصين وجايبين من الاخر ومش هيسيبوك مهما حصل
ايها المدونون افيقوا

ياقوت أقتحموا بيته امبارح
وهو هربان
وليه كل ده ....؟
عشان ياقوت مدون
وحسام الهندي وابراهيم شرقاوي أضربوا
واتخطفت منهم الكاميرات
ولولا ستر ربنا كانوا راحوا
وليه كل ده ... ؟
عشان حسام مدون
وعشان ابراهيم مدون
واخيرا
أحدث عروض جهاز مباحث امن الانترنت والتدوين
القبض علي عمر شرقاوي
هاه ناوين تتحركوا ولا ناوين علي ايه ؟
ناوين تثوروا ولا ناوين تحصلوا أخوانا المعتقلين ؟
يوم ما وقفت ادافع عن كريم عامر في احد الموتمرات قلت
أنا بدافع عن كريم مش عشان كريم لا عشان حريتي انا
وكررت الكلام برده في موتمر لدعم منعم
لنعلنها صريحة حريتي يعني حرية كل مصري وكل مصر

الأحد، 10 يونيو، 2007

وصدقت النبؤة ... للاسف


يوم ما كتبت التدوينه ده مكنتش بضرب الودع ولا بقرا الغيب
كل الحكاية كنت بحلل افعال النظام والي مش محتاجه محلل سياسي ولا حتي محلل وحيد القناة ( ده احد الكواشف الاشعاعيه ) عشان نتوقع الي بيحصل ده
طب السوال هو ايه الي حصل ؟
محصلش حاجه
كل الحكاية ان الخط الاحمر قبل الاخير تم اجتيازه
اشاوس مبارك قبضوا علي اخوات من الشارع لو مش مصدق طالع الخبر هنا
يبقي مش فاضل الا خط واحد ... فضيلة المرشد
بالمناسبة احب افكركم بالنائب الي اتسحل في الشارع
وأحب افكركم أنه ومعاه نواب الاخوان فضوا اعتصامهم بالمجلس بمجرد مكالمة اعتذار من د/ فتحي سرور

نائب قبل الاعتذار
ومش عايز اعلق علي موضوع الاعتذار ده عشان مرارتي مش ناقصة
نائب بعد الاعتذار

واحب افكركم بان عدد الاخوان المعتقلين في انتخبات الشوري بس 1000 واحد وطفل و3 اخوات
يارب تكونوا اتاكدتوا من كلامي


* الصور نقلا عن انسي

الخميس، 7 يونيو، 2007

قاطعوا محكمة العسكر

أولا يا جماعه الدعوه ده مش انا الي بدعتها الدعوه ده كانت دعوه من منظمات حقوق الانسان ومنظمات المجتمع المدني ومراكز المساعده القانونية
الدعوه ببساطه ليه نروح محكمة أحنا عارفين نتيجتها مقدما ؟
وليه نروح محكمة احنا بنقول انه غير دستوري مثلونا امامها ؟
وليه بنروح محمكة نهين فيها كرامتنا قدام بوابة صبر ايوب - قصدي ايوب - بتاعه الهيك استب ؟
الدعوه ببساطة
قاطع محكمة العسكر
لا متهمين ولا محامين ولا اهالي معتقلين ولا متضامنين يروحوا
ولا اي حد خالص
وخليهم يشبعوا بمحكمتهم
البانرات ده لنشر الدعوه
الرجاء نشرها
وبشكر الاخت اروي الطويل محررة مدونة انا كده علي تعبها معايا في تصميم البانرات والاخ الي معرفوش الي نقفذ البانرات
عالعموم جزاهم الله خيرا علي المجهود





الأربعاء، 6 يونيو، 2007

لحظة اعتقال الطفل عبد الرحمن حينما طاخ الشطرموخ في التروللي ايها الاخوان


هالني الخبر .. ان لم يكن افزعني ... كنت اعتقد لفترات طويلة ان اصغر معتقل للاخوان هو شقيقي الاصغر ياسر - عضو حزب وطني حاليا - والذي اعتقل في عامه الخامس عشر مع 4 من اصدقائه وتم الافراج عنهم بعد 24 ساعه من الاعتقال وكانت التهمة تنظيف وتجميل الحدائق العامة بمناسبة الاحتفال بشم النسيم حيث قبض علي اخي الاصغر مع زملائه بالاسرة الاخوانية وهو يقومون بهذا العمل الشنيع .
لكن موخرا وبالتحديد منذ يومين تغيرت هذه الحقيقة من ذهني وليحيا اخي الاصغر ياسر بقية حياته مفتقدا الشرف الاعظم بانه اصغر معتقل للاخوان فوفق موقع اخوان اون لاين اعتقال الطفل عبد الرحمن البالغ من العمر 10 سنوات تفاصيل الخبر لا تهمني كثيرا يمكن مطالعتها من هنا
ما يهمني هنا هو دلالة الحدث فاليوم يتم اعتقال طفل عمره 10 سنوات بعد ان تم اعتقال النائب الثاني للمرشد العام للاخوان المسلمين وقبلها اعتقال اعداد كبيرة من الاخوان ولا ننسي اعتقال اثنين من نواب مجلس الشعب من كتلة الـ 88 فالملاحظ انه كل يوم يتم رفع وتيرة التعمال مع الاخوان ولا استبعد ان اري غدا اعتقال مجموعه من الاشبال في رحلة - تمت هذه العملية الصيف الماضي ولكن تم ترحيلهم فورا ولم يتم التحقيق معهم - ليتبقي اما النظام الخطين الاحمرين الاخيرين المرشد العام ونساء الاخوان .
نعم المرشد والنساء فانا لا استبعد ان نري هذا التطور خلال زمن قياسي لا يتجاوز بضعه اشهر خصوصا ان شهدت انتخبات المحليات القادمة خوض بعض نساء الاخوان لها ولكن السوال لماذا هذا التصعيد الان بالذات ؟
الاجابة من الموكد جاهزة وهي التمهيد للتوريث والتعديلات السياسية التي سيتشهدها الساحة السياسية المصرية علي المدي القريب ولكن هذه التطورات يتم الاعداد لها منذ زمن بعيد فلماذا الان بالذات هذه التطورات ؟
من وجهة نظري المتواضعه ان السبب في هذا التصعيد هو رد فعل الاخوان انفسهم علي التصعيد المتبع ضدهم فالاخوان يتبعون سياسة لا ترقي حتي الي مستوي سياسة رد الفعل فهم يتلقون الضربة تلو الضربة دون ابداء اي رد فعل اللهم الا القدر اليسير من الموتمرات المغلقة داخل النقابات والتي لا يشعر بها من يمر حتي بالشارع المجاور للنقابة بالاضافة لبعض التصعيد الاعلامي والذي يتركز علي شبكة الانترنت فقط .
من المفترض من حماعه في قوة جماعه الاخوان المسلمين وبحضورها الكبير في الشارع ان تتخذ نوعا من انواع سياسة الفعل وليس رد الفعل - ولا اتحدث هنا عن سياسة السلبية المتبعة حاليا - فالحل الوحيد لكي تخرج الجماعه من زمام ودوامة الاعتقالات المستمرة حاليا هو الاخذ بزمام الامور والرد بحزم علي كل الاعتقالات وهنا احب ان استشهد بتجربة قد لا يري البعض جواز الاستشهاد بها هنا ولكني ارويها
من قبيل ضرب المثال .
الحادثة التي اتحدث عنها هي اعتقال المدون الاخواني والصديق والاخ العزيز عبد المنعم محمود فاعتقال عبد المنعم شهد منذ لحظاته الاولي تحرك واسع جدا للنشطاء في سبيل الافارج عن عبد المنعم كانت اولي التحركات قبل القبض علي عبد المنعم بساعات عندما كان مطاردا حين خرج مجموعه من شباب المدونين - اغلبهم من الاخوان - ليقفوا وقفة نتضامن مع عبد المنعم ويعلنون ان المدونون هم خط احمر وانه لا يوجد مدون واحد مهما كان توجهه السياسي سيتهاون مع اعتقال اي مدون من اي تيار او يتبع اي فكر .
ولتتصاعد حملة التضامن مع عبد المنعم بعد اعتقاله وللمفارقة ان يكون المشرفون علي موقع الحملة الدولية للتضامن مع عبد المنعم هم مدونون من تيارات مخالفة للراي الي ابعد الحدود مهع الاخوان ونري منهم منتهي التفاني والنشاط في حملة التضامن لتنتهي هذه الحملة في نهاية الامر بالافارج عن عيبد المنعم والمجموعه المرافقة له في ما عرف بقضية معهد التعاون الزراعي .
لا ازعم ان حملة التضامن هي السبب في الافراج عن عبد المنعم ولكني ازعم انها سبب وسبب هام جدا واريد هنا ان الفت نظر قيادات الجماعه الي الزخم الذي حظيت به الحملة بسبب اشتراك الكل بها .
ادعوا قيادات الجماعه الي دراسة تجربة اعتقال عبد المنعم محمود دراسة وافية والاستفادة منها في قضايا الاعتقالات الاخيرة واحب ان اذكرهم في النهاية ان من قام علي حملة التضامن معه عيبد المنعم ومن تظاهر علي سلم نقابة الصحفين هم شباب اعمارهم لا تتجاوز الواحد والعشرين سنه - شوية عيال يعني - فان كان هذا الاثر لهدذه المجموعه القلية الصغيرة في السن فما بالنا باثر يحدثة ملاين الاخوان بطول البلاد وعرضها ؟؟؟

السبت، 2 يونيو، 2007

أوشاعات الست عيشة

اليوم جالي اتصال من زميلة وهي بتضحك وتقول لي أحمد الحق عائشة عبد الهادي بتقول ان الكلام عن تسفير الخادمات المصريات للسعودية اشاعة كانت لاثارة الراي العام وانها اشاعات مغرضة وان تصريحها ده منشور بالاخبار اليوم.
وطبعا مش قادر احكيلكم علي كمية الضحك الي ضحكتها لما سمعت الخبر ده
طب لو اشاعه يا عائشة تفسري بايه تصريح رئيس اللجنة الوطنية للاستقدام في السعودية سعد البداح في تصريحات لـ"العربية نت والي دافع فيها عن الموضوع ؟ وتفنيده فيها لبود الاتفاق الي وقعه مع الست الوزيرة .
ونفسر بايه الاتفاق نفسه الي اتوقع الا انه كان هزار بقه ولعب عيال ووزراء اعيل منهم؟
ونفسربايه دفاع الحكومة في وسائل الاعلام عن هالاتفاق ؟
ونفسر بايه ان وزراة القوي العالمة كانت فتحت الباب لتقدم اول 120 خادمة والي احد الزميلات الصحفيات قدمت طلب لشغل أحدي الوظائف الـ 120 لتستطيع عمل تحقيق من داخل الحدث وبالفعل تقدمت للوزارة ؟
اكيد طبعا الصحف والوزارة والحكومة والمسول السعودي الرفيع وكل دول مشتركين في الاوشاعه
ومش مستبعد ان الست عائشة تطلع لينا في التلفزيون وهي تغني اغنية مسرحية ريا وسكينه " اشاعات اشاعات اشاعات بيقولوا فيه عصابات بتسفر الستات
معلش بقه يا بنات مصر
مش هتسافروا
الموضوع طلع اوشاعه
بس علي فكرة يا ست عائشة
المنصورة اسبانيا ياتري هتعملي معها ايه ده كمان ؟

منعم أختفي ... طب مه ده المتوفع اصلا

تحديث
الحمد لله الخبر غير صحيح منعم نام في بيتهم وكله تمام
كده نقول للحكومة شكرا ويسكوا عالسجن الواي فاي
وعلي راي اسد فالترفع البانرات
45 يوم يا راجل صورتك علي كل المدونات
نغير بقه


الخبر صدمني علي مدونة نورا يونس
ملخصه ان منعم اختفي في ترحيلات البحيرة
والخبر منقول عن محامي منعم واتنشر علي الموقع الرسمي للحملة الدولية للدفاع عن منعم
منكرش ان الخبر وحش بس استنوا
مين فينا مكنش متوقعه ؟
مين فينا كان عنده امل فعلا يشوف بوست لمنعم علي مدونته يوم السبت او تعليق له او يسمع صوته عالموبيل ؟
أحنا هنضحك علي بعض ولا ايه يا شباب ؟
ده مبروم علي مبروم ميلفش
منعم دلوقت كلنا عارفين هو فين
بيتابع علي راي اسد
بس احنا مش هنسكت
ده لحم المدونين مر
يا حيوانات الداخلية وامن الدولة استعدوا
وانصحكم اعملوا سجن للمدونين بس يبقي فيه واي فاي وحياة ابوكم
لاننا مش هنسكت
ومش هنتاخد

شارك مع اصدقائك

Share |