الأربعاء، 30 مايو 2007

مبروك منعم خرج بس لسه 18 الف منعم


بجد انا فرحان انا اسعد واحد النهرده بالرغم من ان الامتحان كان رخم بس مش مهم الامتحان المهم ان منعم خاااااااااااااااااارج

وحشني يا منعم... وحشني قوي بجد وحشتني رخامتي عليك في الموبيل واتصالي بيك كل 10 دقائق واقولك الحق العيال خدوا افراج او ابعت لك رسالة كلمني عشان رصيدي خلص وانت تتصل
وفرحان طبعا عشان هشيل العداد الي فوق ده الي كان كائبني علي طول .
طيب لحاد هنا كفاية تهاني بقه وكفاية التهاني الي نازله عالواد من الصبح ونتكلم في المهم
النهرده يوم تاريخي لكل مناضل وكل نشط وكل حقوقي في البلد ده ، لكل واحد ناضل وبيناضل من اجل الحرية .
منعم خرج اليوم بفضل الله اولا طبعا ، وبمجهود عدد كبير جدا من الناس اغلبهم مكنش يعرف منعم اصلا بس كانوا بيعرفوا الحرية كانوا بيدافعوا عن الحرية كانوا بيحلموا بالحرية لكل بني ادم في الارض ده
يمكن منعم محظوظ لانه لقي الي يكتب عنه والي يسوق قضيته والي يهتم بيه بس ارجع وااكد ان ده كله كان لان كل دول بيدافعوا عن المبدا الي هو الحرية .
بفكر كل دول ان لسه في 18 الف معتقل في مصر وملاين في العالم كله .
ومتيقلي ان دورنا يادوب ابتدي بالافراج عن منعم ...
المسولية كبيرة والمهمة صعبة والطريق طويل.. بس احنا والحمد لله عفاريت وقدها والي خرج منعم قادر يخرج ال18 الف الي باقين بس احنا ناخد بالاسباب .
بدعوك تفكروا معايا اذاي ندعم 18 الف معتقل في بلدنا المنكوب مصر واذاي نرفع عنهم الظلم الي هما فيه .
أما انت بقه يا عم منعم فهنديك اجازة لمدو 24 ساعه بس تسلم عالحاج والحاجه وتطمن عليهم بعد كده لو ملقتش كلامك مالي المدونة والاماكن الي انت شغال فيها ونشاطك مكسر الدنيا صدقني انا هيبقي ليا معاك تصرف جامد وانت عارف بقه امكانيات التنظيم الخاص التابع لجماعه المدونين الاحرار وعارف ممكن يعملوا ايه .

رسالة الي كل المدونات الاناث


بصوا للصورة كويس قبل ما تقروا


وعدتكم بالامس ان اروي لكم عن مكالمة تليفونية اطارت النوم من عيني ، فبالامس وانا غرقان لشوشتي في معادلات الاحصائية السخيفة وفيزياء الجوامد والتي كان لا يقطع اندماجي معها سوي رنين الموبيل كل 10 دقائق وكل المكالمات بالطبع بخصوص ما نشر بالامس بالمصري اليوم اذ بالموبيل يرن وهذه المرة ظهر اسم شيماء ابو زيد علي الشاشة وشيماء صحفية كبيرة - عالاقل بالنسبة ليا - وهي من قلائل علموني الصحافة وتعمل باسلام اون لاين علي الفور تصورت ان مكالمتها بخصوص ما نشر بالمصري ومنيت نفسي بنقض فذ حول ما نشر من الناحية المهنية وامسكت بالقلم وفتحت ورقة بيضاء جديدة لادون خلفها ما ستقوله وعندما قمت بالرد عليها وجدتها تسالني
"أحمد انت شفت موضوع الخدمات بتوع السعودية ؟ "
قلت لها " أكيد طبعا هو انتي لسه شايفاه ولا ايه ؟ "
قالت لي" لا طبعا بس بجد انا مخنوقة من ده هو محدش هيتحرك ؟ ناهد ابو القمصان مش هتتحرك ولا هتتكلم بس عالجرايد ؟ مفيش حد هيتحرك خالص ؟ "
قلت لها " هو أكيد حد هيتحرك بس انا معرفش مين بالضبط وامتي ثم انا بمتحن "
قالت " طب وفين البنات والنساء ؟ "
قلت لها "والله مش عارف بس هشوف "
أغلقت الهاتف وانا مهموم اكثر من همي هما سوال شيماء كان طبيعي جدا اين النساء من قضية تمس امنهن القومي في الصميم - مش عارف بس الامن القومي ده لايقة عالموضوع - اين رواد حقوق المراة والمدافعين عن بنات جلدتهن ؟
أعلم ان القضية ليست قضية نساء فقط هي قضية مجتمع ولكن انا اتصور ان الاولي بها النساء وهن من وجب عليهن تحريكحها وتحريك الجماهير فيها لا اتنصل من دوري كرجل في الامر ولكن اتمني ان يكون دور النساء في هذا الامر أكبر .
اتمني من النساء ان يبتكرن طرقا جديدة لمواجهة هذه المحاولة لبيعهن في سوق الرقيق الابيض .
وهنا اوجه ندائي بالاخص للمدونين من الفتيات واقول لهم هذه قضيتكن فانتم اولي بها اولي ان تحركوها وتتخذوا فيها رد فعل يتناسب مع الضرر الواقع عليكن وعلي الشعب المصري كله .
أوجه ندائي لكل من اعرفه من فتيات المدوانات امثال رانده صاحبة الزنزانة وشهروزه ولمنال سيدة العمرانية ونورا يونس وشروق صاحبة احلي ما في الدنيا واوري الطويل صاحبة انا كده واية فلسطسنة الهوي وعلا ام قلم حر وايمان صاحبة الم وطن وسارة المقاومة والاخت الي مستنية الفرج وشذا الي لسانها ملتوف واكيد لامي الي بتعلق عندي باسم البتول

الدعوه ده بوجها لكل مدونة بنت من الي انا زكرتهم ولعشرات انا مش لاقي لينكاتهم دلوقت بس بزورهم ومعجب جدا بشغلهم وكتباتهم ولمئات انا معرفش مدوناتهم
ويمكن انا زكرت نماذج فوق باللينكات عشان ابرهن ان عندنا الحمد لله مدونات نشيطات جدا ويقدروا يحركوا القضية ده لو فكروا في كده
في النهاية ليا كلم طلب
1- ميهمنيش ان حد من المدونات تعلق عالبوست ده الاهم تعلقوا عند بعض وتتكلموا حولين الموضوع
2- ياريت تطلعوا القديم والجديد للست عائشة وتربطوه ببعضه ذي عاملات المنصورة اسبانيا
3- انا همرر التدوينة ده علي ميلات المدونات الي عنمدي ومرروها لبعض عشان ننشر الدعوه اكتر
4- مش محتاج ااكد طبعا اننا - كشباب مدونين - معاكم وهنضرب مكانكم وانا عن نفسي مستعد اشيل تهمة التحريض علي التظاهر والجمهرة واي تهمة تاني مدام هنعمل حاجه

بقلم ديسك المصري اليوم


بالتاكيد الكل متصور ان التدوينه ده رد علي الموضوع الالمعي الي نشرته المصر اليوم والذي تتصدره صورتي وانا ذي القمر
التدوينه ده فعلاكانت مشروع للرد وتفنيد الاخطاء الي في التحقيق
بس للاسف انا مش فاضيي لاني سايب معادلات الاحصائية وبلاوي فيزياء الجوامد ومعادلات مكسويل عشان اكتب الكمتين دول
عشان كده انا فكرت في كلمة جامعه مانعه اعبر فيها عن رايي
وهي

بقلم ديسك المصري اليوم
ملاحظة : متيقلي جديدة ان حد يظهر في جورنان بكوباية الشاي وانا باطالب ببرائه اختراع وحقوق ملكية فكرية عن الموضوع ده وشكرا للمصري
وانتظروني بكره هشاركم الهم معايا في مكالمة جتلي طيرت النوم من عيني ال يطاير اصلا بقاله 20 يوم بسبب الامتحنات

الاثنين، 28 مايو 2007

الاخوان ومسلسل جديد من التبريرات واهدار حقوقهم

كالعادة طالعتنا الصحف ووسائل الاعلام بخبر عن لقاء بين مجموعه من نواب الاخوان بمجلس الشعب مع مجموعه من نواب الكونجرس وكالعادة ايضا طالعنا مجموعه من قيادات الاخوان بمسلسل من التبريرات حول اللقاء وعن ما جري .
الامر الذي يتكرر للمرة الثانية خلال بضعة اسابيع حيث لم يمر سوي ثمانية اسابيع علي اللقاء الذي حدث في منزل السفير الامريكي في القاهره بين رئيس الكتلة البرلمانبية اللاخوان وزعيم الاغلبية بالكونجرس .
لم اكن انوي الكتاب في هذا الامر بسبب كثرة الاحداث حولنا وبسبب انشغالي بسبب الامتحنات الا انني رايت ان الحدث يتكرر بنفس السيناريو من قبل الاخوان والحكومة وهو ما استفزني للكتابة فيه .
وقبل ان نبدا في الحديث عن الامر نراجع التفاصيل التي تتكر كل مرة .
المشهد 1 : مجموعه من نواب الاخوان يقابلون مجموعه من نواب الكونجرس والذين غالبا ما ينتمون للاغلبية الديموقراطية بالكونجرس ليدور حديث محفوظ عن رفض نواب الاخوان لاحتلال العراق والسياسية الامريكية بالمنطقة وسياسية امريكا تجاه القضية الفلسطينية .
مشهد 2 : تخرج صحف الصباح تتحدث عن لقاء تم بين الاخوان والامريكان وينقسم الاعلام الي قسمين قسم يتحول لابواق ضد الاخوان تتهمهم بالعمالة لامريكا وجزء اخر يظهر فيه قيادات الاخوان لتبرر اللقاء وتروي ما حدث فيه بالحرف وتقول كالعادة ان الامر لم يكن يخص شان داخلي مصري ولا يخلوا المشهد ايضا من بعض الصحف التنويرية اياها - ذي صحيفة أمن الدولة الرسمية اياها - لتفرد صفحات كاملة تتحدث فيها عن اسرار اللقائات الظلامية بين الاخوان والامريكان .
اما هذه المرة فقد تم زيادة مشهد جديد وهو خروج السفير سليمان عواد المتحدث باسم رئاسة الجمهورية لينتقض اللقاء ويقول لما لا تتم هذه اللقائات مع نواب حماس بفلسطين في طريقة واضحة جدا لاستفزاز مشاعر الراي العام .
لا اعلم لما كل هذه الضجة وكل هذه المهاترات حول لقاء طبيعي جدا وعادي جدا من المفترض ان يحدث بين النواب البرلمانين حول العالم ؟
هل لان المتهم - اقصد الملتقي بهم من قبل نواب الكونجرس - اخوان ؟
أم لان نظامنا يعادي النظام الامريكي ويعتبر اي لقاء بين نواب مصريين وامريكان هو نوع من انواع العمالة في مشهد مستوحي من الحقبة الناصرية ؟
وبالطبع الاجابة علي هذا السوال سهل فكل هذه الضجة لانهم اخوان وهو امر لا يخفي علي احد
ولكن السوال الاولي بالاجابة لماذا يبرر الاخوان كل هذه التبريرات ولماذا يفردون الصفحات تلو الصفحات في تبرير مثل هذه الامور التي هي من حقوقهم الاصيلة ؟
فيكفي انه في السادسة صباحا طالعني صوت الدكتور عصام العريان علي موجات البي بي سي يبرر ما يحدث وكنت اتمني ان يرد علي المذيعه بقوله وهو فيها ايه يعني لما يقابلوا نواب من الكونجرس هو ممنوع ؟ بس كده بمنتهي البجاحة
اتذكر جيدا بعد اللقاء الاول والذي تم في منزل السفير الامريكي تدوينه اخي وصديقي عبد المنعم محمود - فك الله اسره - والذي اخد يروي فيها ما حدث بين السيناتور لامريكي ستيني هوياروبين سعد الكتتني بالحرف وقتها اعجبت جدا بالتدوينه ولكن سالت نفسي وهل مطلوب منا ان نروي كل ما حدث حتي يطمئن " القلقون " ؟
وهل بعد ما روينا ما حدث سكت الصوت واطمئن " القلقون " ؟
وهل يستحق لقاء لم يتجاوز الاربع دقائق تدوينه يستغرق قرائتها ربع ساعه فما بالنا بكم ما نشر حول هذا الموضوع والذي قد يستغرق ايام في قرائته
الامر مستفز للغاية ومثير للسخرية
فالمشكلة من وجهة نظري في طرفين
السلطة التي تري ان من حقها وحدها الاتصال بالعالم وانه حكر عليها دون غيرها ولكم في ايمن نور عبرة لانه تجرأ واتصل بالامريكان واصبح لدي بعض الامريكان أهم من مبارك نفسه
والطرف الاخر هم الاخوان الذين اصبحوا يتفنون في التفريط في حقوقهم
ولست مبالغا في كلمة يتفنون في التفريط في حقوقهم
فهم اعتقل لهم المئات وسكتوا
منعوا من جميع انواع الانتخبات وسكتوا
اغلقت في وجوههم كل الابواب وسكتوا
شردوا وطوردوا وصودرت اموالهم وسكتوا
اعتقل نوابهم المحميين بموجب الحصانة وسكتوا
بل ليصل الامر لتسليم انفسهم لامن الدولة ان صادفت ان داهموا منزل احدهم لاعتقاله ولم يكن موجود فيه ( كان ناقص يقدموا اعتذار ليهم كمان )
واخيرا يساومون علي حقهم في اللقاء بالاخر والحديث معه
كنت اتمني ان يكون رد الاخوان قويا بخصوص مثل هذه الامور ولن اقول هنا ان اللقاء تم بطلب من فتحي سرور رئيس المجلس او داخل قاعات المجلس او مثل تلك التبريرات فمن حق الاخوان ان يقابلون من يشائون في اي وقت يشائون في المكان الذي يرغبون - والي مش عاجبه يشرب من البحر -
اما بخصوص صحافتنا الغراء فلا استطيع اللوم عليها فهي تجد من مثل هذه اللقائات مادة خصبة للكتابة وبضاعة لها زبونها فلما لا تكتب ؟ ولما لا تفرد الصفحات ما دام كل يدلوا بدلوه سواء من قبل رئاسة الجمهورية وحتي الاخوان مرورا بروساء الاحزاب والنواب والوزراء والمثقفين واي حد معدي في الشارع .
واتذكر جيدا احد المواقف التي حدثت لي مع احد اصدقائي والذي يعمل بالمكتب السياسي لاحد السفارات الاجنبية في مصر وكنت في هذا اليوم علي موعد لالتقي به واتصل بي وطلب مني المرور غليه بمقر عمله بالسفارة ليصحبني للغداء في احد المطاعم القريبة من السفارة وكنت يومها اضع دبوس بدلة عليه شعار الاخوان المسلمين وقبل اقترابي من السفارة خلعت الدبوس وبعد ان النهينا غدائنا وكنا متجهين لاحد الموتمرات وفور دخولنا القاعه قمت بتثبيت الدبوس مرة اخري وعندما سالني عن السبب قلت له انني خلعته خوفا من ان يراني احد الصحفيين اياهم وانا ادخل للسفارة فيفرد صدر صفحة جريديته الاولي لخبر بعنوان انفراد جريدة مش عارف ايه تنشر تفاصيل اتصال الاخوان بدولة بطيخ استان وتروي تفاصيل لقاء احد قيادات الاخوان مع سفير بطيخ استان في السفارة البطيخية في القاهره
مع العلم ان عمري لا يتجاوز 21 عام لكن الصحفي الامعي سيجعلني بقدرة قادر زعيم اخواني ويجل من صديقي الموظف بالمكتب السياسي سفير الدولة كلها .
اخيرا احب ان اووكد انني لا استطيع اللوم علي النظام فهو يدافع عن نفسه وعن بقائه المرتبط بان يظل شعبنا في القمقم ولكني لا استطيع ان اخفي لومي للاخوان لانهم لا يزالون يساومون علي حقوقهم .
واما بخصوص من لا يزالوان يتحدثون عن العمالة للخراج اهدي اليهم هذه الصور لعلهم يخرسون

وكفاية كده الباقي انتم عارفينه

السبت، 26 مايو 2007

طب نخلي عندنا دم ونوقع للتضامن مع الاقصي

الحملة كانت هتفشل
بسي الحمد لله تم مدها في اخر لحظة بسبب تدافع الشباب للتوقيع علي الوثيقة
محدش بقه ليه حجه
ممكن نوقع في مقر نقابة الاطباء
ممكن نوقع عالنت من الموقع ده
http://www.ems.org.eg/hamlet_tawkee_aqsa/Hamla.html
او ممكن بلتليفون علي رقم
117940738-7943166
يبقي مش فاضل غير اننا نخلي عندنا دم ونوقع بقه

الأربعاء، 23 مايو 2007

الفتة الطائفية ( 2) حيث الطائفية هي الحل

في التدوينه الماضية خضنا في ما اعتقدت انه اسباب الاحداث الطائفية في مصر وما فضلت انا ان اصفة بالفتة الطائفية
وفي هه التدوينه ساحاول ان اخوض في الحلول ولكن اعذروني علي الاختصار الشديد لاني لا املك الكثير من الوقت بسبب الامتحنات وياريت تدعولي
بما اننا قد قمنا برصد اسباب الاحداث الطائفية فمن الموكد ان حلها اصبح سهلا اكثر فما علينا سوي ان نحضر كل سبب علي حدي ونقوم بحله و هي ده بالضبط الطريقة التي لن اتبعها مطلقا
من الاخر
أنا فكرت سريعا في حلين للطائفية اتمني اننا نتناقش حولهم
الحل الاول
ان قلته في صورته العادية سيقول اغلبكم يووووووووووووووووووه هو انت منهم ؟ ويغلقون الصفحة فورا
لذا تصور معي الحوار الاتي
مسول : يا اهالي بمها الكرام عيب قوي الي بتعملوه ده ده مخالف للدستور لان الدستور بيقول في مادته التانية ان المواطنة شئ اساسي وانتم كده بتخالفوا الدستور
أهالي بمها : اصوات صادرة من الانف مع ترديدهم لاسماء افعال بمعني اعترض كلنا عارفينها طبعا ذي الي انت قلتها بالضبط اول ما قريت الجملة الي فاتت
طيب تصور الحوار ده
شيخ او قسيس : يا جماعه عيب كده دينا قالنا ان ده حرام والي انتم بتعملوه ده حرام يوديكم النار في ستين داهية باذن الله
أهالي بمها : ينكسون رؤسهم
وهذا بالتاكيد رد فعل طبيعي خصوصا لو علمنا ان ما قاموا به كان بسبب الحمية للدين - كما يدعون - فما بالنا لو ان الدين يحرم ما قاموا به اصلا ولا يمنع بناء ور العبادة لمعتنقي الديانات الاخري ؟
ونلاحظ ان رجل الدين الي يقول الجملة المذكورة يجب ان يكون رجل دين محبوب وليس من بتوع البول او ارضاع الكبير ويا حبذا لو كان شيخ المسجد التي خرجت منه المظاهرات
من الاخر يا جدعان عشان مرغيش كتير الحل الاول من وجهة نظري هو الدين وليست المواطنة التي لطعت في الدستور من غير اي لزمة
الحل اننا نرجع لصحيح الدين الي استطاع بيه المسلمين يعيشون به في الاندلس مئات السنين في اعظم مثال ضرب علي مر التاريخ في التسامح
والي عنده اعظم يوريني
الحل التاني
هو الطائفية
نعم الطائفية وانا اقصد هنا ان نقوم بتقسيم المجتمع لطائفتين كبيرتين الاولي هي طائفة الظالمون من اتباع النظام واعضاء الحزب الواطي وزبانية النظام الحاكم والطائفة الاخري هي طائفة المصريين
فانا اري ان المستفيد الوحيد من كل ما يحدث من احداث طائفية هو النظام المستبد فهو عندما يشعل الخلاف بين طوائف الشعب يستتب له كرسيه اكثر لانه لن يتفرغ احد لمواجهته وكما يقول الكواكبي في تحفته كتاب طبائع الاستبداد ان الغوغاء هم خط الدفاع الاول لاي طاغية ونحن عندما نقع تحت طائلة الطائفية فنحن نضرب اكبر الامثلة علي الغوغائية

الي هنا اكتفي بما سردته
وانتظر وجهات نظركم حول القضية
وانا مؤمن جدا ان دورنا كدعاه للاصلاح في ها البلد المنكوب يحتم علينا ان نولي اهتمام خاص جدا بهه القضية
يعني نتوصي بيها

منعم الذي لم يغيره السجن ولكن هو من غير السجن


يخرب عقلك يا منعم
ضحكتك متغيرتش
شياكتك متهزتش حتي
لسه ذي ما انت بس فاضلك البدلة والموبيل i-mate
اقولكم سر
بعد ما اتاخد منعم كنا قاعدين انا ومجموعه من الشباب بنتكلم ممكن نعمل ايه لمنعم
أنا اقترحت نلم ونجيب له بدلة بيضاء بس شيك وقميص ابيض بس يكون ماركة
لان منعم مينفعش يبقي مش شيك حتي في السجن
بس برده من غير بدلة القمر ياواد
ولا قولي
مين الي حالق ليك الحلاقة الشيك ده في السجن ؟
منعم.... بجد وحشتنا كلنا
وبجد انا متاسف لاني قصرت معاك ومجتش العرض ده برده
لاني برده كنت مسافر
ويارب ترجع لنا بسرعه بقه

* الصورة نقلا عن http://freemonem.cybversion.org/
الصورة الاصلية



ربنا يفك سجنك يا نور

وحشتنا يانور
لغاية دلوقت فاكر ايام الانتخبات
ايام ما كنت بشتري كل يوم الغد ابو ربع جنية
أيام ما كنا سامعين صوت عالي بيقول لا ضد الي بيحصل
لسه فاكر ايام ما استينا قدام محطوة مترو حلوان الساعه 1 بليل لانك كنت جاي في المترو
ربنا معاك يا نور في الجلسة الجاية
وان شاء الله براة وترجع لنا بالف سلامة







أدعم نور وزور موقع الحرية لنور

http://www.freeaymannour.org/

السبت، 19 مايو 2007

الفتة الطائفية

في غاية الاسف

أعتر لان التدوينه نشرت بالامس دون السماح بالتعليقات وهو خطأ غير مقصود بالمرة وننتظر تعليقاتكم
---------------------------------------------------------------------
أولا احب اقول ملاحظتين
1- التدوينه ده كتبتها قبل كده من حوالي 5 ايام بس الجهاز هنج واتمسحت وللاسف هي مش في مستوي القديمة
2- العنوان مفهوش اي خطا لغوي
قبل ان ابدا الحديث في الموضوع احب ان اوضح شئ هام جدا ان الطائفية هنا لن اتحدث عنها باعتبارها مسلمين ومسيحيين فقط بل ساتحدث عنها باعتبار كل الطوائف الموجوده في المجتمع المصري واحب هنا ان اروي قصتين كمدخل هام لما ساقوله .
القصة الاولي حدثت لي منذ ايام حين قادني حظي لمشاهدة فيلم وثائقي علي الجزيرة الوثائقية عن النوبة المصرية وما يحدث بها وعادتها وتقاليدها وكان سوال المعد اخر الفيلم لكل من شاركوا من اهالي النوبة عن انتمائه فكانت الاجابات مفجعه لي وصادمه فقد جأئت الاجابات كلها بين نوبي ثم مصري أو نوبي فقط أو نوبي مصري المهم في الامر انه دائما ما قدم الضيوف نوبيتهم علي مصريتهم او عربيتهم أو حتي اسلاميتهم وكان تعصبهم للنوبة هو الظاهر عليهم للغاية .
القصة الثانية والتي روتها لي احد الزميلات المسيحيات فهي تروي لي انها كانت مع بعض اصدقائها من مسلمين ومسيحين علي مقهي بوسط البلد ولاحظت علي المنضدة المقابلة أمرأة واضح انها اجنبية بصحبة رجلان وفجاة لاحظت أن المراة تخلع سلسلة من رقبتها من الواضح انه كان معلق بها صليب وتخرج من حقيبتها حجاب تحاول ارتدئه لكنها لا تستطيع لكبر حجم الحجاب فيستاذن أحد الرجلين المرافقين للمراة أحد الشابات المسلمات التي كانت بصحبة زميلتي المسيحية حتي تساعدها في ارتداء الحجاب وتقوم هي وتقوم معها زميلتي المسيحية وتقوم بلف الحجاب لها ويهنوئنها علي الخطوة التي اقدمت عليها وتروي لي زميلتي انها قدمت لها تهنئة ثم قررت ان تنصرف فورا وتقول في الطريق احسست ان واجبي هو ان اساعدها وان أهنئها ولكن هذا لا ينفي احساس بالمرارة احسست به .
الي هنا تنتهي القصتان لتطل علينا قصة جديدة هي قصة بمها .
باختصار شديد الامر لا يحتاج مراكز متخصصه او باحثين أو خبراء ليقولون لنا ان مصر بها توتر طائفي وان ظهر علي السطح أن الماء راكد فهو في الاسفل يفور وأعتقد ان السبب في هذا عدة اسباب هي .
1- من ما درست من الرياضيات واصول الاحصاء فان كل القوانين والبراهين التي اعرفها تقوديني الي نتيجة مهمه ان السبب الرئيسي في اي أحداث طائفية هي الطائفة الاكبر والاقوي بكل تاكيد وهي التي في حالة النوبة المصريين من غير النوبيين وفي حالة بمها هم المسلمين المصريين فانا لا انكر ان المصري علي وجه الخصوص يحب الاحساس بالقوة وسط اهله ومجموعته سواء كانت المجموعه هي اسرته او عائلته او بلدته او أهل دينه وهو ما يجعل اشتعال مثل تلك الامور بالامر الهين .
2- الكبت السياسي الذي يعاني منه الشعب المصري كافة بجميع طوائفه ، فاغلب المصريين يعانون من الاضهاد علي يد النظام وزبانيته وهو ما يجعل أقل ثورة لهم تحدتث احداث كارثية والدليل علي ذلك أحداث متثل أحداث التحرش الجنسي فالشباب أندفع تحت حب الخروج عن القانون والنظام الذي يمقته واحس انه قوة بسبب عدده الكبير .
3- الجهل التام بكل طائفة بالاخري فقلما تجد مسلم يعلم الكثير عن العقيدة المسيحية وقلما تجد مسلم دخل كنيسة قبل ذلك وكذلك المسيحي هو يسمع ان المسيحي يمارس الجنس بالكنيسة وان الكنيسة بها اسود تاكبل من يرتدون عن المسيحية والي أخر القائمة من الخرافات المتبادلة من الطرفين وحتي علي الصعيد القومي فلا نجد مصري الا القليل يعلم شئ عن عادات اهل النوبة والجهل بطبيعة الحال يودي الي حالة من الخوف من المجهول .
4- الحيادية فنحن في مصر اقل شعب في العالم يتمتع بالحيادية ، ففي مصر معني لتك الكلمة نهائيا .
والاسباب بعد كده تتعدد مثل القبلية وغيرها من الاسباب التي هي أعمق من عناق حار - حتي لو كان بالشطة والليمون - بين شيخ الازهر وبابا الاسكندرية .
لهنا وكفاية وكتير يسال طب ايه فايده القصتين والخمس اسباب اقول ان فايدتهم اننا نشغل مخنا في اسباب المشكلة والحلول لانه بجد لو مواجهناش المشكلة ده بلدنا هتخسر كتير .

الأربعاء، 16 مايو 2007

لما منعم يتكلم كلاب الحكومة تخرس

من خلف القضبان جاء صوت منعم
جاء حيا ... نابضا بالحب والامل .. نابضا بحب الوطن
من خلف القضبان جائت تدوينه منعم التي طالما انتظرتها وانتظرها غيري الكثير
وأهم ما في التدوينه طبها انه جاب سيرتي وواضح لسه انه مش مصدق اني من مدوني الاخوان
سلامي ليك يا منعم يا احلي مدون في احلي فراغ افتراضي
أسيبكم مع تدوينه منعم
سلام من وراء القضبان
من سجن القاهرة المحكوم بطره اكتب أولي تدويناتى السجنية ..في هذا المكان الذي تختلط فيه المشاعر والأحاسيس بين الظلم والأسر والشوق للحرية ..للأصدقاء والشوق للوحة الكيبورد التي كنت اعزف من خلالها صورة مقرؤة ومرئية لمصر
أكتب وانا انظر للقضبان التى تحول بيني وبين الحرية ..تحول بيني وبين أصدقائي وعملي ومدونتي ..حتى انها تحول بيني وبين السماء الصافية فقد ارتسمت علي سحبها هذه القضبان التى حتى لم تترك القمر في عيني حرا
في هذا المكان الكئيب احاول الهروب منه في التفكير في أناس وأماكن وإعمال يربطني بهم الود وعندما احاول ان احاكيهم واتفاعل معهم ياتي السجان ليغلق باب الزنزانة بعنف ليذكرني انني محروم منهم وليس لي ان القاهم الا في الخيال
أبي وأمي
في هذا المكان يثور عقلي ليلا ونهارا وأتذكر والدي الذي لا استطيع ان اراه وهو ايضا في هذه المرة عاجزا ان يراني فقد اعياه المرض واقعده خبر اعتقالي للمرة الثالثة فاصبح اسير احدي اسرة المستشفيات بالاسكندرية
اما امي التى كان حضنها لي في هذا المكان يخفف كل الام السجن مر النهر ولم استطع ان اراها لانشغالها برعاية والدي لكن عزائي ان الله عزوجل من وراءهم حفيظ وارحم بهما مني
مدونتي انا اخوان
تلك المدونة التى تفزع هذا النظام المهترا ؟..يااااااااه كم اشتاق اليها فقد كانت هي شريكة حياتي ، افكر فيها طوال الليل واعمل لتطويرها في النهار
اسلام لطفي كان دوما يقولي المدونة ده جنتي
أنا أخوان . رسالتى لنفسي ولشباب الاخوان والمجتمع …كنت اريد ان الاخوان بشر يحملون نفس الاحلام فال ..نشرب ..نجلس علي القهوة ..ندخل السينما ..نتظاهر …ندون للحرية
انا اخوان ..رسالة انسان مصري ينتمي لحركة اصلاحية ..بيحب مصر ويريدها ان تتحرر من الاستبداد والديكتايورية والفساد
انا اخوان ..رسالة مصرية للتعايش شيوعي …قبطي ..علماني ..اخواني ..المهم بيحب مصر
ولأصحابي سلام
وصلني تضامن كثير من الناس منهم الأصدقاء اللي اعرضهم ومنهم ناس لا اعرفهم ولا هم كانوا يعرفوني بس كتبوا عني واعلنوا عن تضامنهم معي والمطالبة بالإفراج عني لكن أحب في البداية ابعت سلامي واشواقي لشلة الثقب وخاصة محمد. واسلام …مفتقد دردشة محمد اوي ..يااااااه فاكر نبقي سهرانين طول الليل وتيجي توصلني وبرده نقعد نحكي تاني واخرك علي البيت
اسلام لطفي اللي كنت مغلبه معايا بعد القصاص ..تعالي نروح نتغذي هنا ونروح لفلان -طيب ااقولك ايه مش عين شمس جنب اكتوبر (بيته )!!تعالي وصلني وحنرجع بسرعة والله وحشتنب غلاستك اوي يا اسلام
وكمان لازم أوجه الشكر لناس كتير مش بس اللي تضامنوا معي واللي سالوا عني وعن امي ووالدي
-ايمان الزميلة الوفية اللي بتشيل يلاطلبة لما بدخل السجن وكما ربنا يكرمها بتجمع لي اوراق الدبلومة من الكلية
-خالد سلامة : المفكر الكبير اللي وداني في دهيه وقعد يشجعني دون يا منعم – اكتب يا منعم ماشي يا عم خالد شفت اخرتها المحكوم
-وشكر خاص لمدونين فاقت علاقتنا الشبكة العنكوبتيه
علاء سيف ومحمد عادل واسد واحمد عبد الفتاح وحسام الحملاوي وشرقاوي ونورا يونس ووائل عباس وسامي غربية في تونس وناس كتير اوي ثانية
وشكر خاص لمارك لينش اللي يعتبر اول كاتب غربي يرصد فكرة مدونات الاخوان وكتب عن اخوان التدوين في الجارديان
-وشكر خاص للاخت الكبري والصديقة العزيزة الصحفية نادية ابو المجد اللي بيوصلني سلامها علي طول
- وسط البلد
الحب مش شرط يكون بين البشر بس – فيه علاقة عاطفية قوية بتربط الناس باماكن معينة ..انا بعشق وسط البلد
بحب اوي طلعت حري وباب اللوق وعابدين والسيدة ..والتحرير والمنيرة والقصر العيني ياااااااااااه والله وحشني شاي عم سعيد علي الندوة الثقافية واكل شلبي او حتى مؤمن وكمان وحشني سندوش ” كروك مسبو ” والبرتقال من عند كوستا اللي جانب الجامعة الامريكية
وانا قاعد سرحان مع المدونة علشان هناك فيه “واي فاي”
واخر الليل اروح لبتاع الجرايد اللي في شارع المنصور علشان اكمل الليلة علي الجرايد
-وحشني صحبي القصاص
محمد القصاص القلب الكبير واعز واغلي الاخوان والاصحاب لما دخل القصاص السجن مكنتش قادر اتخيل اني يمر علي ليلة من غير ما اشوفه لدرجة اني كنت كل شوية اطلع رقم تليفونه علي الموبايل علشان اكلمه لكن يرد التليفون انه مغلق فافتكر ان القصاص في السجن ومش هقدر اني اكلمه
بس كان فيه فرص اني ازوره هناك
ولما تم القبض علي اللي هون علي اني هتحبس معاه في مزرعة طرة ، لكن كنوع من تكبر امن الدولة قرر انه يفرق بينا وروحنا اقذر سجن في مصر ” المحكوم ”
والله ليك وحشه يا ابو القصاقيص
-سارة وانس وسلمان وحبيبة ..ايمن عبد الغني
من فترة قبل حبسي كتبت عن صاحبي الكبير المهندس ايمن عبد الغني المحال مؤخرا لللقضية العكسرية
ايمن زميل برش قديم -اتحبست معاه اول مرة في حياتي سنة 2003 وبعد كده 2006 -المهندس ايمن الكبير السن والمقام قلبه زي الطفل رقيق قوي وبيحب اخوانه جدا وكان مسخر نفسه وبيته وزوجته لخدمتنا في السجن
كان دائما يسيب عياله في الزيارة يلعبوا معي ومع امي علشان يعرف يقعد شويه مع زوجته
في السجن انا ارتبطت جدا باولاده بداية من سارة المشاغبة وانس وسلمان وحتى حبيبة اللي عمرها سنتين
لما كنت بشوف ولاده المرة كان كان سليمان يقول هو انت ليه مش مع بابا في السجن اصل سلمان واخواته تعودوا رؤيتي في السجن دائما مع ابيهم
واديني دخلت السجن يا عم سلمان بس مع مع بابا ومش قادر اشوفك بس والله وحشتني جدا
-مدوني الاخوان
يمكن التدوين عند الاخوان بدا في وقت متاخر اوي لكنهم في وقت قصير استطاعوا انهم يبرزوا انفسهم وفكرتهم بشكل راقي
استطاعوا ان يطرحوا صورة انسانية عن جماعة الاخوان المسلمين وعبروان عن انتمائهم بكل حرية وجراة
واتمني ان التجرية تكون بتمنوا اكثر واكثر
وخاصة مدونة انسي اللتى استطاعت ان تنافس الاعلام التقليدي للدفاع عن المحالين للقضاء العسكري وايضا الشباب والبنات القائمين علي مدونات ضد العسكرية سعد وخديجة واسماء وبلال وال شوشه ومعاذ
وايضا شباب الاخوان المدونين ؟؟ ابن تاج -صوت عصفورة -لسان مولوتوف -يلامش مهم -وابن خلدون
ياشباب انتم اصبحتم تشكلون جيل من الاخوان واصبحتم مسئولين عن تقديم صورة انسانية عن الجماعة -جيل جري هيقدر يشيل هم الاصلاح في البلد دي
-بحبك يا مصر
رغم كل اللي حصل سجن وتعذيب وفساد وفقر -برضه بحبك يامصر -يمكن اكون فكرت اسيبك – لكن مقدرش اكرهك ابدا
بحبك يا مصر وعايزك حرة وحفضل ادون واكتب واتظاهر لحد ما تبقي حرة

في ذكري النكبة ... هل نتزكر الاقصي ؟




في ذكري النكبة تعجز الكلمات عن وصف الاحساس
ولم اجد أفضل من ذه الصورة تصف الاحساس

يارب الي في فلسطين يفتكروا الست ده

* الصورة نقلا عن مدونة شهروزه

الثلاثاء، 15 مايو 2007

حصة فلسفة حول فلسفة الهكونا مطاطا

التدوينه ده تدوينه قديمة كتبتها من كا شهر
بس لما لاحظته من حالة الياس والاحباط الي حوليا
قررت اني اعيد نشرها
ويارب ينفع بيها

أهلا بسكان كوكب الارض المكشرين الزعلانين المعقدين دايما من غير سبب ..

أهلا بيكم علي مدونتنا التي لا تسمح ابدا بالكائبة والاكتئاب

اليوم سنخوض في فلسفة هي من اهم فلسفات الحياة أو بالاحري هي فلسفة الحياة عامة أنها فلسفة الهكونا مطاطا

وواضع فلسفة الهكونا مطاطا - ده لو كان ليك دراية وعلم بافلام الكرتون - هو العالم الجهبز والشخصية الالمعية النمس النميس تيمون وصديقه الاجهبز منه والاتخن منه بومبا أبطال فيلم الكرتون العالمي الملك الاسد .

تيمون وبومبا حطوا الفلسفة ده عشان يعلمونا اذاي نعيش ، أذاي نضحك ، اذاي نفرح ونجري ونقضي الحياة بالطول والعرض وسنبكسات - يعني بالورب -

يقول تيمون في تحفته خالده الذكر في شرح فلسفته الهكونا ماطا طتيه " هكونا مطاطا يعني اضربها طبنجه " ويزيد عليه صاحبه بومبا ويقول " دايما صاحبي تيمون بيقول لما الدنيا تديك ظهرها ادي ظهرك للدنيا "

بس

أيه الجمال ده يا رجاله بجد مش كلام يجنن ؟؟

من الاخر للي مش فاهم هكونا مطاطا هي دعوه للحياة دعوه للحب دعوه للحرية دعوه لنبذ الاكتئاب والضحكة الي من القلب الي بتسمع العالم كله ، دعوه اننا نعيش الحياة ذي ما هي لازم تتعاش .

ببساطه عيش يومك أرمي همومك وراء ظهرك ذي ما قال تيمون وبومبا في اغنيتهم الي بتتكلم عن الموضوع ده كانوا دايما بيقولوا :

هكونا مطاطا ... غنوه نغمها لذيذ

هكونا مطاطا .. انسي الماضي الي يغيظ

أنساه والمستقبل أديه كل التركيز

هذا هو البهريز السنتفيس

هكونا مطاطا

بذمتكم فيه اسهل ولا اجمل ولا احلي من كده

يله فكوا التكشيرة ده وقولوها من جوه قلبكم وبصوت عالي هكونا مطاطا ... ايوه متعمليش مكسوف لانه مينفعش تتكسف تعيش حياتك لانها حياتك وهتعيشها مرة واحده بس يبقي عيشها ذي ما تحب مش ذي ما الناس تحب .

يله ومتنسوش سهله خالص هكونا مطاطا


الأحد، 13 مايو 2007

أعتذار ... وطلب

السادة زباين يالالاللي الكرام
ناسف عن شكل المدونة والذي كان يتغير باستمرار اليوم بسبب تغير التصميم
ونرجوا من سيادتكم ابداء رايكم حول التصميم الجديد باستطلاع الراي الموجود بالصفحة
وتشكروا علي تعبكم معانا







أيمن نور اضرب واتسب له الدين

في اذهي عصور التنبلة أصبح الحدث يحدث ولا نوليه اي اهتمام يذكر مهما كان وزن هذا الحدث .
في موريتنيا أصدر الرئيس أمرا بان يعامل من حصل علي المركز الثاني بالانتخابات المورياتنية معاملة أفضل من وزير في الحكومة وفسر هذا بان هذا الشخص - الحاصل علي المركز الثاني - يحبه مجموعه كبيرة من الشعب قاربت 40% منه ، اما في بلدنا المنكوبة مصر فالامر يختلف فايمن نور الحاصل علي المركز الثاني بالرغم من كل ما حدث من تزوير وانتهاكات في الانتخبات المزعومة يعمل معاملة مجرم جنائي - وان كان المجرم الجنائي لا يعامل هذه المعاملة في اي دولة محترمة او حتي نصف محترمة .
أيمن نور تعرض اليوم للضرب علي يد لواء شرطة ومقدمين ورائدين شرطة اثناء ترحيله لمحكمة الجيزة من سجن مزرعة طره ليحضر احد القضايا ، لم يكتفوا فقط بضربه ولكن الامر وصل للسب والقذف ( وسب الدين ) .
طالع هنا نص بلاغ ايمن نور
فاي بلد هذه التي نحيا فيها ؟

الأربعاء، 9 مايو 2007

متهم جديد ... بتهمة جديدة خااااااااااااااااااالص

اولا بخصوص منعم وقضية طلاب المعهد الزراعي فانا للاسف لم احضر عرض النيابة ومن الممكن لمن يريد التفاصيل ان يزور
ميت - انسي - أخوان اون لاين - أخوان ويب

والصورة لطالبين قاما بتسليم نفسيهما اليوم للنيابة في نفس القضية " فك الله اسرهم واسر كل شريف واصلاحي

ثانيا مبروك ومليون الف مبروك لشرفاء الوطن واصلاحيه لخيرت الشاطر واخوانه علي الحكم التاريخي ببطلان قرار رئيس الجمهورية


ثالثا موضوع متهم جديد ........ وتهمة جديدة خاااااااااااااااالص
انا ولله الحمد دلوقت في القاهره وصلت من ساعات فقط وبصراحة شديدة لم اكن ارهن كثيرا علي امكانية وصولي للقاهره قريبا والسبب ببساطة انني اصبحت شبه مطارد في الفترة الاخيرة وكنت ابيت كل يوم وانا انتظر قدوم زوار الفجر وبعثة كسر الابواب التابعة لهم لاصطحابي الي رحلة المجهول .
الموضوع ببساطة بداء منذ حوالي 25 يوم عندما جأئني احد المعيدين في الكلية والذي كنت علي خلاف معه في الاصل وصل الي حد طلبي من رئيس القسم ومشرف المادة تغيريه من سكشن دفعتي وطلبت رسميا انا ودفعتي ان لا يدرس لنا هذا الشخص ، فوجئت بهذا الشخص في احد الايام ينادي علي ويقول " أحمد تعالي عايزك " ومشي معي في احد ردهات الكلية وعندما اصبحنا وحدنا قال لي " أنت ليك مشاكل ايه مع الامن ؟ " أجبته مفيش غير اني في سنة أولي اتخانقت مع دكتور وأخدت أسبوعين فصل عادي يعني " قالي وايه تاني ؟ " قلت له " غير اني من طلاب الاخوان وهذا امر معروف مفيش " قال لي " لا انا قصدي حاجه تاني " قلت له وما هي هل يوجد جديد ؟ " قال " أه فيه امين شرطة من امن الدولة بلدياتي بيجي الكلية بقاله اسبوع بيسال عليك وبيقول انك ناشط حقوق انسان " لم اتمالك نفسي من الضحك وقلت " وهي حقوق الانسان بقت تهمه ؟ " قال " أنت عارف يا ابو حميد هنا اه تهمه ونص وعالعموم هو عرف اني بدرس لك في السكشن وسالني عنك وعن الي بتقوله لزمايلك وكده وانا قلت له انك واحد كويس وطيب وعادي جدا ذي زمايلك بس شايف نفسك بس وبتلبس كويس وبتلبس نظارة نظر غامقة لانك من القاهره وغاوي منظره " قلت له " كتر خيرك يا دكتور مكنش له لزمه تتعب نفسك " قالي " لا ابدا انت ذي اخويا وانا خايف عليك وخليك جنب الحيط .... الخ " وأمطرني بسيل من النصائح اياها الذي يحفظها جميعنا .
وعرفت منه ان من ابلغ عني هو احد العصافير زميل لي في الدفعه اعلم جيدا انه عصفور وتاكدت من هذا بانه سرد لي كل التفاصيل التي كان يعلمها هذا العصفور بالنص دون حرف زائد او ناقص لتتضح لي الصورة .
الامر ببساطة ان احد اصدقائي الاعزاء والذي يعلم عني الكثير دردش بحسن نية مع هذا العصفور الكبير وحكي له عن انبهاره بشخصية احمد والانشطة الغريبة التي يقوم بها والمحاضرات الدورات والكام مرة الي شافني فيهم عالجزيرة ... الخ ليمارس هذا العصيفر - تصغير لعصفور - ويبلغ الغربان الكبيرة والتي تعاملت مع الامر بمنتهي الجدية فتحرت عني واصبحت انا بكل بساطة متهم .

قلت ايه ؟
قلت متهم
سمعني كده قلت ايه ؟
قلت متهم
والتهمة ايه ؟
والتهمة اني ناشط حقوق انسان
بتقول ايه ؟
ناشط حقوق انسان


وذغرتي يا بهية علي القوانين ذي ما قال عمنا نجم ففي زمن مبارك لم تصبح حقوق الانسان فقط ترف وبدعه لا اصبحت بالمرة تهمه .
ابلغت احد اخواني بالجامعه والذي دهش وقال لي " طب اخوان وعارفين ديتها ايه وههتتحبس فين وهنعرف نبعت لك محامي او تترفد لك اسبوعين بالكتير تيرم لكن حقوق انسان ده ديتها ايه " قلت له "علمي علمك " فاجابني " ان الموضوع خطير ولازم تاخد بالك " .
ومر الوقت وقاربت ان انسي الموضوع حتي حدث صدام بين احد الطلاب من دفعتي مع نفس المعيد ووصل الامر الي ان ذهب الطالب للعميد وقال انه سيرفع دعوي سب وقذف ضد المعيد وتدخل رئيس القسم وهذا الوضع وقابل المعيد بالطالب ولان هذا المعيد الالمعي " مسحوب من لسانه " قال امام رئيس القسم والله انا بحبهم والدليل ان فيه واحد منهم وقع في مشلكة مع الامن وانا عملت كذا وكذا وكذا وقال وانا ممكن اعمل عكس كده مثلا مع محمد - الطالب الشاكي - واوديه في داهية .
بالطبع شعر رئيس القسم بانه اهين لان معيد لا طلع ولا نزل بيهدد طالب قدامه وقدام لفيف من دكاترة القسم ليطلب من الطالب - محمد - ان يغادر الغرفة ويبلغني محمد بما حدث لاعلم ان الموضوع مازال مفتوح وان هذا المعيد يمكن ان يستغله ضدي وخصوصا بعد علمي عن طريق سكرتارية القسم ان قرار رئيس القسم بمنع هذا المعيد من البعثات الخارجية - وهو عقاب صعب للغاية - ومنعه من التدريس لطلاب الفرق الثالثة والرابعه .
كثير نصحوني بتغير محل اقامتي واتخاذ بعض الاحتياطات الامنية وخصوصا بعد القبض علي 8 من طلاب الاخوان زملائي في الجامعه أول امس وتعذيب اثنين ونهم وتحويل 6 للنيابة وتلفيق قضيه لهم ولن اخفيكم سرا فقد جلست 10 ايا م انتظر كل يوم قدومهم ولكنهم لم ياتوا .
واخيرا وصلت للقاهره وكان من المفترض ان امكث بها 3 ايام لاعود للكلية واذاكر اسبوع قبل الامتحنات ولكن بعد ما حدث قد اضطر الي البقاء بالقاهره مدة اطول ولا اعود الا في وقت الامتحنات .
أخيرا اقولها وبكل فخر

اتحرقوا بجاز وسخ
انا مش هبطل
سلطوا كلابكم وعصافيركم واي حيوانات منكم وصدقوني حتي لو رحت انا فمصر فيها ملايين غيري هيطلعوا عينكم
واذا كنتم اتهمتوني اني ناشط حقوقي
فده شرف كبير يارب اكون قده
واهدي اليكم بعض الصور لي في بعض الانشطة الحقوقية يمكن تنفعكم في ملف القضية








ولو عايزين فيدو كمان موجود عالمدونة

وعلي الهامش

لا استطيع اخفاء دهشتي من تقبل رئيس القسم والاستاذه بمتهي البساطة وجود الامن داخل الكلية بل والسكاشن وسوال المعيدين وان ظهر الامر طبيعي في ظل دولة البوليس التي نحيا بها ولا اخفي في نفس الوقت تحيتي للرئيس القسم علي وقوفه بجانبنا.

قال لي احدهم : لم لا تسافر وتريح دماغك قلت له واسيبها لهم مخضرة ده بعدهم ده بلدي وانا قاعد فيها ومش هسيبها والظالم والحرامي والطاغية هو الي هيمشي منها .

ترردت كثير قبل كتابة هذه التدوينه فهي وبلا شك ستقلق كثير ممكن يحبوني علي وعلي احوالي وفي النفس الوقت قد تفهم خطا من جانب البعض وبالفعل لم اكن اتوقع ان اقدم علي كتابتها لولا ان التهمه الجديده تستحق منا الكتابة والتحدث ولنري سروية ما وصل اليه حالي مصرنا المنكوبة ، اتمني ان لا يقلق احد علي فانا بخير والحمد لله واعي تماما اين اضع قدمي قبل ان اخطوا اي خطوه .

الاثنين، 7 مايو 2007

غدا المفاجأة الكبري

بكره كله يشتري المصري اليوم ومحدش يقولي المخبر اليوم وجرنان امني ومقاطعه
كله يشتريه وينتظر المفاجاة في صفحة 14

صباح الانتماء ...صباح الوطنية

كتير بسال
فين انتماء الشباب للبلد ده
وجري ليه ايه ؟




الأحد، 6 مايو 2007

ولا تزال الانابيب تنفجر

النهرده ولع البيت رقم 5 في حي الوليدية باسيوط في اقل من 3 شهور بسبب انبوبة بوتجاز كالعاده .
الوليدية للي ميعرفهاش عبارة عن اكبر منطقة عشوائية في الصعيد .
السؤال المهم هنا انهي اهم بالنسبة للسيد وزير الجاز قصدي البترول أنفجار الانابيب في الوليدية ؟ ولا صعود بترول اسيوط للدوري الممتاز ؟

الجمعة، 4 مايو 2007

أحمد منيب يغني لمنعم

مش عارف ليه اول ما سمعت الاغنية حسيت ان صوت ارض الدهب احمد منيب بيغنيها لاخويا الي مفتقده جدا عبد المنعم محمود
منيب في اغنيته بيحكي قصتين الاولي لعصفور حبسوه ومنعوه من الطيران والقصة التانية لواحد بيحب بلده وعايز يخليها احلي
الحالتين بجد حسيت انهم منطبقين تماما علي منعم وحسيت ان الاغنية ده اتعملت عشانه




الخميس، 3 مايو 2007

أعتذار

أخواني المدونيين أخباركم ايه؟
أنا بصراحه عايز اعتذر ليكم أنا بقالي كتير مبزرش مدونات أو أعلق في مدونات وده مش لاني مشغول واني ذي ما الكل بيقول بس بجد انا مليش مزاج ومفياش دماغ عشان اعلق علي مدونات ده سبب والسبب التاني اني بره القاهره كالعاده ويا دوب بقعد عالنت في سيبرات بالساعه وده مخلي التدوينات الي مقرتهاش عالجوجل ريدر تفوق المئة تدوينه .
أوعدكم اني ارجع قريبا للمتابعه ولحاد لما ارجع متقطعوش الكمنتات .
نسيت اقولكم انا مش هنقطع عن التدوين اثناء الامتحانات لان التدوين ده حاجه في دمي واعلنها عالية مدوية التدوين لاخر يوم واخر رمق في حياتي وواخد بالك يا جاري انت وهو الي بلقح عليك الكلام ؟

بمناسبة الجو الجميل اليومين دول

فرحت جدا لما لقيت الاغنية ده علي احد اجهزة السيبرا ت الحقيرة الي بقعد فيها في اسيوط .
الاغنية ده والي اكيد ارتبطت بايام الصبا والمعيلة لكل واحد فينا مكنتش اعرف مين الي بيغنيها بس اكتشقفت امبارح بس ان الي بيغنيها هو صوت ارض الدهب الجميل الي اغلبنا ميعرفهوش أحمد منيب .
الاغنية ده انصحكم تسمعوها يومين الحر الجمال الي احنا عايشنهم اليومين دول وهتديكم احساس رائع بالانتعاش ، جلربوا وابعتوا رايكم .
واسيبكم مع الغنية

الثلاثاء، 1 مايو 2007

جورج اسحاق في اسيوط بيفك خناقة


أمبارح قاعد في امان الله في الشقة الفخمة جدا الي ساكن فيها في اسيوط ومندمج للغاية مع كتاب الجوامد الجامد جدا وبالتحديد وانا في باب نظرية الالكترون الحر رن موبيلي بالنغمة الرخمة اياها وكان الي علي الخط الحسيني أمين شباب الحزب الناصري باسيوط والطالب في كلية الحقوق في اسيوط وصديقي العزيز بالرغم من انه اطول مني باكتر من نص متر ، حسيني قالي فينك يا احمد عايزك ضروري في الحزب جورج اسحاق جاي الحزب بعد شوية الساعه 7 .

الخبركان مهم اكيد بالنسبة ليا وكان قدامي نص ساعه عشان ابقي في الحزب وبالفعل لبست ونزلت وحاولت اتصرف في كاميرا بس صديقي الندل الي معاه الكاميرا فرقعني ومجاش يحضر اللقاء ، المهم وصلت الحزب لقيت المجموعه اياها بتاعه كل مرة موجوده محمد فاضل الناشط في كفاية والمشاغب اياه واثنين من اصدقاء الحسيني ومحمد فاضل في الكلية وكان الوجه الجديد صحفية اسمها سحر من الدستور ومقيمة باسيوط قعدنا دردشنا حوالي 10 د في المواضيع الي مبنتكلمش الي فيها الا وهي الاخوان والكلام الحمضان اياه ، وبالفعل وصل الحسيني للحزب ومعاه جورج اسحاق وفي خلال 5 دقائق كان الحوار شبه بدأ عرفنا منه انه بقاله 3 ايام بيلف في الصعيد وراح اسوان والاقصر وسوهاج ولسه هنبتدي نتكلم في المهم فوجئنا بدخول اثنين رجالة معرفهمش واحد فيهم كان معاه شاكوش سلمواوقعدوا ولسه هنكمل الكلام لقينا واحد فينا بيقول هو الحاج فاروق عارف اي بيحصل هنا ؟ وعرفت بعد كده ان الحاج فاروق ده امين الحزب في اسيوط ورد الحسيني علي الراجل ده وكلمه من هناوكلمه من هنا وفي خلال دقيقتين اتقلبت الاوضه الي كنا فيها لساحة حرب الحسيني بيزعق ويشتم الراجل والراجل ماسك كوباية وعايز يبطح الحسيني وجورج اسحاق يا عيني مزنوق في النص بيفك معانا الخناقة واستمرت الخناقة لمدة ربع ساعه لغاية لما هدي المتعاركين ووصل الدكتور أحمد ياسين رمضان رجل حزب العمل السابق وامين الحزب الناصري السابق والراجل الذي يحظي باحترام المعارضة كلها الدكتور احمد لقي الوضع كده فاخدنا كلناومعاناجورج اسحاق لبيته نكمل اللقاء هناك .

في الطريق دردشت مع الحسيني ومع الدكتور احمد حولين الي حصل وعرفت خلفيات الموضوع .

الموضوع ومافيه ان الدكتوراحمد كان امين الحزب الناصري باسيوط وحصلت مشاكل وامن الدولة ادخل في عمل الحزب واضطر الدكتوراحمد للاستقالة من من امانة الحزب ليتولي الامانه واحد اسمه الحاج فاروق وجه ومعاه طقم كله مخبرين في امن الدولة وبعد ماكان الحزب مقر للنشاط السياسي في اسيوط كلها ومقرلكفاية في اسيوط تحول لمكان ممكن تشرب فيه شاي بالكتير ، وبالغرم من كل ده رفض الحسيني معاه شوية من مجموعه الدكتور احمد الانسحاب ن الحزب وعشان ده حصل الي حصل .

من الخناقة الي شفتها ده عرفت ليه مفيش امل في الاحزاب المصرية وعرفت ايه سر الوكسة الي احنا فيها ده .

نسيبنا بقه من الوكسة ونرجع لاسحاق الجلسة معاه امتدت اكتر من 4 ساعات اتكلمنا فيها في حاجات كتير وعرفت منه حاجات كتير كان لازم اعرفها .

يمكن اهم الاجات الي عرفتها أن كفاية بدات تراجع اولوياتها في الشارع وصرح لينا جورج ان اهم القضايا الي هتتبناها كفاية في المرحلة الجاية هي قضايا التامين الصحي والتأمينات الاجتماعية وده يعتبر نوع من انواع التحول في اولويات كفاية بعد اهتمامهم لمدة سنة بالدستوروالقوانين .

الحاجه التانية كانت حولين قيادات كفاية والقلق الي حصل في كفاية السنة الي فاتت والي انتهي بتولي الدكتور يحي القزاز المنسق العام لكفاية . جورج اتكلم حولين قضايا كتير ومشاريع كتير بتفكر فيها كفاية في المستقبل .

وامابقه الكلام الي طلب جورج ان الصحفيين انهم ميكتبهوش وكان نتيجه كام سوال مني عن رايه في تحالف كفاية مع الاخوان والمراحل الي مر بيها من ايام مظاهرات القضاه ولحاد التعديلات الدستورية الي رفض الاخون فيها ينزلوا الشارع .

في النهية احب ااكد انه بالرغم من خلافاتي الكبيرة مع جورج اسحاق في الفكر الي اني اووكد ان اللقاء كان مفيد جداومهم جدا بالنسبة ليا .

شارك مع اصدقائك

Share |